Ang Pulong sa Diyos Nagahimog “mga Milagro”
SUMALA SA GIASOY NI THÉRÈSE HÉON
Usa ka adlaw sa 1965, misulod ako sa usa ka balay-patigayon ug mitanyag ug mga kopya sa mga magasing Bantayanang Torre ug Pagmata! ngadto sa mga negosyante. Sa dihang mobiya na ako, nakadungog ako ug buto. Naigo sa usa ka bala ang salog duol sa akong tiil. “Mao kanay paagi sa pagtratar sa mga Saksi ni Jehova,” usa sa mga negosyante nagbugalbugal.
KADTONG maong kasinatian nakapahadlok kanako—apan dili igo sa pagpaundang kanako sa bug-os-panahong ministeryo. Ang mga kamatuoran sa Bibliya nga akong nakat-onan bililhon kaayo nga tugotan ang bisan unsa nga mopahunong kanako sa akong ministeryo. Pasaysaya ako kon nganong nakasulti ako niana.
Human ako matawo sa Hulyo 1918, ang akong mga ginikanan mipuyo sa Cap-de-la-Madeleine, usa ka gamay nga balangay sa Quebec, Canada, nga nailhan ingong Ang Dapit sa mga Milagro. Ang mga bisita nagpanon dinhi aron mosimba diha sa altar ni Birhen Maria. Bisan tuod ang gituohang mga milagro ni Maria dili mapamatud-an, ang Pulong sa Diyos nakahimo ug mga milagro diha sa mga kinabuhi sa daghang tawo samtang ang balangay mitubo ngadto sa usa ka lungsod nga may kapin sa 30,000 ka molupyo.
Sa dihang ako nag-edad ug mga 20 anyos, nakita sa akong amahan ang akong interes sa relihiyosong mga butang ug gihatag kanako ang iyang Bibliya. Sa dihang misugod ako pagbasa niana, nakurat ako sa pagkasayod gikan sa Exodo kapitulo 20 nga ang pagsimba sa larawan dayag nga gisaway. Dihadiha nawala ang akong pagsalig sa mga pagtulon-an sa Iglesya Katolika ug mihunong sa pagtambong sa Misa. Dili ko buot nga mosimba sa mga estatuwa. Mahinumdoman pa nako ang akong amahan nga miingon, “Thérèse, dili ka ba mosimba?” “Dili,” ako mitubag, “Nagbasa ako sa Bibliya.”
Ang pagbasa sa Bibliya padayong nahimong bahin sa akong kinabuhi bisan human ako maminyo niadtong Septiyembre 1938. Sanglit ang akong bana, si Rosaire, subsob nga magtrabaho sa gabii, gihimo nakong batasan ang pagbasa sa Bibliya samtang siya nagtrabaho. Sa wala madugay ako nakahinapos nga ang Diyos duna gayod ing katawhan, ug ako misugod sa pagpangita kanila.
Ang Akong Pagpangita sa Katawhan sa Diyos
Tungod sa akong nakat-onan sa simbahan, sa dihang ako bata pa, ako nahadlok nga matulog basig momata ako sa impiyerno. Aron mapakigbisogan ang maong kahadlok, akong pagasultian ang akong kaugalingon nga ang usa ka Diyos sa gugma dili motugot nga mahitabo ang usa ka makalilisang nga hitabo. Masaligon, padayon akong nagbasa sa Bibliya, nga nangita sa kamatuoran. Sama ako sa Etiopianong yunuko kinsa nagbasa apan wala makasabot.—Buhat 8:26-39.
Ang akong igsoong lalaki nga si André ug ang iyang asawa, kinsa nagpuyo sa usa ka apartment sa andana ubos kanamo, misugod sa pagtuon sa Bibliya uban sa mga Saksi ni Jehova sa mga 1957. Akong giingnan ang akong bayaw nga babaye nga pasidan-an ako pinaagi sa pagtuktok sa kisame sa dihang ang mga Saksi moabot aron sa pagsangyaw diha sa maong tinukod. Nianang paagiha mahibalo ako nga dili nako ablihan ang pultahan. Usa ka adlaw nalimot siya sa pagpasidaan kanako.
Niadtong adlawa akong giablihan ang pultahan ug nahimamat si Kay Munday, usa ka payunir, ingon sa pagtawag sa bug-os-panahong mga ministro sa mga Saksi ni Jehova. Nagsugilon siya kanako bahin sa ngalan sa Diyos, nga misaysay nga ang Diyos adunay personal nga ngalan, si Jehova. Pagbiya niya, akong gisusi ang akong Bibliya sa pagtino kon ang iyang giingon tinuod bang gisuportahan sa mga teksto sa Bibliya. Ang akong panukiduki nakapalipay kanako pag-ayo.—Exodo 6:3; Douay Version, potnot; Mateo 6:9, 10; Juan 17:6.
