Pagkinabuhi Sumala sa Balaod ni Kristo

“Padayong magpinas-anay sa mga kabug-at sa usag usa, ug sa ingon tumana ang balaod sa Kristo.”​—GALACIA 6:2.

1. Nganong ikaingon nga ang balaod ni Kristo maoy usa ka dakong puwersa alang sa kaayohan karong adlawa?

SA Rwanda, ang Hutu ug Tutsi nga mga Saksi ni Jehova nagpameligro sa ilang mga kinabuhi aron panalipdan ang usag usa gikan sa etnikong pagpamatay nga karong bag-o milukop nianang nasora. Ang mga Saksi ni Jehova sa Kobe, Hapon, kinsa namatyan ug mga membro sa pamilya sa malaglagong linog naguol pag-ayo tungod sa ilang pagkamatay. Bisan pa niana, milihok dayon sila sa pagtabang sa ubang mga biktima. Oo, ang makapalipay-sa-kasingkasing nga mga pananglitan sa tibuok kalibotan nagpasundayag nga ang balaod ni Kristo ginapadapat karong adlawa. Kini maoy gamhanang impluwensiya alang sa kaayohan.

2. Sa unsang paagi wala hisabti sa Kakristiyanohan ang tumong sa balaod ni Kristo, ug unsay atong mahimo sa pagtuman nianang balaora?

² Sa samang panahon, ginatuman ang usa ka tagna sa Bibliya bahin niining lisod nga “kataposang mga adlaw.” Daghan ang adunay “dagway sa diyosnong pagkamahinalaron” apan “nagapanghimakak sa gahom niini.” (2 Timoteo 3:1, 5) Ilabina sa Kakristiyanohan, ang relihiyon sagad pormalidad lamang, dili kinasingkasing. Kana ba maoy tungod kay lisod kaayo ang pagkinabuhi sumala sa balaod ni Kristo? Dili. Si Jesus dili mohatag kanato ug balaod nga dili masunod. Yanong wala hisabti sa Kakristiyanohan ang tumong sa maong balaod. Napakyas kini sa pagsunod niining dinasig nga mga pulong: “Padayong magpinas-anay sa mga kabug-at sa usag usa, ug sa ingon tumana ang balaod sa Kristo.” (Galacia 6:2) Atong ‘gituman ang balaod sa Kristo’ pinaagi sa pagpinas-anay sa mga kabug-at sa usag usa, dili pinaagi sa pagsundog sa mga Pariseo ug sa pagkadili-makataronganon makadugang sa mga luwan sa atong mga igsoon.

3. (a) Unsa ang pipila ka sugo nga nalakip diha sa balaod ni Kristo? (b) Nganong sayop ang paghinapos nga ang Kristohanong kongregasyon angay dili magbaton ug mga lagda gawas sa laktod nga mga sugo ni Kristo?

³ Ang balaod ni Kristo naglakip sa tanang sugo ni Kristo Jesus​—kon kaha pagwali ug pagpanudlo, paghupot sa mata nga lunsay ug yano, pagpaningkamot sa pagpakigdaitay sa atong silingan, o pagkuha sa kahugawan gikan sa kongregasyon. (Mateo 5:27-30; 18:15-17; 28:19, 20; Pinadayag 2:14-16) Sa pagkatinuod, ang mga Kristohanon obligado sa pagbantay sa tanang sugo diha sa Bibliya nga gitumong ngadto sa mga sumusunod ni Kristo. Ug adunay dugang pa. Ang organisasyon ni Jehova, ingon man ang indibiduwal nga mga kongregasyon, kinahanglang maghan-ay ug kinahanglanong mga lagda ug mga pamaagi aron mapatunhay ang kahapsay. (1 Corinto 14:33, 40) Aw, ang mga Kristohanon dili gani mahimong magkatigom kon sila walay mga lagda bahin sa kon kanus-a, kon diin, ug kon unsaon paghimo ang maong mga tigom! (Hebreohanon 10:24, 25) Ang pagkooperar sa makataronganong mga latid nga gibutang niadtong gihatagag awtoridad sa organisasyon usa usab ka bahin sa pagtuman sa balaod ni Kristo.​—Hebreohanon 13:17.

