Usa ka Nabahin nga Iglesya—Unsa ka Grabe Kini?
“SAMA sa usa ka dako ug nakugang nga pamilya, nga nagpuyo sa usa ka gubaon karaang balay kansang atubang nga bungbong kalit lang nga nahugno, daw nagpadayon ang panag-away diha sa halos tanang lawak—uban sa nanagtambol nga mga anak ni Jesus nga nanagsinggit ngadto sa eleganteng Anglo-Katolikong mga homoseksuwal nga nagsul-ob ug itom sidang terno.”—The Sunday Times, London, Abril 11, 1993.
Kining pamilyaha mao ang Iglesya sa Inglaterra. Ang panag-away maoy bahin sa pagdawat sa mga babaye ngadto sa pagkapari. Ang tin-awng paghubit sa hilabihang pagkabahin mapadapat usab sa tibuok Kakristiyanohan. Kay ang mga patriarka sa Ortodoksong Simbahan ug ang papa nagsaway sa desisyon nga tugotan ang mga babaye nga mahimong mga pari, ang kinatibuk-ang resulta, usa ka taho mihinapos, mao nga “ang damgo sa pagkahiusa pag-usab sa ubang bahin sa Kakristiyanohan labi pang nagakalayo sukad masukad.”
Unsa ka Dako ang Pagkabahin sa Iglesya?
Ingon sa atong mabasa sa Mateo 7:21, si Jesu-Kristo nag-ingon nga daghan ang moangkong nagtuo kaniya ingong Ginoo apan napakyas gihapon sa ‘pagbuhat sa kabubut-on sa iyang Amahan.’ Ang magasing Maclean’s nag-ingon: “Ang mga magbabasa sa Mateo nga nangita ug kaluwasan mahimong mapasaylo tungod kay nalibog kon unsa gayod ang kabubut-on sa Diyos, sa dihang ang mga Kristohanon, ug ilang mga iglesya, managkalahi kaayo bahin sa maong suliran.” Human sa surbi taliwala sa mga Canadiano, kana naghinapos nga adunay “dakong kalainan sa mga pagtuo ug mga tulomanon sa Canadianong mga Kristohanon—sa pagkatinuod, mas daghang kalainan taliwala sa mga membro sa bisan unsang denominasyon kay sa tali sa mga denominasyon mismo.”
Sumala sa surbi niini, 91 porsiento sa mga Katoliko mouyon sa paggamit sa artipisyal nga pagpugong sa pagpanganak bisan tuod gisaway kana sa ilang simbahan; 78 porsiento naghunahuna nga ang mga babaye kinahanglang tugotan nga mahimong mga pari; ug 41 porsiento ang modawat sa aborsiyon “sa pipila ka kahimtang.” Ang dili-panag-uyonay sulod sa lainlaing mga denominasyon bahin sa “daghang teolohikanhong mga pangutana,” ang Maclean’s nag-ingon, “nagpasiugda sa mga pagkabahin nga nagbungkag sa pangunang mga iglesya.”
Dobleng mga Sukdanan
Ang dobleng mga sukdanan maingon man ang nagkasumpaking mga sukdanan naglungtad bahin sa pamatasan. Ang pipila nag-angkong nagbayaw sa mga prinsipyo sa Bibliya, apan ang uban nagtamay niini. Pananglitan, ang seremonyas ba sa “kasal” nga gihimo alang sa duha ka Lesbiyan sa Metropolitan Church sa Toronto uyon sa kabubut-on sa Diyos? Ang kinasal dayag nga nagtuong uyon kadto. “Buot namong saulogon ang among gugma atubangan sa publiko ug sa Diyos,” sila miingon.
Usa ka kolumnista nangutana kon sa unsang paagi ang “usa ka Katolikong arsobispo nga maoy gisumbongan sa sunodsunod nga mga reklamo, nagbalhin sa mga paring hilig makigsekso sa mga bata ngadto sa laing simbahan diin makahibalag pa silag dugang mga akolito.” Ang pari nga si Andrew Greeley misugyot nga gikan sa 2,000 hangtod sa 4,000 ka pari ang lagmit nag-among-among sa 100,000 ka menor de edad nga mga biktima, nga kasagaran diyutay ra ang nahimo bahin niana.
Ang usa ka wala-mahiusang iglesya nagpatunghag wala-mahiusang katawhan. Sa mga estado sa Balkan, ang Serbiano ug Kroasiano nga “mga Kristohanon” mibati nga si Kristo nagauban kanila sa ilang “matarong” nga gubat. Daghan ang nagkuwintas ug mga krusipiho diha sa gubat; ang usa, gikataho, “kanunayng nagtangag ug krusipiho sa dihang pintas kaayo ang pakigbugno.”
“Angayng Walay Panagkabahin Taliwala Kaninyo”
Tinuod, ang Bibliya nagtugyan sa pipila ka butang nganha sa konsensiya, apan kinahanglang dili kini maghatag ug kahigayonan sa maong pagkabahin. Si apostol Pablo tin-awng nag-ingon: “Kamong tanan kinahanglang magapamulong [ug magalihok] diha sa panag-uyon, ug . . . angayng walay panagkabahin taliwala kaninyo.”—1 Corinto 1:10; Efeso 4:15, 16.
Ang matinud-anong pagtan-aw sa “Kristiyanidad” mga duha ka libo ka tuig human gisulat ni apostol Pablo kadtong mga pulonga nagpatunghag pipila ka ugdang kaayong mga pangutana. Nganong ang “mga Kristohanon” nabahin pag-ayo? Ang mao bang nabahing iglesya makalahutay? Aduna ba gayod unyay nahiusang Kakristiyanohan? Ang mosunod nga artikulo magkonsiderar niining pangutanaha.
[Hulagway sa panid 3]
Demonstrasyon sa mga pari batok sa aborsiyon
[Credit Line]
Hapin ug itaas: Eleftherios/Sipa Press