Haing Lamesaha Ka Nagakaon?
“Dili kamo mahimong magaambit sa ‘lamesa ni Jehova’ ug sa lamesa sa mga demonyo.”—1 CORINTO 10:21.
1. Unsang mga lamesaha ang giandam sa atong atubangan, ug unsang pasidaan ang gihatag ni apostol Pablo mahitungod niana nila?
KINING inspiradong mga pulong ni apostol Pablo nagpakita nga duha ka masambingayong mga lamesa ang ginaandam atubangan sa katawhan. Ang matag lamesa mailhan pinaagi sa matang sa simbolikong pagkaon nga gibutang ibabaw niana, ug kitang tanan nagakaon sa usa o sa laing lamesa. Bisan pa, kon buot natong pahimut-an ang Diyos, dili mahimo nga kita magakaon diha sa iyang lamesa ug sa samang panahon magkutimkutim diha sa lamesa sa mga demonyo. Mipasidaan si apostol Pablo: “Ang mga butang nga ginahalad sa mga nasod ilang ginahalad ngadto sa mga demonyo, ug dili ngadto sa Diyos; ug dili ko buot nga kamo mahimong mga mag-aambit sa mga demonyo. Dili kamo mahimong magainom sa kopa ni Jehova ug sa kopa sa mga demonyo; dili kamo mahimong magaambit sa ‘lamesa ni Jehova’ ug sa lamesa sa mga demonyo.”—1 Corinto 10:20, 21.
2. (a) Unsang lamesa ni Jehova ang naglungtad sa mga adlaw sa karaang Israel, ug kinsay miambit sa giambitang mga halad? (b) Unsay kahulogan karong adlawa sa pag-ambit sa lamesa ni Jehova?
2 Ang mga pulong ni Pablo magpahinumdom kanato sa giambitang mga halad nga gihalad sa karaang mga Israelinhon ubos sa Kasugoan ni Jehova. Ang halaran sa Diyos gitawag ug lamesa, ug ang usang nagdala sa hayop nga igahalad giingon nga may pakig-ambit uban kang Jehova ug sa mga saserdote. Sa unsang paagi? Nahauna, si Jehova nakig-ambit sa halad kay ang dugo giwisik ibabaw sa iyang halaran ug ang tambok giut-ot sa kalayo sa ilalom. Ikaduha, ang saserdote nakig-ambit sa pagkaaging siya (ug ang iyang pamilya) mingkaon sa inasal nga dughan ug tuong paa sa hayop nga gihalad. Ug ikatulo, ang naghalad nakig-ambit pinaagi sa pagkaon sa ubang bahin niana. (Levitico 7:11-36) Karong adlawa, ang pagpakig-ambit sa lamesa ni Jehova nagkahulogan nga atong ihatag kaniya ang matang sa pagsimba nga iyang gipangayo, sumala sa gihatag nga sumbanan ni Jesus ug sa iyang mga apostol. Sa pagbuhat niini, kita kinahanglang mokaon sa espirituwal nga paagi sa gitagana ni Jehova pinaagi sa iyang Pulong ug organisasyon. Ang mga Israelinhon, kinsa nagpahimulos ug linain nga pakig-ambit uban kang Jehova diha sa iyang lamesa, gidid-an sa pagtanyag ug mga halad ngadto sa mga demonyo diha sa ilang lamesa. Ang espirituwal nga mga Israelinhon ug ang kauban nilang “ubang mga karnero” nailalom sa samang balaanong pagdili.—Juan 10:16.
3. Sa unsang paagi ang usa mahimong sad-an sa pag-ambit sa lamesa sa mga demonyo sa atong adlaw?
3 Sa unsang paagi ang usa mahimong sad-an sa pagpakig-ambit sa lamesa sa mga demonyo sa atong adlaw? Pinaagi sa pagpasiugda sa bisan unsa nga supak kang Jehova. Ang lamesa sa mga demonyo naglakip sa tanang propagandang demonyohanon, nga gilaraw aron paglimbong ug pagpatalikod kanato gikan kang Jehova. Kinsa ba ang gusto nga magpakaon sa maong hilo sa iyang kasingkasing ug kaisipan? Ang matuod nga mga Kristohanon modumiling magpakig-ambit sa mga halad nga gihalad karon ngadto sa mga diyos sa gubat ug sa bahandi.—Mateo 6:24.
