Usa ka Mas Maayong Paagi
ANG mga Saksi ni Jehova mabalak-on bahin sa pagkakankan sa espirituwalidad sa kalibotan ug sa imoralidad ug sa relihiyosong pagkadili-tino nga nagakaylap sa katilingban. Tungod niini, sila usahay gitawag ug mga pundamentalista. Apan sila ba mga pundamentalista? Dili. Bisag sila adunay malig-ong relihiyosong mga pagtuo, sila dili mga pundamentalista sa diwa nga gigamit ang termino. Sila dili mopit-os sa mga lider sa politika sa pagpalambo sa usa ka tinong panghunahuna, ug sila dili mogamit sa mga demonstrasyon ug kapintasan batok niadtong dili nila uyonan. Sila nakakaplag ug mas maayong paagi. Ginasundog nila ang ilang Pangulo, si Jesu-Kristo.
Ang mga Saksi ni Jehova kombinsido nga naglungtad ang relihiyosong kamatuoran, nga kini makita diha sa Bibliya. (Juan 8:32; 17:17) Apan ang Bibliya nagatudlo sa mga Kristohanon nga mahimong malulot, buotan, maligdong, ug makataronganon—mga hiyas nga dili magtugot sa pagkapanatiko. (Galacia 5:22, 23; Filipos 4:5) Diha sa basahon sa Bibliya nga Santiago, ang mga Kristohanon gidasig sa pag-ugmad sa “kaalam gikan sa itaas,” nga gihubit ingong “una sa tanan putli, unya makigdaiton, makataronganon, andam mosunod, puno sa kaluoy ug maayong mga bunga.” Si Santiago midugang: “Ang binhi sa bunga sa pagkamatarong napugas diha sa madaitong mga kahimtang alang niadtong mga nagapakigdait.”—Santiago 3:17, 18.
Ang mga Saksi ni Jehova nahinumdom nga si Jesus mabalak-on pag-ayo bahin sa kamatuoran. Gisultihan niya si Poncio Pilato: “Tungod niini ako gipakatawo, ug tungod niini ako mianhi sa kalibotan, aron ako manaksi sa kamatuoran.” (Juan 18:37) Bisag siya maisogong nagalaban sa kamatuoran, wala siya magtinguha nga ipugos ang iyang mga pagtuo diha sa uban. Hinunoa, siya nangamuyo sa ilang mga hunahuna ug mga kasingkasing. Siya nasayod nga ang iyang langitnong Amahan, nga usa ka “maayo ug matul-id” nga Diyos, mohukom kon sa unsang paagi ug kanus-a wad-on ang kabakakan ug inhustisya gikan sa nawong sa yuta. (Salmo 25:8) Busa, wala siya magtinguha sa pagsanta niadtong kinsa dili mouyon kaniya. Sa kasukwahi, ang ortodoksong mga lider sa relihiyon sa iyang adlaw ang naningkamot sa pagsanta kang Jesus.—Juan 19:5, 6.
Ang mga Saksi ni Jehova may malig-ong mga pagtuo bahin sa relihiyosong mga doktrina, ug sila nagpakitag malig-ong mga sukdanan labot sa maayong mga pamatasan. Sama kang apostol Pablo, sila kombinsido nga aduna lamay “usa ka Ginoo, usa ka pagtuo, usa ka bawtismo.” (Efeso 4:5) Sila nahibalo usab sa mga pulong ni Jesus: “Sigpit ang ganghaan ug hagip-ot ang dalan padulong ngadto sa kinabuhi, ug diyutay ra ang mga nakakaplag niini.” (Mateo 7:13, 14) Sa gihapon, sila dili mosulay sa pagpugos sa uban sa pagsunod sa ilang mga pagtulon-an. Hinunoa, ginasundog nila si Pablo ug “nagahangyo” sa tanang nagtinguha nga ‘magpahiuli ngadto sa Diyos.’ (2 Corinto 5:20) Kini maoy mas maayong paagi. Kini maoy paagi sa Diyos.
