Bukid nga “Naglihok”
SA KASADPAN sa Irlandia, ang talagsaong pormag-turotot nga Croagh Patrick nagbuntaog sa nag-alirong nga kabukiran. Matag tuig, sa kataposang Dominggo sa Hulyo, ang tumoy sa bukid daw naglihok sa dihang ang ingon ka daghan sa 30,000 ka tawo, batan-on ug tigulang, manungas sa kinatayuktokan (765 metros) sa tinuig nga pagduaw sa sagradong dapit.
Niining adlawa, ang mga pirigrino manungas ug modulhog sa agianan nga hiktin, libaongon, ug, usahay, peligroso. Sa pagkamatuod, ang kataposang bakilid (gibanabana nga 300 metros) titip kaayo ug haguka ang mga bato, nga naghimo sa pagtungas nga makuyaw ug makakapoy usab.
Ang uban manungas nga magtiniil, ug ang pipila manungas gani sa pila ka dapit nga nagluhod sa paglakaw. Sa karaang panahon, ang pagduaw sa sagradong dapit magsugod sa kangitngit sa kagabhion.
Nganong ang Croagh Patrick maoy usa ka hinungdanong eksperyensiya alang sa daghan?
Dugay Nang Nahimong Sagradong Dapit nga Duawon
Sa sayong bahin sa ika-limang siglo K.P., ang Romano Katolikong Simbahan nagpadala kang Patrick ingong misyonaryong obispo ngadto sa Irlandia. Ang iyang pangunang tumong mao ang pagkombirtir sa mga taga-Irlandia ngadto sa Kristiyanidad, ug sa katuigan sa iyang pagwali ug pagtrabaho taliwala sa katawhan, si Patrick napasidunggan nga maoy nagtukod sa pundasyon alang sa Katolikong Simbahan didto.
Ang iyang buluhaton nagdala kaniya sa daghang lokasyon sa tibuok nasod. Ang usa maoy sa kasadpan sa Irlandia diin, sumala sa pipila ka tinubdan, migugol siyag 40 ka adlaw ug gabii diha sa tumoy sa bukid nga ginganlan gikan sa iyang ngalan—Croagh Patrick (nagkahulogang “Bungtod ni Patrick”). Didto siya nagpuasa ug nag-ampo alang sa kalamposan sa iyang misyon.
Sa paglabay sa daghang tuig daghang sugilanon ang mitungha bahin sa iyang mga nahimo. Usa sa labing ilado mao nga samtang didto nianang bukira, gipuo ni Patrick ang tanang halas gikan sa Irlandia.
Ang tradisyon nagpatuo nga nagtukod siya ug usa ka gamayng simbahan sa tumoy sa bukid. Bisan tuod ang maong tinukod dugay nang nawala, ang orihinal nga pundasyon naglungtad gihapon, ug ang dapit ingon man ang bukid nahimong usa ka sagradong dapit nga ginaduaw sa daghang katuigan.
Mga Bahin sa Pagduaw sa Sagradong Dapit
Alang sa usa nga edaran na o sa usa nga wala maanad sa pagtungas sa bukid, ang pagtapos lamang sa 5 ka kilometros nga pagtungas ug pagdulhog nga luwas maoy usa na ka dakong kalamposan. Sa maayong mga dapit sa daplin sa agianan, andam ang mga tem alang sa emerhensiya sa pag-atiman sa lainlaing mga pagkasamad.
Adunay tulo ka dapit, o mga estasyon, ubay sa agianan diin ang mga pirigrino maghimog lainlaing mga tulumanon sa pagpenitensiya. Kini bug-os nga gipatin-aw diha sa paskinanan ug mga notisya sa pagsugod sa pagtungas.—Tan-awa ang kahon.
Nganong Manungas Sila?
Nganong daghan kaayo ang mihimo niining lisod nga pagduaw sa sagradong lugar? Nganong ang pipila mihimo pa niining paghingapin sa dihang sila manungas?