4. Unsa ang matukmorong puwersa luyo sa maputling pagsimba?

⁴ Bisan pa niana, ang matuod nga mga Kristohanon dili magtugot nga ang ilang pagsimba mahimong way-kahulogang kahan-ayan sa mga balaod. Sila wala mag-alagad kang Jehova tungod lamang kay gisugo sila sa pagbuhat niana sa usa ka tawo o organisasyon. Hinunoa, ang matukmorong puwersa nga nagpaluyo sa ilang pagsimba mao ang gugma. Si Pablo misulat: “Ang gugma sa Kristo nagapugos kanato.” (2 Corinto 5:14, potnot) Gisugo ni Jesus ang iyang mga sumusunod sa paghigugma sa usag usa. (Juan 15:12, 13) Ang nagsakripisyo-sa-kaugalingong gugma mao ang pasikaranan sa balaod ni Kristo, ug kini nagapugos o nagapalihok sa matuod nga mga Kristohanon sa bisan diin, diha sa pamilya ug sa kongregasyon. Tan-awon nato kon sa unsang paagi.

Diha sa Pamilya

5. (a) Sa unsang paagi matuman sa mga ginikanan ang balaod ni Kristo diha sa panimalay? (b) Unsa ang gikinahanglan sa mga anak gikan sa ilang mga ginikanan, ug unsang mga babag ang kinahanglang buntogon sa pipila ka ginikanan aron itagana kana?

⁵ Si apostol Pablo misulat: “Mga bana, padayong higugmaa ang inyong mga asawa, maingon nga ang Kristo usab nahigugma sa kongregasyon ug mitugyan sa iyang kaugalingon alang niini.” (Efeso 5:25) Sa dihang ang usa ka bana magsundog kang Kristo ug magtratar sa iyang asawa nga may gugma ug pagkamasinabtanon, iyang gituman ang usa ka bililhong kinaiyahan sa balaod ni Kristo. Dugang pa, dayag nga gipakita ni Jesus ang pagmahal alang sa mga bata, nga nagkugos kanila, nagpandong sa iyang kamot kanila, ug nagpanalangin kanila. (Marcos 10:16) Ang mga ginikanan nga nagtuman sa balaod ni Kristo magpakita usab ug pagmahal alang sa ilang mga anak. Tinuod, adunay mga ginikanan nga malisdan sa pagsundog sa panig-ingnan ni Jesus niining bahina. Ang pipila sa kinaiyanhon dili mapadayganon. Mga ginikanan, ayaw itugot nga ang maong mga hinungdan magpugong kaninyo sa pagpakita sa inyong mga anak sa gugma nga inyong gibati alang kanila! Dili igo nga kamo nahibalo nga gihigugma ninyo ang inyong mga anak. Kinahanglang sila mahibalo usab niini. Ug dili sila mahibalo niini gawas nga mangita kamog mga paagi sa pagpakita sa inyong gugma.​—Itandi ang Marcos 1:11.

6. (a) Ang mga bata ba nagkinahanglan ug mga lagda sa mga ginikanan, ug nganong kanay imong tubag? (b) Unsang nagpahiping katarongan alang sa mga lagda sa panimalay ang kinahanglang masabtan sa mga anak? (c) Unsang mga kapeligrohan ang malikayan sa dihang ang balaod ni Kristo maglungtad diha sa panimalay?

