Kanus-a Mawala ang Kahadlok?
MATINGALA ka ba sa pagkahibalo nga ang tinuod nga kasegurohan nalangkit sa usa ka tawo nga nabuhi sa 2,000 ka tuig kanhi? Nagpakita sa panginahanglan ug gugma, si Jesu-Kristo nagsugilon ug talagsaong sambingay: “Dihay usa ka tawo nga milugsong gikan sa Jerusalem ngadto sa Jerico ug nahulog sa mga tulisan, nga naghukas kaniya ug nagbun-og kaniya, ug namahawa, nga nagbiya kaniyang himalatyon.” Bisan pag wala panumbalinga sa duha ka maglalakbay ang biktima, usa ka maluloton nga Samaritano nagpakitag kaluoy. Apan, kinsa ang nagpakitag kabalaka sa mga biktima sa krimen karon? Unsang kahupayan gikan sa kahadlok ang atong mapaabot?—Lucas 10:30-37.
Samtang nangangkon nga nagtuo sa Diyos, daghan ang naghunahuna nga ang balaod ug kahusay kinahanglang ipatuman sa tawo. Apan mawala ba sa mas mabug-at nga sentensiya sa pagkabilanggo o sa mas daghan ug mas dakog suweldong polis ang mapintas nga krimen? Nagtuo ka ba gayod nga mawala sa mga ahensiya nga nagpatuman sa balaod, bisag unsa pa ka sinsero sa mga paningkamot sa pagtaganag igong kasegurohan, ang maong mga butang sama sa pag-abuso sa droga, organisadong krimen, ug kakabos? Apan, ang atong pagkagutom ug pagkauhaw sa pagkamatarong dili angay makawang.—Mateo 5:6.
Ang Salmo 46:1 nag-ingon: “Ang Diyos maoy atong dalangpanan ug kusog, usa ka tabang nga makita dayon panahon sa mga kalisod.” Makita nato nga kining mga pulonga dili kay matahom lamang nga balak.
Sama sa imo nang nahibaloan, ang palumagian sa balita adlaw-adlawng nagtaho sa walay kaluoy nga pagpatay diha sa mga giyera sibil ug sa mga atake sa mga terorista. Sa ubang mga bahin sa kalibotan, komon na ang pagpatay sa sinalikwayng mga batan-on o sa mga nakasaksi sa krimen. Nganong nahimong barato kaayo ang kinabuhi? Bisan pag adunay lainlaing mga hinungdan sa maong kapintasan, adunay usa ka katarongan nga dili nato angay isalikway.
Sumala sa Pulong sa Diyos, ang Bibliya, “ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Sa pagkatinuod, gipaila ni Jesu-Kristo si Satanas nga Yawa dili lamang ingong usa ka bakakon kondili ingong “usa ka mamamatayg tawo.” (Juan 8:44) Nag-impluwensiya sa katawhan sa lainlaing mga paagi, kining gamhanan nga espirituhanong linalang nagpasiugda sa pagdaghan sa kapintasan karon. “Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon,” nag-ingon ang Pinadayag 12:12. Apan, makalilipay, kining daotang sistema pagailisan sa “bag-ong mga langit ug usa ka bag-ong yuta . . . , ug niini magapuyo ang pagkamatarong.”—2 Pedro 3:13.
Dugang pa niining kahibulongang paglaom sa bag-ong kalibotan, unsang tabang ang atong mabatonan karon mismo?
Sa dili pa tan-awon ang positibong tubag niana, maayong hinumdoman nga bisan ang matuod nga mga Kristohanon walay garantiya nga sila mapanalipdan batok sa krimen. Gibatbat ni apostol Pablo ang pila ka mga risgo nga personal niyang naatubang. Siya nakaagom “sa kapeligrohan sa mga suba, sa kapeligrohan gikan sa mga tulisan sa dalan, sa kapeligrohan gikan sa [iyang] kaugalingong rasa, sa kapeligrohan gikan sa kanasoran, sa kapeligrohan diha sa siyudad, sa kapeligrohan diha sa kamingawan, sa kapeligrohan sa dagat.” (2 Corinto 11:26) Apan nakalingkawas si Pablo niining mga katalagmana. Mao man karon; pinaagi sa pagkamabinantayon, mabuhat gihapon nato ang atong mga buluhaton sa normal kon posible. Atong tagdon ang pila ka butang nga makatabang.
Kon ang usa nagpuyo sa usa ka makuyaw nga kasilinganan, ang maayong paggawi mahimong usa ka panalipod, sanglit ang mga tawo maniid ug maayo sa uban. Bisag ang mga kawatan magplano ug himoon ang mga krimen, gilantaw sila sa daghan ingong normal nga mga tawo. Paglikay sa pagpanaway kon unsay ilang ginahimo, ug ayaw pagsulay sa pagpakisayod kon unsay ilang ginahimo. Sa ingon, imong mamenosan ang posibilidad nga ikaw mahimong tumong sa pagpanimalos. Ibutang sa hunahuna nga ang mga kawatan nagtinguha sa pagkahibalo kon kinsa ang may bag-ong butang nga gipalit o kon kinsa ang nagbakasyon ug sa ingon wala sa ilang mga balay, busa magmaalamon kon unsay imong isugid sa uban.
