Nagapanawng mga Magtatan-aw—Mga Gasa nga mga Tawo
“Sa dihang siya misaka sa itaas siya nagdala ug mga bihag; siya mihatag ug mga gasa nga mga tawo.”—EFESO 4:8.
1. Unsang bag-ong buluhaton ang gipahibalo niining magasina niadtong 1894?
KAPIN ug usa ka siglo kanhi, may bag-ong gipahibalo ang Bantayanang Torre. Kini gihubit ingong “Laing Sanga sa Buluhaton.” Unsay nalangkit niining bag-ong kalihokan? Mao kadto ang modernong-adlawng pagsugod sa buluhaton sa nagapanawng mga magtatan-aw. Ang Septiyembre 1, 1894, nga isyu niining magasina nagbatbat nga sukad niadto ang kuwalipikadong mga igsoong lalaki magaduaw sa mga grupo sa mga Estudyante sa Bibliya ‘alang sa katuyoan sa pagpalig-on kanila diha sa kamatuoran.’
2. Unsa ang mga katungdanan sa mga magtatan-aw sa sirkito ug distrito?
2 Sa unang siglo K.P., ang Kristohanong mga kongregasyon giduaw sa ingon niini nga mga magtatan-aw sama kang Pablo ug Bernabe. Kining matinumanong mga lalaki may tumong sa ‘pagpalig-on’ sa mga kongregasyon. (2 Corinto 10:8) Karong adlawa, kita gipanalanginan uban sa libolibong mga lalaki nga nagabuhat niini diha sa sistematikanhong paagi. Ang Nagamandong Lawas sa mga Saksi ni Jehova nagtudlo kanila ingong mga magtatan-aw sa sirkito ug distrito. Ang usa ka magtatan-aw sa sirkito mag-alagad sa mga 20 ka kongregasyon sa usa ka semana ang matag usa sa mga duha ka higayon sa usa ka tuig, magasusi sa mga rekord, maghatag ug mga pakigpulong, ug makigbahin sa pag-alagad sa kanataran uban sa lokal nga mga magmamantala sa Gingharian. Ang magtatan-aw sa distrito maoy tsirman alang sa matag usa sa tinuig nga mga sirkitong asembliya alang sa ubay-ubayng mga sirkito, makigbahin sa ministeryo sa kanataran uban sa giduaw nga mga kongregasyon, ug mohatag ug pagdasig pinaagi sa pinasukad-sa-Bibliya nga mga pakigpulong.
Ilang Masakripisyohon-sa-Kaugalingong Espiritu
3. Nganong ang nagapanawng mga magtatan-aw kinahanglang adunay masakripisyohon-sa-kaugalingong espiritu?
3 Ang mga magtatan-aw sa sirkito kanunayng nagapanaw. Kini mismo nagkinahanglan ug masakripisyohon-sa-kaugalingong espiritu. Ang pagbiyahe gikan sa usa ka kongregasyon ngadto sa lain kasagarang malisod, apan kining mga tawhana ug ilang mga asawa nagabuhat niana uban ang mangayaong tinamdan. Usa ka magtatan-aw sa sirkito miingon: “Ang akong asawa mapaluyohon kaayo ug dili moreklamo . . . Siya angayan gayong pasidunggan tungod sa iyang masakripisyohon-sa-kaugalingong espiritu.” Ang ubang mga magtatan-aw sa sirkito nagapanaw sa kapin ug 1,000 kilometros tali sa mga kongregasyon. Daghan ang nagamaneho ug awto, apan ang uban moadto gikan sa usa ka dapit ngadto sa lain pinaagig publikong transportasyon, bisikleta, pagkabayo, o pagbaktas. Usa ka magtatan-aw sa sirkito sa Aprika kinahanglang moubog pa sa suba nga nagbaba sa iyang asawa aron makaabot sa usa ka kongregasyon. Sa iyang mga panaw ingong misyonaryo, gisagubang ni apostol Pablo ang kainit ug katugnaw, kagutom ug kauhaw, mga gabiing walay tulog, nagkalainlaing kapeligrohan, ug mapintas nga paglutos. Siya usab may “kahingawa alang sa tanang kongregasyon”—usa ka kasinatian nga kasagaran sa nagapanawng mga magtatan-aw karong adlawa.—2 Corinto 11:23-29.