⁶ Sa samang panahon, ang mga bata nagkinahanglag mga lagda, nga nagpasabot nga ang ilang mga ginikanan kinahanglang magbutang ug mga lagda ug usahay magpatuman niining mga lagdaa pinaagi sa disiplina. (Hebreohanon 12:7, 9, 11) Bisan pag ingon, ang mga anak kinahanglang tabangan nga mauswagon sa pagsabot sa nagpahiping katarongan sa maong mga lagda: ang ilang mga ginikanan nahigugma kanila. Ug kinahanglang mahibalo sila nga ang gugma mao ang labing maayong katarongan sa ilang pagsugot sa ilang mga ginikanan. (Efeso 6:1; Colosas 3:20; 1 Juan 5:3) Ang tumong sa usa ka mailahong ginikanan mao ang pagtudlo sa mga bata nga gamiton ang ilang “gahom sa pagpangatarongan” aron ngadtongadto sila mohimog maayong mga desisyon sa ilang kaugalingon. (Roma 12:1; itandi ang 1 Corinto 13:11.) Sa laing bahin, ang mga lagda angay nga dili kaayo daghan o ang disiplina mapintas kaayo. Si Pablo nag-ingon: “Kamong mga amahan, ayaw palagota ang inyong mga anak, aron sila dili magminghoy.” (Colosas 3:21; Efeso 6:4) Sa dihang ang balaod ni Kristo maglungtad diha sa panimalay, walay dapit ang disiplina nga gipadapat nga walay-pagpugong nga kasuko o uban ang makapahiubos nga pagtamay. Sa ingon nga panimalay, ang mga bata mobating luwas ug mapalig-on, dili nabug-atan o nahugno.​—Itandi ang Salmo 36:7.

7. Sa unsang mga paagi ang mga balayng Bethel mahimong maghatag ug panig-ingnan kon bahin sa pagbutang ug mga lagda diha sa panimalay?

⁷ Ang pipila nga nakaduaw sa mga balayng Bethel sa tibuok kalibotan nag-ingon nga kana sila maayong mga panig-ingnan sa katimbang kon bahin sa mga lagda alang sa usa ka pamilya. Bisan pag gilangkoban sa dagko nang mga tawo, ang maong mga institusyon nagalihok nga sama kaayog mga pamilya.a Ang mga kalihokan sa Bethel maoy makuti ug nagkinahanglag ubay-ubay nga mga lagda​—tinong labaw pa kay sa gikinahanglan sa kasarangang pamilya. Bisan pa niana, ang mga ansiyano nga nagapanguna diha sa mga puy-anang Bethel, mga opisina, ug sa mga palakaw sa pabrika naningkamot sa pagpadapat sa balaod ni Kristo. Giisip nila nga ilang asaynment dili lamang ang pag-organisar sa buluhaton kondili ang pagpausbaw usab sa espirituwal nga pag-uswag ug sa “kangaya kang Jehova” taliwala sa ilang isigkamagbubuhat. (Nehemias 8:10) Busa, sila naningkamot sa pagbuhat sa mga butang sa positibo ug makapadasig nga paagi ug naningkamot nga mahimong makataronganon. (Efeso 431, 32) Dili katingad-ang ang mga pamilyang Bethel ilado tungod sa ilang mangayaong espiritu!

Diha sa Kongregasyon

8. (a) Unsay angay nga mahimong atong tumong sa tanang panahon diha sa kongregasyon? (b) Ubos sa unsang mga kahimtang nga ang pipila nangayog mga lagda o nagsulay sa paggamag mga lagda?