Nakita sa daghang mga Saksi ni Jehova nga ang ilang dungog ingong mga ministro naghatag kanila ug igong panalipod. Masubsob nga gipakita sa mga kriminal nga ilang gitahod ang maong mga Kristohanon, kinsa sa walay pagpihig naghatag ug tabang sa mga tawo sa komunidad. Ang mga Saksi dili mga mamumuno o mga kawatan, ni sila ‘mga hilabtanon sa mga butang labot sa uban,’ busa dili usa ka hulga.—1 Pedro 4:15.
Kasegurohan Diha sa Bag-ong Kalibotan sa Diyos
Kita naguol sa “pag-uswag sa kalapasan” nga gitagna ni Jesu-Kristo, apan imbes maghinobra sa pagkabalaka, kita makasalig nga sa dili madugay wagtangon sa Diyos kining daotang sistema. Gawas nga nanagna ug tibuok-kalibotan nga pagsangyaw niining “maayong balita sa gingharian,” gipahinumdoman ni Jesus ang iyang mga sumusunod: “Siya nga nakalahutay hangtod sa kataposan mao ang maluwas.”—Mateo 24:12-14.
Kita makatino nga kadtong mamiktima sa uban, usahay pinaagi sa dili katuohang kapintas, pagawagtangon. Ang Proverbio 22:22, 23 nag-ingon: “Ayaw pagkawati ang kabos tungod kay siya kabos, ug ayaw daogdaoga ang sinakit diha sa ganghaan. Kay si Jehova mismo magalaban sa ilang katungod, ug iya gayong kuhaag kalag kadtong nagapangawat kanila.” Wagtangon ni Jehova ang mga mamumuhat ug daotan, sama sa mga kawatan, mga mamumuno, ug sa mga nagabuhat sa mahilay nga sekso. Dugang pa, dili niya kalimtan ang mga biktima sa maong mga krimen. Iyang ulian sila sa ilang mga kapildihan ug bug-os nga ipasig-uli kanila ang ilang maayong panglawas.
Sa pagkamatuod, kadtong “nagpalayo sa daotan ug naghimog maayo” makabaton ug kinabuhing walay kataposan pinaagi sa pagkalabang-buhi sa umaabot nga dakong kasakitan o pinaagi sa pagkabanhaw gikan sa patay. “Ang mga matarong magapanunod sa yuta, ug sila magapuyo niini sa walay kataposan.” (Salmo 37:27-29) Ang maong mga kaayohan mabatonan tungod sa halad lukat ni Jesus. (Juan 3:16) Apan sama sa unsa ang kinabuhi diha sa napasig-uling Paraiso?
Ang kinabuhi ilalom sa Gingharian sa Diyos makalilipay gayod. Si Jehova nagtagna: “Ang akong katawhan magpuyo diha sa malinawon nga pinuy-anan ug sa mga balay nga puno sa pagsalig ug sa pahulayanan nga malinawon.” (Isaias 32:18) Ang tanan nga makabaton ug kinabuhing walay kataposan nagbag-o na sa ilang personalidad. Wala na unyay usa nga daotan o dili-makataronganon, ni aduna pay si bisan kinsa nga mahimong biktima sa maong tawo. Ang manalagnang si Miqueas nag-ingon: “Magalingkod sila, ang tagsa ka tawo sa ilalom sa iyang ubas ug sa ilalom sa iyang igos, ug walay usa ang magpakurog kanila.” (Miqueas 4:4; Ezekiel 34:28) Pagkadako nga kalainan niini diha sa makuyaw nga mga kasilinganan karon!
[Kahon sa panid 6]
MAGMABINANTAYON
Daghang kriminal ang aktibo sa bug-os panahon, nga naghimo sa krimen nga usa ka propesyon. Sila mahimong magtrabaho nga tinagurha o tinagutlo, bisag usa lamang ang magtion ug posil kanimo. Dugang nadayag nga kon mas batan-on ang kriminal, mas peligroso siya. Unsay imong himoon kon mabiktima ka?
Magpabiling kalmado aron dili makulbaan ang kawatan—ang iyang kakulag eksperiyensiya mahimong makapatay. Kon usa ikaw sa mga Saksi ni Jehova, ipailaila ang imong kaugalingon. Apan, andam sa pagtunol kon unsay gusto sa kawatan. Kon maglanganlangan ka, mas modako ang kapeligrohan. Sa ulahi, basin bation nimo nga luwas na sa paghangyo nga ibalik ang identipikasyong mga papeles o plete sa bus.
Kasagaran dili nimo matag-an kon kinsa ang kriminal. Ang ubang mga kawatan maoy mga giyanon sa droga o mga propesyonal, ang uban gusto lamang nga makakaon. Sa bisan unsa nga hitabo, ayaw pagdalag dakong kantidad nga kuwarta. Ayaw ipasundayag ang mga alahas, mga singsing nga bulawan, o mahalong mga relo. Lakaw o panaw nga normal, nga dili magpakitag kahadlok. Ayaw tutoki ang mga indibiduwal nga daw gusto mong mailhan sila. Engkasog may pinosilay sa karsada, hapa; ang mga senina malabhan ra pagkatapos.—Usa ka polis kanhi sa Rio de Janeiro.
[Hulagway sa panid 5]
Magpabiling kalmado ug itunol kon unsay gusto sa kawatan. Kon maglanganlangan ka, mas modako ang kapeligrohan