4. Unsay epekto sa mga suliran sa panglawas diha sa mga kinabuhi sa nagapanawng mga magtatan-aw ug ilang mga asawa?
4 Sama sa kauban ni Pablo nga si Timoteo, ang nagapanawng mga magtatan-aw ug ilang mga asawa usahay may mga problema sa panglawas. (1 Timoteo 5:23) Kini maghatag ug dugang kapit-os kanila. Usa ka asawa sa magtatan-aw sa sirkito nag-ingon: “Ang pakig-uban kanunay sa mga igsoon malisod kon dili maayo ang akong gibati. Sa nagsugod ang menopos, ako nakakaplag niini nga ilabinang malisod. Ang paghipos lang sa tanan namong mga butang kada semana ug sa pagbalhin sa laing dapit maoy usa ka tinuod nga hagit. Sagad, ako mohunong ug mag-ampo kang Jehova nga hatagan ako ug kusog nga makapadayon.”
5. Bisan pa sa nagkalainlaing mga pagsulay, unsang espiritu ang gipakita sa nagapanawng mga magtatan-aw ug ilang mga asawa?
5 Bisan pa sa mga suliran sa panglawas ug ubang mga pagsulay, ang nagapanaw nga mga magtatan-aw ug ilang mga asawa nakakaplag ug kalipay diha sa ilang pag-alagad ug nagpasundayag sa masakripisyohon-sa-kaugalingong gugma. Gipameligro sa uban ang ilang mga kinabuhi aron ikahatag ang espirituwal nga tabang sa mga panahon sa paglutos o panaggubat. Sa dihang nagaduaw sa mga kongregasyon, sila nagpakitag espiritu nga sama nianang gipakita ni apostol Pablo, nga nag-ingon sa mga Kristohanon sa Tesalonica: “Kami nagmalumo taliwala kaninyo, sama sa usa ka nagapasusong inahan nga nagapangga sa iyang kaugalingong mga anak. Busa, kay may malumong pagmahal kaninyo, kami nahimuot pag-ayo nga ipaambit kaninyo, dili lamang ang maayong balita sa Diyos, apan usab ang among kaugalingong mga kalag, tungod kay kamo nahimo mang hinigugma alang kanamo.”—1 Tesalonica 2:7, 8.
6, 7. Unsang positibong impluwensiya ang ikahatag sa kugihang nagapanawng mga magtatan-aw?
6 Sama sa ubang mga ansiyano diha sa Kristohanong kongregasyon, ang nagapanawng mga magtatan-aw “nagahago sa pagpamulong ug sa pagpanudlo.” Kining tanang ansiyano angayng “ipatamod ingong takos sa dobleng dungog.” (1 Timoteo 5:17) Ang ilang panig-ingnan mahimong mapuslanon kon, human ‘magpalandong kon unsay ginasangpotan sa ilang panggawi, atong sundogon ang ilang pagtuo.’—Hebreohanon 13:7.
7 Unsay epekto sa nagapanawng mga ansiyano diha sa uban? “Maayo kaayong impluwensiya si Igsoong P—— sa akong kinabuhi!” misulat ang usa ka Saksi ni Jehova. “Siya usa ka nagapanawng magtatan-aw sa Mexico sukad pa sa tuig 1960 padayon. Sa bata pa, ako nagpaabot sa iyang mga pagduaw nga may pagdahom ug kalipay. Sa dihang ako nagdiyes anyos, siya miingon kanako, ‘Ikaw usab mahimong usa ka magtatan-aw sa sirkito.’ Sa panahon sa malisod nga mga tuig sa pagkatin-edyer, kanunay ko siyang gipangita tungod kay siya sa tanang panahon may mga pulong sa kaalam nga ikahatag. Ang iyang pangunang kabalaka mao ang pagbantay sa panon! Karon nga ako usa na ka magtatan-aw sa sirkito, maningkamot ako kanunay sa paggahig panahon alang sa mga batan-on ug sa pagbutang sa teokratikanhong mga tumong atubangan kanila sama sa iyang gihimo kanako. Bisan sa kataposang mga tuig sa iyang kinabuhi, bisan pa sa mga suliran sa sakit sa kasingkasing, si Igsoong P—— kanunayng nangitag paagi nga makahatag ug makapadasig nga pulong. Usa ka adlaw lang sa wala pa siya mamatay niadtong Pebrero 1995, giubanan niya ako sa usa ka espesyal nga adlaw sa asembliya ug nagbutang ug maayong mga tumong diha sa usa ka igsoong lalaki nga usa ka arkitekto. Ang igsoong lalaki dihadiha nagtunol sa iyang aplikasyon sa pag-alagad sa Bethel.”
