Kon Unsaon sa Nagapanawng mga Magtatan-aw sa Pag-alagad Ingong Matinumanong mga Tinugyanan

“Sumala sa nadawat nga gasa sa matag usa, gamita kini sa pag-alagad sa usag usa ingon nga maayong mga tinugyanan sa dili-takos nga kalulot sa Diyos nga gipahayag sa nagkadaiyang paagi.”​—1 PEDRO 4:10.

1, 2. (a) Unsaon nimo paghubit sa pulong “tinugyanan”? (b) Kinsay nalakip sa mga tinugyanan nga gigamit sa Diyos?

GIGAMIT ni Jehova ang tanang matinumanong mga Kristohanon ingong mga tinugyanan. Ang usa ka tinugyanan kasagarang maoy usa ka sulugoong gipiyalan sa usa ka panimalay. Siya mahimong nagadumala usab sa mga kalihokan sa negosyo sa iyang agalon. (Lucas 16:1-3; Galacia 4:1, 2) Gitawag ni Jesus ang iyang lawas sa maunongong mga dinihogan sa yuta nga “kasaligang tinugyanan.” Ngadto niini nga tinugyanan nga gipiyal niya ang “tanan niyang mga gipanag-iya,” lakip ang mga buluhatong pagsangyaw sa Gingharian.​—Lucas 12:42-​44; Mateo 24:14, 45.

² Si apostol Pedro miingon nga ang tanang Kristohanon maoy mga tinugyanan sa dili-takos nga kalulot sa Diyos nga gipahayag sa nagkalainlaing mga paagi. Ang matag Kristohanon may usa ka dapit diin iyang matuman nga matinumanon ang pagkatinugyanan. (1 Pedro 4:10) Ang tinudlong Kristohanong mga ansiyano maoy mga tinugyanan, ug taliwala kanila mao ang nagapanawng mga magtatan-aw. (Tito 1:7) Sa unsang paagi pagalantawon kining nagapanawng mga ansiyano? Unsang mga hiyas ug mga tumong ang angay nilang batonan? Ug sa unsang paagi makahatag sila ug labing dako nga kaayohan?

Mapasalamaton sa Ilang Pag-alagad

3. Nganong ang nagapanawng mga magtatan-aw mahimong matawag nga “maayong mga tinugyanan”?

³ Nagsulat ngadto sa usa ka nagapanawng magtatan-aw ug sa iyang asawa, usa ka Kristohanong magtiayon miingon: “Buot namong ipahayag ang among pagpasalamat sa tanang panahon ug gugma nga inyong gihatag kanamo. Ingong usa ka pamilya, kami nakabenepisyo ug dako gikan sa tanan ninyong pagdasig ug tambag. Nasayod kami nga kinahanglan kaming magpadayon sa pag-uswag sa espirituwal, apan uban sa tabang ni Jehova ug sa mga igsoong lalaki ug babaye nga sama kaninyo, ang nagdakong mga kasakit ginahimong mas magaan.” Ang mga pulong nga ingon niini masubsob tungod kay ang nagapanawng mga magtatan-aw nagpakitag personal nga interes sa mga isigkamagtutuo, sama nga ang usa ka maayong tinugyanan nagaatiman ug maayo sa mga panginahanglan sa panimalay. Ang uban maoy maayong mga mamumulong. Daghan ang batid diha sa buluhatong pagsangyaw, samtang ang uban nailhan sa ilang pagkamainiton ug kahangawa. Pinaagi sa pag-ugmad ug paggamit sa maong mga gasa sa pag-alagad sa uban, ang nagapanawng mga magtatan-aw hustong matawag nga “maayong mga tinugyanan.”

