Mga Pangutana Gikan sa mga Magbabasa

Sanglit si Jesus kaliwat man ni Jesse ug David, nganong gitawag siya nga “ang gamot” sa iyang mga katigulangang si Jesse ug David?

Ikaw sagad nagtuo labot sa gamot sa kahoy o tanom nga unang motungha sa punoan o sa mga sanga. Sa ingon daw si Jesse (o ang iyang anak nga si David) pagahisgotan nga mao ang gamot nga gikan niini si Jesus sa ulahi mitungha. Dugang pa, ang Isaias 11:10 nagtagna nga ang umaabot nga Mesiyas mao “ang gamot ni Jesse,” ug gipadapat sa Roma 15:12 kining tagnaa ngadto kang Jesu-Kristo. Sa ulahi ang Pinadayag 5:5 nagtawag kaniya nga “ang Leon nga maoy sa tribo ni Juda, ang gamot ni David.” Adunay mga katarongan niini nga mga ngalan.

Ang Bibliya kasagaran mogamit ug tanom, sama sa kahoy, sa masumbingayong paagi. Usahay kini maoy tungod sa kamatuoran nga samtang ang liso moturok ug motubo, ang mga gamot ang mougmad una pa sa mga sanga, sa ubang mga salingsing, o mga bunga nga gisuportaran sa mga gamot. Pananglitan, ang Isaias 37:31 mabasa: “Kadtong nakaikyas sa balay sa Juda, kadtong salin nga nabilin, manggamot paingon sa ubos ug mamunga paingon sa ibabaw.”​—Job 14:8, 9; Isaias 14:29.

Kon madaot ang gamot, bation sa nahibilin sa kahoy ang epekto. (Itandi ang Mateo 3:10; 13:16.) Busa, si Malaquias misulat: “‘Pagalamyon gayod sila sa adlaw nga moabot,’ nagaingon si Jehova sa mga panon, ‘aron nga walay mabilin kanila bisan gamot o sanga.’” (Malaquias 4:1) Ang kahulogan matin-aw​—bug-os nga pagputol. Ang mga ginikanan (mga gamot) pagaputlon, maingon man ang ilang mga anak (mga sanga).a Kini nagpasiugda sa kaakohan sa mga ginikanan ngadto sa ilang gagmayng kabataan; ang walay kataposang umaabot sa gagmayng kabataan ginatino sa baroganan sa ilang mga ginikanan atubangan sa Diyos.​—1 Corinto 7:14.

Ang pinulongan sa Isaias 37:31 ug Malaquias 4:1 nagagikan sa kamatuoran nga ang mga sanga (ug ang bunga diha sa mga salingsing) nagakuha sa ilang kinabuhi gikan sa gamot. Kini mao ang yawi sa pagsabot kon sa unsang paagi si Jesus mao ang “gamot ni Jesse” ug ang “gamot ni David.”

Sa unodnong paagi, si Jesse ug David mao ang katigulangan ni Jesus; sila mao ang mga gamot, siya mao ang salingsing o sanga. Ang Isaias 11:1 nag-ingon bahin sa umaabot nga Mesiyas: “Usa ka salingsing ang mogula gikan sa punoan ni Jesse; ug gikan sa iyang mga gamot mobunga ang sanga.” Sa susama, diha sa Pinadayag 22:16, gitawag ni Jesus ang iyang kaugalingon nga “ang kaliwat ni David.” Apan gitawag usab niya ang iyang kaugalingon nga “ang gamot ni David.” Ngano?

Usa ka paagi nga si Jesus mao ang “gamot” ni Jesse ug David mao nga pinaagi kaniya ang ilang linya sa kaliwat nagpabiling buhi. Walay tawo karong adlawa ang makapamatuod nga siya kaliwat sa banay ni Levi, Dan, o bisan ni Juda, apan kita makatino nga ang kaliwat ni Jesse ug David buhi gihapon tungod kay si Jesus buhi karon sa langit.​—Mateo 1:1-16; Roma 6:9.

Si Jesus nakadawat usab sa posisyon nga langitnong Hari. (Lucas 1:32, 33; 19:12, 15; 1 Corinto 15:25) Kini may kalabotan sa iyang relasyon bisan sa iyang mga katigulangan. Sa matagnaon, gitawag ni David si Jesus nga iyang Ginoo.​—Salmo 110:1; Buhat 2:34-36.

Sa kataposan, gihatagag gahom si Jesu-Kristo ingong Maghuhukom. Sa panahon sa umaabot nga Milenyo, ang mga kaayohan sa lukat ni Jesus ipaabot usab ngadto kang Jesse ug David. Ang ilang kinabuhi sa yuta unya magadepende kang Jesus, kinsa mag-alagad ingong ilang “Walay-Kataposang Amahan.”​—Isaias 9:6.

Busa, bisag naggikan si Jesus sa kaliwat ni Jesse ug David, ang gidangatan kaniya ug ang iyang pagahimoon pa nagpakuwalipikar kaniya nga pagatawgong “ang gamot ni Jesse” ug “ang gamot ni David.”

[Footnote]

[Picture Credit Line sa panid 31]

Pictorial Archive (Near Eastern History) Est.