Sila Ginapabilhan
8. Kinsa ang “mga gasa nga mga tawo” nga gihubit sa Efeso kapitulo 4, ug sa unsang paagi sila nakahatag ug kaayohan sa kongregasyon?
8 Ang nagapanawng mga magtatan-aw ug ubang mga ansiyano nga gihatagan ug asaynment sa pag-alagad pinaagi sa dili-takos nga kalulot sa Diyos gitawag nga “mga gasa nga mga tawo.” Ingong hawas ni Jehova ug Ulo sa kongregasyon, si Jesus nagtagana niining espirituwal nga mga lalaki aron kita mapalig-on sa tinagsatagsa ug makab-ot ang pagkahamtong. (Efeso 4:8-15) Ang bisan unsang gasa takos sa usa ka pulong sa pagpabili. Tinuod kini ilabina sa usa ka gasa nga magpalig-on kanato sa padayong pag-alagad kang Jehova. Busa, sa unsang paagi ikapasundayag nato ang atong pagpabili sa buluhaton sa nagapanawng mga magtatan-aw? Diha sa unsang mga paagi atong ikapakita nga kita ‘padayong nagpakamahal niining mga tawhana’?—Filipos 2:29.
9. Sa unsang mga paagi ikapakita nato ang pagpabili sa nagapanawng mga magtatan-aw?
9 Sa dihang ipahibalo ang duaw sa magtatan-aw sa sirkito, kita makasugod sa paghimog mga plano nga makaambit sa bug-os sa mga kalihokan sa kongregasyon alang nianang semanaha. Tingali kita makagahig ekstrang panahon nga suportahan ang mga kahikayan sa pag-alagad sa kanataran sa panahon sa pagduaw. Kita basin makaalagad ingong mga oksilyare payunir nianang bulana. Sa pagkatinuod buot natong ipadapat ang mga sugyot sa magtatan-aw sa sirkito aron mouswag sa atong ministeryo. Ang maong madinawatong espiritu mohatag kanatog kaayohan ug mopasalig kaniya nga ang iyang pagduaw hinungdanon. Oo, ang nagapanawng mga magtatan-aw moduaw sa kongregasyon sa paglig-on kanato, apan sila usab nagkinahanglang mapalig-on sa espirituwal. May mga panahon sa dihang si Pablo nagkinahanglan ug pagdasig, ug sagad niyang gihangyo ang kaubang mga Kristohanon sa pag-ampo alang kaniya. (Buhat 28:15; Roma 15:30-32; 2 Corinto 1:11; Colosas 4:2, 3; 1 Tesalonica 5:25) Ang presenteng-adlaw nagapanawng mga magtatan-aw sa ingon usab nagkinahanglan sa atong mga pag-ampo ug pagdasig.
10. Sa unsang paagi makatabang kita nga mahimong makapalipay ang buluhaton sa nagapanawng magtatan-aw?
10 Gisultihan ba nato ang magtatan-aw sa sirkito ug iyang asawa kon unsa ka dako ang atong pagpabili sa ilang mga pagduaw? Nagpasalamat ba kita kaniya sa makatabang nga tambag nga gihatag niya kanato? Gipahibalo ba nato kaniya sa dihang ang iyang mga sugyot sa pag-alagad sa kanataran nagpadako sa atong kalipay diha sa ministeryo? Kon gibuhat nato kana, kini motabang sa paghimo sa iyang buluhaton nga makalilipay. (Hebreohanon 13:17) Usa ka magtatan-aw sa sirkito sa Espanya sa partikular mikomento kon unsa ka dako sa pagpabili niya ug sa iyang asawa sa mga sulat sa pagpasalamat nga nadawat nila human sa pagduaw sa mga kongregasyon. “Gitagoan namo kini nga mga kard ug basahon kini sa dihang bation namo nga nawad-ag kadasig,” siya miingon. “Kini maoy tuboran sa tinuod nga pagdasig.”
11. Nganong angay natong pahibal-on ang mga asawa sa mga magtatan-aw sa sirkito ug distrito nga sila gihigugma ug gipabilhan?
