Usa ka Pagdinasigay Alang sa Tanan
1. Unsang linaing mga kahigayonan ang atong mapahimuslan sa duaw sa nagapanawng mga magtatan-aw?
1 Si apostol Pablo misulat sa kongregasyon sa Roma: “Ako nangandoy sa pagpakigkita kaninyo, aron ako makahatag kaninyo ug espirituwal nga gasa aron mapalig-on kamo; o, labi pang maayo, aron adunay pagdinasigay sa inyong taliwala, pinaagi sa pagtuo sa tagsatagsa, sa inyo ug sa akoa.” (Roma 1:11, 12) Ang mga duaw karon sa nagapanawng mga magtatan-aw naghatag ug samang mga kahigayonan sa pagdinasigay.
2. Nganong abante mang ipahibalo ang duaw sa magtatan-aw sa sirkito?
2 Ang Kongregasyon: Ang duaw sa magtatan-aw sa sirkito kasagarang ipahibalo sa kongregasyon mga tulo ka bulan nga abante. Tungod niini, atong maplano daan ang atong mga eskedyul aron makapahimulos kita pag-ayo niana. (Efe. 5:15, 16) Kon ikaw may sekular nga trabaho, lagmit makahangyo kag bakasyon aron imong masuportahan ang pagsangyaw nianang semanaha. Ang uban nag-oksilyare payunir nianang bulana. Kon nakaplano ka nang molakaw sa laing dapit atol sa duaw, mausab mo ba kana aron imong masuportahan ang duaw?
3. Unsay angay natong buhaton aron madasig kita panahon sa duaw?
3 Ang pangunang katuyoan sa duaw sa magtatan-aw sa sirkito mao ang paghatag ug personal nga pagdasig ug pagbansay diha sa ministeryo. Makahikay ka ba sa pag-uban kaniya o sa iyang asawa kon siya minyo? Ang magtatan-aw sa sirkito malipay sa pag-uban sa lainlaing mga magmamantala, lakip na niadtong wala pa kaayoy kasinatian o kahanas sa ministeryo. Kita makakat-on sa iyang paagi sa pagsangyaw ug makapadapat sa iyang maayong mga sugyot. (1 Cor. 4:16, 17) Ang pagdapit kaniya sa usa ka pagpangaon maghatag usab ug dugang kahigayonan alang sa pagdinasigay. (Heb. 13:2) Tungod kay gipahaom man ang iyang mga pakigpulong sa mga panginahanglan sa kongregasyon, paminaw pag-ayo.
4. Sa unsang paagi atong madasig ang atong magtatan-aw sa sirkito?
4 Ang Magtatan-aw sa Sirkito: Si apostol Pablo dili lahi sa mga igsoon nga iyang gialagaran sa pagkaagi nga siya nakaagom usab ug mga suliran ug mga kabalaka, ug siya nagkinahanglan usab ug pagdasig. (2 Cor. 11:26-28) Sa dihang nahibaloan sa kongregasyon sa Roma nga moabotay si Pablo, nga usa ka binilanggo niadtong tungora, ang uban mibaktas ug 74 kilometros aron sa pagpakigkita kaniya didto sa Tiyanggihan sa Apio! “Sa iyang pagkakita kanila, si Pablo nagpasalamat sa Diyos ug nakabatog kaisog.” (Buh. 28:15) Makadasig ka usab sa inyong magtatan-aw sa sirkito. Ipakita kaniya ang “doble nga pasidungog” pinaagi sa imong madasigong pagpaluyo sa iyang duaw. (1 Tim. 5:17) Ipahayag ug ipasundayag ang imong sinsero nga pagpabili sa iyang mga paningkamot alang kanimo. Siya ug ang iyang kapikas malipay sa pagkakita sa imong pagtuo, gugma, ug pagkamalahutayon.—2 Tes. 1:3, 4.
5. Nganong nanginahanglan man kitag pagdasig karon?
5 Niining “makuyaw nga mga panahong lisod sagubangon,” kinsa ba kanato ang wala manginahanglag pagdasig? (2 Tim. 3:1) Pagplano na karon nga bug-os makapakigbahin sa espesyal nga semana sa duaw sa magtatan-aw sa sirkito. Kitang tanan—nagapanawng mga magtatan-aw ug mga magmamantala—makapakigbahin sa malipayong pagdinasigay. Pinaagi niini kita usab ‘makapadayon sa paghupay sa usag usa ug sa paglinig-onay sa usag usa.’—1 Tes. 5:11.