Ang relihiyosong pundamentalismo, ingon sa paggamit sa pulong karong adlawa, lahi gayod kaayo. Ang mga pundamentalista nagagamit ug daghang paagi—lakip ang kapintasan—sa pagpugos sa ilang mga prinsipyo diha sa katilingban. Sa pagbuhat niana, sila nahimong dakong bahin sa politikanhong sistema. Apan, si Jesus nag-ingon nga ang iyang mga sumusunod angayng “dili bahin sa kalibotan.” (Juan 15:19; 17:16; Santiago 4:4) Uyon nianang mga pulonga, ang mga Saksi ni Jehova naghupot ug estriktong neyutralidad sa mga panagbangi sa politika. Ug, ingon sa gidawat sa mantalaang Fuoripagina sa Italya, sila “dili mopugos sa bisan unsa ngadto ni bisan kinsa; ang tanan libre sa pagdawat o pagsalikway sa ilang gisulti.” Ang resulta? Ang malinawong mensahe sa Bibliya sa mga Saksi nakadani sa mga tawo sa tanang matang, bisan kadtong kinsa kanhi mga pundamentalista.—Isaias 2:2, 3.
Usa ka Kalibotan nga May Malig-ong mga Sukdanan
Ang mga Saksi nahibalo nga ang mga tawo dili makasulbad sa mga problema nga gikabalak-an sa mga pundamentalista. Dili nimo mapugos ang tawo sa pagtuo sa Diyos o sa pagdawat sa imong personal nga mga pagtulon-an. Ang paghunahuna nga posible ang maong butang mitultol sa pipila sa labing mangilngig nga mga kalisangan sa kasaysayan, sama sa mga Krusada, mga Inkwisisyon sa edad medya, ug sa “mga pagkombertir” sa mga Indian sa Amerika. Apan, kon ikaw nagasalig sa Diyos, ikaw andam nga motugyan sa mga butang diha sa iyang mga kamot.
Sumala sa Bibliya, ang Diyos naglimite sa panahon nga niana siya nagtugot sa mga tawo sa paglapas sa iyang mga balaod ug sa ingon nakapahinabog pag-antos ug kasakit. Kanang panahona hapit nang mahurot. Karon, si Jesus nagmando na ingong Hari sa langitnong Gingharian sa Diyos, ug sa dili madugay ang maong Gingharian molihok sa pagwagtang sa tanang kagamhanan sa tawo ug mopuli sa adlaw-adlaw nga pagmando sa katawhan. (Mateo 24:3-14; Pinadayag 11:15, 18) Ang resulta mao ang tibuok yutang paraiso nga niana ang pakigdait ug pagkamatarong modagaya. Nianang panahona mawala na ang pagkadili-tino kon sa unsang paagi angayng pagasimbahon ang matuod nga Diyos. “Ang matarong mismo magapanunod sa yuta, ug sila magapuyo diha niana sa walay kataposan.” (Salmo 37:29) Ang maong dumalayong mga sukdanan sama sa mahigugmaong-kalulot, kamatuoran, hustisya, ug pagkamaayo modaog alang sa kaayohan sa tanang masinugtanong katawhan. Sa pagpaabot nianang panahona, ang salmista nag-ingon diha sa balaknong paagi: “Mahitungod sa mahigugmaong-kalulot ug kamatuoran, sila nagkatagbo; ang pagkamatarong ug pakigdait—sila naghinalokay sa usag usa. Ang kamatuoran mogitib sa yuta mismo, ug ang pagkamatarong mosud-ong gikan mismo sa kalangitan. Usab, si Jehova, sa iyang bahin, mohatag sa kon unsay maayo, ug ang atong kaugalingong yuta mohatag sa abot niini. Una kaniya ang pagkamatarong mismo molakaw, ug kini maghimog dalan pinaagi sa iyang mga lakang.”—Salmo 85:10-13.
Bisan tuod dili nato mabag-o ang kalibotan, kita ingong mga indibiduwal makaugmad ug diyosnong mga sukdanan bisan karon. Busa, kita makapaningkamot nga mahimong ang matang sa mga tawo nga buot sa Diyos ingong iyang mga magsisimba nianang bag-ong kalibotan. Kita unya mahimong mahilakip sa maaghop nga gipunting sa salmista: “Ang mga maaghop mismo makapanunod sa yuta, ug sila makakaplag ug kalipay tungod sa kadagaya sa pakigdait.” (Salmo 37:11) Ang Diyos magapaluyo ug magapanalangin niadtong nagabuhat sa iyang kabubut-on, ug siya nagasaad sa kahibulongang mga butang alang sa ilang umaabot. Si apostol Juan miingon: “Ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.”—1 Juan 2:17.
[Hulagway sa panid 7]
Ang mga Saksi ni Jehova nagadapit sa tanan aron masayod sa maayong balita sa Gingharian sa Diyos
[Picture Credit Line sa panid 6]
Lamparahan sa mga panid 3, 4, 5, ug 6: Printer’s Ornaments/ ni Carol Belanger Grafton/Dover Publications, Inc.