Ang Pagduaw sa Papa sa HK—Unsay Nalampos Niadto?

SA IYANG paglupad ibabaw sa Atlantiko aron mopakigpulong sa HK sa New York City, si Papa Juan Paulo II misaylo sa 1,000,000-kilometro nga marka sa iyang pagbiyahe sa kalibotan. Kadto maoy Oktubre 4, 1995, ug kadto ang iyang ika-68ng biyahe sa laing nasod ingong papa. Sa walay pagduhaduha, siya ang labing layog-biyahe nga papa sa kasaysayan sa Iglesya Romana Katolika.

Miabot siya sa Newark International Airport, New Jersey, sa usa ka nag-ulan nga Miyerkoles, nga gilibotan sa usa sa labing kuti nga likop sa seguridad nga gitukod sukad alang kang bisan kinsang taas ug katungdanan. Gibanabanang mga 8,000 ka pederal ug sa siyudad nga mga polis ang gitahasan sa pagpanalipod sa papa. Gitawag kana sa usa ka taho nga “usa ka kuti nga bagaw sa seguridad,” nga naglangkit sa mga helikopter ug mga mananalom.

Nganong Miduaw Siya?

Sa iyang pakigpulong sa pag-abot sa tugpahanan, gihinumdoman sa papa nga ang iyang gipulihan, si Papa Paulo VI, nakapahayag ngadto sa Heneral nga Asembliya sa HK uban ang awhag alang sa pakigdait: “Wala nay gubat, wala na gayoy gubat!” Si Juan Paulo II miingon nga siya mibalik “aron ipahayag ang [iyang] dulot nga pagtuo nga ang mga mithi ug mga katuyoan nga mitultol sa pagkatukod sa HK tunga sa siglo kanhi labi pang kinahanglanon sa usa ka kalibotan nga nagapangita ug katuyoan.”

Sa mga pag-ampo sa gabii sa Sacred Heart Cathedral, Newark, gipakita na usab sa papa ang iyang pagsuportar sa HK, nga miingon: “Ang maong organisasyon naglungtad aron moalagad sa katibuk-ang kaayohan sa tawhanong pamilya, ug busa angay nga ang papa mopakigpulong didto ingong usa ka pamatuod sa paglaom sa Ebanghelyo.” Siya midugang: “Busa ang atong pag-ampo alang sa pakigdait maoy pag-ampo usab alang sa Organisasyon sa Hiniusang Kanasoran. Si San Francis sa Assisi . . . ilado ingong bantogang maghihigugma ug batid sa pakigdait. Pangayoon nato ang iyang hinabang sa mga paningkamot sa Hiniusang Kanasoran alang sa hustisya ug pakigdait sa tibuok kalibotan.”

Sa iyang pakigpulong ngadto sa HK, iyang gidayeg ang dili-mabangisong politikanhong mga kausaban sa 1989 sa Silangang Uropa, diin napasig-uli ang kagawasan diha sa ubay-ubayng nasod. Iyang gidasig ang mga tawo nga ipakita ang “matuod nga patriotismo” ingong lahi sa “mapihigon ug bug-os nga pagkamakinasod.” Gihisgotan niya ang mga inhustisya sa presenteng sistema, nga miingon: “Sa dihang ang minilyong katawhan nagaantos sa kakabos nga nagpasabot sa kagutmanan, kakulang ug sustansiya, sakit, iliterasiya, ug pagkaalaot, kinahanglang . . . pahinumdoman nato ang atong kaugalingon nga walay mausa ang adunay katungod sa pagpahimulos sa lain alang sa iyang kaugalingong bentaha.”

Unya siya miingon: “Samtang atong atubangon kining dagko kaayong mga hagit, sa unsang paagi mapakyas kita sa pag-ila sa papel sa Organisasyon sa Hiniusang Kanasoran?” Siya miingon nga ang HK kinahanglang “mahimong sentro sa moral nga mga sukdanan diin ang tanang nasod sa kalibotan mobating relaks.” Gipasiugda niya ang panginahanglan nga ipausbaw “ang panag-usa sa tibuok tawhanong pamilya.”

