“Bililhon Ako Kang Jehova!”

NIINING “makuyaw nga mga panahong lisod sagubangon,” daghang matinumanong mga alagad ni Jehova ang nag-antos sa walay kataposang bugno sa mga pagbati sa pagkawalay-bili. (2 Timoteo 3:1) Dili kini katingad-an, tungod kay ang usa sa “malinglahong mga buhat” ni Satanas mao ang pagpabati nga walay nahigugma kanato, bisan ang atong Maglalalang! (Efeso 6:11, potnot) Uyon niini, ang Abril 1, 1995, nga isyu sa Ang Bantayanang Torre naundan ug duha ka artikulo alang sa pagtuon sa kongregasyon nga nag-ulohang “Ikaw Bililhon sa Panglantaw sa Diyos!” ug “Pagpasibot sa Paghigugma ug sa Maayong mga Buhat​—Sa Unsang Paagi?” Kining maong mga artikulo gidesinyo aron ipahinumdom kanato nga gipakahamili ni Jehova ang atong mga paningkamot. Ang mosunod maoy pipila ka pulong sa apresasyon nga nadawat:

“Wala pa mahitabo sulod sa 27 ka tuig nakong pagka-Saksi ni Jehova nga natandog gayod ako sa usa ka magasin. Wala ako makapugong sa paghilak​—kining mga artikuloha nakahatag kanako ug dakong kahupayan. Gibati ko karon nga gimahal gayod ako ni Jehova. Daw nahaw-asan akog mabug-at nga palas-anon gikan sa akong mga abaga.”—C. H.

“Kaupat nako basaha kining maong magasin sa usa ka adlaw. Nagustohan nako ang paagi sa pagsulti sa artikulo nga gitudloan ka ug bakak kon motuo ka nga ikaw walay bili. Gamiton nako kining maong artikuloha sa pagbantay sa panon ug sa pagsangyaw sa pultahan-ug-pultahan.”​—M. P.

“Maayo kaayo ang nahimo ni Satanas sa pagpabating walay bili ug dili hiligugmaon bisan kadtong mga nahigugma kang Jehova. Ang mapahinumdoman pinaagi sa ‘kasaligan nga ulipon’ nga matang nga gihigugma gayod kita ni Jehova ug nga iyang giapresyar ang tanang gagmayng mga butang nga atong ginahimo alang kaniya maoy usa sa labing makapadasig nga mga butang nga akong nabasahan. Sa daghang katuigan nabati ko ang mga pagbati nga inyong gihisgotan niining mga artikuloha. Wala gayod ako mobati nga takos sa gugma ni Jehova, busa naningkamot ako sa pagbuhat ug dugang ug dugang pa sa pag-alagad kaniya ingong paagi aron maangkon ang maong gugma. Apan napalihok ako sa sad-ang pagbati ug kaulaw. Busa bisag unsa ka daghang oras ang akong ginagugol sa ministeryo, o bisag unsa ka daghang tawo ang akong natabangan, gibati ko nga dili pa kadto igo. Kakulangan lamang nako ang akong nakita. Karon sa dihang moalagad ako kang Jehova tungod sa gugma, handurawon ko nga siya nagpahiyom ug nga siya mapasigarbohon kanako. Kini labaw pang nagpadako sa akong gugma kaniya ug maoy hinungdan nga gusto nakong mohimo ug labaw pa. Karon naeksperyensiyahan ko ang dakong kalipay gikan sa akong pag-alagad kang Jehova.”​—R. M.

“Kini sa walay duhaduha mao ang labing maayo, labing makapalig-on, oo, talagsaong mga artikulo nga makatandog sa atong mga kasingkasing nga akong nabasa sukad! Tigbasa akog Ang Bantayanang Torre sulod sa 55 ka tuig, ug dihay daghang miaging talagsaong mga isyu. Apan kining isyuha milabaw sa bisan unsang atong nabatonan nga makapahupay sa atong mga pagduhaduha, mga katahap, ug mga kahadlok nga kita ‘walay pulos’ ug ‘wala higugmaa’ ug dili gayod makahimo ug igo aron ‘maangkon’ ang gugma ni Jehova. Kining maong Bantayanang Torre naundan sa matang sa espirituwal nga tabang nga gikinahanglan gayod sa atong mga igsoon. Nagplano ako nga gamiton kining mga artikuloha nga sublisubli sa dihang magbantay sa panon.”​—F. K.

“Alang kanamo nga nakigbisog tungod sa ubos nga pagtamod sa kaugalingon, o gani sa mga pagbati nga nayugot sa kaugalingon, lisod kaayong magpauli sa atong kusog aron makapadayon sa kamatuoran. Kining artikuloha nagpabanaag sa maong halalom nga kahangawa ug pagsabot, nahisama kadto sa paghaplas ug makapahupay, makatambal nga balsamo, mismo sa kasingkasing. Pagkadakong kahupayan nga mabasa ang maong mga pulong diha sa Ang Bantayanang Torre ug ang pagkasayod nga walay pagduhaduha nga si Jehova tinuod nga nakasabot! Salamat sa pagpahinumdom kanamo nga si Jehova dili mosulay sa pagdasig sa iyang katawhan pinaagi sa paghatag ug sad-ang pagbati, kaulaw, o kahadlok. Bisan tuod ang akong naamot sa buluhatong pagwali menos kaayo niining bag-o pa tungod sa mga suliran sa pinansiyal ug panglawas sa among pamilya, nakakita gihapon ako ug katumanan sa butang nga akong maarangang mahimo. Nakaplagan ko nga mas malipayon ako sa pag-alagad sa dihang tugotan ko ang gugma nga maoy mopalihok kanako.”​—D. M.

