Nahinumdom Ka Ba?

Gipabilhan mo ba ang pagbasa sa dili pa dugayng mga isyu sa Ang Bantayanang Torre? Buweno, tan-awa kon makatubag ka sa mosunod nga mga pangutana:

◻ Ang mga pulong ba ni Jesus, “Kon inyong pasayloon ang mga sala ni bisan kinsang mga tawo, kini mapinasaylo kanila,” nagpasabot nga ang mga Kristohanon makapasaylo ug mga sala? (Juan 20:23) Walay Kasulatanhong pasikaranan sa paghinapos nga ang mga Kristohanon sa linangkob, o bisan ang tinudlong mga ansiyano sa kongregasyon, awtorisado sa Diyos nga magpasaylo ug mga sala. Ang konteksto sa mga pulong ni Jesus daw nagpakita nga ang mga apostol gihatagan pinaagi sa paglihok sa espiritu ug talagsaong awtoridad nga magpasaylo o dili magpasaylo sa mga sala. (Tan-awa ang Buhat 5:1-​11; 2 Corinto 12:12.)​—4/15, panid 28.

◻ Unsay talagsaon sa hubad ni J. J. Stewart Perowne sa basahon sa mga Salmo, nga unang gipatik niadtong 1864?

Sa iyang hubad si Perowne naningkamot sa pagsunod “nga suod sa porma sa Hebreohanon, sa idiom niini ug sa gramatikanhong pagkabalay sa mga pulong.” Sa pagbuhat niana siya mipabor sa pagpasig-uli sa balaang ngalan diha sa pormang “Jehova.”​—4/15, panid 31.

◻ Unsang paggiya ang gihatag ni Jesus sa iyang mga sumusunod bahin sa ilang pagpakiglabot sa mga gobyerno sa kalibotan?

Si Jesus miingon: “Busa, ibayad ang mga butang ni Cesar ngadto kang Cesar, apan ang mga butang sa Diyos ngadto sa Diyos.” (Mateo 22:21) Siya usab miingon: “Kon ang usa nga ilalom sa awtoridad magpugos kanimo nga moalagad ug usa ka milya, adto uban kaniya ug duha ka milya.” (Mateo 5:41) Si Jesus nag-ilustrar dinhi sa prinsipyo sa kinabubut-ong pagpasakop sa lehitimong mga gipangayo, sa tawhanong mga relasyon kaha o sa mga kinahanglanon sa kagamhanan nga kaharmonya sa balaod sa Diyos. (Lucas 6:27-​31; Juan 17:14, 15)​—5/1, panid 12.

◻ Unsay kahulogan sa ‘paglakaw diha sa kamatuoran’? (Salmo 86:11)

Kini naglakip sa pagsugot sa mga kinahanglanon sa Diyos ug pag-alagad kaniya sa pagkamatinumanon ug katim-os. (Salmo 25:4, 5; Juan 4:23, 24)​—5/15, panid 18.

◻ Unsay nalampos sa pagpadala ni Jehova kang Jonas sa Nineve?

Ingong resulta, ang buluhatong pagsangyaw ni Jonas sa Nineve nagpakita sa kalainan tali sa mahinulsolong mga taga-Nineve ug sa gahig-ulong mga Israelinhon, nga wala gayoy pagtuo ug pagkamapaubsanon. (Itandi ang Deuteronomio 9:6, 13; Jonas 3:4-​10.)​—5/15, panid 28.

◻ Kinsa ang Serpente ug kinsa ang “babaye” nga gihisgotan sa Genesis 3:15?

Ang Serpente dili ang ubos nga halas kondili ang usa nga migamit niini, si Satanas nga Yawa. (Pinadayag 12:9) Ang “babaye” dili si Eva kondili ang langitnong organisasyon ni Jehova, ang inahan sa iyang dinihogan-sa-espiritu nga mga alagad sa yuta. (Galacia 4:26)​—6/1, panid 9.

