Ginatudlo ba sa Bibliya ang Pagtuo sa Kapalaran?

LIBELO! PAKAULAW! Sa dihang ang usa ka tinahod nga membro sa komunidad nagtuo nga nadaot ang iyang ngalan o dungog sa usa ka bakak nga taho, mobati siyang mapugos sa pagtul-id sa kahimtang. Basin siya mokiha pa niadtong responsable sa libelo.

Aw, ang doktrina sa suwerte sa pagkatinuod maoy pakaulaw batok sa Diyos nga Labing Gamhanan. Ang teoriya nangangkon nga ang Diyos sa personal maoy responsable sa tanang trahedya ug mga disgrasya nga nagsakit sa katawhan. Kon nagtuo ka sa kapalaran, basin ikaw naghunahuna nga ang Unibersohanong Soberano naghipos ug talaan nga mabasa nga sama sa mosunod: ‘Karong adlawa, si John maangol sa usa ka aksidente sa sakyanan, si Fatou atakehon ug malarya, ang balay ni Mamadou maguba sa usa ka bagyo’! Madasig ka ba gayod sa pag-alagad sa ingon nga Diyos?

‘Apan kon ang Diyos dili maoy responsable sa atong mga kaalaotan, nan kinsa man?’ mangutana ang mga magtutuo sa kapalaran. Si Ousmane, ang batan-ong lalaki nga gihisgotan sa nag-unang artikulo, nahibulong mismo bahin niini. Apan dili kinahanglang siya managhap o magbanabana aron makadangat sa kamatuoran. Iyang nasayran nga ang Diyos naghinlo sa iyang kaugalingon sa maong pakaulaw pinaagi sa mga pagtulon-an nga hikaplagan diha sa Iyang dinasig nga Pulong, ang Bibliya. (2 Timoteo 3:16) Nan, tagdon nato kon unsay gisulti sa Bibliya bahin niining ulohana.

Kinsay Mabasol?

Mga baha, mga bagyo, mga linog​—ang maong mga katalagman sagad gitawag nga mga pagbuot sa Diyos. Apan ang Bibliya wala magpaila nga ang Diyos maoy nagpahinabo sa maong mga katalagman. Tagda ang usa ka trahedya nga nahitabo kasiglohan kanhi sa Tungang Sidlakan. Ang Bibliya nagtug-an kanato nga ang bugtong naluwas sa maong katalagman mitaho: “Ang kalayo mismo sa Diyos [Hebreohanong pahayag nga subsob nagkahulogang kilat] nahulog gikan sa mga langit ug misilaob taliwala sa mga karnero ug sa mga sulugoon ug milamoy kanila.”​—Job 1:16.

Bisan tuod ang maong nalisang nga lalaki lagmit nagtuo nga ang Diyos maoy responsable sa kalayo, ang Bibliya nagpadayag nga Siya dili maoy mabasol. Basaha ang Job 1:7-12 sa imong kaugalingon, ug imong mahibaloan nga ang kilat gipahinabo, dili sa Diyos, kondili sa iyang Kaaway​—si Satanas nga Yawa! Dili kay ang tanang kaalaotan maoy gipahinabo nga direkta ni Satanas. Apan tin-aw, walay katarongan sa pagbasol sa Diyos.

Sa pagkamatuod, ang mga tawo kasagaran maoy mabasol inigkahitabo sa mga kadaotan. Ang mga kapakyasan sa tunghaan, sa trabahoan, o sa sosyal nga mga kalabotan mahimong mosangpot tungod sa kakulang sa paningkamot ug maayong pagbansay o tingali sa kakulang sa pagkamahunahunaon alang sa uban. Sa susama, ang mga sakit, mga aksidente, ug mga kamatayon mahimong mao ang resulta sa pagpasagad. Aw, ang yanong pagsul-ob sa bakos sa lingkoranan samtang nagmaneho mopakunhod ug dako sa purohan nga ang usa mamatay sa aksidente sa sakyanan. Ang usa ka bakos sa lingkoranan dili makapahinabog kalainan kon ang dili-mausob nga “kapalaran” maoy nagmando sa kahimtang. Ang tukmang medikal nga pag-atiman ug panghinlo magpakunhod usab ug dako sa gidaghanon sa ahat nga mga kamatayon. Bisan ang pipila ka katalagman nga kasagarang ginganlang “mga pagbuot sa Diyos,” sa pagkamatuod, maoy mga buhat sa tawo​—ang makapasubong kabilin sa sayop nga pagdumala sa tawo sa yuta.​—Itandi ang Pinadayag 11:18.