Paglikay sa “Lamesa sa mga Demonyo”
4. Unsang pangutana ang giatubang natong tanan, ug nganong sa tinuyo dili nato buot moambit sa lamesa sa mga demonyo?
4 Ang pangutanang giatubang natong tanan mao, Haing lamesaha ba ako nagakaon? Dili kita makalikay sa kamatuoran nga kita obligadong mokaon sa usa o sa laing lamesa. (Itandi ang Mateo 12:30.) Dili nato gusto nga sa tinuyo makig-ambit sa lamesa sa mga demonyo. Ang pagbuhat niana magpahinabo nga kita mawad-an sa pag-uyon sa bugtong matuod ug buhing Diyos, si Jehova. Sa laing bahin, ang pagpakig-ambit sa pagkaon diha lamang sa lamesa ni Jehova motultol sa atong walay-kataposang kinabuhi diha sa kalipay! (Juan 17:3) Adunay panultihon nga ang usa ka tawo mao siya sumala sa gikaon niya. Nan, si bisan kinsang buot maghupot ug maayong panglawas ug panghunahuna kinahanglang magbantay sa iyang diyeta. Maingon nga ang daghag-tambok way-sustansiyang pagkaon, bisan pag lamiang pagkaluto uban sa kemikal nga mga aditibo, dili makatabang sa atong padayong maayong panglawas, ang propaganda usab niining kalibotana nga sinaktag mga ideyang demonyohanon maoy dili-maayo masambingayong way-sustansiyang pagkaon nga magdaot sa atong mga kaisipan.
5. Sa unsang paagi makalikay kita sa pagdawat ug demonyohanong mga pagtulon-an karong adlawa?
5 Si apostol Pablo mitagna nga sa kataposang mga adlaw, ang katawhan mapahisalaag pinaagi sa “mga pagtulon-an sa mga demonyo.” (1 Timoteo 4:1) Dili lamang nga kanang demonyohanong mga pagtulon-an makaplagan diha sa bakak relihiyosong mga tinuohan kondili sila kaylap usab nga gisangyaw sa ubang mga paagi. Pananglitan, kinahanglang analisahon ug timbangtimbangon nato kon unsang mga libro ug mga magasin ang gibasa nato ug sa atong mga anak, kon unsang mga salida sa telebisyon ang atong gitan-aw, ug kon unsang mga drama ug mga pelikula ang atong gitan-aw. (Proverbio 14:15) Kon kita nagbasag piksiyon alang sa kalingawan, kana ba nagpasiugdag binuang nga kapintasan, mahilayong sekso, o okultong mga buhat? Kon kita nagbasag dili-piksiyon aron matudloan, kana ba nagpatin-aw sa usa ka pilosopiya o dalan sa kinabuhi nga “dili sumala kang Kristo”? (Colosas 2:8) Gipadayag ba ang way-kapuslanang mga pangagpas, o gipasiugda ba ang pakiglangkit sa kalibotanong sosyal nga mga kalihokan? Nagpalambo ba kana sa determinasyon nga mahimong bahandianon kaayo? (1 Timoteo 6:9) Kana ba usa ka basahon nga sa kamalalangon nagpahayag ug dili-makapahiusang mga pagtulon-ang dili gayod Kristohanon? Kon ang tubag maoy oo ug atong ipadayon ang pagbasa o pagtan-aw sa maong materyal, may kapeligrohan nga kita nagapakig-ambit sa lamesa sa mga demonyo. Karong adlawa, adunay ginatos ka libong basahon nga nagpasiugdag kalibotanong mga pilosopiya nga morag nalamdagan kaayo ug moderno. (Ecclesiastes 12:12) Apan ang maong propaganda dili gayod bag-o; ni kana mosangpot sa kaayohan ug kauswagan sa usa, sama ra nga ang malalangong gipamulong ni Satanas ngadto kang Eva wala mosangpot sa iyang kauswagan.—2 Corinto 11:3.
6. Sa dihang si Satanas modapit kanato sa pagtilaw sa iyang demonyohanon way-sustansiyang pagkaon, sa pagkamatuod, sa unsang paagi kita angay mosanong?
