Maayong Balita sa Unahan!
KITANG tanan masubo inigkadawat natog daotang balita nga nakaapektar kanato sa personal. Sa laing bahin, malipay kita kon moabot ang maayong balita—mga balita sa kalipay alang sa atong kaugalingon o sa atong mga minahal. Apan kon ang daotang balita nakaapektar sa uban ug dili kanato, sagad anaa ang pagkamausisaon; ang uban malipay pa gani nga masayod sa nahimong kadaot sa uban. Kini sa bahin maoy hinungdan kon nganong himalitan kaayo ang daotang balita!
Sa unang bahin sa Gubat sa Kalibotan II, dihay usa ka buhi kaayo nga pananglitan sa dako kaayong kaikag sa katalagman nga midangat sa pipila ka tawo. Ang 10,000-ka-toniladang tulin ug armadong boke de giyera, nga Graf Spee, mao ang kinamaayohan sa mga barko sa gubat sa Alemanya niadtong 1939. Sulod sa daghang semana kining barkoha nakapahinabog kadaot sa mga barko sa Alyado nga gigamit sa negosyo sa kadagatan sa South Atlantic ug sa India. Sa kataposan, gisundan ug giatake sa tulo ka barko sa Britanya ang Graf Spee, nga nagpahinabog kamatayon ug nagpugos sa barko sa pag-aginod sa dunggoanan sa Uruguay sa Montevideo aron ayohon. Mimando ang kagamhanan sa Uruguay nga ibalik dihadiha sa lawod ang boke de giyera, kay kon dili kini kompiskahon. Sa ingon daw umaabot ang mangilngig nga gubat nga pabor sa Britanya.
Sa pagkadungog niini, usa ka pundok sa adunahang mga negosyante sa Tinipong Bansa miabang ug ayroplano, nga mokantidad ug $2,500 sa matag usa ka tawo, aron moadto sa Uruguay sa pagsaksi sa mangilngig nga gubat. Sa ilang kahigawad, ang gubat wala gayod mahitabo. Si Adolf Hitler nagsugo nga ipatundag ang Graf Spee. Ang libolibo sa mga tumatan-aw nga nagpanon sa dunggoanan nga naglaom nga makasaksi sa panghitabo sa mangilngig nga gubat sa dagat, nakakita ug nakadungog hinuon ug makabungog nga pagbuto nga nagpaunlod sa Graf Spee, nga gipatundag sa kaugalingong tripulante niini. Ang kapitan naghikog pinaagig pagposil sa iyang ulo.
Bisan pa sa pagkahilig sa pipila ka tawo ug mangilngig nga hitabo, ang labing daghan mouyon nga buot nila ang maayong balita kay sa daotang balita. Ingon ba niana ang imong gibati? Nan, nganong sa rekord sa kasaysayan daghan kaayo ang daotang balita ug diyutay ra ang maayong balita? Mausab pa ba ang kahimtang?
Mga Hinungdan sa Tanang Daotang Balita
Ang Bibliya naghisgot sa panahong ang maayong balita lamang ang madungog. Ang daotang balita maoy usa ka butang nga wala hisayri, wala hidunggi. Sa dihang gitapos ni Jehova nga Diyos ang iyang mga buhat sa paglalang, ang planetang Yuta andam na alang sa tawo ug sa hayop nga pagakalipayan. Ang asoy sa Genesis nag-ingon kanato: “Nakita sa Diyos ang tanang gibuhat niya ug, tan-awa! kini maayo kaayo.”—Genesis 1:31.
Ang pagkawalay daotang balita wala kaayo magdugay human lalanga ang tawo. Sa wala pa manganak si Adan ug Eva, gitaho na ang daotang balita bahin sa pagrebelde batok sa Diyos ug sa iyang mahapsay unibersohanong kahikayan sa kaayohan. Usa ka taas-ug-ranggo nga espirituhanong anak nahimong mabudhion sa gisalig kaniya nga posisyon ug milampos sa pag-agda sa unang tawhanong magtiayon sa pagduyog kaniya sa iyang rebelyoso, mabudhiong dalan.—Genesis 3:1-6.
Ang pagdaghan sa daotang balita nga nasaksihan sa katawhan nagsugod niadtong panahona. Dili ikatingala nga ang intriga, panglimbong, pamakak, pagkadili-tinuod, ug dili pagtug-an sa bug-os nga kamatuoran maoy gipasiugda diha sa daotang balita nga mibaha sa kalibotan sukad niadto. Prangkang gipasanginlan ni Jesu-Kristo si Satanas nga Yawa nga maoy tuboran sa daotang balita, nga gisultihan ang relihiyosong mga lider sa Iyang adlaw: “Kamo gikan sa inyong amahan nga Yawa, ug buot ninyong buhaton ang mga tinguha sa inyong amahan. Kana siya mamamatayg-tawo sa iyang pagsugod, ug wala siya mobarog nga lig-on diha sa kamatuoran, tungod kay wala kaniya ang kamatuoran. Sa dihang mamulong siya sa bakak, siya magapamulong sumala sa iyang kaugalingong pagbuot, tungod kay siya bakakon ug ang amahan sa bakak.”—Juan 8:44.
Samtang nagdaghan ang tawhanong populasyon, nagdaghan duyog niini ang daotang balita. Siyempre, wala kini magpasabot nga walay mga panahon sa kangaya ug kalipay, kay may daghang butang sa kinabuhi nga maoy mga hinungdan sa kangaya. Apan, ang mga panganod sa kasamok ug kaguol dayag kaayo sa matag kaliwatan sa katawhan hangtod karon.