4. Unsang pangutana ang pagatagdon karon?

⁴ “Ang gipangita diha sa mga tinugyanan mao nga ang usa ka tawo makaplagang kasaligan,” nagsulat si apostol Pablo. (1 Corinto 4:2) Ang pag-alagad sa kaubang mga Kristohanon diha sa nagkalainlaing kongregasyon matag semana maoy usa ka talagsaon ug makapalipay nga pribilehiyo. Bisan pa niana, kini usa usab ka bug-at nga responsabilidad. Nan, sa unsang paagi makatuman nga matinumanon ug malamposon ang nagapanawng mga magtatan-aw sa ilang pagkatinugyanan?

Malamposong Pagtuman sa Ilang Pagkatinugyanan

5, 6. Nganong ang mainampoong pagsalig kang Jehova hinungdanon kaayo sa kinabuhi sa usa ka nagapanawng magtatan-aw?

⁵ Ang mainampoong pagsalig kang Jehova hinungdanon kon ang nagapanawng mga magtatan-aw mahimong magmalamposong mga tinugyanan. Tungod sa ilang eskedyul ug daghang responsabilidad, sila usahay mobating nabug-atan. (Itandi ang 2 Corinto 5:4.) Busa kinahanglan silang molihok nga uyon sa awit ni salmistang David: “Itugyan mo kang Jehova mismo ang imong palas-anon, ug siya magalig-on kanimo. Dili gayod niya pasagdan nga matarog ang matarong.” (Salmo 55:22) Makahupay, usab, ang mga pulong ni David: “Dalayegon si Jehova, nga sa matag adlaw nagapas-an sa atong palas-anon.”​—Salmo 68:19.

⁶ Diin kuhaa ni Pablo ang kusog sa pag-atiman sa iyang espirituwal nga mga responsabilidad? “Sa tanang butang ako adunay kusog tungod kaniya nga nagahatag ug gahom kanako,” siya misulat. (Filipos 4:13) Oo, si Jehova nga Diyos mao ang Tuboran sa kusog ni Pablo. Sa susama, si Pedro nagtambag: “Kon ang usa magaalagad, paalagara siya ingon nga nagasandig diha sa kusog nga ginahatag sa Diyos; aron nga sa tanang butang mahimaya ang Diyos pinaagi ni Jesu-Kristo.” (1 Pedro 4:11) Usa ka igsoon nga usa ka nagapanawng magtatan-aw sa daghang katuigan nagpasiugda sa panginahanglan sa pagsalig sa Diyos, nga nag-ingon: “Dangop kanunay kang Jehova sa pagdumala sa mga problema, ug pangitaa ang tabang sa iyang organisasyon.”

7. Sa unsang paagi ang pagkatimbang may bahin sa buluhaton sa nagapanawng magtatan-aw?

⁷ Ang pagkatimbang gikinahanglan alang sa usa ka malamposong nagapanawng magtatan-aw. Sama sa ubang mga Kristohanon, siya maningkamot nga “matino ang mas hinungdanong mga butang.” (Filipos 1:10)a Kon ang lokal nga mga ansiyano may mga pangutana bahin sa pipila ka butang, maalamon alang kanila nga mangutana sa nagaduawng magtatan-aw sa sirkito. (Proverbio 11:14; 15:22) Lagmit, ang iyang timbang nga mga hunahuna ug Kasulatanhong tambag mapamatud-ang mapuslanon kaayo samtang magpadayon ang mga ansiyano sa pagdumala niana inigbiya niya sa kongregasyon. Sa susama niana nga kahimtang, nga gisultihan ni Pablo si Timoteo: “Ang mga butang nga imong nadungog kanako nga may pagpaluyo sa daghang saksi, kining mga butanga ipiyal sa kasaligang mga tawo, kinsa, sa baylo, mahimong sa igo kuwalipikado sa pagtudlo sa uban.”​—2 Timoteo 2:2.

