Ang Hunahuna sa Bibliya

Ang Gugma nga Magpalig-on

NIADTONG 1978 ang maluhong barkong Queen Elizabeth 2 gimakmak sa usa ka kusog kaayong bagyo sa Amihanang Atlantiko. Ang mga balod nga sama ka taas sa napulo-ka-andanang tinukod napusgay diha sa barko, nga nagpaulpot-ulpot niini samag sungsong diha sa tubig. Nabuagsa ang muwebles ug mga pasahero samtang nagtuwangtuwang ang barko. Katingalahan, gagmay lang ang mga kadaot nga nahiagoman taliwala sa 1,200 ka pasahero. Ang maayong inhenyeriya, materyales, ug konstruksiyon nagpugong sa pagkabungkag sa barko.

Kasiglohan kanhi may laing barko nga gimakmak sa kusog nga bagyo. Si apostol Pablo ug 275 nga uban pa mao ang nagsakay. Kay nahadlok nga mabungkag ang barko tungod sa kusog nga bagyo, lagmit ang mga marinero nagpaagi ug “mga ayuda”​—mga kadena o mga pisi—​sa ilalom sa barko gikan sa usa ka kiliran ngadto sa lain aron mapalig-on ang mga tablang naglangkob sa kasko niadtong komersiyal nga barko. Ang tanang pasaherong sakay naluwas, bisan pag ang barko nalunod.​—Buhat, kapitulo 27.

Ang mga pagsulay sa kinabuhi usahay mopabati kanatong kita nagsakayg barko sa balorong dagat. Mahimong malumsan kita sa mga balod sa kabalaka, kahigawad, ug depresyon, nga sa bug-os magtigi sa atong gugma. Aron masagubang ang maong mga bagyo ug malikayan ang pagkalusno, atong gikinahanglan usab ang pipila ka ayuda.

Inigtungha sa mga Bagyo

Ang pagtuo ug paglahutay ni apostol Pablo nahitala gayod sa Bibliya. Siya naghago alang sa unang Kristohanong mga kongregasyon. (2 Corinto 11:24-28) Ang iyang mga nahimo sa buluhaton sa Ginoo tin-awng nagpamatuod sa iyang mainit nga gugma alang sa iyang mga silingan ug sa iyang lig-ong relasyon uban sa Diyos. Bisan pa niana, ang kinabuhi ni Pablo dili kay walay mga suliran. Sa literal ug masambingayong paagi, gisagubang sa apostol ang daghang bagyo.

Sa adlaw ni Pablo, sa dihang ang usa ka barko nakabagat ug kusog nga bagyo, ang kaluwasan sa mga pasahero ug sa barko nagdepende sa kahanas sa tripulante maingon man sa kalig-on sa barko. Matuod usab kana sa dihang nakabagat ang apostol ug masambingayong mga bagyo. Bisan pag nakasagubang si Pablo ug pisikal nga kawalad-on, pagkabilanggo, ug pagpaantos, ang kinagrabehang mga bagyo nga nagtigi sa iyang espirituwal ug emosyonal nga kalig-on ug iyang katakos nga magpadayon sa paghigugma naggikan sa sulod sa Kristohanong kongregasyon.

Pananglitan, si Pablo sa way-hunong nagbudlay sulod sa usa ka tuig ug tunga aron matukod ang kongregasyon sa siyudad sa Corinto. Tungod sa iyang mga kasinatian uban sa mga taga-Corinto iyang naugmad ang malumong mga pagbati alang sa panon. Gihisgotan pa gani ni Pablo ang iyang kaugalingon nga usa ka amahan alang kanila. (1 Corinto 4:15) Apan, bisan pa sa iyang rekord sa gugma ug paghago alang sa kongregasyon, ang pipila sa Corinto nagsulting mapasipad-anon bahin kang Pablo. (2 Corinto 10:10) Tungod sa iyang tanang pagsakripisyo-sa-kaugalingon, pagkamakapaguol gayod kadto!