Matuod nga Pakigdait​—Diin Gikan?

Sa walay pagduhaduha, siya mipahayag ug daghang hamiling mga pagbati. Bisan pa, sa iyang taas nga pakigpulong, may panahon ba nga iyang gipunting ngadto sa mga pangulo sa kalibotan ang solusyon sa Diyos alang sa mga suliran sa katawhan​—ang pagmando sa iyang Gingharian pinaagi ni Kristo Jesus? (Mateo 6:10) Wala. Sa pagkamatuod, wala gayod siya mokutlo sa Bibliya sa iyang pakigpulong ngadto sa HK. Sa kasukwahi, siya miingon nga “sa tabang sa grasya sa Diyos, kita makatukod sa sunod nga siglo ug sa sunod nga milenyo sa usa ka sibilisasyon nga takos sa tawhanong pagkatawo, sa usa ka matuod nga kultura nga may kagawasan.” Alang sa mga estudyante sa Bibliya, ang maong pagbati daw nagpalanog sa susamang pagbati nga gipahayag niadtong didto sa karaang Babel kapig 4,000 ka tuig kanhi, nga naghunahuna nga mahiusa nila ang katawhan pinaagi sa tawhanong ahensiya: “Dali kamo! Magtukod kitag usa ka siyudad ug usab usa ka torre nga ang tumoy niini abot sa mga langit, ug himoon nato ang usa ka dungganong ngalan alang sa atong kaugalingon.” (Genesis 11:4) Busa, gikan sa maong punto de bista, ang politikanhong mga pangulo sa katawhan, nga gihawasan diha sa HK, maoy magtukod ug usa ka bag-ong sibilisasyon nga gipasukad sa kagawasan.

Apan unsay gitagna sa Bibliya bahin sa umaabot sa politikanhong mga gobyerno sa tawo ug sa HK mismo? Ang mga basahong Daniel ug Pinadayag naghatag sa tin-awng panan-awon sa umaabot nga naghulat kanila. Si Daniel mitagna nga sa kataposang mga adlaw, ang Diyos magpahiluna sa iyang Gingharianong pagmando, nga samag usa ka dako kaayong bato nga ‘dili kinulit sa mga kamot sa tawo.’ Unsay iyang himoon? “Sa mga adlaw niadtong mga haria ang Diyos sa langit magatukod ug usa ka gingharian nga dili gayod magun-ob. . . . Kini magadugmok ug magatapos niining tanang gingharian, ug kini mismo mobarog sa mga panahong walay tino.” Ang mga gobyerno sa tawo pulihan sa usa ka matarong nga pagmando alang sa tanang tawo.​—Daniel 2:44, 45.

Unsay mahitabo sa HK? Ang Pinadayag kapitulo 17 naghulagway sa HK (ug sa wala-magdugay nga mag-uuna niini, ang Liga sa Kanasoran) ingong sanag-pulang bulok nga mapintas nga mananap nga “mopadulong ngadto sa kalaglagan.” (Pinadayag 17:8)a Ang kang Jehova nga tinubdan sa matuod nga pakigdait dili ang di-hingpit nga tawhanong ahensiya, bisan pag unsa ka sinsero tingali ang mga sumusunod niini. Ang matuod nga pakigdait moabot pinaagi sa sinaad nga Gingharian sa Diyos, diha sa mga kamot sa binanhawng si Kristo Jesus sa kalangitan. Kana ang pasikaranan sa pagkatuman sa saad sa Diyos sa Pinadayag 21:3, 4: “Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”

Ang Pagduaw​—Unsa ka Dako ang Epekto?