6 Busa, sa dihang dapiton kita ni Satanas nga motilaw sa iyang demonyohanon way-sustansiyang pagkaon, unsay angay natong sanong? Sama sa gibuhat ni Jesus sa dihang gitental siya ni Satanas nga himoong tinapay ang mga bato. Si Jesus mitubag: “Kini nahisulat, ‘Ang tawo mabuhi, dili sa tinapay lamang, apan sa matag pamulong nga nagagula sa baba ni Jehova.’” Ug sa dihang ang Yawa mitanyag kang Jesus sa “tanang gingharian sa kalibotan ug ang ilang himaya” kon siya mohapa ug mohimog usa ka buhat sa pagsimba kang Satanas, si Jesus mitubag: “Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon, ug kaniya lamang ikaw magahatag ug sagradong pag-alagad.’”—Mateo 4:3, 4, 8-10.
7. Nganong ginalimbongan nato ang atong kaugalingon kon kita maghunahuna nga kita malamposong makakaon diha sa lamesa ni Jehova ug sa lamesa sa mga demonyo?
7 Ang lamesa ni Jehova ug ang lamesa nga giandam sa iyang demonyohanong mga kaaway dili gayod magkauyon! Ay, oo, gisulayan na kana sa nangagi. Hinumdomi ang karaang mga Israelinhon sa mga adlaw ni propetang Elias. Ang katawhan miangkon nga nagsimba kang Jehova, apan sila nagtuo nga ang ubang mga diyos, sama kang Baal, misaad ug kauswagan. Giduol ni Elias ang katawhan ug miingon: “Hangtod kanus-a ba kamo magakiangkiang diha sa duha ka magkalaing mga hunahuna? Kon si Jehova mao ang matuod nga Diyos, sumunod kamo kaniya; apan kon si Baal, sumunod kamo kaniya.” Dili ikalimod, ang mga Israelinhon nagkiangkiang “sa sinugdan sa usa ka tiil unya sa lain.” (1 Hari 18:21; The Jerusalem Bible) Gihagit ni Elias ang mga saserdote ni Baal nga pamatud-an ang pagkadiyos sa ilang diyosdiyos. Ang Diyos nga makapadalag kalayo gikan sa langit ibabaw sa usa ka halad magpamatuod nga mao ang matuod nga Diyos. Bisan pa sa dakong paningkamot, ang mga saserdote ni Baal napakyas. Dayon si Elias sa yano miampo: “Oh Jehova, tubaga ako, aron kining katawhan makaila unta nga ikaw, si Jehova, mao ang matuod nga Diyos.” Dihadiha ang kalayo gikan kang Jehova misidlit gikan sa langit ug gitilapan ang gibasa-sa-tubig nga halad nga hayop. Kay natandog sa makapatuo nga pasundayag sa pagkadiyos ni Jehova, ang katawhan misunod kang Elias ug mipatay sa tanang 450 ka propeta ni Baal. (1 Hari 18:24-40) Busa karong adlawa, kinahanglang ilhon nato si Jehova ingong matuod nga Diyos ug moliso gayod sa pagkaon diha lamang sa iyang lamesa kon wala pa nato kana mahimo.
‘Ang Matinumanong Ulipon’ Nag-alagad sa Lamesa ni Jehova
8. Unsang ulipon ang gitagna ni Jehova nga iyang gamiton sa pagpakaon sa iyang mga tinun-an sa espirituwal panahon sa iyang presensiya, ug kinsa man ang ulipon?
8 Ang Ginoong Jesu-Kristo mitagna nga panahon sa iyang presensiya ang “matinumanon ug maalamong ulipon” magtaganag espirituwal nga pagkaon alang sa iyang mga tinun-an: “Malipayon kanang ulipona kon ang iyang agalon sa pag-abot makakaplag kaniya nga nagabuhat sa ingon! Sa pagkamatuod ako magaingon kaninyo, Siya magatudlo kaniya ibabaw sa tanan niyang mga gipanag-iya.” (Mateo 24:45-47) Kining ulipona napamatud-an nga maoy, dili usa ka indibiduwal, kondili mao ang matang sa nagpahinungod, dinihogang mga Kristohanon. Ang maong matang nagbutang ibabaw sa lamesa ni Jehova sa labing lamiang espirituwal nga pagkaon alang sa dinihogang nahibilin ug sa “dakong panon.” Karon kapig upat ka milyon, ang dakong panon mibarog uban sa dinihogang nahibilin dapig sa unibersohanong pagkasoberano ni Jehova nga Diyos ug dapig sa iyang Gingharian nga pinaagi niana balaanon niya ang iyang balaang ngalan.—Pinadayag 7:9-17.
