Hangtod Kanus-a Kinahanglang Maghulat ang Kabos?

“Kon ang usa ka may-kagawasang katilingban dili makatabang sa daghan nga kabos, kini dili makaluwas sa diyutay nga bahandianon.”​—John F. Kennedy.

“GUSTO ko nga ang ugma-damlag magmasanagon alang sa tanan​—walay kakabos, walay matulog sa parke, usa ka paraiso!” Kanay gipamulong sa usa ka 12-anyos nga batang lalaki nga taga-São Paulo, Brazil. Apan posible ba nga mapapas ang kakabos? Hangtod kanus-a kinahanglang maghulat ang kabos?

Ang pipila mag-isip nga sila kabos tungod kay dili sila makapalit sa mga butang nga gusto nila. Apan, palandonga ang makapasubong kahimtang niadtong tinuod nga nag-antos sa kakabos. Mahanduraw mo ba ang tumang kalisdanan ug kasub-anan nianang mga tawhana? Ang pipila kinahanglang makig-indig sa mga kanaway ug sa mga ilaga, samtang sila manguykoy sa mga basurahan nga nangitag pagkaon! Hangtod kanus-a ang maong kakabos magsakit sa katawhan? Ang pangaliyupo ni Federico Mayor, direktor-heneral sa UNESCO (United Nations Educational, Scientific, and Cultural Organization), maoy haom: “Atong biyaan kanang kaduhaduhaang pagkamatugoton nga nagtugot kanato nga tugotan ang dili-matugotan​—ang kakabos, kagutmanan ug pag-antos sa milyonmilyong tawo.”

Matuman ba ang pangandoy sa pagkamaayog kahimtang sa tanang tawo? Unsa ang paglaom sa kabos?

Unsa ang Kahigayonan Alang sa Kabos?

Gisugyot sa maayog-tuyo nga mga lider ang mas daghang trabaho, mas maayong mga suweldo, mas maayong mga programa sa sosyal nga seguridad, ug reporma sa yuta. Tingali sila uyon sa kanhing presidente sa T.B. nga si John F. Kennedy: “Kon ang usa ka may-kagawasang katilingban dili makatabang sa daghan nga kabos, kini dili makaluwas sa diyutay nga bahandianon.” Hinuon, ang maayong mga tuyo dili igo aron mapapas ang kakabos. Pananglitan, matabangan ba sa ekonomikanhong pag-uswag ang kadaghanang kabos? Dili gayod kanunay. Ang kanhing Indian nga lider nga si Jawaharlal Nehru mipahayag: “Ang mga puwersa sa usa ka kapitalistang katilingban, kon dili masumpo, lagmit magpadato pa sa mga dato ug magpakabos pa sa mga kabos.” Hinuon, gawas pa sa kalisdanan ug kawalad-on, ang pagbati sa pagkawalay-katakos mopausbaw sa palas-anon sa mga kabos. Ang tawhanong mga lider ba makatabang sa mga kabos sa pagbuntog sa mga pagbati sa kawalay-mahimo ug kawalay-paglaom?

Sa tinuod, daghan sa mga kabos kaayo nakakat-on sa pagsagubang sa kakabos ug nakabuntog sa mga pagbati sa ubos nga pagtahod-sa-kaugalingon atubangan sa dagkong mga suliran, sama sa taas kaayong implasyon ug kawalay-trabaho. Dugang pa, ang kagutmanan, kawalay-puy-anan, ug katimawa sa walay pakyas bug-os nga papason. Matingala ka ba niini? Gidapit ka namo sa pagbasa sa sunod artikulo: “Sa Dili Madugay, Wala Nay Kabos!”