Mga Magmamantala sa Gingharian Nagtaho
Ang Pagpanaksi Namunga Diha sa Panimalay ug sa Tunghaan
ANG kinabuhi sa usa ka Kristohanon naglangkit sa pagbuhat ug maayo ngadto sa uban, ilabina sa pagpakig-ambit kanila sa maayong balita sa Gingharian sa Diyos. Ang Proverbio 3:27 nag-ingon: “Ayaw ihikaw ang maayo ngadto kanilang takos niini, kon anaa sa gahom sa imong mga kamot ang pagbuhat niini.” Sa Argentina usa ka batan-ong Saksi sa iyang ikatulong tuig sa hayskul buot nga mopaambit sa maayong balita sa Gingharian uban sa usa ka higala sa tunghaan. Ang pagbuhat niya niana may layog-abot nga mga resulta.
Usa ka adlaw ang batan-ong Saksi naghisgot ngadto sa iyang higala nga dili maayo ang tanang relihiyon. Sa dihang ang batan-ong lalaki mitubag nga wala siyay gihimong daotan, ang Saksi miingon: “Ni may gihimo ka alang sa Diyos.” Nagpahunahuna kini sa batan-on. Sa ulahi ang Saksi misaysay nga kini mao ang kataposang mga adlaw ug nga aron mabatonan ang pag-uyon sa Diyos, ang usa kinahanglang makabaton ug tukmang kahibalo sa Bibliya ug ipadapat kana. Miuyon ang iyang higala sa tunghaan. Apan tugtan ba siya sa iyang pamilya nga magtuon sa Bibliya? Aron hatagan ang iyang higala ug usa ka butang nga hunahunaon, ang Saksi mihangyo kaniya nga basahon ang librong Ikaw Mabuhing Walay Kataposan sa Paraiso sa Yuta.
Nanglabay ang panahon, ug ang higala miundang sa pagtungha. Wala nay nadungog bahin kaniya sulod sa kapin sa usa ka tuig. Unya usa ka adlaw ang batan-ong Saksi natingala sa pagkadawat ug tawag sa telepono gikan sa iyang higala kinsa miingon nga iyang nakita nga nangatuman gayod ang mga tagna sa Bibliya. Dihadiha ang Saksi mihikay ug pagtuon sa Bibliya uban kaniya.
Sa dihang miadto siya sa balay sa iyang kanhing higala sa tunghaan, iyang namatikdan nga ang mga ginikanan sa iyang higala nabalaka kon unsay giapilan sa ilang anak lalaki. Bisan ang manghod nga lalaki sa higala naghunahuna nga siya nabuang na. Busa gipaapil sa mga ginikanan ang manghod nga lalaki sa sunod nga pagtuon. Human niana, nga may luha sa iyang mga mata, kining batan-ong lalaki mitaho ngadto sa iyang mga ginikanan nga ang iyang magulang nga lalaki wala mabuang, nga niana misinggit ang inahan, “Inay usa lang ka suliran, karon duha na ang akong suliran!”
Busa, sa misunod nga pagtuon siya mismo mitambong ug miuyon nga ang batan-ong mga lalaki wala mangabuang. Sa ulahi usa ka pagtuon sa Bibliya ang gihikay uban kaniya ug sa iyang bana. Sa wala madugay ang tibuok pamilya misugod sa pagtambong sa mga tigom sa kongregasyon sa Kingdom Hall. Ngadtongadto, ang mga apohan sa bahin sa inahan misugod usab sa pagtuon sa Bibliya ug misugod sa pagtambong sa mga tigom. Sukad niadto, ang unang batan-ong lalaki nabawtismohan na. Naminyo siya, ug siya ug ang iyang asawa maoy masibotong mga magmamantala.
Dugang pa, pinaagi sa di-pormal nga pagsangyaw diha sa tunghaan, ang batan-ong Saksi nakatabang ug laing duha ka kauban sa tunghaan maingon man sa inahan ug igsoon nga babaye sa usa kanila nga mosugod sa pagtuon sa Bibliya. Tanantanan, 11 ka tawo ang nakakat-on sa kamatuoran sa Bibliya tungod kay ang batan-ong Saksi wala magpugong sa paghimog maayo ngadto sa iyang mga kauban sa eskuylahan. Pagkamakapalipayng sangpotanan! Sa pagkatinuod, “Malipayon ang katawhan kansang Diyos mao si Jehova!”—Salmo 144:15.