⁸ Diha sa kongregasyon maoy atong tumong usab ang pagpalig-onay sa usag usa diha sa espiritu sa gugma. (1 Tesalonica 5:11) Busa ang tanang Kristohanon angay nga magbantay nga dili dugangan ang mga kabug-at sa uban pinaagi sa pagbuotbuot nga ipasunod ang ilang kaugalingong mga ideya diha sa mga butang nga pagadesisyonan nga personal. Usahay, ang pipila mosulat sa Watch Tower Society nga mangayog mga lagda bahin sa mga butang nga sama sa kon unsang panghunahuna ang ilang batonan bahin sa tinong mga pelikula, mga libro, ug bisan mga dulaan. Ugaling lang, ang Sosyedad dili awtorisado sa pag-usisa nianang mga butanga ug sa pagluwat ug mga desisyon bahin niana. Sa kadaghanang kahimtang, kini mga butang nga angayng desisyonan sa matag indibiduwal o ulo sa pamilya, nga gipasukad sa iyang gugma sa mga prinsipyo sa Bibliya. Ang uban makiling sa paghimong mga lagda sa mga sugyot ug mga latid sa Sosyedad. Pananglitan, sa Marso 15, 1996, isyu sa Ang Bantayanang Torre, dihay usa ka maayong artikulo nga nagdasig sa mga ansiyano sa paghimog regular nga mga pagduaw ingong magbalantay sa mga membro sa kongregasyon. Ang katuyoan ba mao ang pagpahimutang ug mga lagda? Dili. Bisan pag kadtong makasunod sa mga sugyot makabatog daghang kaayohan, ang pipila ka ansiyano dili makaarang sa pagbuhat niana. Sa susama, ang artikulong “Mga Pangutana Gikan sa mga Magbabasa” sa Abril 1, 1995, isyu sa Ang Bantayanang Torre nagpasidaan batok sa pagkebra sa dignidad sa okasyon sa bawtismo pinaagi sa paghimo sa mga hingapin, sama sa makisaw nga pagsalosalo o pag-organisar ug mga selebrasyon. Ang pipila nagmapig-oton sa pagpadapat niining tambaga, nga naghimo pag usa ka lagda nga ang pagpadalag makapalig-ong kard sa maong okasyon maoy sayop!

9. Nganong hinungdanon nga atong likayan ang pagkahimong sobra ka hinawayon ug mahukmanon sa usag usa?

⁹ Palandonga, usab, nga kon “ang hingpit nga balaod nga iya sa kagawasan” maoy maglungtad sa atong taliwala, kinahanglang dawaton nato nga dili magkapareho ang tanang Kristohanong mga tanlag. (Santiago 1:25) Angay ba natong himoong isyu kon ang mga tawo adunay indibiduwal nga mga pagpili nga dili maglapas sa Kasulatanhong mga prinsipyo? Dili. Ang atong pagbuhat niana makapabahinbahin. (1 Corinto 1:10) Si Pablo, sa nagpasidaan kanato batok sa paghukom sa isigka-Kristohanon, miingon: “Ngadto sa iyang kaugalingong agalon siya magbarog o mapukan. Sa pagkatinuod, siya mapabarog, kay si Jehova makapabarog kaniya.” (Roma 14:4) May kapeligrohan nga dili kita makapahimuot sa Diyos kon kita mosultig batok sa usag usa bahin sa mga butang nga angay itugyan sa tinagsa ka tanlag.​—Santiago 4:10-12.

10. Kinsay giasayn sa pagbantay sa kongregasyon, ug sa unsang paagi angay nga atong suportahan sila?

¹⁰ Pagahinumdoman nato, usab, nga ang mga ansiyano giasayn sa pagbantay sa panon sa Diyos. (Buhat 20:28) Sila anaa aron motabang. Angay nga dili kita magpanuko sa pagduol kanila alang sa tambag, kay sila maoy mga estudyante sa Bibliya ug nasinati sa nahisgotan diha sa literatura sa Watch Tower Society. Inigkakita sa mga ansiyano sa panggawi nga lagmit mosangpot sa paglapas sa Kasulatanhong mga prinsipyo, sa way-kahadlok motanyag sila ug gikinahanglang tambag. (Galacia 6:1) Ginasunod sa mga membro sa kongregasyon ang balaod ni Kristo pinaagi sa pagkooperar sa maong minahal nga mga magbalantay, kinsa maoy nagapanguna sa ilang taliwala.​—Hebreohanon 13:7.