11 Ang asawa sa nagapanawng magtatan-aw tinuod gayod nga makabatog kaayohan gikan sa mga pulong sa pagdayeg. Nakahimo siyag dagkong mga pagsakripisyo sa pagtabang sa iyang bana niini nga natad sa pag-alagad. Kining matinumanong mga igsoong babaye nagsalindot sa kinaiyanhong tinguha nga makabaton ug ilang kaugalingong balay ug, sa daghang kaso, usab nianang pagpakabaton ug mga anak. Ang anak nga babaye ni Jepte maoy usa sa mga alagad ni Jehova nga andam sa paghiklin sa iyang kahigayonan nga makabatog bana ug pamilya tungod sa gipanaad sa iyang amahan. (Maghuhukom 11:30-39) Giunsa paglantaw ang iyang mga pagsakripisyo? Ang Maghuhukom 11:40 nag-ingon: “Tuigtuig ang mga anak nga babaye sa Israel mag-adtoan sa paghatag ug komendasyon sa anak nga babaye ni Jepte nga Galaadhanon, upat ka adlaw sulod sa usa ka tuig.” Pagkamaayo gayod kon maningkamot kita sa pagsulti sa mga asawa sa mga magtatan-aw sa sirkito ug distrito nga sila gihigugma ug gipabilhan!
“Ayawg Kalimti ang Pagkamaabiabihon”
12, 13. (a) Unsa ang pasukaranan sa Kasulatan sa pagpakitag pagkamaabiabihon sa nagapanawng mga magtatan-aw ug ilang mga asawa? (b) Iilustrar kon sa unsang paagi ang maong pagkamaabiabihon makabenepisyo sa matag usa.
12 Ang pagpakitag pagkamaabiabihon maoy laing paagi sa pagpasundayag ug gugma ug pagpabili alang niadtong anaa sa Kristohanong nagapanawng buluhaton. (Hebreohanon 13:2) Gidayeg ni apostol Juan si Gayo sa pagpakitag pagkamaabiabihon niadtong nagaduaw sa kongregasyon ingong nagapanawng mga misyonaryo. Si Juan misulat: “Hinigugma, nagabuhat ka ug matinuohong buhat sa bisan unsa nga imong ginahimo alang sa mga igsoon, ug bisan kon mga estranyo, kinsa nanaksi sa imong gugma atubangan sa kongregasyon. Mahimuot ka nga pagikanon kini sila sa paaging takos sa Diyos. Kay maoy alang sa iyang ngalan nga sila nanglakaw, nga wala magakuha sa bisan unsa gikan sa katawhan sa kanasoran. Busa, kita ilalom sa obligasyon nga dawaton sa kamatinagdanon ang maong mga tawo, aron kita mahimong mga isigkamagbubuhat diha sa kamatuoran.” (3 Juan 5-8) Karong adlawa, kita makapauswag sa buluhatong pagsangyaw sa Gingharian pinaagi sa pagpaabot sa samang pagkamaabiabihon ngadto sa nagapanawng mga magtatan-aw ug sa ilang mga asawa. Siyempre, paneguroon sa lokal nga mga ansiyano nga maayo ang mga sak-anan, apan usa ka magtatan-aw sa distrito miingon: “Ang among pagpakiglabot sa mga igsoon dili pinasukad sa kon kinsay makabalos kanamo. Dili man gani namo buot nga mohatag sa ingon niana nga impresyon. Kami andam gayod nga modawat sa pagkamaabiabihon ni bisan kinsa sa among mga igsoon, adunahan man o kabos.”
13 Ang pagkamaabiabihon makahatag ug kaayohan sa matag usa. “Sa akong pamilya, kostumbre na namo ang pagdapit sa nagapanawng mga magtatan-aw sa pag-estar uban kanamo,” nahinumdom si Jorge, usa ka magtatan-aw sa sirkito niadto nga nag-alagad na karon sa Bethel. “Gibati ko nga kini nga mga pagduaw nakatabang kanako nga labaw pa kay sa akong naamgohan niadto. Sa batan-on pa ako, ako may mga problema sa espirituwal. Nabalaka ang akong inahan bahin niini apan wala mahibalo kon unsaon pagtabang ug busa naghangyo sa magtatan-aw sa sirkito nga makigsulti kanako. Sa sinugdan naglikay ako kaniya, sanglit nahadlok nga ako sawayon. Apan ang iyang mahigalaong espiritu sa kataposan nakadani kanako. Gidapit niya ako nga mangaon uban kaniya usa ka Lunes niana, ug gibuksan ko ang akong kasingkasing tungod kay ako mibati gayod nga ako hisabtan. Siya namati pag-ayo. Ang iyang mapuslanong mga sugyot misaler gayod, ug ako nagsugod sa pag-uswag sa espirituwal.”