“Panahon ug Wala-Makita-Daang Hitabo”

Tinuod, adunay daghang makapasubong mga hitabo nga ang mga hinungdan niana dili kaayo tin-aw. Apan, matikdi kon unsay giingon sa Ecclesiastes 9:11: “Ako mibalik nga nakita sa silong sa adlaw nga ang matulin wala makaangkon sa lumba, ni ang mga kusgan sa gubat, ni ang maalamon usab nakaangkon sa pagkaon, ni ang mga masinabtanon usab nakaangkon sa mga bahandi, ni bisan kadtong adunay kahibalo nakaangkon sa pag-uyon; tungod kay ang panahon ug wala-makita-daang hitabo mahitabo kanilang tanan.” Busa wala diay ing katarongan sa pagtuo nga ang Maglalalang mao ang hinungdan sa mga aksidente o ang mga biktima sa aksidente sa usa ka paagi gisilotan.

Si Jesu-Kristo mismo miergo batok sa pangatarongang langkit sa kapalaran. Sa pagtumong sa usa ka trahedya nga ilado sa iyang mga mamiminaw, si Jesus nangutana: “Kadtong napulog-walo nga diha kanila natumpag ang tore sa Siloam, nga sa ingon nagpatay kanila, nagahunahuna ba kamo nga sila napamatud-ang labaw nga utangan kay sa tanang uban pang mga tawo nga nagapuyo sa Jerusalem? Sultihan ko kamo, dili gayod.” (Lucas 13:4, 5) Lagmit si Jesus nagpasangil sa katalagman, dili sa pagsalga sa Diyos, kondili sa “panahon ug wala-makita-daang hitabo.”

Ang mga Pangdaot sa Pagkadili-hingpit

Apan, komosta man ang dili-ikapatin-aw nga mga kamatayon ug mga balatian? Ang Bibliya naghatag niining pintok nga paghubit sa kahimtang sa tawo: “Diha kang Adan ang tanan nagakamatay.” (1 Corinto 15:22) Ang kamatayon nagsakit sa katawhan sukad nga ang atong katigulangang si Adan misubay sa dalan sa pagkamasupilon. Sumala sa gipasidaan sa Diyos, gibilin ni Adan sa iyang mga kaliwat ang kabilin nga kamatayon. (Genesis 2:17; Roma 5:12) Sa kataposan, ang tanang balatian masubay ngadto sa katigulangan natong tanan nga si Adan. Ang atong napanunod nga mga kahuyangan dako usab ug kalabotan sa mga kahigawad ug mga kapakyasan nga atong masinati sa kinabuhi.​—Salmo 51:5.

Tagda ang suliran sa kakabos. Ang pagtuo sa kapalaran sagad nagdasig sa mga nag-antos nga dawaton lamang ang ilang lisod nga pagkinabuhi. ‘Mao kiniy atong kapalaran,’ nagtuo sila. Ang Bibliya nagpakita, hinunoa, nga ang pagkadili-hingpit sa tawo, dili ang kapalaran, maoy mapasanginlan. Ang pipila mahimong kabos sa dihang ilang ‘anihon kon unsay ilang gipugas’ tungod sa pagkataspokan o sayop nga pagdumala sa kahinguhaan. (Galacia 6:7; Proverbio 6:10, 11) Ang di-maihap nga minilyon nag-ilaid sa kakabos tungod kay nabiktima sila sa mga tawong hakog nga anaa sa gahom. (Itandi ang Santiago 2:6.) “Ang tawo nagmando sa tawo sa iyang kadaotan,” matod sa Bibliya. (Ecclesiastes 8:9) Walay naglungtad nga ebidensiya sa pagpasangil sa tanang kakabos ngadto sa Diyos o sa kapalaran.

Pagtuo sa Kapalaran​—Makapadaot nga mga Epekto Niini

Ang lain pang makapadaning argumento batok sa pagtuo sa kapalaran mao ang mamahimong epekto sa doktrina sa suwerte diha sa mga magtutuo niana. Matod ni Jesu-Kristo: “Ang matag maayong kahoy nagapatunghag maayong bunga, apan ang matag daot nga kahoy nagapatunghag walay-pulos nga bunga.” (Mateo 7:17) Atong hisgotan ang usa ka “bunga” sa doktrina sa suwerte​—ang paagi sa pag-impluwensiya niini sa panabot sa mga tawo sa responsabilidad.

Ang usa ka maayong panabot sa personal nga responsabilidad mahinungdanon. Usa kini sa mga butang nga magdasig sa mga ginikanan sa pagbuhi sa ilang mga pamilya, sa mga trabahante sa pagbuhat sa ilang mga tahas sa binuotang paagi, sa mga pabrikante sa pagtaganag de-kalidad nga produkto. Ang pagtuo sa kapalaran mahimong magpahabol nianang panabot sa responsabilidad. Pananglitan, handurawa nga ang sakyanan sa usa ka tawo adunay daot nga manibela. Kon siya adunay hait nga panabot sa responsabilidad, siya magpaayo niana tungod sa paghunahuna sa iyang kaugalingong kinabuhi ug sa mga kinabuhi sa iyang mga pasahero. Ang usa ka magtutuo sa kapalaran, sa laing bahin, mahimong dili magpakabana sa risgo, nga mangatarongan nga mahitabo lamang ang pagkaguba kon kini ‘kabubut-on sa Diyos’!

