Usa ka Kalibotan nga Walay mga Kawatan

KALIT kaayo ang mga hitabo. Gitionan sa usa ka tawong maayog-pamiste ug posil ang ulo ni Antônioa sa atubangan sa iyang balay sa Saõ Paulo, Brazil, gipangayo ang mga yawi ug ang mga papeles sa iyang awto, ug kalit nga mipadagan.

Sa Rio de Janeiro, atubangan sa mga mata sa iyang diyes-anyos nga anak nga babaye, gisikop sa upat ka lalaking armado ang tawong ginganlag Paulo. Unya, human nakaabot sa iyang balay sakay sa awto, misulod ang mga kawatan ug gikawat ang ilang gusto, gipuno ang duha ka kotse ni Paulo. Gihulga nga ilang patyon ang asawa ni Paulo, ilang gidala siya ug ang usa ka empliyado ingong bihag ngadto sa tindahan sa alahas ni Paulo sa siyudad, diin ilang gihurot ug kuha ang tanang mahalong mga butang. Apan, wala damha, ang mga kawatan sa ulahi mitelepono, gisultihan sila kon diin nila gibilin ang mga awto.

Pagkamakaguol nga makawatan sa hinagoan-kaayong kuwarta ug mga butang! Bisan tuod si Antônio ug Paulo wala maningamot sa pagpahamtang ug silot, gihimo kini sa uban. Ilang patyon o piangan ang kawatan, o kaha sila ang mapatay. Pananglitan, sa dihang gisakmit sa batan-on ang iyang relo, gikuha sa nasukong babayeng taga-Brazil ang iyang posil sa bag ug giluthang ang kawatan, nagpatay kaniya. Ang resulta? Ang O Estado de S. Paulo mitaho: “Gidayeg sa mga tawong nakakita sa hitabo ang tinamdan sa babaye, ug walay mitabang sa kapolisan sa pag-ila kaniya.”

Bisan tuod naghandom sila ug usa ka kalibotan nga walay kawatan, ang mga Kristohanon dili mobalos sama sa gihimo sa babaye. Sanglit ang panimalos iya sa Diyos, sila nagapatalinghog sa mga pulong sa Proverbio 24:19, 20: “Ayaw kasuko tungod sa mga mamumuhat ug daotan. Ayaw kasina sa mga daotan. Kay walay umaabot ang bisan kinsa nga daotan.”

Apan kon atakehon, unsay imong himoon? Usa ka hitabo sa Rio de Janeiro nagpakita kon unsa ka hinungdanon ang pagpabiling kalmado. Usa ka Kristohanong si Heloísa, nagpaingon sa pagdumalag pagtuon sa Bibliya sakay sa bus. Duha ka lalaki misugod sa pagpangawat sa mga pasahero. Nakaabot sa hunonganan sa bus nga iyang kanaogan, gisultihan sila ni Heloísa nga usa siya sa mga Saksi ni Jehova ug nga siya magadumala ug pagtuon sa Bibliya. Iyang gipakita ang iyang Bibliya ug ang tabang sa pagtuon. Siya wala kawati, gitugotan siya sa mga kawatan sa pagkawas. Laing pasahero, hinunoa, wala tugoti sa pagkanaog. Ang drayber miingon sa ulahi nga wala pa gayod siya makakita ug sama niadto.

Si Regina nagpabiling kalmado usab sa dihang gimandoan siya sa duha ka lalaking armado sa pagsulod sa iyang awto. Gipakita ang iyang kaugalingong kopya sa magasing Pagmata!, si Regina nagpamatuod. Sanglit ginerbiyos man ang mga kawatan, iyang gihangyo sila sa pagbukas sa gamayng kaha sulod sa awto nga iyang gibutangag mga karmelitos. Apan sa nakakita sa mga teyp sa cassette nga Kingdom Melodies, sila misugod sa pagpamati sa maong musika. Ang kahimtang nahimong mas mahigalaon, ang mga kawatan mihukom sa pagpakanaog kang Regina diha sa haywey nga wala nila unsaa, gipasaligan siya nga makakita ra siya ug tawong maluluton nga motabang kaniya. Human nakabaktas ug diyes minutos, nakakita siyag balay, apan ang tagbalay wala makatuo sa iyang estorya, nga nag-ingon: “Ang imong panagway nagpakita nga daw wala ka atakeha; kalmado ka kaayo.”

Bisag ang biktima tingali wala maunsa sa pisikal, ang maong makuyaw nga eksperyensiya mopahinabog seryosong mga epekto. ‘Ang biktima tingali mawad-an ug kasegurohan, madumtanon sa mga membro sa pamilya o niadtong maningkamot sa pagtabang kaniya, mawad-an ug pagsalig sa uban, matinguhaon sa pag-organisar sa mga detalye, mobati nga dili-makataronganon ang kalibotan,’ mitaho ang O Estado de S. Paulo. Sa kaatbang, ang usa ka biktima nga may pagsalig kang Jehova nga Diyos malagmit makalahutay sa kasinatian nga dili-madaot sa pisikal ug sa emosyonal. Bisan pa, dili ba mouyon ka nga usa ka panalangin kon wala na unyay krimen ni bisan unsa nga mopahinabog kahadlok?

