Usa ka Nabahin nga Iglesya—Makalahutay ba Kini?

ANG tanang nagtuo sa makaluwas nga kamatuoran ni Kristo sakop sa makitang Iglesya. Ang mga pagkabahin sa Kakristiyanohan​—tali sa Silangan ug Kasadpan, ug tali sa Roma ug sa mga iglesya sa Repormasyon​—maoy mga pagkabahin sulod sa usa ka Iglesya.” (Christians in Communion) Mao kana ang pag-isip sa usa ka awtor sa Kristiyanidad​—ingong usa ka kaylap pagkakatag nga pamilya sa mga relihiyon, nga ang tanan nag-angkon ug usa ka matang sa pagtuo kang Jesu-Kristo.

Hinunoa, kana usa ka nabahin nga pamilya, nga adunay magkasumpaking mga pagtuo ug mga sukdanan sa panggawi. “Ang presenteng-adlaw nga Kristiyanidad . . . adunay mas ubos nga mga sukdanan alang sa pagkamembro sa simbahan kay niadtong sa pagsakay ug bus,” matud sa usa ka tigpaniid. Nan, sa unsang paagi marekonosir nato ang espirituwal nga kahimtang niini? Ang Katolikong obispo nga si Basil Butler mihinapos: “Ang usa ka nabahing Kristiyanidad masakiton gayod kaayo.” (The Church and Unity) Sa unsang paagi nagsugod ang balatian? Aduna bay paglaom nga maulian?

“Ang Tawo sa Kalapasan”

Si apostol Pablo nagpasidaan nga ang pagkabahinbahin mahitabo. Ngadto sa mga Kristohanon sa Tesalonica kinsa naghunahuna nga ang presensiya ni Kristo haduol na, siya misulat: “Ayaw tugoting may modaldal kaninyo sa bisan unsa mang paagi, tungod kay kini [adlaw ni Jehova] dili moabot gawas kon ang apostasya moabot una ug ang tawo sa kalapasan mapadayag, ang anak sa kalaglagan.”​—2 Tesalonica 2:3.

Kining “tawo sa kalapasan” nagpailaila sa apostasiya ug rebelyon ngadto sa Kristohanong kongregasyon. Kinsa siya? Dili indibiduwal nga tawo kondili, hinunoa, ang klerong matang sa Kakristiyanohan. Kining maong matang nagtuboy sa kaugalingon ibabaw sa apostatang kongregasyon wala madugay human sa kamatayon sa mga apostol ni Jesus, ug ngadtongadto nagtudlo sa paganong mga pilosopiya, sama sa Trinidad ug sa pagkadili-mamatay sa tawhanong kalag. (Buhat 20:29, 30; 2 Pedro 2:1-3) Sama sa usa ka makamatayng kagaw, nataptan niini ang nag-angkong Kristohanong kongregasyon nga may inspirado-sa-demonyong mga ideya nga seguradong motultol ngadto sa pagkabahinbahin.​—Galacia 5:7-10.

Ang pagtakod nagsugod na sa adlaw ni apostol Pablo. Siya misulat: “Matuod, ang misteryo niini nga kalapasan nagalihok na; apan hangtod lamang nga siya kinsa karon mismo nagalihok ingong pugong makuha na sa agianan.” (2 Tesalonica 2:7) Ang mga apostol milihok ingong pugong batok sa hilo sa apostasiya. Sa dihang ang ilang makapahiusang impluwensiya nakuha, ang wala-mapugnging apostasiya mikaylap samag gangrena.​—1 Timoteo 4:1-3; 2 Timoteo 2:16-18.

Ang mga kalihokan niining “tawo sa kalapasan” nagpadayon nga wala mamenosi. Sa usa ka bag-ohayng taho bahin sa “usa ka iglesya nga gisakit sa seksuwal ug teolohikal nga paagi,” usa ka pangulong diyakono sa Iglesya sa Inglaterra gikutlo nga nagreklamo: “Ang mga sugyot nga nag-awhag sa klero nga dili moapil sa seksuwal nga kalihokan gawas sa kaminyoon gisalikway. Ang aktibong mga homoseksuwal giordinahan. Gihimo nilang maayo ang daotan ug ang daotan gihimong maayo.”​—The Sunday Times Magazine, London, Nobyembre 22, 1992.