Oo, ang pagtuo sa kapalaran mahimong daling makapausbaw sa kadanghag, kataspokan, kapakyasan sa pagdawat ug responsabilidad alang sa mga lihok sa usa, ug sa daghan pang negatibong mga kinaiya.

Usa ka Babag sa Atong Relasyon Uban sa Diyos?

Labing makadaot sa tanan, ang pagtuo sa kapalaran makapukgo sa panabot sa responsabilidad, o obligasyon, sa usa ngadto sa Diyos. (Ecclesiastes 12:13) Ang salmista nag-awhag sa tanang tawo nga “tilawi ug tan-awa nga si Jehova maayo.” (Salmo 34:8) Ang Diyos naghatag ug tinong mga kinahanglanon alang niadtong magpahimulos sa iyang pagkamaayo.​—Salmo 15:1-5.

Usa sa maong kinahanglanon mao ang paghinulsol. (Buhat 3:19; 17:30) Ang maong paghinulsol naglangkit sa pagdawat sa atong mga sayop ug paghimog gikinahanglang mga kausaban. Ingong dili-hingpit nga mga tawo, kitang tanan daghag sayop nga gikinahanglang atong hinulsolan. Apan kon ang usa ka tawo nagtuo nga siya maoy way-mahimong biktima sa kapalaran, lisod ang pagbati nga gikinahanglan ang paghinulsol o pagdawat sa responsabilidad alang sa iyang mga sayop.

Matod sa salmista mahitungod sa Diyos: “Ang imong mahigugmaong-kalulot labi pang maayo kay sa kinabuhi.” (Salmo 63:3) Bisan pa niana, ang pagtuo sa kapalaran nagkombinsir sa minilyon nga ang Diyos mao ang tigmugna sa ilang kaalaotan. Natural lamang, daghan ang nayugot kaniya tungod niini, nga nagtak-op sa ganghaan ngadto sa pagbaton nilag tinuod nga suod nga relasyon uban sa Maglalalang. Kon buot sabton, unsaon nimo pagbatig gugma alang sa usa nga giisip nimong maoy nagpahinabo sa tanan nimong suliran ug mga pagsulay? Sa ingon ang doktrina sa suwerte nagpatindog ug usa ka babag tali sa Diyos ug sa tawo.

Nahigawas sa Pagpanglupig sa Kapalaran

Ang batan-ong si Ousmane, nga gihisgotan sa sinugdan, kaniadto naulipon sa pagtuo sa kapalaran. Bisan pa niana, sa dihang ang mga Saksi ni Jehova mitabang kaniya sa pagtulotimbang sa iyang panghunahuna sa kahayag sa Bibliya, si Ousmane nadasig sa pagsalikway sa iyang pagtuo sa kapalaran. Ang mga sangpotanan mao ang dulot nga panabot sa kahupayan ug bag-o, positibong panglantaw sa kinabuhi. Labawng hinungdanon, siya nakaila kang Jehova ingong Diyos nga “maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran.”​—Exodo 34:6.

Si Ousmane nakaamgo usab nga ang Diyos, bisan pag wala magplano sa matag detalye sa atong mga kinabuhi, adunay katuyoan alang sa umaabot.a Matod sa 2 Pedro 3:13: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.” Ang mga Saksi ni Jehova nakatabang sa minilyon sa pag-ugmad sa paglaom nga mabuhing walay kataposan ingong bahin niining gisaad nga “bag-ong yuta.” Buot usab nilang motabang kanimo.

Samtang motubo ka sa tukmang kahibalo sa Bibliya, imong maila nga ang imong umaabot wala mag-agad sa gitino-daang kapalaran nga dili nimo magamhan. Ang mga pulong ni Moises ngadto sa karaang mga Israelinhon mapadapat gayod: “Gibutang ko ang kinabuhi ug ang kamatayon sa imong atubangan, ang panalangin ug ang tunglo; ug kinahanglang pilion mo ang kinabuhi aron ikaw makapabiling buhi, ikaw ug ang imong mga kaliwat, pinaagi sa paghigugma kang Jehova nga imong Diyos, pinaagi sa pagpatalinghog sa iyang tingog ug pinaagi sa pagpabilin kaniya.” (Deuteronomio 3019, 20) Oo, ikaw makahimog pagpili labot sa imong umaabot. Kini wala mag-agad sa kapalaran.

[Footnote]

[Mga hulagway sa panid 6, 7]

Kining mga katalagmana dili ‘mga pagbuot sa Diyos’

[Credit Lines]

Letrato sa U.S. Coast Guard

WHO

LETRATO SA HK 186208 /M. Grafman