Adunay laing dakong hinungdan alang niining makapasubong kahimtang. Kana mao ang atong napanunod nga hilig sa pagbuhat ug daotan ug katalagman. Gipakita ni Jehova mismo kining dili-kalikayang hinungdan sa daotang balita pinaagi sa pag-ingon: “Ang hilig sa kasingkasing sa tawo maoy daotan sukad sa iyang pagkabata.”—Genesis 8:21.
Nganong Nagdagsang ang Daotang Balita?
Ugaling, adunay katarongan kon nganong midagsang ang daotang balita niining ika-20ng siglo. Kini nga katarongan tin-awng gipakita sa Bibliya, nga nagtagna nga ang katawhan sa ika-20ng siglo mosulod sa usa ka talagsaong yugto sa panahon nga nailhang ang “kataposang mga adlaw” o ang “panahon sa kataposan.” (2 Timoteo 3:1; Daniel 12:4) Gipaila sa tagna sa Bibliya ug sa Biblikanhong kronolohiya kining “kataposang yugto,” nga nagsugod niadtong 1914. Alang sa detalyadong pamatuod sa Kasulatan bahin niini, palihog tan-awa ang kapitulo 11 sa librong Kahibalo nga Motultol sa Kinabuhing Walay Kataposan, nga gipatik sa Watchtower Bible and Tract Society of New York, Inc.
Sugdan ang kataposang mga adlaw ug usa ka hitabo nga sa awtomatiko maoy hinungdan sa pagdaghan sa daotang balita sa yuta. Unsa kana? Kini mao ang paghulog gikan sa langit kang Satanas nga Yawa ug sa iyang mga panon sa demonyo. Mabasa nimo kining tatawng kahubitan bahin sa di-kalikayang pagdagsang sa daotang balita diha sa Pinadayag 12:9, 12: “Gitambog ang dakong dragon, ang orihinal nga halas, ang usa nga gitawag Yawa ug Satanas, kinsa nagapahisalaag sa tibuok gipuy-ang yuta; siya gitambog sa yuta, ug ang iyang mga anghel gitambog uban kaniya. . . . ‘Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.’”
Busa sa panahong nahibilin pa hangtod ang kataposang mga adlaw modangat sa konklusyon niini, makalaom kita nga ang daotang balita magpadayon ug gani mouswag pa ang kasagunson ug gikusgon niini.
Dili Kini Magpadayon Hangtod sa Hangtod
Ikalipay alang sa mga molupyo sa yuta, ang miserableng kahimtang sa katibuk-an nga maoy hinungdan sa pagdaghan sa daotang balita karong adlawa dili magpadayon hangtod sa hangtod. Sa pagkatinuod, atong ikasulti nga may pagsalig nga giihap na ang mga adlaw sa walay hunong nga daotang balita. Ang kahimtang dili kay walay paglaom, bisan pag unsa tingali ang mopatim-aw nga kahimtang. Ang kataposan sa tanang daotang balita haduol na ug moabot nga dili mapakyas sa gitakdang panahon sa Diyos.
Kita makaseguro bahin niini tungod kay ang kataposang mga adlaw gitagna nga mosangko o matapos pinaagi sa paglaglag ug pagwagtang sa Diyos sa tanang mga hinungdan sa daotang balita. Siya magalaglag sa daotan tawhanong mga tigpasiugda sa kabangian kinsa nagadumili sa pagbag-o ug sa pagtalikod sa ilang makasasalang dalan. Kini mosangko sa gubat sa dakong adlaw sa Diyos nga Labing Gamhanan, nga kasagarang nailhan ingong ang gubat sa Armageddon. (Pinadayag 16:16) Dihadiha human niana, si Satanas nga Yawa ug ang iyang mga panon sa mga puwersa sa demonyo dili na makalihok pa. Ang Pinadayag 20:1-3 nagbatbat sa paggapos kang Satanas, ang tinubdan sa tanang daotang balita: “Nakita ko ang usa ka anghel nga nanaog gikan sa langit uban ang yawi sa kahiladman ug usa ka dakong kadena diha sa iyang kamot. Ug iyang gidakop ang dragon, ang orihinal nga halas, kinsa mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya sa kahiladman ug gisirhan kini ug gitimbrihan kini sa ibabaw kaniya, aron nga dili na niya mapahisalaag pa ang kanasoran.”
Human niining dramatikanhong mga hitabo, ang usa ka panahon sa di-hitupngang maayong balita moabot alang sa yuta ug sa mga molupyo niini. Kini nga mga molupyo maglakip sa minilyon kinsa maluwas sa kataposang gubat sa Armageddon ug sa binilyon kinsa pagabanhawon gikan sa pagkatulog sa kamatayon diha sa mga lubnganan. Kining kinamaayohan sa tanang maayong balita gibatbat sa kataposang basahon sa Bibliya: “Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Pinadayag 21:3, 4.
Mahanduraw ba nimo kanang malipayon nga panahon? Tinuod gayod nga usa ka mahimayaong umaabot diin ang daotang balita dili na maglungtad. Oo, ang tanang daotang balita matapos ug dili na gayod madungog pag-usab. Ang maayong balita unya mao ang mangibabaw, ug kini modagaya sa walay kataposan.