Walay Pakigdait sa Bakak nga mga Mensahero!
“Ang mga mamumuhat ug daotan pagaputlon . . . Apan ang mga maaghop mismo magapanunod sa yuta, ug sila makakaplag gayod sa ilang tumang kalipay tungod sa kadagaya sa pakigdait.”—SALMO 37:9, 11.
1. Nganong kita angayng magdahom nga makakaplag ug mga mensahero, matuod ug bakak, sa “panahon sa kataposan”?
MGA mensahero—bakak o tinuod? Adunay ingon nianang mga matanga sa panahon sa Bibliya. Apan komosta sa atong adlaw? Sa Daniel 12:9, 10, atong mabasa nga ang usa ka langitnong mensahero nag-ingon sa propeta sa Diyos: “Ang mga pulong himoong tinago ug tinimbrehan hangtod sa panahon sa kataposan. Daghan ang magahinlo sa ilang kaugalingon ug magapaputi sa ilang kaugalingon ug mangaulay. Ug ang mga daotan molihok pa sa tumang pagkadaotan, ug walay mga daotan gayod ang makasabot; apan ang mga may salabotan makasabot.” Nagakinabuhi kita karon nianang “panahon sa kataposan.” Nasabtan ba nato ang dakong kalainan tali sa “mga daotan” ug sa “mga may salabotan”? Tino gayod!
2. Sa unsang paagi ang Isaias 57:20, 21 nagakatuman karong adlawa?
2 Sa kapitulo 57, mga bersikulo 20 ug 21, atong mabasa ang mga pulong sa mensahero sa Diyos nga si Isaias: “‘Ang mga daotan nahisama sa dagat nga ginasaliyab, sa dihang kini dili malinaw, ang katubigan niana padayong nagasaliyab ug lusay ug lapok. Walay pakigdait,’ ang akong Diyos nag-ingon, ‘alang sa mga daotan.’” Pagkatukma niining mga pulonga nga naghubit niining kalibotana samtang kini nagapadulong sa ika-21ng siglo! Nangutana pa ngani ang pipila, ‘Makaabot pa kaha kita nianang sigloha?’ Unsay ikaingon kanato sa mga mensahero nga may salabotan?
3. (a) Unsang pagtandi ang gipakita sa 1 Juan 5:19? (b) Sa unsang paagi ang “mga may salabotan” gihubit sa Pinadayag kapitulo 7?
3 Si apostol Juan adunay dinasig-sa-Diyos nga salabotan. Sa 1 Juan 5:19, kini nag-ingon: “Nahibalo kita nga kita nagagikan sa Diyos, apan ang tibuok kalibotan nahimutang diha sa gahom sa tuman-kadaotang usa.” Sukwahi niining kalibotana mao ang 144,000 espirituwal nga mga Israelinhon, ang nagakatigulang nga nanghibilin niini ania pa uban kanato. Nakigduyog niini karong adlawa mao ang “dakong panon . . . gikan sa tanang kanasoran ug mga tribo ug katawhan ug mga dila,” nga may gidaghanon na karon nga kapin sa lima ka milyon, nga may salabotan usab. “Mao kini sila ang nanagpakagawas gikan sa dakong kasakitan.” Ug nganong sila gigantihan? Tungod kay ila usab nga “gilabhan ang ilang mga taas-nga-besti ug nagpaputi niini sa dugo sa Kordero” pinaagi sa pagpakitag pagtuo sa lukat ni Jesus. Ingong mga mensahero sa kahayag, sila usab “nagahatag [sa Diyos] ug sagradong pag-alagad adlaw ug gabii.”—Pinadayag 7:4, 9, 14, 15.
Gikaingong mga Mensahero sa Pakigdait
4. (a) Nganong ang gikaingong mga mensahero sa pakigdait sa kalibotan ni Satanas mapakyas? (b) Sa unsang paagi ang Efeso 4:18, 19 mapadapat karong adlawa?
