Imong Relihiyon—Usa ka Barkong Dili Gayod Biyaan?
USA ka barko ang gimakmak sa unos. Ang tripulante, kinsa hugot nga nagapakigbisog sa pagluwas sa ilang sakyanan, nag-atubang sa usa ka dinalian nga desisyon: kon magpabilin sa pagsakay o mobiya sa barko ug luwason ang ilang kaugalingon. Nasayod ka ba nga kining makalilisang nga talan-awon gigamit ingong usa ka teolohikanhong ilustrasyon?
Ang mga teologo, ilabina ang Katolikong mga eskolar, sagad magtandi sa ilang simbahan ngadto sa usa ka barko nga nagasagubang sa usa ka bagyo. Sila moingon nga ang maong barko, nga si Jesus o si Pedro anaa sa timon, naghawas sa bugtong paagi sa kaluwasan. Ang baroganan sa klero mao, ‘Ayaw gayod pagbiya sa barko. Naagian na sa simbahan ang seryosong mga suliran sa nangagi, apan kini maoy usa ka barko nga nakalabang sa tanang bagyo sa kasaysayan.’ Ang uban moingon, ‘Nganong mobiya man niini? Unsa ang mga kapilian? Nganong dili magpabilin ug motabang sa paggiya niini paingon sa mas linaw nga katubigan?’
Sa pagpahiuyon nianang masambingayong pinulongan, daghang tawo, nga sakop sa tanang matang sa mga relihiyon, mangatarongan, ‘Nahibalo ako nga sa daghang butang sayop ang akong relihiyon, apan gilaoman nako nga mag-usab kini. Dili ko gusto nga mobiya niini. Gusto ko nga makabatog bahin sa pagtabang niini pagbuntog sa iyang mga suliran.’ Kining matanga sa pangatarongan tingali gidiktahan sa tim-os nga pagmahal sa relihiyon sa katigulangan sa usa o sa kahadlok nga “magluib” niini.
Usa ka pananglitan mao si Hans Küng, usa ka iladong Katolikong rebeldeng teologo, kinsa namalandong: “Angay bang mobiya ako sa barko sa panahon sa bagyo, nga magbiya sa mga kauban nako sa paglawig hangtod karon nga mosagubang sa kusog nga hangin, molimas sa tubig, ug tingali makigbisog pa gani aron maluwas?” Siya mitubag: “Dili ako mohunong sa akong pag-alagad sulod sa simbahan.” Ang laing kapilian mao “ang pagbulag sa maong simbahan, tungod sa kapakyasan niini, ilis sa gugma sa mas tag-as nga mga prinsipyo, ug tingali, aron mahimong mas tinuod nga mga Kristohanon.”—Die Hoffnung bewahren.
Apan ang usa ka tawo makapabilin bang nagsakay sa barko sa iyang kaugalingong simbahan sa paglaom nga ang Diyos, tungod sa iyang kaluoy, magtugot ug way-kinutobang yugto sa panahon aron magbag-o ang tanang relihiyon? Kini usa ka seryosong pangutana. Sumala sa gipaila sa ilustrasyon, ang dinaliang pagbiya sa usa ka nameligrong barko pinaagi sa pagsakay sa way-kasegurohang mga boteng pangsalbar maoy sama ra ka peligroso sa pagpabiling nagsakay sa talilunod nga barko. Maalamon ba nga magpabilin sa usa ka simbahan bisag unsay mahitabo, bisan unsay kahimtang niini? Unsang mga purohan sa reporma ang gitanyag sa mga relihiyon karong adlawa? Hangtod kanus-a nga ang Diyos magtugot kanila sa pagbuhat nga supak sa iyang kabubut-on?
[Picture Credit Line sa panid 3]
Chesnot/Sipa Press