9. Unsang instrumento ang gigamit sa ulipon nga matang sa pagtaganag espirituwal nga pagkaon alang sa mga Saksi ni Jehova, ug sa unsang paagi ang ilang espirituwal nga pagpangombira matagnaong gibatbat?
9 Kining matinumanong ulipong matang naggamit sa Watch Tower Bible and Tract Society sa pagtaganag espirituwal nga pagkaon alang sa tanang Saksi ni Jehova. Samtang ang Kakristiyanohan ug ang ubang bahin niining sistema sa mga butang gigutom tungod sa kakulang sa mohatag-kinabuhing espirituwal nga pagkaon, ang katawhan ni Jehova nagakombira. (Amos 8:11) Kini maoy katumanan sa tagna sa Isaias 25:6: “Si Jehova sa mga panon magahimo alang sa tanang mga katawhan, niining bukira, sa usa ka kombira sa matambok nga mga pagkaon, sa usa ka kombira sa bino nga pinalugdang, sa matambok nga mga pagkaon nga puno sa utok, sa bino nga pinalugdang, nga sinala.” Sumala sa gipakita sa mga bersikulo 7 ug 8, kining kombiraha magpadayon sa walay kataposan. Pagkatalagsaon kining panalangin alang sa tanan diha sa makitang organisasyon ni Jehova karon, ug magpadayon kining talagsaong panalangin sa umaabot!
Pagbantay sa Makahilong Pagkaon Diha sa Lamesa sa mga Demonyo
10. (a) Unsang matang sa pagkaon ang gihatag sa daotang ulipong matang, ug unsay nakaaghat kanila? (b) Unsay pagtratar sa daotang ulipon nga matang sa kanhi kauban nilang mga ulipon?
10 Ang pagkaon sa lamesa sa mga demonyo maoy makahilo. Pananglitan, tagda ang pagkaong gipanghatag sa daotang ulipon nga matang ug sa mga apostata. Kini dili makapahimsog o makapalig-on; kini dili maayo. Kini dili mahimong maayo, kay ang mga apostata wala na magakaon diha sa lamesa ni Jehova. Ingong sangpotanan, ang bisan unsa nga ilang naugmad sa bag-ong personalidad nahanaw na. Ang nagapalihok kanila maoy, dili ang balaang espiritu, kondili ang masawayong kayugot. Sila natuphan sa usa lang ka tumong—ang pagdagmal sa kanhing kauban nilang mga ulipon, sumala sa gitagna ni Jesus.—Mateo 24:48, 49.
11. Unsay gisulat ni C. T. Russell bahin sa pagpili sa usa sa espirituwal nga pagkaon, ug giunsa niya pagbatbat kadtong mibiya sa lamesa ni Jehova?
11 Pananglitan, balik sa 1909, ang presidente niadto sa Watch Tower Society, si C. T. Russell, misulat mahitungod niadtong mingtalikod sa lamesa ni Jehova ug unya misugod pagdagmal sa kanhing kauban nilang mga ulipon. Ang The Watch Tower sa Oktubre 1, 1909, miingon: “Ang tanan nga mibulag sa Sosyedad ug sa buluhaton niini, inay mouswag sa ilang kaugalingon o makapalig-on sa uban diha sa pagtuo ug sa pag-ugmad sa mga bunga sa espiritu, maorag nagbuhat sa balit-ad—ang pagtinguha nga daoton ang Kawsa nga ilang gialagaran kaniadto, ug, uban sa kapin kun kulang kasaba, sa anam-anam miunlod ngadto sa pagkanahikalimtan, nga nagdaot lamang sa ilang kaugalingon ug sa ubang nahupong sa susamang mabingkilong espiritu. . . . Kon ang pipila naghunahunang makabaton silag ingon ka maayo o mas maayo nga pagkaon diha sa ubang mga lamesa, o nga sila makapatunghag ingon ka maayo o mas maayo sa ilang kaugalingon—ipahimo nila kana. . . . Apan samtang atong gitugotan ang uban nga moadto sa laing dapit ug sa tanang dapit aron mangitag pagkaon ug kahayag sa ilang katagbawan, katingad-anan, kadtong nahimong atong mga kontra misubay ug lahi kaayong dalan. Inay magpahayag sa maisogong tinamdan sa kalibotan, ‘Nakaplagan ko ang butang nga akong gusto; adiyos!’ sila nagpadayag ug kasuko, kamadinaoton, pagdumot, pakigbingkil, ‘mga buhat sa unod ug sa yawa’ sa sukod nga wala ipadayag sa kalibotanong mga tawo sumala sa atong nasayran. Sila daw nahupngan sa kabuang, sa Satanasnong kagaw. Pipila kanila moatake kanato ug unya mangangkon nga kita ang miatake. Sila andam mosulti ug mosulat sa mangil-ad nga mga bakak ug magpakaulaw ngadto sa pagbuhat sa kapintasan.”
