Ang HK—Ang Paagi sa Diyos sa Kalinaw?

“Kombinsido ako nga makahatag ang Hiniusang Kanasoran ug labing maayong dalan sa umaabot alang niadtong may pagsalig sa among katakos sa pag-umol sa atong kaugalingong kapalaran niining planetaha.”

KANANG pagtuoha gipahayag sa miaging Sekretaryo-Heneral si Kurt Waldheim diha sa iyang librong The Challenge of Peace. Samtang giadmiter ang mga kakulangan, siya mibatbat usab: “Angay nga masayran nga ang Hiniusang Kanasoran, maoy usa ka gamay nga kalibotan. Ang mga kahuyangan mapasangil sa mga kasumpakian nga maoy kinaiya sa komunidad sa kalibotan.” Siya midugang: “Ikaingon ko nga kini [ang Hiniusang Kanasoran] maoy hulagway sa kalibotan nga gialagaran niini. Kanang kalibotana maoy katigoman sa hilabihan ka lahi, kasagaran badlongon, mabination, ug maawayong kanasoran.” Apan dili tanan sa mga komentarista naglantaw sa HK sa samang paborableng hunahuna.

Diha sa ilang librong A Dangerous Place—The United Nations as a Weapon in World Politics, ang duha ka Propesor si Yeselson ug Gaglione nangatarongan nga sa unang mga adlaw niini ang HK maoy usa ka katigoman sa pagdayganay sa panag-away, ug nga lugar kini sa mainit nga mga panagbingkil ug politikal nga mga maniobra nga mopasamot lang sa internasyonal nga mga away. Ug komusta ang kalibotan nga gialagaran niini? “Ang malaw-ay apan simpleng kamatuoran mao nga ang politika sa kalibotan dako kaayog kaamgiran sa lasang. Gibase ang nasodnong pamatasan sa intereses sa kaugalingon ug sa kaluwasan. Ang tinguha nga makab-ot ang ulahi nakahatag sa nasod-estado nga sistema dili lamang balaod sa lasang kondili sa moralidad usab niini.” Ingong resulta, “ang gubat nahimong permanenteng bahin sa internasyonal nga relasyon.”

Pagkadakong kalainan kini sa dagkong mga paglaom nga ilang nabatonan sa gipirmahan ang Karta sa Hiniusang Kanasoran sa 1945! Ang pasiuna niini nag-ingon: “KAMI NGA KATAWHAN SA HINIUSANG KANASORAN MATINGUHAON sa pagluwas sa mosunod nga kaliwatan gikan sa hampak sa gubat, diin duha ka beses nakahatag sa atong kinabuhi ug dako kaayong kagul-anan sa katawhan . . . NAGKASABOT SA PAGHIUSA SA AMONG MGA PANINGKAMOT SA PAGKAB-OT NIINING MGA TUMONGA.”

Sa milabay ang kap-atan ka tuig taphaw kining pamation. Imbes magkahiusa, ang mga nasod nabahin. Bisan karon ang gubat maoy adlaw-adlawng hitabo sa milyonmilyon sa nagkalainlaing bahin sa yuta! Adlaw-adlaw nanag-antos ang mga tawo ug nangamatay ingong mga biktima sa gubat—bisan pa sa paglungtad sa HK.

Kinsa Gayod ang Nagapaluyo sa HK?

Bisag adunay nagkalainlaing mga hunahuna, ang duha ka libro nga gikutlo sa sinugdan nagpunting sa usa ka tagsaong bahin. Si Waldheim nag-ingon nga ang HK ‘maoy hulagway sa kalibotan nga gialagaran niini,’ ug gitandi ni Yeselson ug Gaglione kanang politikal nga kalibotan sa lasang. Busa ang HK bug-os nga nagpabanaag sa mao gihapong kabalaoran sa politikal nga lasang nga ginapuy-an sa mga sakop niini.

Uban niini sa hunahuna, maayong tagdon ang mga simbolismo nga gigamit sa Bibliya. Ang Bibliya naghisgot ug usa ka “mapintas nga mananap” ug sa “larawan” niini, nga gibatbat ingong “mapulag kolor nga mapintas nga mananap.” (Pinadayag 13:1, 2, 14; 17:3, 8, 11) Ang unang mapintas nga mananap naghulagway sa bug-os tibuok-kalibotang politikal nga organisasyon nga naglungtad kapin sa miaging 4,000 ka tuig ug nga misangpot sa nagkadaiyang politika nga makita sa kalibotan karon.a Nan unsay gihulagwayan nianang maong “larawan”?