Aw, ang pipila nagtuo nga pinaagi sa pag-ampo sa panahon sa pagduaw sa sagradong lugar, ang ilang mga hangyo alang sa personal nga kaayohan dakog kalagmitan nga dunggon. Ang uban naghimo niana sa pangagpas nga pasayloon sa pipila ka kalapasan. Alang sa uban, kini maoy paagi sa pagpasalamat. Siyempre, daghan ang nangadto alang sa sosyal nga bahin niini. Usa ka awtoridad nag-ingon nga kini maoy ‘ekspresyon sa katilingbanhong espiritu ug katilingbanhong gugma.’ Nag-ingon usab siya nga ang pagtungas sa Croagh Patrick “maoy ilang paagi sa pagsunod sa mga lakang ni San Patrick ug sa pag-ila sa pagkautangan kaniya sa pagtuo.” Siya midugang nga, labing hinungdanon, ang pagtungas maoy “usa ka porma sa penitensiya tungod kay ang pisikal nga paghago nga nalangkit maoy usa ka tinuod nga buhat sa pagpenitensiya. Ang hinay nga pagtungas ngadto sa tayuktok maoy dugayng buhat sa paghinulsol.”
Usa ka tawo magarbohong nag-ingon nga siya nakatungas na ug 25 ka beses! Iya kanang gihimo, matud niya, “aron sa paghimog pila ka penitensiya!” Laing tawo yanong miingon, “Kon walay pag-antos, dili masantos!”
Bisan tuod dili kini kinahanglanon, daghan ang manungas sa bukid nga nagtiniil. Nganong gihimo nila kana? Una, ilang giisip ang dapit nga “sagrado” ug busa maghubo sa ilang mga sapatos. Ikaduha, uyon kini sa ilang tumong sa ‘paghimog diyutayng penitensiya.’ Kini usab ang hinungdan kon nganong ang pipila naghimo pa gani ug lainlaing mga buhat sa penitensiya nga nagluhod.
Napalihok sa Pag-apresyar sa Maglalalang
Apan komosta kon ang usa dili samag relihiyosong mga pagbati sa mga pirigrino nga nanungas sa maong espesyal nga adlaw? Uban sa maayong kahimtang sa panahon ug usa ka parisan sa lig-ong sapatos, ang bukid mahimong tungason sa bisan unsang panahon. Wala kami manungas sa adlaw sa dihang nanungas ang daghang nagaganayang pirigrino. Panahon sa among masubsob nga pagpamahulay, nakapamalandong kami bahin sa pagtungas mismo ug sa epekto niini ngadto sa daghan kaayo. Sa nagpalandong sa linibong pirigrino nga naghimo niining hago kaayo nga pagtungas ug paghimog lainlaing mga buhat sa pagpenitensiya, natukmod kami sa pagpangutana, ‘Mao ba kini ang gikinahanglan sa Diyos? Ang rituwal ba sa pagtungas o paglakaw libot sa pipila ka monumento samtang balikbalik nga magyamyam ug pangadyeon mas magpaduol kang bisan kinsa sa Diyos?’ Unsay ikasulti bahin sa tambag ni Jesus labot sa balikbalik nga mga pag-ampo diha sa Mateo 6:6, 7?
Dayag, kami wala manungas sa bukid aron masinati ang relihiyosong eksperyensiya. Apan, sa tinuod gibati namo nga mas nasuod sa atong Maglalalang tungod kay naapresyar namo ang iyang lalang, ang mga bukid sa tanang dapit ingong bahin sa mga kahibulongan sa yuta. Gikan sa tayuktok nakapahimulos kami sa klaro kaayong pagtan-aw sa maanindot nga talan-awon, nakakita pa gani sa yuta nga gitagboan sa Dagat Atlantiko. Ang gagmayng kaislahan nga nangidlapkidlap diha sa luok sa ubos namo sa usa ka kiliran lahi ra kaayo kon itandi sa bungdobungdo ug umaw nga bukirong dapit sa pikas kilid.
