Usa ka Pagduaw sa Yutang Saad
INGNON ta nga gisultihan ka sa imong higala nga aduna siyay gipalit alang kanimo—ingong usa ka gasa—usa ka bag-ong balay sa tunga sa matahom, hilom nga palibot. ‘Unsa kahay hitsura niini?’ tingali mahibulong ka. Walay duhaduha maghinamhinam ka sa pagtan-aw niining balaya mismo, sa paglakaw diha niini ug sa pagsusi sa matag lawak. Total, imo kining bag-ong balay!
Sa 1473 W.K.P., gihatagan ni Jehova ang nasod sa karaang Israel ug usa ka bag-ong pinuy-anan—ang Yutang Saad, usa ka nagtaas hiktin nga luna sa yuta nga may sukod nga mga 500 kilometros gikan sa amihanan pahabagatan ug 55 kilometros ang gilapdon, sa aberids.a Nahimutang sa gitawag nga Fertile Crescent, ang Yutang Saad maoy usa ka matahom nga dapit nga pagapuy-an, nga gitugahan ug iyang kaugalingong tagsaong mga bahin.
Apan nganong interesado ka man karon sa usa ka “pinuy-anan” nga gihatag ngadto sa lain, ilabina ngadto sa lain nga nabuhi sa dugay na kaayong panahong nangagi? Tungod kay ang kahibalo bahin niining makasaysayanhong yuta makapalambo sa imong pagsabot sa mga asoy sa Bibliya. “Diha sa yuta sa Bibliya,” misulat ang anhing Propesor Yohanan Aharoni, “ang geograpiya ug kasaysayan nalambigit gayod pag-ayo nga walay usa ang masabtan dayon kon wala ang tabang sa usa.” Dugang pa, sa mauswagong panahon niini ang Yutang Saad naghatag ug gamayng-bahin nga pananglitan kon unsay kahulogan sa Paraiso ilalom sa Gingharian sa Diyos alang sa katawhan sa tibuok yuta!—Isaias 11:9.
Sa panahon sa iyang yutan-ong ministeryo, gigamit ni Jesu-Kristo ang pamilyar nga mga talan-awon sa Yutang Saad aron sa pagtudlo ug praktikal nga mga pagtulon-an. (Mateo 13:24-32; 25:31-46; Lucas 13:6-9) Kita usab daghag makat-onan sa praktikal nga paagi sa pagtagad sa pipila ka bahin sa karaang Palestina. Manglakaw kita sa pipila sa mga lawak niini, pagaingnon pa, susihon ang pipila ka lahi nga mga bahin niining yutaa nga nagsilbing pinuy-anan sa katawhan sa Diyos sa daghang siglo. Sa atong makita unya, daghan pa ang atong makat-onan gikan sa Yutang Saad.
[Footnote]
a Ang paggamit sa “Yutang Saad” niining mga artikuloha naglantaw sa mga butang gikan sa panan-aw sa karaang mga panahon, ingon sa pagkapresentar diha sa Bibliya, ug walay kalabotan sa modernong politikanhon/relihiyosong mga pangangkon diha sa maong dapit.
[Picture Credit Line sa panid 2]
Cover: Pictorial Archive (Near Eastern History) Est.
[Picture Credit Line sa panid 3]
Garo Nalbandian