Mga Ansiyano Nagpadapat sa Balaod ni Kristo

11. Sa unsang paagi ang mga ansiyano magpadapat sa balaod ni Kristo diha sa kongregasyon?

¹¹ Ang mga ansiyano ikag nga motuman sa balaod ni Kristo diha sa kongregasyon. Sila nagapanguna sa pagwali sa maayong balita, nagtudlo gikan sa Bibliya aron maabot ang mga kasingkasing ug, ingong mahigugmaon, malumong mga magbalantay, makigsulti ngadto sa “magul-anong mga kalag.” (1 Tesalonica 5:14) Ginalikayan nila ang di-kristohanong mga tinamdan nga naglungtad diha sa daghan kaayong mga relihiyon sa Kakristiyanohan. Tinuod, kining kalibotana tuling nagakadaot, ug sama kang Pablo, ang mga ansiyano mahimong mobatig kabalaka alang sa panon; apan huptan nila ang katimbang samtang gitagad nila ang maong mga alatimanon.​—2 Corinto 11:28.

12. Sa dihang ang usa ka Kristohanon moduol sa usa ka ansiyano alang sa tabang, sa unsang paagi mahimong mosanong ang ansiyano?

¹² Pananglitan, ang usa ka Kristohanon tingali buot mokonsulta sa usa ka ansiyano bahin sa usa ka hinungdanong butang nga wala mahisgoti sa direktang Kasulatanhong reperensiya o nagkinahanglan sa pagpatimbang sa nagkalainlaing Kristohanong mga prinsipyo. Tingali gitanyagan siyag usa ka promosyon sa trabaho nga adunay mas dakong suweldo apan mas dakong responsabilidad. O ang di-matinuohong amahan sa usa ka batan-ong Kristohanon mahimong dunay mga gipabuhat sa iyang anak nga tingali makaapektar sa iyang ministeryo. Sa maong mga kahimtang ang ansiyano molikay sa paghatag ug personal nga opinyon. Hinunoa, lagmit ablihan niya ang Bibliya ug tabangan ang indibiduwal nga mangatarongan pinasukad sa nahiangayng mga prinsipyo. Mahimong gamiton niya ang Watch Tower Publications Index, kon duna, sa pagkaplag kon unsay gisulti sa “matinumanon ug mabuot nga ulipon” bahin sa ulohan diha sa mga panid sa Ang Bantayanang Torre ug sa ubang mga basahon. (Mateo 24:45) Unsa man kon ang Kristohanon sa ulahi mohimog desisyon nga sa hunahuna sa ansiyano daw dili maalamon? Kon ang desisyon dili laktod nga molapas sa mga prinsipyo o mga balaod sa Bibliya, masayran sa Kristohanon nga giila sa ansiyano ang katungod sa indibiduwal sa paghimo sa maong desisyon, nga nasayod nga “ang matag usa magapas-an sa iyang kaugalingong luwan.” Bisan pa niana, ang Kristohanon angayng mahinumdom nga “bisan unsay ginapugas sa usa ka tawo, kini usab ang iyang anihon.”​—Galacia 6:5, 7.

13. Inay mohatag ug laktod nga mga tubag sa mga pangutana o mohatag sa ilang kaugalingong mga opinyon, nganong ang mga ansiyano motabang sa uban nga mangatarongan bahin sa mga butang?