12. (a) Sa unsang paagi gidagmalan sa mga apostata ang ilang kaubang mga ulipon? (b) Nganong peligroso ang pagbasa sa mga sinulat sa mga apostata tungod sa kamausisaon?
12 Oo, ang mga apostata nagpatik ug literatura nga naggamit sa mga pagtuis, mga katunga-kamatuoran, ug bug-os nga kabakakan. Sila mangabong pa sa mga kombensiyon sa Saksi, nga magtinguha sa paglit-ag sa mga di-mabinantayon. Busa, kuyaw nga butang nga tungod sa atong kamausisaon kita matukmod sa pagbasa sa maong mga panulat o sa pagpamati sa ilang mapasipad-anong mga sinultihan! Bisan pag wala kita tingali maghunahuna nga peligroso kini kanato sa personal, ang kapeligrohan nagpabilin. Ngano? Sa usa ka butang, pipila sa apostatang literatura nagpahayag ug kabakakan pinaagi sa “ulog-ulog nga sinultihan” ug “mini nga mga pulong.” (Roma 16:17, 18; 2 Pedro 2:3) Dili ba kini ang dahomon nimo gikan sa lamesa sa mga demonyo? Ug bisan pag ang mga apostata tingali mopahayag usab ug pila ka kamatuoran, kini kasagarang sabton sa laing paagi uban sa tumong nga ang uban mabira pahilayo sa lamesa ni Jehova. Ang ilang tanang panulat yanong mosaway ug modaot! Walay bisan unsa nga makapalig-on.
13, 14. Unsa ang mga bunga sa mga apostata ug sa ilang propaganda?
13 Si Jesus miingon: “Pinaagi sa ilang mga bunga mailhan ninyo sila.” (Mateo 7:16) Karon, unsa ba ang mga bunga sa mga apostata ug sa ilang mga basahon? Upat ka butang ang nagtimaan sa ilang propaganda. (1) Kaabtik. Ang Efeso 4:14 nag-ingon nga sila “malipatlipaton sa pagmugnag sayop.” (2) Magarbohong intelihensiya. (3) Kawalay gugma. (4) Pagkamalimbongon sa lainlaing mga dagway. Kini sila mao ang mga sangkap mismo sa pagkaon nga anaa sa lamesa sa mga demonyo, nga tanan niana gilaraw sa pagdaot sa pagtuo sa katawhan ni Jehova.
14 Ug adunay lain pang kinaiyahan. Ngadto sa unsa nga ang mga apostata mibalik? Sa daghang kahimtang, sila mibalik sa kangitngitan sa Kakristiyanohan ug sa mga doktrina niini, sama sa pagtuo nga ang tanang Kristohanon moadto sa langit. Dugang pa, ang kinabag-an wala na magbaton ug lig-ong Kasulatanhong baroganan mahitungod sa dugo, neyutralidad, ug sa panginahanglan sa pagsangyaw mahitungod sa Gingharian sa Diyos. Kita, hinunoa, nakalingkawas na sa Dakong Babilonya, ug dili na gayod nato buot nga mobalik niana. (Pinadayag 18:2, 4) Ingong maunongong mga alagad ni Jehova, nganong buot man nato bisan ang pagsil-ip sa propaganda nga gipagawas sa maong mga misalikway sa lamesa ni Jehova nga karon sa binaba nag-atake niadtong nagatabang kanato sa pagkaon sa “makapahimsog nga mga pulong”?—2 Timoteo 1:13.
15. Unsang prinsipyo sa Bibliya ang motabang nato sa pagsubay sa maalamong dalan sa dihang makabati kitag mga akusasyon sa mga apostata?