“Ang Kawatan Kinahanglang Dili na Mangawat”

Bisag daghan ang magpalabi sa ilang hinakog nga paagi sa kinabuhi, ang Pulong sa Diyos nakatabang sa mga kawatan sa pagbag-o sa ilang mga tinguha ug sa ilang mga personalidad. (Efeso 4:23) Nakabaton ug usa ka tinuod, pinasukad sa Bibliya nga katuyoan sa kinabuhi, ilang gipatalinghogan ang mga pulong: “Maayo pa ang diyutay nga adunay pagkamatarong kay sa daghang abot nga walay hustisya.” (Proverbio 16:8) Si Cláudio miasoy: “Halos tanang membro sa akong pamilya mga Saksi, apan wala gayod ako mamati sa ilang gisulti bahin kang Jehova ug sa iyang mga katuyoan. Mibalik gikan sa usa ka biyahe nga hapit 2,000 ka kilometros diha sa usa ka kinawat nga pickup, agian gayod nako ang daghang checkpoint sa polisiya. Samtang nagbiyahe naamgohan ko nga kinahanglang mag-usab ako sa akong kinabuhi. Misulay na ako sa paghimo niana kaniadto apan wala molampos. Niining higayona misugod ako sa pagpalandong sa akong mga paryente nga mga Saksi ni Jehova ug pagkalahi nila, may kasaya, kalipay, ug kalinaw.” Ingong resulta, si Cláudio misugod sa pagtuon sa Pulong sa Diyos, gibiyaan ang mga droga ug ang iyang kanhi nga mga higala, ug nahimong usa ka Kristohanong ministro.

Ang uban usab karon nagpatalinghog sa mga pulong: “Ayaw pagsalig sa pagpanglimbong, ni mahimong walay kapuslanan tungod sa pagpangawat.” (Salmo 62:10) Human gisentensiyahag pagkabilanggo tungod sa pagsulay sa pagpatay sa panahon sa pagpangawat, si José, usa ka giyanon sa droga ug tigpamaligyag droga, nakabaton ug kaayohan gikan sa pagtuon sa Bibliya uban sa iyang bayaw. Miundang siya sa paggamit ug pagpamaligyag mga droga ug karon siya usa na ka madasigong Saksi.

Bisan pa, ang bag-ong personalidad dili motungha sa kalit o sa milagro. Si Oscar, nga nalangkit kaayo sa mga droga ug pagpangawat, miasoy: “Kinasingkasing akong miampo kang Jehova nga tungod niini ang salog morag nahimong gamayng linaw tungod sa akong daghang luha.” Oo, gawas sa kuging pagtuon sa Pulong sa Diyos, ang malahutayon, kinasingkasing nga pag-ampo gikinahanglan. Matikdi ang kaalam niining mainampoon nga hunahuna: “Ayaw ako hatagi ug kawalad-on ni mga bahandi. Pakan-a ako sa pagkaon nga maoy gikinahanglan alang kanako, aron dili ako mabusog ug magalimod kanimo ug magaingon: ‘Kinsa si Jehova?’ ug ako mahimong kabos ug mangawat ug magapasipala sa ngalan sa akong Diyos.”​—Proverbio 30:8, 9.

Ang interes sa kaugalingon kinahanglang pulihan ug matuod nga gugma: “Ang kawatan kinahanglang dili na mangawat, kondili magbudlay hinuon siya, nga magbuhat sa mga maayong butang pinaagi sa iyang mga kamot, aron may ikahatag siya ngadto sa mga nagakinahanglan.” (Efeso 4:28) Sama sa kahimtang sa ubang unang siglong mga Kristohanon nga kaniadto ‘mga kawatan o mga tawong dalo,’ si Jehova, pinaagi sa lukat ni Jesu-Kristo, maluloy-ong mipasaylo sa mga naghinulsol. (1 Corinto 6:9-11) Pagkamakapalipay nga bisan unsa pay atong nangagi, kita makabag-o sa atong paagi sa kinabuhi ug makabaton sa pag-uyon sa Diyos!​—Juan 3:16.

Kasegurohan Diha sa Bag-ong Kalibotan sa Diyos

Handurawa ang usa ka kalibotan nga walay kawatan. Dili ka na magkinahanglan ug dakog-gasto nga pagpatuman sa balaod nga sistema sa mga huwes, abogado, polis, ug mga bilanggoan! Usa unya kini ka mauswagong kalibotan diin ang matag usa magatahod sa uban ug sa ilang kabtangan! Daw dili ba kana katuohan? Ang Diyos mangilabot ba gayod sa tawhanong kalihokan ug motapos sa pagkadaotan? Among gidapit kamo sa pagsusi sa ebidensiya nga ang Bibliya mao ang Pulong sa Diyos ug nga ang mga tagna niini kasaligan. Makakita ka ug malig-ong pasukaranan sa pagsalig nga anaa sa unahan ang usa ka kausaban. Walay makababag sa Diyos gikan sa pagpatunghag kahupayan nga gisaad ngadto sa tanan nga nahigugma sa pagkamatarong: “Dili ka magkasuko tungod sa mamumuhat ug daotan. Ni masina ikaw batok niadtong mga nagabuhat ug pagkadili-matarong. Kay sama sa balili sila mangalaya ra dayon, ug sama sa lunhaw bag-ong sagbot sila mangahanaw.” (Salmo 37:1, 2) Kadtong mga pulonga nga gisulat dugay na kaayo kanhi sa dili madugay bug-os nga matuman.