¹³ Nganong ang eksperyensiyadong ansiyano molihok sa maong paagi? Tungod sa labing menos duha ka katarongan. Una, giingnan ni Pablo ang usa ka kongregasyon nga siya dili ‘ang agalon sa ilang pagtuo.’ (2 Corinto 1:24) Ang ansiyano, sa pagtabang sa iyang igsoon nga mangatarongan pinasukad sa Kasulatan ug sa paghimo sa iyang desisyon nga gipasukad sa kahibalo, nagasundog sa tinamdan ni Pablo. Giila niya nga adunay mga limitasyon ang iyang awtoridad, maingon nga giila ni Jesus nga may mga limitasyon ang iyang awtoridad. (Lucas 12:13, 14; Judas 9) Sa samang panahon, ang mga ansiyano motanyag dayon ug makatabang, pintok pa, Kasulatanhong tambag kon gikinahanglan. Ikaduha, siya nagabansay sa iyang isigka-Kristohanon. Si apostol Pablo miingon: “Ang gahi nga pagkaon ilaha sa hamtong nga mga tawo, kanilang kinsa pinaagi sa pagginamit nakabansay sa ilang kagahom sa pag-ila nga mailhan ang husto ug ang sayop.” (Hebreohanon 5:14) Busa, aron motubo sa pagkahamtong, kinahanglang atong gamiton ang atong mga gahom sa pag-ila, nga dili kanunayng magsalig sa laing tawo sa paghimo sa atong mga desisyon. Ang ansiyano, pinaagi sa pagpakita sa iyang isigka-Kristohanon kon unsaon pagpangatarongan pinasukad sa Kasulatan, sa ingong paagi nagatabang kaniya sa pag-uswag.

14. Sa unsang paagi ang mga hamtong makapakita nga sila nagsalig kang Jehova?

¹⁴ Kita mahimong magbaton ug pagtuo nga si Jehova nga Diyos pinaagi sa iyang balaang espiritu mag-impluwensiya sa mga kasingkasing sa matuod nga mga magsisimba. Sa ingon, ang hamtong nga mga Kristohanon maghaylo sa mga kasingkasing sa ilang mga igsoon, nga mangaliyupo kanila, sama sa gibuhat ni apostol Pablo. (2 Corinto 8:8; 10:1; Filemon 8, 9) Nasayod si Pablo nga ang mga dili-matarong ilabina, dili mga matarong, ang nagkinahanglag detalyadong mga balaod aron sila magagawi sa tukmang paagi. (1 Timoteo 1:9) Gipahayag niya, dili ang katahap o kaway-pagsalig, kondili pagtuo diha sa iyang mga igsoon. Ngadto sa usa ka kongregasyon siya misulat: “Kami adunay pagsalig diha sa Ginoo maylabot kaninyo.” (2 Tesalonica 3:4) Ang pagtuo, pagsalig, ug pagpiyal ni Pablo tinong dakog nahimo sa pagpalihok sa maong mga Kristohanon. Ang mga ansiyano ug nagapanawng mga magtatan-aw karong adlawa adunay susamang mga tumong. Pagkamakapalig-on ang maong matinumanong mga tawo, samtang sila mahigugmaong nagabantay sa panon sa Diyos!​—Isaias 32:1, 2; 1 Pedro 5:1-3.

Pagkinabuhi Sumala sa Balaod ni Kristo

15. Unsay pipila ka pangutana nga atong ikasukna sa atong kaugalingon sa pagsusi kon kita ba nagapadapat sa balaod ni Kristo diha sa atong relasyon uban sa atong mga igsoon?

¹⁵ Kitang tanan kinahanglang magsusi sa atong kaugalingon nga regular sa pagsusi kon kita ba nagkinabuhi sumala sa balaod ni Kristo ug nagpausbaw niana. (2 Corinto 13:5) Sa tinuoray, kitang tanan makabatog kaayohan pinaagi sa pagsukna: ‘Ako ba makapalig-on o hinawayon? Ako ba balanse o hingapin? Nagpakita ba akog konsiderasyon sa uban o mopugos sa akong kaugalingong mga katungod?’ Ang usa ka Kristohanon dili mosulay sa pagdiktar kon unsang mga lakang ang angay o dili angayng himoon sa iyang igsoon sa mga butang nga wala hisgoti sa tino diha sa Bibliya.​—Roma 12:1; 1 Corinto 4:6.

16. Sa unsang paagi makatabang kita niadtong may negatibong mga panglantaw sa ilang kaugalingon, sa ingon magtuman sa usa ka bililhong kinaiyahan sa balaod ni Kristo?