8. Nganong ang pagtuon sa Bibliya, panukiduki, ug pagpamalandong hinungdanon?

⁸ Ang pagtuon, panukiduki, ug pagpamalandong sa Kasulatan kinahanglanon sa paghatag ug maayong tambag. (Proverbio 15:28) Usa ka magtatan-aw sa distrito miingon: “Sa dihang nakigmiting sa mga ansiyano, dili kita angayng mahadlok sa pagdawat nga kita wala masayod sa tubag sa usa ka partikular nga pangutana.” Ang pagpaningkamot nga mabatonan “ang kaisipan ni Kristo” bahin sa usa ka butang magpaposible sa paghatag ug tambag nga pinasukad-sa-Bibliya nga motabang sa uban sa pagsunod sa kabubut-on sa Diyos. (1 Corinto 2:16) Usahay kinahanglang mosulat ang nagapanawng magtatan-aw sa Watch Tower Society alang sa pagtultol. Sa bisan unsang kahimtang, ang pagtuo kang Jehova ug ang gugma sa kamatuoran ang labawng hinungdanon kay sa impresyon o sa kalarino manulti. Imbes miabot nga may “paghinobra sa sinultihan o sa kaalam,” gisugdan ni Pablo ang iyang ministeryo sa Corinto “sa kahuyang ug sa kahadlok ug uban ang labihan nga pagkurog.” Naghimo ba kini kaniya nga dili-epektibo? Sa kasukwahi, kini nakatabang sa mga taga-Corinto nga makabaton ug pagtuo, nga “dili diha sa kaalam sa tawo, apan diha sa gahom sa Diyos.”​—1 Corinto 2:1-5.

Ubang Hinungdanong mga Hiyas

9. Nganong ang empatiya gikinahanglan sa nagapanawng mga ansiyano?

⁹ Ang empatiya motabang sa nagapanawng mga magtatan-aw sa pagkab-ot sa maayong mga resulta. Giawhag ni Pedro ang tanang Kristohanon nga ‘magpakitag pagbati sa isigkaingon,’ o “magmabination.” (1 Pedro 3:8, potnot) Gibati sa usa ka magtatan-aw sa sirkito ang panginahanglan nga ‘magbatog interes sa tanan diha sa kongregasyon ug magmatinagdanon gayod.’ Uban sa samang espiritu, si Pablo misulat: “Magmaya uban sa mga tawong nagamaya; hilak uban sa mga tawong nanghilak.” (Roma 12:15) Ang maong tinamdan magpalihok sa nagapanawng mga magtatan-aw sa paghimog kinasingkasing nga mga paningkamot sa pagsabot sa mga problema ug mga sirkumstansiya sa mga isigkamagtutuo. Nan sila makahatag ug makapalig-ong tambag sa Kasulatan nga makahimog tinuod nga kaayohan kon kini ipadapat. Usa ka magtatan-aw sa sirkito nga maayo kaayong mopakita ug empatiya nakadawat niining sulata gikan sa usa ka kongregasyon duol sa Turin, Italya: “Kon buot ka nga mahimong makaiikag, magmaikagon; kon buot ka nga mahimong makapahimuot, magmahimut-anon; kon buot ka nga mahimong higugmaon, magmahigugmaon; kon buot ka nga tabangan, magmaandam sa pagtabang. Kini ang among nakat-onan gikan kanimo!”

10. Unsay giingon sa mga magtatan-aw sa sirkito ug distrito bahin sa pagkamapainubsanon, ug unsang panig-ingnan ang gipakita ni Jesus niining bahina?