4 Unsa na man ang gikaingong mga mensahero sa pakigdait sa kalibotanong sistema ni Satanas? Sa Isaias kapitulo 33, bersikulo 7, atong mabasa: “Tan-awa! Ang ilang mga bayani mismo nanagtuaw diha sa dalan; ang mga mensahero sa pakigdait mismo mohilak sa kapait.” Pagkatinuod niini alang niadtong nagkabuang sa pag-adto gikan sa usa ka kaulohan sa kalibotan ngadto sa lain, nga naningkamot sa pagpatunghag pakigdait! Pagkakawang! Ngano man? Tungod kay maoy ilang giatiman ang mga simtoma sa kadunotan sa kalibotan inay kay sulbaron ang lintunganayng mga hinungdan. Sa unang bahin, buta sila sa paglungtad ni Satanas, kinsa gihubit ni apostol Pablo nga “ang diyos niini nga sistema sa mga butang.” (2 Corinto 4:4) Ginapugas ni Satanas ang mga binhi sa pagkadaotan taliwala sa katawhan, uban ang resulta nga ang kadaghanan, lakip ang daghan sa mga magmamando, karon mihaom sa pagkahubit sa Efeso 4:18, 19: “Sila anaa sa kangitngit sa kaisipan, ug nahimulag gikan sa kinabuhi nga iya sa Diyos, tungod sa kawalay-alamag nga anaa kanila, tungod sa pagkakubol sa ilang mga kasingkasing. Nga nawad-an na sa tanang moral nga pagbati, ilang gitugyan ang ilang kaugalingon sa malaw-ayng panggawi sa pagbuhat sa tanang matang sa pagkadili-hinlo uban ang pagkadalo.”
5. (a) Nganong ang tawhanong mga ahensiya mapakyas ingong mga tigpatunhay sa pakigdait? (b) Unsang makapahupayng mensahe ang gihatag sa Salmo 37?
5 Walay ahensiya sa di-hingpit nga mga tawo ang makaluka gikan sa tawhanong mga kasingkasing sa kadalo, kahakog, ug pagdumot nga kaylap kaayo karong adlawa. Ang atong Maglalalang lamang, ang Soberanong Ginoong Jehova, ang makahimo niana! Dugang pa, ang mga maaghop lamang, nga minoriya taliwala sa katawhan, ang andam nga mopasakop sa iyang paggiya. Ang mga resulta niini ug sa kadaotan sa kalibotan gipalahi sa Salmo 37:9-11: “Ang mga mamumuhat ug daotan pagaputlon, apan kadtong nagalaom kang Jehova maoy magapanunod sa yuta. Ug sa dili madugay, ang mga daotan mawala na . . . Apan ang mga maaghop mismo magapanunod sa yuta, ug sila makakaplag gayod sa ilang tumang kalipay tungod sa kadagaya sa pakigdait.”
6, 7. Unsay gipakita sa rekord sa kalibotanong mga relihiyon nga sila napakyas sa pag-alagad ingong mga mensahero sa pakigdait?
6 Nan, makaplagan ba ang mga mensahero sa pakigdait taliwala sa mga relihiyon niining masakitong kalibotan? Buweno, unsa man ang rekord sa relihiyon hangtod karon? Gipakita sa kasaysayan nga ang relihiyon nakig-ambit, oo, nahimo pang tighulhog sa tumang pag-ula ug dugo latas sa kasiglohan. Pananglitan, ang Christian Century sa semana sa Agosto 30, 1995, nga nagataho sa kaguliyang sa kanhing Yugoslavia, nag-ingon: “Sa gikontrol-sa-Serbia nga Bosnia, ang mga pari nagalingkod sa atubangan sa kinaugalingong parliamento, ug anaa usab sa mga front line, diin ang mga yunit ug bisan ang mga hinagiban gipanalanginan sa dili pa ang mga gubat.”