Trigo ug mga Bunglayon

Si Jesu-Kristo mismo nagtudlo nga ang matuod nga Kristiyanidad temporaryong mahanaw. Miingon siya nga ang pagkatukod sa Kristohanong kongregasyon sama sa usa ka tawo nga nagsabod ug maayong binhi sa iyang uma. Apan, matud ni Jesus, “miabot ang iyang kaaway ug misapaw sa pagpugas ug mga bunglayon diha sa mga trigo.” Sa dihang ang iyang mga ulipon nangutana kon sulayan ba nila pag-ibot ang mga bunglayon, ang tag-iya sa uma miingon: “Dili; aron walay purohan, nga samtang manguha sa mga bunglayon, inyong maibot ang trigo uban kanila.” Unsa ka dugay nga magpadayon kining panagsagol sa trigo ug mga bunglayon? Ang tag-iya sa uma miingon: “Pasagdi nga pareho kining manubo hangtod sa ting-ani.”​—Mateo 13:25, 29, 30.

Hangtod sa “ting-ani,” o panahon sa paglain sulod sa kataposang mga adlaw sa “sistema sa mga butang,” ang mini nga mga Kristohanon midungan ug tubo sa matuod nga mga Kristohanon. (Mateo 28:20) Si Satanas nga Yawa naggamit sa mga apostata sa pagpatungha ug usa ka dunot ug nabahin mining Kristohanong kongregasyon. (Mateo 13:36-39) Sila nagpatungha ug makauulawng sinundog sa matuod nga Kristiyanidad. (2 Corinto 11:3, 13-15; Colosas 2:8) Samtang ang iglesya natipaktipak latas sa kasiglohan, nahimong mas lisod ang pag-ila sa matuod nga mga Kristohanon.

Bag-ong mga Tipak

Sa mas bag-ong kapanahonan, matud sa The Testing of the Churches​—1932-1982, “ang [b]ag-ong mga tipak mitungha, ilabina ang kalihokan nga karismatik, nga may pasiugda sa personal nga pagtuo ug kasinatian.” Makaiikag, ang pipila nakasabot sa natawo pag-usab, karismatik nga mga kalihokan ingong mga ilhanan sa espirituwal nga pagkanahigmata inay bag-ong mga tipak. Pananglitan, ang Amihanang Irlandia nakasinati sa maong pagkanahigmata sa katuigang 1850. Dihay hilabihang mga pagdahom. Ang usa ka taho naghisgot bahin sa “inigsoong panaghiusa . . . taliwala sa Presbiteriano, Wesleyan, ug Independenteng mga pastor” ug miingon nga “ang matag adlaw nagdala ug bag-ong mga taho bahin sa mga pagpunaw, pagkatulog, panan-awon, damgo ug mga milagro.”​—Religious Revivals.

Daghan ang nakasabot niining maukyabong mga kapahayagan ingong pamatuod sa espiritu sa Diyos nga nagalihok aron sa pagpamata sa iyang iglesya. “Ang iglesya sa Diyos,” matud sa usa ka tigpaniid, “sa kinatas-ang diwa niini nakamata dinhi niining mga distritoha.” Hinunoa, bisan pag kining linaing pagkanahigmata gimantala ingong “usa ka mahimayaon ug dili-hitupngang yugto sa relihiyosong kasaysayan sa Ulster,” kini ug ang ubang pagkanahigmata nga sama niini wala makapatunghag relihiyosong pagkahiusa taliwala niadtong nag-angkon ug espirituwal nga pagkatawo pag-usab.

Ang maong mga tawo moergo nga sila nahiusa sa labing hinungdanon ug pasukaranang mga butang. Apan mao gihapon kini ang katarongan nga gigamit sa uban sa Kakristiyanohan, kinsa nangatarongan nga “ang naghiusa sa mga Kristohanon labi pang hinungdanon karon kay sa mga butang nga nagbahin gihapon kanila.” (The Church and Unity) Miangkon ang Kakristiyanohan: “Ang atong sukaranang panaghiusa sa usag usa ug uban sa tanan natong isigka-Kristohanon nagsukad sa atong bawtismo diha kang Kristo.” (Christians in Communion) Apan ang pag-ingon nga ang mga pagkabahin dili-hinungdanon tungod kay parehong nagtuo kang Jesus maoy sama sa pag-ingon nga ang kanser dili peligro basta lig-on ang imong kasingkasing.