¹⁰ Ang pagkamapainubsanon ug daling maduol motabang sa nagapanawng mga magtatan-aw nga makahimog dakong kaayohan. Usa ka magtatan-aw sa sirkito nag-ingon: “Hinungdanon kaayo ang paghupot ug mapainubsanong tinamdan.” Iyang gipasidan-an ang bag-ong mga magtatan-aw sa sirkito: “Ayaw tugoti ang inyong kaugalingon nga magpaimpluwensiya nga dili angay sa mas sapiang mga igsoon tungod sa ilang mahimo alang kaninyo, ni maglimite sa inyong pagpakighigala ngadto kanila, apan maningkamot kanunay sa pagpakiglabot sa uban nga walay-pagpihig.” (2 Cronicas 19:6, 7) Ug ang tinuod mapainubsanong nagapanawng magtatan-aw dili magbatog hinobrang panglantaw sa iyang kaugalingon nga importante ingong hawas sa Sosyedad. Usa ka magtatan-aw sa distrito tukmang mikomento: “Magmapainubsanon ug andam nga mamati sa mga igsoon. Himoa nga dali kang maduol kanunay.” Ingong labing bantogang tawo nga nabuhi sukad, mahimong mapabati ni Jesu-Kristo ang mga tawo nga dili-komportable, apan siya mapainubsanon kaayo ug daling maduol nga bisan ang mga bata mibating komportable sa iyang pagkaanaa. (Mateo 18:5; Marcos 10:13-​16) Buot sa nagapanawng mga magtatan-aw nga ang mga bata, mga tin-edyer, mga edaran​—sa pagkatinuod ang si bisan kinsa ug ang tanan diha sa kongregasyon​—mobating libre sa pagduol kanila.

11. Kon kini gikinahanglan, unsay mahimong epekto sa pagpangayog pasaylo?

¹¹ Siyempre, “kitang tanan mangapandol man sa makadaghan,” ug walay nagapanawng magtatan-aw ang dili makahimog mga sayop. (Santiago 3:2) Sa dihang sila makahimog mga sayop, ang kinasingkasing nga pagpangayog pasaylo maghatag sa ubang mga ansiyano ug panig-ingnan sa pagkamapainubsanon. Sumala sa Proverbio 22:4, “ang balos sa pagkamapainubsanon ug sa [matinahurong] pagkahadlok kang Jehova mao ang pagkaadunahan ug kadungganan ug kinabuhi.” Ug dili ba ang tanang alagad sa Diyos kinahanglang ‘magmapainubsanon sa paglakaw uban sa ilang Diyos’? (Miqueas 6:8, 1960 Edisyon) Sa dihang gipangutana kon unsay iyang tambag alang sa bag-ong nagapanawng ansiyano, usa ka magtatan-aw sa sirkito mikomento: “Pagbatog dakong pagtahod ug pagtagad sa tanang igsoon, ug tagda sila nga mas maayo kay kanimo. Daghan kag makat-onan gikan sa mga igsoon. Magmapainubsanon. Ayaw pagminaot. Ayaw panghambog.”​—Filipos 2:3.

12. Nganong hinungdanon kaayo ang kasibot sa Kristohanong ministeryo?

¹² Ang kasibot sa Kristohanong ministeryo mohatag ug puwersa sa mga pulong sa nagapanawng magtatan-aw. Sa pagkatinuod, kon siya ug ang iyang asawa magpakitag masibotong mga panig-ingnan sa buluhatong pag-ebanghelyo, ang mga ansiyano, ilang mga asawa, ug ang uban sa kongregasyon madasig sa pagpakitag kasibot sa ilang ministeryo. “Magmasiboton sa pag-alagad,” nag-awhag ang usa ka magtatan-aw sa sirkito. Siya midugang: “Akong nakita nga, sa katibuk-an, kon mas masiboton ang kongregasyon sa ministeryo, mas diyutayng mga problema ang maagoman nila.” Ang laing magtatan-aw sa sirkito miingon: “Nagtuo ako nga kon ang mga ansiyano mosangyaw sa kanataran uban sa mga igsoong lalaki ug babaye ug tabangan sila nga malipay sa ministeryo, kini moresultag kalinaw sa hunahuna ug labing dakong katagbawan sa pag-alagad kang Jehova.” Si apostol Pablo ‘nagbaton ug kaisog pinaagi sa pagpamulong sa maayong balita sa Diyos ngadto sa mga taga-Tesalonica uban ang kusganon nga pakigbisog.’ Dili ikahibulong nga sila may malipayong mga handomanan sa iyang pagduaw ug pagsangyaw nga kalihokan ug nangandoy nga makakita kaniya pag-usab!​—1 Tesalonica 2:1, 2; 3:6.

