KRISTOHANONG PAGKINABUHI
“Si Pablo Nagpasalamat sa Diyos ug Nakabatog Kaisog”
Dihang nabalitaan sa kongregasyon sa Roma nga moabot si Pablo, usa ka grupo sa mga igsoon ang mibiyaheg mga 64 kilometros aron sugaton siya. Unsay epekto kang Pablo sa ilang gipakitang gugma nga andam mosakripisyo? “Sa iyang pagkakita kanila, si Pablo nagpasalamat sa Diyos ug nakabatog kaisog.” (Buh 28:15) Bisag nailhan si Pablo nga maoy tigdasig sa kongregasyon nga iyang giduaw, niining higayona dihang siya napriso, siya ang nakadawat ug pagdasig.—2Co 13:10.
Karon, ang mga tigdumala sa sirkito nagdasig sa mga igsoon sa matag kongregasyon nga ilang duawon. Sama sa tanang alagad sa Diyos, may mga panahon nga sila kapoyon, mabalaka, ug maluya. Sa sunod duaw sa tigdumala sa sirkito uban sa iyang asawa sa inyong kongregasyon, unsay imong mahimo sa pagtabang kanila nga makabatog kaisog, aron “adunay pagdinasigay” sa usag usa?—Rom 1:11, 12.
Tambong sa mga tigom para sa pagsangyaw. Ang tigdumala sa sirkito madasig dihang ang mga magmamantala mosakripisyo aron bug-os makabenepisyo niining espesyal nga semana. (1Te 1:2, 3; 2:20) Puwede kang mag-oksilyare payunir sa bulan sa iyang duaw. Puwede ba kang makigpartner nila sa pagsangyaw o iuban ang usa nila sa Bible study? Malipay silang makigpartner sa lainlaing igsoon, apil sa mga bag-ohan o dili pa kaayo hanas sa ministeryo.
Abiabiha sila. Mahimo ba nimo silang tanyagag katulgan o pagkaon? Ang paghimo niana mopabati nila nga gimahal nimo sila. Wala sila magdahom ug sobra sa atong maarangan.—Luc 10:38-42.
Paminawa ug ipadapat ang iyang giya ug tambag. Ang tigdumala sa sirkito mahigugmaong motabang nato nga makita kon unsa pay atong mapauswag sa atong pag-alagad kang Jehova. Usahay, kinahanglan ta niyang hatagag bug-at nga tambag. (1Co 5:1-5) Malipay siya dihang kita mosunod ug magpasakop.—Heb 13:17.
Ipakita ang apresasyon. Sultihi ang tigdumala sa sirkito ug iyang asawa kon sa unsang paagi nakabenepisyo ka sa ilang mga paghago. Puwede ni nimong isulti nila o isulat sa note o card.—Col 3:15.