Sa dihang miduaw pag-usab si Kay, among gihisgotan ang doktrina sa Katoliko bahin sa Trinidad, nga nag-angkon nga ang Diyos maoy tulo ka persona sa usa ka Diyos. Sa ulahi mainampingon nakong gisusi ang akong kaugalingong Bibliya sa pagtagbaw sa akong kaugalingon nga kana wala magtudlo sa Trinidad. (Buhat 17:11) Ang akong pagtuon nagpalig-on nga si Jesus dili ingon ka gamhanan sa Diyos. Siya gilalang. Siya may sinugdanan, samtang si Jehova wala. (Salmo 90:1, 2; Juan 14:28; Colosas 1:15-17; Pinadayag 3:14) Natagbaw sa akong nakat-onan, nalipay ako sa pagpadayon sa mga panaghisgot sa Bibliya.
Usa ka adlaw sa 1958, panahon sa usa ka bagyo sa niyebe sa Nobyembre, gidapit ako ni Kay sa pagtambong sa usa ka sirkitong asembliya nga gihimo niana gayong gabhiona didto sa usa ka inabangang tigomanan. Akong gidawat ang pagdapit ug nalingaw sa programa. Human niadto, sa panaghisgot uban sa usa ka Saksi nga miduol kanako, ako nangutana, “Ang usa ka tinuod nga Kristohanon kinahanglan bang mosangyaw gikan sa balay ngadto sa balay?”
“Oo,” siya miingon, “ang maayong balita kinahanglang imantala, ug ang Bibliya nagpadayag nga ang pagduaw sa mga tawo diha sa ilang kabalayan maoy usa ka hinungdanong paagi sa pagsangyaw.”—Buhat 20:20.
Pagkadako sa akong kalipay sa iyang tubag! Kana nagpakombinser kanako nga akong nakaplagan ang katawhan sa Diyos. Kon siya miingon pang, “Dili, dili na kinahanglan,” ako magduhaduha unta nga akong nakaplagan ang kamatuoran, tungod kay nasayod ako kon unsay giingon sa Bibliya mahitungod sa pagsangyaw gikan sa balay ngadto sa balay. Sukad niadtong panahona, tulin ang akong espirituwal nga pag-uswag.
Human sa maong sirkitong asembliya, misugod ako sa pagtambong sa mga tigom sa mga Saksi ni Jehova nga gihimo sa sikbit nga lungsod sa Trois-Rivières. Si Kay ug ang iyang kauban, si Florence Bowman, mao lamang ang mga Saksi niadtong panahona nga nagpuyo sa Cap-de-la-Madeleine. Usa ka adlaw ako miingon, “Mouban ako kaninyo sa pagsangyaw ugma.” Nalipay sila nga ako mouban kanila.
Pagsangyaw sa Akong Lungsod nga Pinuy-anan
Ako naghunahuna nga ang tanan modawat sa mensahe sa Bibliya, apan akong nasayran gilayon nga dili kana mao ang kahimtang. Sa dihang si Kay ug Florence naasayn sa laing dapit, ako na lang usa sa lungsod ang nagsangyaw sa mga kamatuoran sa Bibliya gikan sa balay ngadto sa balay. Nga maisogon, mipadayon ako sa pagsangyaw nga nag-inusara sulod sa mga duha ka tuig hangtod sa pagbawtismo kanako sa Hunyo 8, 1963. Niadtong adlawa mismo ako nagpalista sa gitawag niadtong panahona nga bakasyon payunir nga pag-alagad.
Mipadayon ako ingong usa ka bakasyon payunir sulod sa usa ka tuig. Unya, si Delvina Saint-Laurent misaad nga siya moadto sa Cap-de-la-Madeleine ug mosangyaw uban kanako kas-a sa usa ka semana kon ako magregular payunir. Busa akong gipil-apan ang aplikasyon sa payunir. Ikasubo, hinuon, duha lamang ka semana una ako mosugod sa bug-os-panahong pag-alagad, namatay si Delvina. Unsay akong buhaton? Aw, ako nang napil-apan ang akong aplikasyon ug dili buot nga mousab sa akong mga plano. Busa sa Oktubre 1964, gisugdan nako ang akong karera diha sa bug-os-panahong ministeryo. Sulod sa misunod nga upat ka tuig, nag-inusara ako sa pagpamalaybalay.
Ang debotadong mga Katoliko sa Cap-de-la-Madeleine subsob nga masupakon. Ang pipila motawag sa kapolisan sa paningkamot nga pugngan ako sa pagsangyaw. Usa ka adlaw, sa akong gihisgotan sa sinugdanan, usa ka negosyante ang misulay sa paghadlok kanako pinaagi sa pagpusil sa akong tiil. Aw, kadto nakapaukay pag-ayo sa lungsod. Ang lokal nga estasyonan sa telebisyon nagtawag niana nga krusada batok sa mga Saksi ni Jehova. Ang tibuok hitabo misangpot sa maayong pagpamatuod. Wala damha, napulo ka tuig sa ulahi, usa ka paryente sa maong negosyante nga mipusil kanako nahimong Saksi mismo.