13. Unsay tagdon sa nagapanawng magtatan-aw kon magsangyaw uban sa mga isigka-Kristohanon diha sa pag-alagad sa kanataran?

¹³ Sa dihang nagabuhat kauban sa mga isigka-Kristohanon sa pag-alagad sa kanataran, ang nagapanawng magtatan-aw magtagad sa ilang mga kahimtang ug mga limitasyon. Bisag makatabang tingali ang iyang mga sugyot, nasayod siya nga ang uban tingalig kulbaan sa dihang mosangyaw uban sa usa ka eksperyensiyadong ansiyano. Busa, sa pipila ka kahimtang, ang pagdasig tingalig mas mapuslanon kay sa tambag. Sa dihang ubanan niya ang mga magmamantala o mga payunir sa usa ka pagtuon sa Bibliya, basin buot nilang siya ang modumala niini. Lagmit magpasinati kini kanila sa ubang mga paagi sa pagpauswag sa ilang mga paagi sa pagpanudlo.

14. Nganong ikaingon nga ang masibotong nagapanawng mga magtatan-aw makapukaw ug kadasig sa uban?

¹⁴ Ang masibotong nagapanawng mga magtatan-aw makadasig ug kasibot sa uban. Usa ka magtatan-aw sa sirkito sa Uganda nagbaktas sa bagang kalasangan sa usa ka oras aron ubanan ang usa ka igsoon sa usa ka pagtuon sa Bibliya nga wala kaayo mouswag. Sa panahon sa ilang pagbaktas mibunok pag-ayo ang ulan nga miabot sila nga nahumod. Sa dihang ang pamilya sa unom nahibalo nga ang ilang bisita maoy usa ka nagapanawng magtatan-aw, sila nakadayeg kaayo. Sila nahibalo nga ang mga ministro sa ilang iglesya dili gayod makapakitag ingon niana nga interes sa panon. Sa pagkasunod nga Dominggo, sila mitambong sa ilang unang tigom ug nagpahayag ug tinguha nga mahimong mga Saksi ni Jehova.

15. Unsang maayong eksperyensiya ang gitagamtam sa masibotong magtatan-aw sa sirkito sa Mexico?

¹⁵ Sa estado sa Oaxaca sa Mexico, usa ka magtatan-aw sa sirkito mihimog paningkamot nga wala gayod dahoma gikan kaniya. Gihikay niya nga moestar sa selda sa bilanggoan sulod sa upat ka gabii aron maduaw ang usa ka grupo sa pito ka binilanggo nga nahimong mga magmamantala sa Gingharian. Daghang adlaw nga iyang giubanan kining mga binilanggo samtang sila nagsangyaw gikan sa selda ug selda ug nagdumalag mga pagtuon sa Bibliya. Tungod sa gipakitang interes, ang uban niini nga mga pagtuon gipadayon hangtod sa lawom na nga gabii. “Sa kataposan sa pagduaw, ang mga binilanggo ug ako napuno sa kalipay ingong resulta sa pagdasig sa usag usa,” misulat kining masibotong magtatan-aw sa sirkito.

16. Nganong mapuslanon kaayo sa dihang ang nagapanawng mga magtatan-aw ug ilang mga asawa mohatag ug pagdasig?

¹⁶ Ang nagapanawng mga magtatan-aw maningkamot nga magmadasigon. Sa dihang miduaw si Pablo sa mga kongregasyon sa Macedonia, siya ‘nagdasig kanila uban sa daghang pulong.’ (Buhat 20:1, 2) Ang mga pulong sa pagdasig makatabang kaayo sa pag-agak sa batan-on ug tigulang ngadto sa espirituwal nga mga tumong. Sa usa ka dakong sangang buhatan sa Watch Tower Society, usa ka dili-pormal nga surbi nagbutyag nga ang mga magtatan-aw sa sirkito nakadasig ug halos 20 porsiyento sa mga boluntaryo sa pagsulod sa bug-os panahong pag-alagad. Pinaagi sa iyang maayong panig-ingnan ingong usa ka bug-os panahong magmamantala sa Gingharian, ang asawa sa nagapanawng magtatan-aw usab napamatud-ang usa ka dakong tuboran sa pagdasig.