7 Ang usa ka siglo sa misyonaryong buluhaton sa Kakristiyanohan sa Aprika walay nahatag nga maayong resulta, ingon sa gihulagway pag-ayo sa Rwanda, usa ka nasod nga nailhang 80-porsiyentong Katoliko. Ang The New York Times sa Hulyo 7, 1995, nagtaho: “Ang Golias, usa ka gawasnon, laykong Katolikong magasin nga gipatik sa Lyons [Pransiya], nagplano nga ipaila ang 27 dugang pang pari ug upat ka madre sa Rwanda kinsa giingon niini nga nagpatay ug nagdasig sa pagpamatay sa Rwanda sa miaging tuig.” Ang African Rights, usa ka organisasyon sa tawhanong mga katungod sa London, mikomento: “Gawas pa sa pagpakahilom niini, ang mga iglesya kinahanglang manubag usab gumikan sa aktibong pagkalambigit sa pipila sa mga pari niini, mga pastor ug mga madre sa pagpuo sa kaliwat.” Susama kini sa kahimtang sa Israel sa dihang ang matuod nga mensahero ni Jehova nga si Jeremias naghubit sa “kaulaw” sa Israel, uban sa mga magmamando niini, mga saserdote niini, ug mga propeta niini, nga midugang: “Sa imong mga sidsid usab hingkaplagan ang mga timaan sa dugo sa mga kalag sa walay-sala nga mga kabos.”—Jeremias 2:26, 34.
8. Nganong ikaingon nga si Jeremias maoy usa ka mensahero sa pakigdait?
8 Si Jeremias kasagarang gitawag ug propeta sa kalaglagan, apan siya matawag usab ug mensahero sa Diyos sa pakigdait. Subsob niyang gipunting ang pakigdait sama sa gihimo ni Isaias nga una pa kaniya. Gigamit ni Jehova si Jeremias aron ipahayag ang paghukom sa Jerusalem, nga nagaingon: “Kining siyudara, gikan sa adlaw nga ilang gitukod kini, hangtod niining adlawa, napamatud-ang walay pulos apan usa ka hinungdan sa akong kasuko ug hinungdan sa akong kaligutgot, aron sa pagkuha niini gikan sa akong atubangan, tungod sa tanang kadaotan sa mga anak sa Israel ug sa mga anak sa Juda nga ilang gihimo aron sa pagpasuko kanako, sila, ang ilang mga hari, ang ilang mga prinsipe, ang ilang mga saserdote ug ang ilang mga manalagna, ug ang mga lalaki sa Juda ug ang mga pumoluyo sa Jerusalem.” (Jeremias 32:31, 32) Naglandong kini sa paghukom ni Jehova sa mga magmamando ug klero sa Kakristiyanohan karong adlawa. Aron molungtad ang matuod nga pakigdait, kining mga tighulhog sa pagkadaotan ug kapintasan kinahanglang wagtangon! Sila dili gayod mga mensahero sa pakigdait.
Ang HK Ingong Tigpatunhay sa Pakigdait?
9. Giunsa pag-angkon sa HK ingong mensahero sa pakigdait?
9 Dili ba mahimong matuod nga mensahero sa pakigdait ang Hiniusang Kanasoran? Total, ang pasiuna sa karta niini, nga gisubmitar niadtong Hunyo 1945, 41 ka adlaw lamang una pa migun-ob ang bomba atomika sa Hiroshima, mipahayag sa katuyoan niini: “sa pagluwas sa mosunod nga mga kaliwatan gikan sa hampak sa gubat.” Ang 50 ka umaabot nga membro sa Hiniusang Kanasoran “maghiusa sa [ilang] kusog sa pagmentinar sa internasyonal nga pakigdait ug kasegurohan.” Karong adlawa ang HK aduna nay 185 ka membrong nasod, ang tanan gikaingong dedikado sa samang kawsa.
10, 11. (a) Giunsa pagpahayag sa relihiyosong mga lider ang ilang pagpaluyo sa HK? (b) Diha sa unsang paagi ang mga papa sayop nga nagrepresentar sa “Maayong Balita sa Gingharian sa Diyos”?