◻ Sa unsang paagi ang usa ka tawo makagawas sa Dakong Babilonya ug makabatog kaluwasan? (Pinadayag 18:4)

Kinahanglang bug-os niyang ibulag ang iyang kaugalingon gikan sa bakak nga relihiyosong mga organisasyon ug usab gikan sa ilang mga kostumbre ug sa espiritung ilang gipatungha, ug dayon siya mangitag luwas nga dapit sulod sa teokratikanhong organisasyon ni Jehova. (Efeso 5:7-​11)​—6/1, panid 18.

◻ Nganong kanunay hisgotan sa Kasulatan ang agila?

Gipunting sa mga magsusulat sa Bibliya ang mga kinaiya sa agila sa paghawas sa mga butang sama sa kaalam, panalipod sa Diyos, ug katulin.​—6/15, panid 8.

◻ Ang mga alagad ba sa Diyos karong adlawa nga may yutan-ong paglaom may parehong espiritu sa Diyos sama sa dinihogan-sa-espiritu nga mga Kristohanon?

Sa pagkatinuod, ang tubag maoy oo. Ang espiritu sa Diyos mabatonan sa samang sukod niining duha ka matang, ug ang kahibalo ug pagsabot parehong maabot sa duha.​—6/15, panid 31.

◻ Nganong mapuslanon alang kanato karong adlawa ang pagsusi sa sagradong pag-alagad nga gibuhat sa mga saserdote sa Israel sa templo sa Jerusalem?

Sa pagbuhat niana mas bug-os natong mapabilhan ang maluluy-ong kahikayan diin ang makasasalang mga tawo karon mahimong ikapasig-uli uban sa Diyos. (Hebreohanon 10:1-7)​—7/1, panid 8.

◻ Sa unsang paagi ang ikaduhang templo nga gitukod sa Jerusalem nakabatog mas dakong himaya kay sa usa nga gitukod ni Solomon?

Ang ikaduhang templo milungtad ug 164 ka tuig nga mas dugay pa kay sa templo ni Solomon. Daghan pang mga magsisimba gikan sa daghang nasod ang mihugop ngadto sa iyang mga sawang. Labawng hinungdanon, kining ikaduhang templo nakabatog dakong kalainan sanglit ang Anak sa Diyos, si Jesu-Kristo, nanudlo sulod sa mga sawang niini.​—7/1, panid 12, 13.

◻ Kanus-a gipatungha sa Diyos ang iyang espirituwal nga templo?

Kini maoy niadtong 29 K.P. sa dihang gipakita sa Diyos ang iyang pag-uyon sa pag-ampo sa pagbawtismo kang Jesus. (Mateo 3:16, 17) Ang pag-uyon sa Diyos sa pagpresentar sa lawas ni Jesus nagpasabot nga, sa espirituwal nga diwa, ang halaran nga mas dako kay sa templo sa Jerusalem naglihok na.​—7/1, panid 14, 15.

◻ Nganong kita angayng magmapinasayloon?

Ang pagpasaylo sa nakasala nga nangayog pasaylo hinungdanon kon buot natong mahuptan ang Kristohanong panaghiusa. Ang pagdumot ug paghambin ug kasuko dili makahatag kanatog kalinaw sa hunahuna. Kon kita dili magmapinasayloon, kita mameligro nga sa umaabot si Jehova dili na mopasaylo sa atong mga sala. (Mateo 6:14, 15)​—7/15, panid 18.

◻ Sa unsang paagi mabalaan ang mga Israelinhon?

Ang pagkabalaan posible lamang pinaagi sa suod nilang relasyon uban kang Jehova, ang balaang Diyos, ug sa ilang maputling pagsimba kaniya. Gikinahanglan nila ang tukmang kahibalo bahin sa “Labing Balaang Usa” aron simbahon siya diha sa pagkabalaan, sa pisikal ug espirituwal nga kahinlo. (Proverbio 2:1-6; 9:10)​—8/1, panid 11.