Naunsa ba nga kadtong nakadawat sa way-tihiktihik nga gugma ni Pablo nahimo mang mapintason kaayo ug matamayon? Sa walay duhaduha gibati ni Pablo nga siya samag gikuniskunis, sama sa usa ka barkong gimakmak sa usa ka bagyo. Pagkasayon unta nga mohunong siya, nga mobating ang iyang nangaging mga paningkamot tanan nakawang, o nga magmayugtanon! Unsay nagpalig-on kang Pablo? Unsay mipugong kaniya sa pagkamabugnaw tungod sa kahiubos?

Ang Gugma nga Magpalig-on Kanato

Gitino ni Pablo diha sa mga kaisipan sa iyang mga magbabasa ang tinubdan sa iyang kalig-on ug iyang panukmod. Misulat siya: “Ang gugma nga iya sa Kristo nagatukmod kanamo.” (2 Corinto 5:14) Gipunting ni Pablo ang labaw nga tinubdan sa kalig-on ug panukmod. Ang matukmorong gahom mao “ang gugma nga iya sa Kristo.” Usa ka eskolar sa Bibliya mipahayag sa mosunod bahin sa maong kasulatan: “Si Pablo wala mag-ingon nga ang atong gugma alang kang Kristo magpalig-on kanato sa atong ministeryo . . . Kana maoy paghunong sa tungatunga. Ang atong gugma alang kang Kristo gihaling ug kanunayng gipasiga sa iyang gugma alang kanato.”​—Italiko amoa.

Ang gugma nga gipasundayag ni Kristo pinaagi sa pag-agom sa masakit nga kamatayon sa kahoy sa pagsakit​—nga sa ingon naghatag sa iyang hingpit tawhanong kinabuhi ingong lukat aron pagluwas sa tanang matinuohong katawhan​—nagtukmod, nagduso, ug nagpugos kang Pablo sa pagpadayon pag-alagad sa intereses ni Kristo ug sa kaigsoonan. Sa ingon, ang gugma ni Kristo maoy migahom kang Pablo, nga nagpugong kaniya gikan sa kahakog, ug naglimite sa iyang mga tumong nganha lamang sa pag-alagad sa Diyos ug sa mga isigkatawo.

Sa pagkatinuod, ang tinubdan sa panukmod luyo sa matinumanong dalan sa kinabuhi sa usa ka Kristohanon mao ang gugma ni Kristo. Kon nag-atubang kitag mga pagsulay nga makapaluya kanato sa lawasnon, emosyonal, ug sa espirituwal nga paagi, ang matukmorong gahom sa gugma ni Kristo makapaarang nato nga mosaylo sa punto diin ang usa nga nakulangan ug panukmod mahimong mohunong. Kini mohatag kanatog kusog sa paglahutay.

Dili kita makasalig sa atong di-hingpit nga mga emosyon sa paglig-on ug pagtukmod kanato. Ilabinang matuod kini inig-abot sa atong mga pagsulay ingong sangpotanan sa kahiubos o kabalaka. Sa laing bahin, ang gugma ni Kristo adunay gahom nga makapalig-on kanato sa atong ministeryo, nga magdasig ug magtukmod kanato, bisan pa sa personal natong pagsulay. Ang gugma ni Kristo makapaarang sa usa ka Kristohanon nga molahutay dili lamang lapaw sa mga pagdahom sa uban apan tingali bisan lapaw pa sa iya mismong mga pagdahom.

Dugang pa, sanglit ang gugma ni Kristo malungtaron man, ang epekto maoy walay kataposan. Kini usa ka matukmorong gahom nga dili matarog o matibhangan. “Ang gugma dili gayod mapakyas.” (1 Corinto 13:8) Tungod niini kita mopadayon pagsunod kaniya nga maunongon, bisan pag unsay mahitabo.

Ang emosyonal nga mga pagsulay mahimong kusganon nga makapalusno kanato. Busa, pagkabililhon nga kita magpalandong sa gugma nga gipasundayag ni Kristo alang kanato. Ang gugma ni Kristo magpalig-on kanato. Tungod sa iyang gugma malikayan ang pagkalunod sa atong pagtuo. (1 Timoteo 1:14-19) Dugang pa, ang gugma ni Kristo magtukmod kanato sa pagbuhat kutob sa atong maarangan sa paghimaya sa usa nga nagpaposible nga ang gugma ni Kristo ikapahayag, si Jehova nga Diyos.​—Roma 5:6-8.