Ang kamatuoran mao nga ang maong modernong relihiyosong mga kalihokan nakadugang sa kalibog ug nakapatunghag espirituwal nga anarkiya samtang ang madanihong mga magtutudlo nagtigom ug mga sumusunod alang sa ilang kaugalingon. Si Jim Jones ug David Koresh maoy bag-ong mga pananglitan sa espirituwal nga mga lider kinsa naglimbong sa linibo. (Mateo 15:14) Usa ka pastor sa Baptist maoy pangunang membro sa Ku Klux Klan. Gilangkit niya ang iyang kampaniya alang sa pagkalabaw sa puti uban sa usa ka relihiyosong pagkanahigmata ug nag-ingon nga kadtong moapil niana “pagahatagan ug kusog nga giniyahan nga balaanon, nga pagahatagan ug kaisog Niya kinsa namatay sa Kalbaryo [Jesu-Kristo].”

Komosta ang gituohang mga milagro, ang gamhanang mga buhat, ug ang mga ilhanan nga gihimo sa ngalan ni Jesus? Hinumdomi ang kusganong pasidaan ni Jesu-Kristo nga, dili lamang kadtong nag-ingong “Ginoo, Ginoo” ang makabaton sa iyang pag-uyon, kondili, hinuon, ‘kadtong magabuhat sa kabubut-on sa iyang Amahan.’ Daghan karong adlawa ang wala gani masayod sa ngalan sa iyang Amahan, si Jehova. Si Jesus nagpasidaan niadtong ‘magpagawas ug mga demonyo sa iyang ngalan, ug maghimog gamhanang mga buhat sa iyang ngalan’ apan maoy “mga mamumuhat sa kalapasan.”​—Mateo 7:21-23.

“Gumula Kamo Kaniya Katawhan Ko”

Unsa ang kalaoman sa pagkaayo sa masakitong Kakristiyanohan? Dili gayod maayo. Nan, sundon ba nato ang tambag sa Katolikong obispo nga si Butler, nga “moanib [sa iglesya] nga walay langan ug motabang sa padayong ‘pagputli’ kaniya gikan sa iyang mga membro”? Dili! Ang nabahin ug mabahinbahinong Kakristiyanohan dili molahutay. (Marcos 3:24, 25) Siya maoy bahin sa usa ka kalibotang empiryo sa bakak nga relihiyon nga gitawag ug Dakong Babilonya. (Pinadayag 18:2, 3) Kining sad-an sa dugo nga relihiyosong sistema nag-atubang sa haduol nang kalaglagan diha sa kamot sa Diyos.

Ang Bibliya wala magsugyot nga ang tinuod nga mga Kristohanon magpabilin sulod niining daotan relihiyosong organisasyon ug mosulay sa pagbag-o kaniya gikan sa sulod. Hinunoa, kini nagtambag: “Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak. Kay ang iyang mga sala nagtipun-og sangko sa langit, ug nahinumdoman sa Diyos ang iyang inhustisya nga mga buhat.”​—Pinadayag 18:4, 5.

“Gumula” paingon sa unsang dapit? Hinumdomi, si Jesus misaad nga sa panahon sa ting-ani, ang matuod nga mga Kristohanon pagatigomon pag-usab ngadto sa tibuok kalibotang panaghiusa. Gitagna usab ni propetang Miqueas ang maong pagtigom pag-usab niining mga pulonga: “Hiusahon ko sila, ingon sa mga karnero diha sa toril.” (Miqueas 2:12) Nahitabo na ba kini?

Oo! ang matuod nga mga Kristohanon ginatigom na karon ngadto sa usa ka nahiusang panag-igsoonay sa tibuok yuta. Kinsa sila? Sila mao ang Kristohanong kongregasyon sa mga Saksi ni Jehova, kinsa nahiusang nagmantala sa maayong balita mahitungod sa Gingharian sa Diyos sa 231 ka kayutaan. Gisalikway nila ang makapabahing mga pagtulon-an sa Kakristiyanohan ug naningkamot sa pagsimba sa Diyos sumala sa kamatuoran sa iyang Pulong.​—Juan 8:31, 32; 17:17.

Ikaw mainitong giabiabi sa pagpakigsulti kanila. Kon buot kang masayod ug dugang pa bahin sa mga Saksi ni Jehova, palihog kontaka sila sa lokal o pinaagi sa tukmang adres sa panid 2 niining magasina.

[Hulagway sa panid 7]

“Nahinumdoman sa Diyos ang iyang inhustisya nga mga buhat”