10 Latas sa katuigan, ang HK gituboy pag-ayo, ilabina sa relihiyosong mga pangulo. Niadtong Abril 11, 1963, si Papa Juan XXIII milagda sa iyang ensiklikal nga nag-ulohang “Pacem in Terris” (Pakigdait sa Yuta) nga niana siya miingon: “Maoy atong mainitong panghinaot nga ang organisasyon sa Hiniusang Kanasoran—sa katukoran ug sa kahinguhaan niini—mahimo pa untang mas takos sa pagdumala sa gidak-on ug kahamili sa buluhaton niini.” Sa ulahi, niadtong Hunyo 1965, ang relihiyosong mga pangulo, gikaingong nagrepresentar sa katunga sa populasyon sa kalibotan, nagsaulog sa ika-20ng natawhan sa HK sa San Francisco. Usab niadtong 1965, si Papa Paulo VI sa usa ka pagduaw sa HK naghubit niana ingon nga “ang kataposang paglaom sa kahusay ug pakigdait.” Niadtong 1986, si Papa Juan Paulo II nakigtambayayong sa pagpalambo sa Internasyonal nga Tuig sa Pakigdait sa HK.
11 Lain pa, sa iyang duaw niadtong Oktubre 1995, ang papa mipahayag: “Karong adlawa atong ginasaulog ang Maayong Balita sa Gingharian sa Diyos.” Apan siya ba gayod ang mensahero sa Diyos sa maayong balita sa Gingharian? Sa paghisgot sa mga suliran sa kalibotan, siya mipadayon sa pag-ingon: “Samtang atong atubangon kining dagkong mga hagit, mapakyas ba kita nga ilhon ang papel sa Organisasyon sa Hiniusang Kanasoran?” Ang HK, inay ang Gingharian sa Diyos, mao ang pinili sa papa.
Mga Katarongan sa ‘Paghilak sa Kapait’
12, 13. (a) Sa unsang paagi milihok ang HK uyon sa paghubit sa Jeremias 6:14? (b) Nganong ang pagpanguna sa HK nalakip sa paghubit sa Isaias 33:7?
12 Ang pagsaulog sa ika-50ng anibersaryo sa HK napakyas sa pagbutyag sa bisan unsang tinuod nga palaaboton sa “pakigdait sa yuta.” Usa ka katarongan mao ang gipakita sa usa ka magsusulat sa The Toronto Star sa Canada, kinsa misulat: “Ang H.K. maoy usa ka leyon nga walay ngipon, nga mongulob kon atubangon sa tawhanong kaluog, apan kinahanglang maghulat pa sa mga membro niini aron itaod ang iyang mga pustiso una pa kini mopaak.” Kasagaran kanang paaka ginagmay ra kaayo ug ulahi pa kaayo. Ang mga mensahero sa pakigdait sa presenteng sistema sa kalibotan, ug ilabina niadtong diha sa Kakristiyanohan, nagapalanog sa mga pulong sa Jeremias 6:14: “Sila nagsulay sa pag-ayo ug diyutay lamang sa kadaotan sa akong katawhan, sa pag-ingon, ‘Adunay pakigdait! Adunay pakigdait!’ sa dihang walay pakigdait.”
13 Ang sunodsunod nga mga sekretaryo-heneral sa HK nagkugi pag-ayo, ug sa walay duhaduha sinsero, aron molampos ang HK. Apan ang kanunayng kabangian tali sa daghag-katuyoang 185 ka membro maylabot sa kon unsaon pagsumpo sa panag-away, pagplanog polisa, ug pagdumala sa panalapi nagpalisod sa mga gidahom nga kalamposan. Sa iyang tinuig nga taho sa 1995, ang kanhi sekretaryo-heneral misulat bahin sa nag-us-os nga “kakuyaw sa globonhong nukleyar nga katalagman” nga nag-abli sa dalan alang sa “mga nasod nga magtinabangay ngadto sa ekonomikanhon ug sosyal nga pag-uswag alang sa kinatibuk-an sa katawhan.” Apan siya midugang: “Ikasubo, ang rekord sa mga kalihokan sa kalibotan sa miaging pipila ka tuig sa kinatibuk-an nagpanghimakak niadtong malaomong mga pagdahom.” Sa pagkatinuod, ang gikaingong mga mensahero sa pakigdait ‘nagahilak sa kapait.’
14. (a) Nganong ikaingon nga ang HK nahapay sa pinansiyal ug sa moral? (b) Sa unsang paagi ang Jeremias 8:15 nagakatuman?