Sa dihang ang papa naghisgot sa Bibliya diha sa iyang mga pakigpulong, ang Katolikong mga matinuohon ba nadasig sa pagkuha sa ilang mga Bibliya ug nagsusi sa mga reperensiya? Ang kamatuoran mao nga ang kadaghanan wala gani magdalag Bibliya. Talagsa rang misitar ang papa ug tinong kasulatan aron daling makabasa ang mamiminaw sa Bibliya.

Usa ka pananglitan maoy sa dihang siya mipakigpulong ngadto sa 83,000 sa Giants Stadium, New Jersey, ug miingon: “Kita nagpaabot sa pagbalik sa Ginoo ingon nga maghuhukom sa mga buhi ug sa mga patay. Kita nagpaabot sa iyang pagbalik diha sa himaya, sa pag-abot sa gingharian sa Diyos diha sa kabug-osan niini. Kana mao ang makanunayong pagdapit sa mga salmo: ‘Maghulat sa Ginoo uban ang kaisog; magmaisogon sa kasingkasing, ug maghulat sa Ginoo.’” Apan unsang tekstoha ang iyang gikutlo gikan sa mga salmo? Ug kinsang Ginoo ang iyang gitumong​—si Jesus o ang Diyos? (Itandi ang Salmo 110:1.) Sumala sa Batikanong mantalaan, L’Osservatore Romano, siya nagkutlo sa Salmo 27:14, nga mabasang mas tin-aw: “Ibutang ang imong paglaom kang Yahweh, magmalig-on, magmaisogon sa imong kasingkasing, ibutang ang imong paglaom kang Yahweh.” (The Jerusalem Bible) Oo, angay natong ibutang ang atong paglaom kang Yahweh, o Jehova, ang Diyos ni Ginoong Jesus.​—Juan 20:17.

Sa tibuok nga kasaysayan, ang Katolikong klero ug mga pangulo nagpasiugda bag pakigdait taliwala sa mga nasod? Ang Katolikong pagpanudlo nakasulbad ba sa etniko, rasanhon, ug tribonhong mga kabingkilan? Ang 1994 nga mga huwes de-kutsilyo sa Rwanda, silangan-sentral Aprika, ug ang tinigbakay nga mga gubat sa miaging pipila ka tuig diha sa kanhing Yugoslavia naghulagway tanan nga ang relihiyosong mga pagtuo kasagarang napakyas sa pagwagtang sa labing lalom nga pagdumot ug mga pagkamapihigon nga nagpahipi diha sa kasingkasing sa tawo. Ni ang senemanang pangompisal ngadto sa usa ka pari ni ang regular nga pagtambong ug Misa mag-usob sa panghunahuna ug linihokan sa mga tawo. Kinahanglang adunay mas lalom pang impluwensiya, usa ka impluwensiya nga mahitabo lamang sa dihang ang Pulong sa Diyos pasudlon sa kasingkasing ug kaisipan sa magtutuo.

Ang nausob nga panggawi sa usa ka matuod nga Kristohanon gibase, dili sa emosyonal nga reaksiyon nga gidasig sa relihiyosong mga rituwal, kondili gibase sa matarong nga pagsabot sa kabubut-on sa Diyos alang sa matag usa ka indibiduwal. Si apostol Pablo mipahayag: “Ayaw ninyo umola ang panggawi sa kalibotan alirong kaninyo, apan usba ang inyong panggawi, nga giumol sa inyong bag-ong kaisipan. Kini lamang ang paagi sa pagsuta sa kabubut-on sa Diyos ug pagkahibalo kon unsay maayo, kon unsay gikinahanglan sa Diyos, kon unsay hingpit nga butang buhaton.” (Roma 12:1, 2, JB) Kining bag-ong panggawi makab-ot pinaagi sa pagtuon sa Pulong sa Diyos nga motultol sa tukmang kahibalo sa iyang kabubut-on. Momugna kinig espirituwal nga puwersa nga mopalihok sa kaisipan ug mosangpot sa Kristohanong panggawi.​—Efeso 4:23; Colosas 1:9, 10.

Ang Iglesya ba Anaa sa “Makuyaw nga Kinasang-an”?