17. Unsay gibati sa usa ka edarang magtatan-aw sa sirkito bahin sa iyang pribilehiyo sa pagtanyag ug tabang sa uban?

¹⁷ Ang mga edaran ug nagmagul-anong mga kalag maoy ilabinang nagkinahanglan ug pagdasig. Usa ka edarang magtatan-aw sa sirkito misulat: “Ang bahin sa akong buluhaton nga nakahatag ug di-matukib nga kalipay sa sulod mao ang pribilehiyo sa paghatag ug tabang sa mga di-aktibo ug mga maluyahon taliwala sa panon sa Diyos. Ang mga pulong sa Roma 1:11, 12 may linaing kahulogan alang kanako, sanglit nabatonan ko ang dakong pagdasig ug kalig-on samtang ‘nagpaambit sa pipila sa espirituwal nga gasa sa maong mga tawo aron nga sila mahimong malig-on.’”

Mga Ganti sa Ilang Malipayong Buluhaton

18. Unsang Kasulatanhong mga tumong ang nabatonan sa nagapanawng mga magtatan-aw?

¹⁸ Ang nagapanawng mga magtatan-aw interesado gayod kaayo sa pagtabang sa ilang mga isigkamagtutuo. Buot nilang mapalig-on ang mga kongregasyon ug palig-onon sila sa espirituwal. (Buhat 15:41) Usa ka nagapanawng magtatan-aw nagapaningkamot gayod “sa pagdasig, paghatag ug kahupayan, ug pagpalambo sa tinguha sa pagtuman sa ministeryo ug sa pagpadayon sa pagkinabuhi nga uyon sa kamatuoran.” (3 Juan 3) Ang lain nagtinguha sa pagpalig-on sa mga isigkamagtutuo diha sa pagtuo. (Colosas 2:6, 7) Hinumdomi nga ang nagapanawng magtatan-aw maoy usa ka “tiunay nga kayugo,” dili usa ka agalon sa pagtuo sa uban. (Filipos 4:3; 2 Corinto 1:24) Ang iyang pagduaw maoy higayon sa pagdinasigay ug dugang kalihokan, ingon man usa ka higayon alang sa lawas sa mga ansiyano sa pagsubli sa pag-uswag nga nahimo ug sa pagtagad sa umaabot nga mga tumong. Pinaagi sa iyang mga pulong ug panig-ingnan, ang mga magmamantala, mga payunir, ministeryal nga mga alagad, ug mga ansiyano sa kongregasyon makadahom nga mapalig-on ug madasig alang sa buluhaton sa unahan. (Itandi ang 1 Tesalonica 5:11.) Busa, kinasingkasing nga paluyohi ang mga pagduaw sa magtatan-aw sa sirkito, ug pahimusli sa bug-os ang pag-alagad nga gihatag sa magtatan-aw sa distrito.

19, 20. Sa unsang paagi ang nagapanawng mga magtatan-aw ug ilang mga asawa gigantihan sa ilang matinumanong pag-alagad?