“Bag-o lang gayod nako nahuman ug basa ang ‘Ikaw Bililhon sa Panglantaw sa Diyos!’ Ang matag parapo nagpalugmaw sa mga luha sa akong mga mata. Gikan ako sa usa ka pamilya nga wala kaayo magpakitag gugma. Ako gitamay, gisulogsulog, ug gikataw-an. Busa, sa bata pa kaayo gibati ko na nga walay pulos. Gihambin gihapon nako ang nakagamot nga mga pagbati gikan sa akong nangagi nga magpaluya kanako sa dihang makaagom ako ug kalisod. Sa dihang mihunong ako sa pag-alagad ingong usa ka ansiano sa kongregasyon, sama sa naandan gibati ko nga ako napakyas​—sa Diyos, sa akong pamilya, ug sa akong mga igsoon sa kongregasyon. Kining mga pagbatia dili dayon mawala, apan kining tukma-sa-panahon nga artikulo nakatabang kanako aron mabatonan pag-usab ang igong pagkatimbang. Nakapasanag kini sa akong panglantaw.”​—D. L.

“Salamat sa artikulong ‘Ikaw Bililhon sa Panglantaw sa Diyos!’ Aduna akoy suliran sa grabeng pagdumot sa kaugalingon ug lalom nga mga pagbating walay pulos, nga masubay ug balik sa pagdaogdaog nga naagoman sa pagkabata. Tino nga haom nga lantawon kining hiwi nga panghunahuna ingong usa ka malinglahong buhat ni Satanas mismo. Makapukan pa kini sa kusog nga kabubut-on sa usa nga mabuhi. Kinahanglan manlimbasog gayod ako adlaw-adlaw aron makasukol sa bakak nga dili ako hiligugmaon. Kining artikuloha dakog kahulogan kanako kay sa inyong nasayran.”​—C. F.

“Karon ang mga igsoon ilabinang mosanong sa hunahuna nga giapresyar ni Jehova ang mga buhat nga tinukmod sa gugma inay napugos o napit-os. Ang pagtagad sa mainit ug mahigugmaong personalidad ni Jehova, ang iyang interes sa iyang katawhan ingong mga indibiduwal, ug ang mahigugmaong paagi nga iyang gihatag ang iyang kaugalingon makapalagsik ug makapadasig. Tungod niini, dihang nadawat dayon namo ang artikulong ‘Ikaw Bililhon sa Panglantaw sa Diyos!’ daghan ang mipahayag ug apresasyon. Daw nagbukas kini sa dalan alang sa daghan aron maugmad ang mas personal nga relasyon uban kang Jehova. Kami sa akong asawa buot magpahayag ug apresasyon sa tono ug pagkasensitibo nga gipadayag diha sa bag-o pang mga magasing Bantayanang Torre. Maningkamot kami sa pagpadapat sa daghan niining mga puntoha samtang magaduaw kami sa mga kongregasyon.”​—Gikan sa usa ka nagapanawng magtatan-aw.

“Matinumanon akong magbabasa duolan sa 30 ka tuig, apan wala pa akoy nabasahan sukad nga makapadasig, makapalipay kaayo. Ang kusganon, maayong pagkapadapat nga mga kasulatan nakatabang kanako sa pagluka sa kabakakan nga natago sa akong kaugalingong mga pagbati, nga nagtugot kanako sa pagkahimong mas suod kang Jehova. Sa daghang tuig ako nag-alagad kang Jehova tungod sa sad-ang pagbati. May intelektuwal nga pagsabot lamang ako bahin sa lukat ug sa gugma sa Diyos. Salamat alang sa maong punog salabotan ug mahunahunaong mga artikulo. Naglaom ako nga makabasa pag daghan nga susama niini.”​—M. S.

“Sa tibuok 29 anyos nako sa kamatuoran, wala akoy mahinumdomang higayon diin ang usa ka artikulo nakapasanong kanako ug samang dakong pagpasalamat ug lalom nga pagbati. Bisan tuod gimatuto ako uban sa dakong gugma ug sa usa ka matinagdanong pamilya, wala gayod ako mobati nga takos nga mabuhi, labaw na ang pagkahimong takos sa pag-alagad kang Jehova. Human niining artikuloha, miluhod ako, ug uban sa pagbakho nagpasalamat ako kang Jehova. Pabilhan ko ug maayo kining artikuloha hangtod sa hangtod. Akong tan-awon ang akong kaugalingon sa lahi nga paagi tungod kay karon nasabtan ko nga bililhon ako kang Jehova.”​—D. B.