Ang Kinatsilang mantalaang El País mibatbat kang Papa Juan Paulo II ingong nagbaton ug “ekstraordinaryong karisma” alang sa usa ka tawong 75 anyos na, ug ang usa ka mantalaan sa T.B. nagtawag kaniyang “usa ka eksperto sa media.” Hanas siyang makiglabot sa prensa ug makigkontak sa mga masa ug sa ilang mga anak. Sa iyang mga biyahe iyang gihawasan sa takos nga paagi ang Santa Sede nga anaa sa Siyudad sa Batikano. Bisan pag ang Batikano opisyal nga giila sa HK, ang pagpanalangin sa papa sa maong organisasyon dili magagarantiya sa pagpanalangin ni Jehova nga Diyos niana.

Nagkadaiya ang mga sanong sa pagduaw sa papa. Daghan niadtong mga Katoliko nga nakakuhag mga tiket alang sa Misa sa gawas mibating nabayaw sa emosyon tungod sa kasinatian. Bisan pa niana, ang pipila ka Katolikong lider nakabaton ug mas negatibong panghunahuna bahin sa pagduaw ug sa posibleng mga epekto niini. Ang The New York Times mikutlo kang Timothy B. Ragan, presidente sa Katolikong Nasodnong Sentro Alang sa Pastoral nga Pagpanguna, nga nag-ingong “ang pagduaw sa Papa maoy usa ka higayon nga nakawang. Bisan pag ang biyahe ‘makapadasig ug sa sakramento usa ka talagsaong hitabo alang sa kadaghanang tawo,’” alang sa daghang Katolikong mga lider kadto “wala magtaganag higayon nga siya makapatalinghog ug walay tagana alang sa pagbayloay ug hunahuna.” Daghang Katoliko mibati nga kon bahin sa mga isyu sama sa selibasiya, pagpugong sa pag-anak, ug diborsiyo, sila napugos sa pagpamati lamang sa usa ka papa nga nagpahayag.

Ang pila ka Katolikong awtoridad miila nga “ang iglesya anaa sa makuyaw nga kinasang-an,” ug nahadlok sila nga daghang Katoliko, “ilabina ang mga batan-on, nagakawad-an ug tinong pagsabot kon unsay kahulogan sa pagka-Katoliko.” Si James Hitchcock, usa ka Katolikong tradisyonalista, “nag-isip sa suliran ingong usa ka malaglagong bugnawng gubat tali sa mausbawon nga konserbatibong herarkiya ug sa may pagkaliberal nga ‘tungatungang pagdumala.’”

Bahin sa kon sa unsang paagi ang pagduaw sa papa makaapektar sa krisis diha sa mga membro sa iglesya, si Hitchcock miingon: “Siya moanhi, siya dayegon pag-ayo, siya mopauli​—ug walay nalampos. Ang mga sangpotanan makapahigawad gikan sa akong panglantaw.” Nalabyan gayod sa papa ang usa ka higayon sa pagsulti sa politikanhong mga pangulo sa HK kon asa hikaplagan ang tinubdan sa matuod nga pakigdait.

Bisan pag ang Karta sa HK ug tawhanong propaganda naghatag ug pasiugda sa tumong nga “kalinaw ug kasegurohan,” ayaw pagpalimbong. Ang Bibliya nagpasidaan: “Sa diha nga sila magaingon: ‘Kalinaw ug kasegurohan!’ niana ang kalit nga kalaglagan modangat dihadiha kanila ingon sa pag-ul-ol sa kasakit sa usa ka babayeng mabdos; ug sila dili gayod makaikyas.” (1 Tesalonica 5:3) Ang matuod nga kalinaw ug kasegurohan moabot lamang pinaagi sa kabubut-on sa Diyos ug sa iyang paagi​—pinaagi sa pagmando sa iyang Gingharian, dili pinaagi sa HK.

[Footnote]

[Picture Credit Line on page 22]

Mga letrato sa HK