¹⁹ Ang nagapanawng mga magtatan-aw ug ilang mga asawa dagayang pagagantihan tungod sa ilang matinumanong pag-alagad, ug sila makasalig nga si Jehova magapanalangin kanila sa maayo nga ilang ginabuhat. (Proverbio 19:17; Efeso 6:8) Si Georg ug Magdalena maoy usa ka edarang magtiayon nga nag-alagad sa daghang katuigan sa nagapanawng buluhaton. Sa kombensiyon sa Luxembourg, giduol si Magdalena sa usa ka babaye nga iyang gisangyawan kapin sa 20 ka tuig na nga miagi. Ang interes niining Hudiyo nga babaye sa kamatuoran napukaw sa literatura sa Bibliya nga napahimutang ni Magdalena kaniya, ug sa ulahi siya nabawtismohan. Si Georg giduol sa usa ka igsoong babaye sa pagtuo, nga nahinumdom sa iyang pagduaw diha sa iyang balay duolan sa 40 ka tuig na kanhi. Ang iyang madasigong pagtanyag sa maayong balita sa ulahi nag-agak kaniya ug sa iyang bana sa pagdawat sa kamatuoran. Dili na isulti pa, si Georg ug Magdalena nalipay kaayo.

²⁰ Ang mabungahong ministeryo ni Pablo sa Efeso naghatag kaniyag kalipay ug tingali maoy nagpalihok kaniya sa pagkutlo sa mga pulong ni Jesus: “Adunay labaw nga kalipay sa paghatag kay sa pagdawat.” (Buhat 20:35) Sanglit ang nagapanawng buluhaton naglangkit ug kanunayng paghatag, kadtong nakigbahin niini nakasinatig kalipay, ilabina sa dihang masayod sila sa maayong mga resulta sa ilang paghago. Usa ka magtatan-aw sa sirkito nga mitabang sa nawad-ag-kadasig nga ansiyano gisultihan diha sa usa ka sulat: “Ikaw nahimong dako kaayong ‘makapalig-ong tabang’ sa akong espirituwal nga kinabuhi​—labaw pa kay sa imong nahibaloan. . . . Wala gayod nimo bug-os hisayri kon unsa ikaw ka dakong tabang ngadto sa modernong-adlawng Asap, kansang ‘mga tiil hapit nang madakin-as.’”​—Colosas 4:11; Salmo 73:2.

21. Nganong ikaingon nimo nga ang 1 Corinto 15:58 ikapadapat sa mga kalihokan sa nagapanawng mga magtatan-aw?

²¹ Usa ka edarang Kristohanon nga diha sa sirkitong buluhaton sulod sa daghang katuigan buot nga mamalandong sa 1 Corinto 1558, diin si Pablo nag-awhag: “Magmalig-on, dili-matarog, nga kanunay may daghang buhaton diha sa buluhaton sa Ginoo, nga nahibalo nga ang inyong kahago dili kawang may kalabotan sa Ginoo.” Ang nagapanawng mga magtatan-aw sa pagkatinuod daghag mahimo diha sa buluhaton sa Ginoo. Ug pagkamapasalamaton nato nga sila nag-alagad nga malipayon kaayo ingong matinumanong mga tinugyanan sa dili-takos nga kalulot ni Jehova!

[Footnote]

Unsay Imong Tubag?

◻ Nganong ang nagapanawng mga magtatan-aw malantaw ingong “maayong mga tinugyanan”?

◻ Unsa ang pipila ka mga butang nga motabang sa mga magtatan-aw sa sirkito ug distrito nga makahimog dakong kaayohan?

◻ Nganong ang pagkamapainubsanon ug kasibot hinungdanon kaayo alang niadtong nagapakigbahin sa nagapanawng buluhaton?

◻ Unsang maayong mga tumong ang nabatonan sa nagapanawng mga magtatan-aw?

[Hulagway sa panid 16]

Ang nagapanawng mga magtatan-aw naningkamot sa pagdasig sa mga isigkamagtutuo

[Hulagway sa panid 17]

Ang mga batan-on ug edaran parehong makabaton ug kaayohan sa pagpakig-uban sa nagapanawng mga magtatan-aw ug sa ilang mga asawa

[Hulagway sa panid 18]

Ang masibotong ministeryo sa nagapanawng magtatan-aw magpalambo ug kasibot sa uban