“Mga Milagro” nga Gipahinabo sa Pulong sa Diyos
Latas sa katuigan, nakita nako ang paril sa pagsupak sa mga kamatuoran sa Bibliya nga inanayng nahugno sa Cap-de-la-Madeleine. Sa mga 1968, ang laing mga Saksi mibalhin dinhi, ug ang lokal nga mga molupyo misugod sa pagsanong sa mga kamatuoran sa Bibliya. Sa sayong bahin sa katuigang 1970, sa pagkamatuod, dihay usa ka dakong pag-uswag sa gidaghanon sa mga panagtuon sa Bibliya. Kadto miabot sa punto diin akong gihangyo ang ubang mga Saksi nga modumala ug daghan sa mga panagtuon sa Bibliya nga akong gidumala aron nga ako makapadayon sa pagpakig-ambit sa balay-sa-balay nga ministeryo.
Usa ka adlaw usa ka batan-ong babaye ang midawat gikan kanako sa giya sa pagtuon sa Bibliya nga Ang Kamatuoran nga Motultol sa Kinabuhing Dayon. Ang iyang kauban niadtong panahona mao ang usa ka batan-ong lalaki nga ginganlag André, usa ka bagis-tan-awong kriminal nga miapil sa panaghisgot. Ang usa ka panaghisgot uban kang André mipukaw sa iyang interes, ug ang usa ka panagtuon sa Bibliya nasugdan. Sa wala madugay human niadto misugod siya sa pagsulti ngadto sa iyang mga higala mahitungod sa iyang nakat-onan.
Sa usa ka panahon, ako nagtuon sa Bibliya uban sa upat ka membro sa gang, nga usa kanila wala kaayoy gisulti apan naminaw pag-ayo. Ang iyang ngalan mao si Pierre. Usa ka buntag sa mga alas dos, ang akong bana ug ako nakadungog ug tuktok sa pultahan. Handurawa kining maong esena: Upat ka membro sa gang ang nagbarog didto nga may mga pangutana kanako. Maayo na lang, si Rosaire wala gayod moreklamo bahin sa maong wala-sa-panahong mga pagduaw.
Sa sinugdan ang upat ka lalaki mitambong sa mga tigom. Apan, si André ug si Pierre lamang ang mipadayon. Ilang giharmoniya ang ilang mga kinabuhi sa mga sukdanan sa Diyos ug nabawtismohan. Sulod sa kapin sa 20 ka tuig karon, ang duha ka lalaki parehong matinumanong nag-alagad kang Jehova. Sa dihang misugod sila sa pagtuon, sila ilado kaayo gumikan sa ilang kriminal nga kalihokan ug gibantayan sa mga polis. Usahay ang mga polis moabot nga mangita kanila human sa usa sa among mga panagtuon sa Bibliya o panahon sa usa ka tigom sa kongregasyon, Ako nalipay nga ako misangyaw sa “tanang matang sa mga tawo,” ug sa ingon nakasaksi mismo kon sa unsang paagi ang Pulong sa Diyos nagpahinabog mga kausaban nga dayag gayod nga milagroso.—1 Timoteo 2:4.
Kon sa sinugdan sa akong ministeryo ako giingnan nga may Kingdom Hall unya sa Cap-de-la-Madeleine ug nga kana mapuno sa katawhan ni Jehova, dili gayod ako motuo niana. Sa akong kalipay ang bugtong gamay nga kongregasyon sa kasikbit nga siyudad sa Trois-Rivières miuswag ngadto sa unom ka mauswagong mga kongregasyon nga nagtigom sa tulo ka Kingdom Hall, lakip ang usa sa Cap-de-la-Madeleine.
Sa personal nabatonan nako ang kalipay sa pagtabang sa mga 30 ka tawo nga miabot sa punto sa dedikasyon ug bawtismo. Karon, sa edad nga 78 anyos, sa pagkatinuod makaingon ako nga ako malipayon nga akong gipahinungod ang akong kinabuhi kang Jehova. Hinunoa, kinahanglang akong angkonon nga diha akoy mga pagbati sa kahigawad. Aron mabuntog ang maong mga pagbati nga malamposon, kanunay nakong buksan ang akong Bibliya ug basahon ang pipila ka teksto nga nakaparepresko pag-ayo kanako. Imposible kanako ang pagpalabay sa usa ka adlaw nga dili makabasa sa Pulong sa Diyos. Ilabinang makapadasig ang Juan 15:7, diin kini nag-ingon: “Kon kamo magapabilin nga nahiusa kanako ug ang akong mga sulti magapabilin diha kaninyo, pangayo ug bisan unsa nga buot ninyo ug kini matuman alang kaninyo.”
Maoy akong paglaom nga makita si Rosaire sa bag-ong kalibotan nga haduol na kaayo. (2 Pedro 3:13; Pinadayag 21:3, 4) Una siya mamatay niadtong 1975, siya nag-uswag pag-ayo padulong sa pagpabawtismo. Sa pagkakaron, ako determinado nga mopadayon sa bug-os-panahong ministeryo ug mopadayon sa pagmaya diha sa buluhaton ni Jehova.