¹⁶ Niining lisod nga kapanahonan, hinungdanon nga mangita kitag mga paagi sa pagdasigay sa usag usa. (Hebreohanon 10:24, 25; itandi ang Mateo 7:1-5.) Kon tan-awon nato ang atong mga igsoong lalaki ug mga babaye, dili ba ang ilang maayong mga hiyas labi pang makahuloganon kanato kay sa ilang mga kahuyangan? Alang kang Jehova, ang matag usa maoy bililhon. Ikasubo, dili ang tanan mobati niana, bisan bahin sa ilang kaugalingon. Daghan ang lagmit makakita lamang sa ilang personal nga mga depekto ug mga pagkadi-hingpit. Sa pagpalig-on sa maong mga tawo​—ug sa uban​—masulayan ba nato ang pagpakigsulti sa usa o duha ka tawo sa matag tigom, nga ipahibalo kanila kon nganong atong gipabilhan ang ilang presensiya ug ang hinungdanong amot nga ilang gihimo diha sa kongregasyon? Pagkamakapangaya ang pagpagaan sa ilang palas-anon niining paagiha ug sa ingon matuman ang balaod ni Kristo!​—Galacia 6:2.

Ginapadapat ang Balaod ni Kristo!

17. Sa unsang nagkalainlaing mga paagi nga imong makitang ang balaod ni Kristo ginapadapat diha sa inyong kongregasyon?

¹⁷ Ang balaod ni Kristo ginapadapat diha sa Kristohanong kongregasyon. Ato kining makita sa matag adlaw​—sa dihang ang isigka-Saksi maikagong magpakig-ambit sa maayong balita, sa dihang sila maghupay ug magdasigay sa usag usa, sa dihang sila manlimbasog sa pag-alagad kang Jehova bisan pa sa labing lisod nga mga suliran, sa dihang ang mga ginikanan maningkamot sa pagmatuto sa ilang mga anak sa paghigugma kang Jehova uban ang mangayaong mga kasingkasing, sa dihang ang mga magtatan-aw magtudlo sa Pulong sa Diyos uban ang gugma ug pagkamadasigon, nga magadasig sa panon nga batonan ang nagdilaab nga kasibot diha sa pag-alagad kang Jehova sa walay kataposan. (Mateo 28:19, 20; 1 Tesalonica 5:11, 14) Sa dihang ingong mga indibiduwal atong ipadapat ang balaod ni Kristo diha sa atong kaugalingong mga kinabuhi, pagkadako sa kangaya sa kasingkasing ni Jehova! (Proverbio 23:15) Gusto niyang ang tanan nga nahigugma sa iyang hingpit nga balaod mabuhing walay kataposan. Sa umaabot nga Paraiso, atong makita ang panahon nga ang katawhan hingpit, ang panahon nga walay mga maglalapas sa balaod, ug panahon nga ang matag kiling sa atong mga kasingkasing magamhan na. Pagkamahimayaong ganti tungod sa pagkinabuhi sumala sa balaod ni Kristo!

[Footnote]

Unsay Imong Hunahuna?

◻ Nganong ang Kakristiyanohan wala makasabot sa tumong sa balaod ni Kristo?

◻ Sa unsang paagi atong mapadapat ang balaod ni Kristo diha sa pamilya?

◻ Aron mapadapat ang balaod ni Kristo diha sa kongregasyon, unsay kinahanglang atong likayan, ug unsay kinahanglang atong buhaton?

◻ Sa unsang paagi ang mga ansiyano mahimong magmasinugtanon sa balaod ni Kristo diha sa ilang mga pagpakiglabot sa kongregasyon?

[Hulagway sa panid 23]

Ang imong anak nanginahanglan pag-ayo sa gugma

[Hulagway sa panid 24]

Pagkamakapalig-on ang atong mahigugmaong mga magbalantay!