14 Usa ka ulohan sa The Orange County Register sa California mabasa: “Nahapay ang H.K. sa Pinansiyal, sa Moral.” Ang artikulo nag-ingon nga tali sa 1945 ug 1990, may kapin sa 80 ka gubat, nga nagpatay sa kapin sa 30 milyones ka kinabuhi. Mikutlo kini sa usa ka magsusulat sa Oktubre 1995 nga isyu sa Reader’s Digest kinsa “naghubit sa mga operasyong militar sa H.K. nga naila sa ilang ‘inutil nga mga komander, way-disiplinang mga sundalo, pakigkomboya sa mga kaaway, kapakyasan sa pagpugong sa kabangisan ug usahay nagadugang pa sa kalisang.’ Dugang pa, ‘ang gidak-on sa pag-usik-usik, panglimbong, ug pangabuso maoy hilabihan.’” Sa usa ka seksiyon nga nag-ulohang “Ang H.K. sa edad 50,” ang The New York Times nagdala sa ulohang “Sayop nga Pagdumala ug Pag-usik-usik Nakawala sa Labing Maayong mga Intensiyon sa H.K.” Ang The Times sa London, Inglaterra, misugod sa artikulo uban sa mga pulong “Luya sa Ikasingkuwenta—Ang HK nagkinahanglag programa sa pag-ehersisyo aron maulian sa kalagsik.” Sa tinuoray, sama niana ang atong mabasa sa Jeremias kapitulo 8, bersikulo 15: “Dihay paglaom sa pakigdait, apan walay maayong miabot; sa panahon sa pagpang-ayo, apan, tan-awa! kalisang!” Ug ang hulga sa nukleyar nga katalagman padayon gihapong nagahulga sa katawhan. Tin-aw, ang HK dili mao ang mensahero sa pakigdait nga gikinahanglan sa katawhan.
15. Sa unsang paagi ang karaang Babilonya ug ang relihiyosong anak niini napamatud-ang parehong makalurong ug makalaglag?
15 Unsay mahimong sangpotanan niining tanan? Ang matagnaong Pulong ni Jehova tin-aw kaayo. Sa unang bahin, unsay nagpaabot sa bakak nga mga relihiyon sa kalibotan nga sa kasagaran hingamigo ra kaayo sa HK? Sila ang mga anak sa usa ka idolatrosong tinubdan, ang karaang Babilonya. Sa katukma, sila gihubit sa Pinadayag 17:5 ingon nga “Dakong Babilonya, ang inahan sa mga bigaon ug sa dulumtanang mga butang sa yuta.” Gihubit ni Jeremias ang kalaglagan niining salingkapaw nga organisasyon. Sama sa bigaon, gihaylo niini ang mga politiko sa yuta, nga nagaulog-ulog sa HK ug nagahimog gidiling mga relasyon uban sa membrong politikal nga mga gahom niini. Sila ang pangunang mga sumasalmot sa mga gubat sa kasaysayan. Usa ka komentarista naghisgot maylabot sa relihiyosong panaggubat sa India: “Gipunting ni Karl Marx ang relihiyon ingong opyum sa masa. Apan kanang mga pulonga dili kaayo husto sanglit ang opyum makapaluya, makapalurong kini sa katawhan ngadto sa pagkanawad-ag-panimuot. Dili, ang relihiyon sama kaayog cocaine. Magpahinabo kinig labihang kapintasan ug usa ka malaglagon kaayong puwersa.” Apan kana nga magsusulat dili pod kaayo husto. Ang bakak nga relihiyon maoy parehong makapalurong ug malaglagon.
16. Nganong ang matinud-anog-kasingkasing nga katawhan mokalagiw na karon gikan sa Dakong Babilonya? (Tan-awa usab ang Pinadayag 18:4, 5.)
16 Nan, unsay angayng himoon sa matinud-anog-kasingkasing nga katawhan? Ang mensahero sa Diyos nga si Jeremias naghatag kanato sa tubag: “Kumalagiw kamo gikan sa taliwala sa Babilonya, ug ipaluwas sa tagsatagsa ka tawo ang iyang kaugalingong kinabuhi. . . . Kay kini mao ang panahon sa pagpanimalos nga iya ni Jehova.” Malipayon kita nga minilyon ang mikalagiw gikan sa pagkabilanggo sa Dakong Babilonya, ang kalibotanong imperyo sa bakak nga relihiyon. Usa ka ba niini nila? Nan ikaw nakasabot pag-ayo kon nganong ang Dakong Babilonya nakaapektar sa kanasoran sa yuta: “Gikan sa iyang bino ang mga nasod nangahubog. Busa ang mga nasod nangabuang.”—Jeremias 51:6, 7.