15 Ang pipila tingali mausisaon mahitungod sa mga akusasyon nga gihimo sa mga apostata. Apan kinahanglang ibutang nato sa kasingkasing ang prinsipyo sa Deuteronomio 12:30, 31. Dinhi si Jehova pinaagi ni Moises nagpasidaan sa mga Israelinhon kon unsay pagalikayan sa dihang ila nang mapalagpot ang paganong mga molupyo sa Yutang Saad. “Magbantay ka nga dili ka mabitik sa pagsunod kanila, tapos nga malaglag sila sa atubangan nimo, ug nga dili ka mangutana mahitungod sa ilang mga diyos, nga magaingon, ‘Sa unsang paagi kining mga nasora nag-alagad sa ilang mga diyos? Ug ako, oo, ako, mobuhat sa ingon.’ Dili ka magabuhat sa ingon ngadto kang Jehova nga imong Diyos.” Oo, si Jehova nga Diyos nasayod kon sa unsang paagi molihok ang tawhanong kamausisaon. Hinumdomi si Eva, ug usab ang asawa ni Lot! (Lucas 17:32; 1 Timoteo 2:14) Dili gayod nato pamation ang ginasulti o ginabuhat sa mga apostata. Hinunoa, magmapuliki kita sa pagpalig-on sa mga tawo ug pagkaon nga maunongon diha sa lamesa ni Jehova!
Lamesa Lamang ni Jehova ang Magpabilin
16. (a) Unsay mahitabo sa dili na madugay kang Satanas, sa iyang mga demonyo, ug sa masambingayong lamesa nga niana ang kanasoran sa kalibotan nagakaon? (b) Unsay mahitabo sa tanang tawo nga nagpadayon sa pagkaon diha sa lamesa sa mga demonyo?
16 Sa dili madugay, ang dakong kasakitan kalit nga moulbo, nga daling moabot sa tayuktok diha sa “gubat sa dakong adlaw sa Diyos nga Labing Gamhanan.” (Pinadayag 16:14, 16) Moabot kini sa kinatayuktokan samtang laglagon ni Jehova kining sistemaha sa mga butang ug ang masambingayong lamesa nga diha niana ang kanasoran sa kalibotan nagakaon. Pukanon usab ni Jehova ang tibuok dili-makitang organisasyon ni Satanas nga Yawa uban sa mga panon niini sa mga demonyo. Kadtong nagpadayon sa pagkaon sa espirituwal nga lamesa ni Satanas, ang lamesa sa mga demonyo, mapugos sa pagtambong sa usa ka literal nga pagpangaon, dili, dili ingong mga umalambit, kondili ingong pangunang dinulot—sa ilang kalaglagan!—Tan-awa ang Ezekiel 39:4; Pinadayag 19:17, 18.
17. Unsang mga panalangin ang moabot niadtong nagkaon diha lamang sa lamesa ni Jehova?
17 Lamesa lamang ni Jehova ang magpabilin. Kadtong sa pagkamapabilhon magakaon niana pagaluwason ug makapribilehiyo sa pagkaon dinha sa walay kataposan. Ang bisan unsang matang sa mga kanihit sa pagkaon dili na gayod mohulga kanila. (Salmo 67:6; 72:16) Sa hingpit nga panglawas sila mag-alagad kang Jehova nga Diyos diha sa Paraiso! Sa kataposan ang makapatandog nga mga pulong sa Pinadayag 21:4 sa pagkatahom matuman: “Iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang miagi na.” Kay wala na unyay pagsupak, ang unibersohanong pagkasoberano ni Jehova nga Diyos maglungtad na sa bisan asa hangtod sa kahangtoran samtang ang dili-matapos nga balaang pag-uyon ibubo sa nalukat nga katawhan nga nagapuyo sa Paraisong yuta. Aron maangkon ang maong ganti, ihukom natong tanan nga moambit diha lamang sa lamesa ni Jehova, nga nagaawas sa labing lamiang espirituwal nga pagkaon!
Unsay Imong Tubag?
◻ Sa unsang paagi makalikay kita nga mapahisalaag sa demonyohanong mga pagtulon-an?
◻ Nganong dili kita malamposong makakaon diha sa lamesa ni Jehova ug sa lamesa sa mga demonyo?
◻ Unsang matang sa pagkaon ang gihatag sa mga apostata?
◻ Nganong peligroso nga mahimong mausisaon sa mga akusasyon sa mga apostata?
◻ Unsa ang mga bunga sa mga apostata?
[Hulagway sa panid 10]
Ang lamesa ni Jehova nagaawas sa labing lamiang espirituwal nga pagkaon