Taposon sa Gingharian sa Diyos ang kaguol ug pagkadili-matarong, nga nagapahinabog dakong kawalay-paglaom ug pagkawalay-katinoan. Wala na unyay manginahanglan, nga mapugos sa pagpangawat. Kita gipasaligan diha sa tagna: “Aduna unyay daghang trigo sa yuta; sa ibabaw sa kabukiran adunay pag-awas. Ang iyang bunga sama unya sa [karaang] Lebano, ug sila nga anaa sa siyudad mamuswak sama sa talamnon sa yuta.” (Salmo 72:16) Sa pagkatinuod, diha sa napasig-uling Paraiso, walay mobalda sa pakigdait sa mga tawo nga nakaila ug nagasimba sa matuod nga Diyos.​—Isaias 32:18.

Pagkadako nga ganti unya kana tungod sa pagbatok sa mga paagi niining hakog nga kalibotan! Ang Proverbio 11:19 nag-ingon: “Ang usa nga malig-ong nagabarog alang sa pagkamatarong makadangat ngadto sa kinabuhi, apan ang usa nga mangagpas sa daotan makadangat ngadto sa iyang kaugalingong kamatayon.” Oo, human malaglag ang mga daotan, wala nay katarongang mahadlok pa alang sa iyang kinabuhi o sa iyang kabtangan. Gisaaran kita sa Salmo 37:11 niini: “Ang mga maaghop magapanunod sa yuta, ug ilang makaplagan sa pagkatinuod ang ilang tumang kalipay tungod sa kadagaya sa pakigdait.”

[Footnote]

[Kahon sa panid 5]

Pagsagubang sa Katinuoran sa Pagpangawat

DIHA SA BALAY​—Sanglit mosulod man ang mga kawatan sa imong balay anaa ka man o wala, siradohi ug kandadohi kanunay ang mga pultahan. Ang mga eksperto mirekomendar sa pagtaod ug mga alarma o magbaton ug tigbantay nga iro. Pahibaloa ang usa ka kasaligang silingan sa panahong mobakasyon ka. Pabiling kalmado​—abtik kaayo ang mga kawatan, nga dili madahom, ug makausab dayon sa mga plano kon sila nerbiyoson. Kon usa ikaw ka Saksi ni Jehova, ipaila ang imong kaugalingon ug paningkamot nga makapamatuod. Basig makadani ka pa ug panaghigala o simpatiya. Ayaw ug sukol gawas kon atakehon sa pisikal.

DIHA SA PUBLIKO​—Magmaabtik sa pagmatikod kon gisundan ka. Lakaw diha sa tunga sa asiras. Likayi ang ngitngit ug hilit nga mga dalan. Tagoag maayo ang imong pitaka o ang mahalong mga butang. Lakaw ug kusog nga daw may adtoan ka. Ayaw pagsul-ob ug mahalong mga senina o nagapangidlap nga mga alahas. Pamalit nga adunay kauban kon gikinahanglan sa kahimtang. Pagdala lamang ug kuwarta nga imong gikinahanglan, ibutang sa lainlaing bulsa o lugar.

DIHA SA KOTSE​—Kon komon na sa imong dapit ang “pagpangawat ug kotse,” ayaw pabilin diha sa imong giparada nga kotse. Agi ug lainlaing dalan sa pagpaingon ug sa pagpauli gikan sa trabaho. Agi sa dili delikado nga dalan, bisan pag mas layo kini. Sa dili pa iparada, tan-awa ang palibot kon aduna bay suspetsoso. Ayaw buksi ang kargahanan sa likod sa kotse diha sa hilit nga lugar. Ayaw pagbilin ug mahalong mga butang nga makita diha sa kotse. Ang makita nga gikandadohang kadena o ubang batok-pangawat nga mga gamit basin makapabugnaw sa kasagarang mga kawatan.

[Kahon sa panid 6]

“Hunong na kamo sa pagtigom ug mga bahandi dinhi sa yuta, diin ang tangkob ug taya nagakutkot, ug diin ang mga kawatan nagapanglungkab ug nagapangawat. Hinunoa, pagtigom kamog mga bahandi alang kaninyo didto sa langit, diin walay tangkob ni taya nga magakutkot, ug diin walay kawatan nga magapanglungkab ug mangawat.”​—Mateo 6:19, 20