Suportahi ang Duaw sa Magtatan-aw sa Sirkito
1 Gikan sa Oktubre 15, 1946, padayon, ang mga kongregasyon giorganisar ngadto sa mga sirkito nga ginaalagaran sa nagabiyaheng mga magtatan-aw. Sa hapit 43 na ka tuig karon, ang mga indibiduwal ug mga kongregasyon nakabenepisyo gikan niining teokratikanhong tagana. (Isa. 1:26) Ang atong padayong pagpaluyo niini nga kahikayan mohatag kanato ug daghan dugang mga panalangin.—Efe. 4:7, 8, 11.
PANGANDAM ALANG SA DUAW
2 Sa ikapahibalo na ang duaw sa magtatan-aw sa sirkito, kita makasugod sa pagpangandam alang niana. Atong ikapasibo ang atong normal nga eskedyol aron bug-os nga makasuportar sa semana sa espesyal nga kalihokan. Ang pipila ka magmamantala mogugol ug mas pang panahon sa ministeryo sa kanataran pinaagig pag-oksilyare payunir. Ang uban basin dili motrabaho sa usa o duha ka adlaw sa sekular nga trabaho aron makig-ambit sa ministeryo. Daghang magmamantala nagahimog espesyal nga mga kasabotan sa pagsangyaw uban sa magtatan-aw sa sirkito.
3 Ang mga taho nagapakita nga mahimo pang mas maayong suportar sa balikduaw ug pagtuon sa Bibliya nga buluhaton sa palis. Maeskedyol mo ba ang mga balikduaw ug pagtuon sa Bibliya sa usa ka palis sulod sa semana? Ang magtatan-aw sa sirkito malipayong mouban kanimo, ug kon gusto mo, siya mahimuot nga maoy modumala sa imong pagtuon.
PERSONAL NGA PAGTABANG
4 Ang magtatan-aw sa sirkito interesado sa pagtabang kanilang nagapanlimbasog sa pagkab-ot sa mas dakong mga pribilehiyo sa pag-alagad. (1 Tim. 3:1) Aduna ka ba ing mga pangutana bahin sa imong mga asaynment o mga responsabilidad? Buot ba nimong mapauswag ang imong katakos ug personal nga organisasyon? Gusto ba nimong moalagad sa dapit nga ang panginahanglan maoy dako sulod sa inyong sirkito? Unsa man ang imong espirituwal nga mga tumong, ang magtatan-aw sa sirkito malipayon nga mohisgot niana uban kanimo.
5 Kon ang inyong magtatan-aw sa sirkito minyo, ang iyang asawa payunir usab ug mosuportar sa bug-os sa mga kahikayan sa pag-alagad sa kanataran. Siya sa iyang kaugalingon mokuyog sa pagsangyaw uban sa ubang mga igsoong babaye ug mouban kanila sa mga balikduaw ug mga pagtuon sa Bibliya. Siya angay sa samang pagdayeg nga gihatag ni Pablo kang Febe.—Roma 16:1, 2.
6 Dili sayloan mao ang pribilehiyo nga atong nahuptan sa pagpakitag pagkamadinawaton sa nagaduaw nga magtatan-aw. Daghang mga igsoon ang nagapabahandi sa mga handomanan ug pagpalig-on nga ilang nadawat tungod sa pagkabukas sa ilang puloy-anan o pagpaambit ug usa ka pagkaon uban niining nagabiyaheng mga ministro ug mitagamtam sa espirituwal nga pagsandurotay uban kanila.—3 Juan 5-8.
7 Hinaot ang tanan kanato mahimong determinado sa bug-os nga pagsuportar sa sunod nga duaw sa atong magtatan-aw sa sirkito.