14. Nganong kita angayng magmapabilhon imbes hinawayon sa nagapanawng mga ansiyano?
14 Ang usa ka nagapanawng magtatan-aw maningkamot nga magmatinabangon sa espirituwal ngadto sa mga batan-on ug mga edaran. Nan, sa pagkatinuod angay natong ipakita ang atong pagpabili sa iyang mga paningkamot. Apan, komosta kon manaway kita kaniya tungod sa iyang mga kahuyangan o itandi siya nga di-paborable sa uban nga nakaduaw na sa kongregasyon? Lagmit, dili gayod kini makapadasig. Dili makapadasig kang Pablo nga nakadungog ug mga pagsaway sa iyang buhat. Dayag, ang pipila ka mga Kristohanon sa Corinto nanultig dili-maayo bahin sa iyang panagway ug katakos sa pagpanulti. Siya mismo nagkutlo sa maong mga hinawayon nga nag-ingon: “Ang iyang mga sulat mabug-at ug kusganon, apan ang iyang pagkaania sa personal maoy maluya ug ang iyang pagpamulong talamayon.” (2 Corinto 10:10) Makapalipay, hinunoa, ang nagapanawng mga magtatan-aw sagad makadungog ug mga pulong sa mahigugmaong pagpabili.
15, 16. Sa unsang paagi naapektohan ang nagapanawng mga magtatan-aw ug ilang mga asawa sa gugma ug kasibot nga gipakita sa ilang mga isigkamagtutuo?
15 Usa ka magtatan-aw sa sirkito sa Latin Amerika nagabaktas sa tibuok adlaw diha sa lapokon nga mga dalan aron maduaw ang iyang espirituwal nga mga igsoong lalaki ug babaye nga nagpuyo sa dapit nga gikontrolar sa mga gerilya. “Makapatandog gayod nga makita ang paagi nga gipakita sa mga igsoon ang ilang pagpabili sa pagduaw,” siya misulat. “Bisag dako kaayo ang akong paningkamot aron makaabot didto, nga nag-atubang ug daghang kapeligrohan ug mga kalisod, kining tanan gantihan sa gugma ug kasibot nga ipakita sa mga igsoon.”
16 Usa ka magtatan-aw sa sirkito sa Aprika nagsulat: “Tungod sa gipakitang gugma sa mga igsoon kanamo, dako gayod ang among pagmahal sa teritoryo sa Tanzania! Ang mga igsoon andam sa pagkakat-on gikan kanamo, ug sila malipayon sa pagdawat kanamo diha sa ilang mga balay.” Dihay usa ka mahigugmaon ug malipayong relasyon tali kang apostol Pablo ug sa unang-siglong Kristohanong magtiayon nga si Aquila ug Prisca. Ngani, si Pablo miingon bahin kanila: “Ipangumosta ako kang Prisca ug Aquila nga akong mga isigkamagbubuhat diha kang Kristo Jesus, nga nagpameligro sa ilang kaugalingong mga liog alang sa akong kalag, kang kinsa dili lamang ako apan usab ang tanang kongregasyon sa mga nasod nagapasalamat.” (Roma 16:3, 4) Ang nagapanawng mga magtatan-aw ug ilang mga asawa mapasalamaton nga makabaton ingong ilang mga higala ang modernong-adlawng Aquila ug Prisca nga naningkamot pag-ayo nga ikapakita ang pagkamaabiabihon ug pagtaganag panag-ubanay.
Pagpalig-on sa mga Kongregasyon
17. Nganong ikaingon nga adunay kaalam luyo sa kahikayan sa nagapanawng mga magtatan-aw, ug diin nila kuhaa ang ilang instruksiyon?