17. Unsang paghukom ang duol nang ipahamtang sa Dakong Babilonya, ug unsay mosunod sa maong lihok?
17 Sa dili madugay, ang “nangabuang” nga mga membro sa HK maniobrahon ni Jehova aron mobalitok sa bakak nga relihiyon, ingon sa gihubit sa Pinadayag 17:16: “Kini sila magadumot sa bigaon ug magahimo kaniya nga pinayhag ug hubo, ug magakaon sa iyang unod nga mga bahin ug magaugdaw kaniya pinaagi sa kalayo.” Magtimaan kini sa pagsugod sa dakong kasakitan nga gipunting sa Mateo 24:21 ug matapos sa Armagedon, ang gubat sa dakong adlaw sa Diyos nga Labing Gamhanan. Sama sa karaang Babilonya, ang Dakong Babilonya makaagom sa paghukom nga gipahayag sa Jeremias 51:13, 25: “‘Oh babaye nga nagapuyo sa daghang katubigan, buhong sa mga bahandi, ang imong kataposan miabot na, ang sukdanan sa imong pagpaganansiya. Ania ako batok kanimo, Oh malaglagong bukid,’ nagaingon si Jehova, ‘ikaw nga manglalaglag sa tibuok nga yuta; ug akong pagatuy-oron ang akong kamot batok kanimo ug ligiron ko ikaw gikan sa mga bato ug magahimo kanimo nga usa ka bukid nga nasunog.’” Ang dunot, tighulhog-sa-gubat nga mga nasod mosunod sa bakak nga relihiyon ngadto sa kalaglagan sa dihang ang adlaw sa panimalos ni Jehova ipahamtang usab kanila.
18. Kanus-a ug sa unsang paagi matuman ang Isaias 48:22?
18 Sa 1 Tesalonica 5:3, kini ang gikaingon bahin sa daotan: “Sa diha nga sila magaingon: ‘Kalinaw ug kasegurohan!’ niana ang kalit nga kalaglagan modangat dihadiha kanila ingon sa pag-ul-ol sa kasakit sa usa ka babayeng mabdos; ug sila dili gayod makaikyas.” Kini sila ang giingon ni Isaias: “Tan-awa! . . . Ang mga mensahero sa pakigdait mohilak sa kapait.” (Isaias 33:7) Sa pagkatinuod, ingon sa atong mabasa sa Isaias 48:22, “‘walay pakigdait,’ si Jehova miingon, ‘alang sa mga daotan.’” Apan unsang kaugmaon ang nagahulat sa matuod nga mga mensahero sa diyosnong pakigdait? Hisgotan kini sa atong sunod nga artikulo.
Mga Pangutana sa Pagsubli
◻ Uban sa unsang kusganong mga pulong nga giyagyag sa mga propeta sa Diyos ang bakak nga mga mensahero?
◻ Nganong ang tawhanong mga ahensiya mapakyas sa pagpaningkamot sa pagpatunghag dumalayong pakigdait?
◻ Sa unsang paagi gitandi ang matuod nga mga mensahero sa pakigdait uban sa mga tigpaluyo sa HK?
◻ Unsay kinahanglang buhaton sa maaghop aron makapahimulos sa gisaad ni Jehova nga pakigdait?
[Mga hulagway sa panid 15]
Si Isaias, Jeremias, ug Daniel pulos nagtagna sa kapakyasan sa tawhanong mga paningkamot sa pakigdait
[Hulagway sa panid 16]
“Ang tibuok kalibotan nahimutang diha sa gahom sa tuman-kadaotang usa.”—Apostol Juan
[Hulagway sa panid 17]
“Sila anaa sa kangitngit sa kaisipan.”—Apostol Pablo