Namalandong kami sa tulo ka estasyon. Ang mga pulong ni Jesus mismo misantop sa hunahuna, sa dihang iyang gisultihan ang iyang matuod nga mga sumusunod: “Sa dihang mag-ampo, ayawg isulti ang samang mga butang nga pabalikbalik, maingon sa ginahimo sa katawhan sa kanasoran, kay sila nagahanduraw nga dunggon sila tungod sa paggamit nila ug daghang pulong.”—Mateo 6:7.
Nasabtan namo nga ang bukid nahimong bahin sa usa ka tradisyon nga nag-ulipon sa linibo ka tawo diha sa hago nga rituwal. Gipalandong namo kon unsa ka lahi kana kon itandi sa kagawasan nga gisulti ni apostol Juan sa dihang siya miingon: “Atong sundon ang iyang [sa Diyos] mga sugo; ug gani ang iyang mga sugo dili man mabug-at.”—1 Juan 5:3.
Nalingaw kami sa among pasiyo, lakip sa pagtungas sa Croagh Patrick. Nakapalihok kini kanamo sa pagtan-aw sa unahan ngadto sa panahon sa dihang ang tanang katawhan mapahigawas gikan sa dili-biblikanhong mga tradisyon ug makahimo sa pagsimba sa mahigugmaong Maglalalang sa yuta “uban sa espiritu ug kamatuoran.”—Juan 4:24.
[Kahon sa panid 27]
Pangunang mga Bahin sa Pagduaw sa Sagradong Dapit
Ang matag pirigrino nga motungas sa bukid sa Piyesta ni San Patrick o sulod sa walo ka adlaw nga piyesta, o sa bisan unsang panahon sa mga bulan sa Hunyo, Hulyo, Agosto ug Septiyembre, ug MANGADYE SA SULOD O SA DUOL SA KAPILYA alang sa mga katuyoan sa Papa mahimong makabaton ug indulhensiya plenaria sa kondisyon nga Mangumpisal ug Mangalawat diha sa Tayuktok o sulod sa semana.
ANG TRADISYONAL NGA MGA ESTASYON
Adunay tulo ka “estasyon” (1) Sa tiilan sa bukid o sa Leacht Benain, (2) Sa tayuktok, (3) Sa Roilig Muire, layolayog gamay padulhog sa Lecanvey [usa ka lungsod] nga kiliran sa bukid.
1ng Estasyon - LEACHT BENAIN
Ang pirigrino molakaw ug pito ka beses libot sa tinapok nga mga bato nga mangadye ug 7 ka Amahan Namo, 7 ka Maghimaya Ka Maria ug usa ka Mituo Ako
Ika-2ng Estasyon - ANG TAYUKTOK
(a) Ang pirigrino moluhod ug mangadye ug 7 ka Amahan Namo, 7 ka Maghimaya Ka Maria ug usa ka Mituo Ako
(b) Ang pirigrino mangadye duol sa Kapilya alang sa mga katuyoan sa Papa
(c) Ang pirigrino molibot ug 15 ka beses sa Kapilya ug mangadye ug 15 ka Amahan Namo, 15 ka Maghimaya Ka Maria ug usa ka Mituo Ako
(d) Ang pirigrino molibot ug 7 ka beses sa Leaba Phadraig [Katre ni Patrick] nga mangadye ug 7 ka Amahan Namo, 7 ka Maghimaya Ka Maria ug usa ka Mituo Ako
Ika-3ng Estasyon - ROILIG MUIRE
Ang pirigrino molibot ug 7 ka beses sa matag tinapok nga mga bato nga mangadye ug 7 ka Amahan Namo, 7 ka Maghimaya Ka Maria ug usa ka Mituo Ako sa matag bungtod [adunay tulo ka bungtod] ug sa kataposan molibot sa tibuok kinoralang dapit sa Roilig Muire nga nagapangadye ug 7 ka beses.