17 Si Jesus miingon: “Ang kaalam mapamatud-ang matarong pinaagi sa mga buhat niini.” (Mateo 11:19) Ang kaalam luyo sa kahikayan sa nagapanawng-magtatan-aw maoy dayag sa pagkaagi nga kini nagatabang sa pagpalig-on sa mga kongregasyon sa katawhan sa Diyos. Sa panahon sa ikaduhang misyonaryong panaw ni Pablo, siya ug si Silas malamposong “milatas sa Siria ug Cilicia, nga nagapalig-on sa mga kongregasyon.” Ang basahon sa Buhat nagsugilon kanato: “Samtang sila mipanaw latas sa mga siyudad ilang ipanghatod aron sundon sa mga atua didto ang mga sugo nga gidesisyonan sa mga apostol ug mga ansiyano nga didto sa Jerusalem. Busa, sa pagkatinuod, ang mga kongregasyon padayong nalig-on diha sa pagtuo ug miuswag sa gidaghanon adlaw-adlaw.” (Buhat 15:40, 41; 16:4, 5) Ang presenteng-adlaw nga nagapanawng mga magtatan-aw nagadawat ug espirituwal nga instruksiyon pinaagi sa Kasulatan ug sa mga publikasyon sa “kasaligan ug mabuot nga ulipon,” sama sa tanang ubang mga Kristohanon.—Mateo 24:45.
18. Sa unsang paagi ginapalig-on sa nagapanawng mga magtatan-aw ang mga kongregasyon?
18 Oo, ang nagapanawng mga ansiyano kinahanglang padayong magakaon sa espirituwal nga talad ni Jehova. Kinahanglang sila sinati kaayo sa mga paagi ug mga pagtultol nga gisunod sa organisasyon sa Diyos. Nan ang maong mga tawo mahimong usa gayod ka panalangin sa uban. Pinaagi sa ilang maayong panig-ingnan sa kasibot sa pag-alagad sa kanataran, matabangan nila ang mga isigkamagtutuo nga mouswag sa Kristohanong ministeryo. Ang pinasukad-sa-Bibliya nga mga pakigpulong nga gihatag niining nagaduaw nga mga ansiyano nagapalig-on sa mga mamiminaw sa espirituwal. Pinaagi sa pagtabang sa uban nga ipadapat ang tambag sa Pulong sa Diyos, mag-alagad nga kaharmonya uban sa katawhan ni Jehova sa tibuok yuta, ug pahimuslan ang espirituwal nga mga tagana nga gihimo sa Diyos pinaagi sa ‘kasaligang ulipon,’ ang nagapanawng mga magtatan-aw nagapalig-on sa mga kongregasyon nga sila nakapribilehiyo sa pagduaw.
19. Unsang mga pangutana ang pagatagdon pa?
19 Sa dihang gisugdan sa organisasyon ni Jehova ang buluhaton sa nagapanawng mga ansiyano taliwala sa mga Estudyante sa Bibliya mga usa ka gatos ka tuig na ang miagi, kini nga basahon nag-ingon: “Hulaton nato ang sangpotanan ug ang dugang pagtultol sa Ginoo.” Ang pagtultol ni Jehova tin-awng nakita. Tungod sa iyang panalangin ug ubos sa pagdumala sa Nagamandong Lawas, kining buluhatona napadako ug napahapsay sa paglabay sa katuigan. Tungod niini, ang mga kongregasyon sa mga Saksi ni Jehova sa tibuok yuta napalig-on sa pagtuo ug nagauswag sa gidaghanon adlaw-adlaw. Dayag, si Jehova nagapanalangin sa masakripisyohon-sa-kaugalingong espiritu niining mga gasa nga mga tawo. Apan sa unsang paagi malamposong matuman sa nagapanawng mga magtatan-aw ang ilang buluhaton? Unsay ilang mga tumong? Sa unsang paagi makahatag sila ug labing dakong kaayohan?
Unsay Imong Tubag?
◻ Unsa ang pipila ka mga katungdanan sa mga magtatan-aw sa sirkito ug distrito?
◻ Nganong ang nagapanawng mga magtatan-aw kinahanglang magbatog masakripisyohon-sa-kaugalingong espiritu?
◻ Sa unsang paagi ikapakita ang pagpabili sa buluhaton sa nagapanawng mga ansiyano ug sa ilang mga asawa?
◻ Unsay mahimo sa nagapanawng mga magtatan-aw sa pagpalig-on sa mga kongregasyon diha sa pagtuo?
[Hulagway sa panid 10]
Ang pagbiyahe kanunay nagkinahanglag masakripisyohon-sa-kaugalingong espiritu
[Hulagwayn sa panid 13]
Nakapakita ka bag pagkamaabiabihon sa nagapanawng mga magtatan-aw ug ilang mga asawa?