Sumala sa mga tuboran nga gikutlo sa ibabaw, unsang organisasyona nga naghulagway sa politikal nga sistema karon? Sa dayag, ang HK uban sa 159 ka membrong mga nasod niini, nga gihawasan hapit sa tibuok yuta. (Tan-awa ang panid 11.) Ug ang mga simbolo sa Bibliya sa mapintas nga mananap takdo kaayo sa larawan sa ‘politikal nga lasang.’ Makasubo apan tinuod nga daghang politiko nakapakanaog ug ilang politikal nga mga pilosopiya samag mapintas nga mga mananap—nga mabangisong nagapamatay sa milyonmilyong katawhan, kasundalohan ug mga sibilyan, sa ilang mga gubat ug sa mga pagpamatay tungod sa politika. Ang pagsakit ug ang pundok sa mga tigpatay gigamit gihapon ingong mga kasangkapan sa politikal nga pagpamugos. Ug kadaghanan niining mga gobyernoha ug mga pilosopiya adunay ilang dungganong hawas diha sa HK.

Tungod sa nag-una, makataronganon ba ang pagtuo nga ang HK maoy paagi sa Diyos sa kalinaw, ilabina kon, sa pinakayanong kabatbatan, ang “Diyos gugma”? (1 Juan 4:8) Apan kon ang HK dili mao ang sulbad sa Diyos sa suliran, kinsa gayod ang nagapaluyo sa HK?

Tin-aw nga gipadayag sa Bibliya ang sinugdanan sa politikal nga sistema sa “mapintas nga mananap” ug sa HK nga “larawan” niini. Diha sa Pinadayag 13:2 atong mabasa: “Ug gihatagan sa dragon ang mananap ug iyang gahom ug trono ug dakong pagbulot-an.” Kinsay gihulagwayan sa “dragon”? Ang mao gihapong magsusulat sa Bibliya nagtin-aw nga ang “dragon” mao “ang usa nga gitawag Yawa, ug Satanas, nga nagapahisalaag sa tibuok yuta.” Apan sa unsang paagi gipahisalaag ni Satanas ang kalibotan?—Pinadayag 12:9.

Pinaagi sa tanang politikal nga laraw ug pilosopiya, lakip sa HK, si Satanas, ang unang bakakon, nagpalayo sa pagtagad sa katawhan gikan sa bugtong tinuod nga dalan sa kalinaw ug kasegurohan—ang pagmando sa Gingharian sa Diyos ibabaw ning yutaa. (Juan 8:44) Hapit duha ka libo ka tuig, ang nag-angkong mga Kristohanon nag-ampo, “Paanhia ang imong gingharian.” Apan ang kadaghanan walay klarong ideya kon unsay kahulogan sa Gingharian sa Diyos. Unsay kahulogan niini alang kanimo? Karon nga haduol na kaayo ang Gingharian hinungdanon gayod ang pagbaton ug tukmang pagsabot bahin niana.—Mateo 6:9, 10.

Ang mga koresponsal sa Pagmata! nasayod gikan sa personal nga kontak nga daghang sinsero ug dedikadong katawhan nagkugi sa pagpalambo sa tumong sa HK. Kining sinserong katawhan nakakita usab sa mga kahuyangan sa organisasyon, apan sama kang Kurt Waldheim ug sa uban, sila nagtuo nga kini mao lamang ang bugtong paglaom alang sa walay kataposang kalinaw ug kasegurohan sa tawo. Wala silay nahibaloang mas maayong solusyon. Apan adunay kapilian nga tingali ilang nalimtan—ang pagmando sa Gingharian sa Diyos.—Pinadayag 11:15.

Ang Bugtong Paagi sa Kalinaw

Ang Bibliya nagpakita nga nagkahulogan ang Gingharian sa Diyos sa langitnong pagmando, o kagamhanan sa yuta nga gikan sa espirituhanong gingharian. (Daniel 2:44; Pinadayag 21:1-4) Kining Gingharian nga kagamhanan pinaagi ni Kristo nagalihok na sa tibuok yuta ug ginaandam ang dili nasyonalistikong katawhan alang sa kinabuhing walay kataposan ilalom sa pagmando niini. Kining bug-os nahiusang lawas sa katawhan nga gikan sa tanang kanasoran ug sa tanang pinulongan nailhang mga Saksi ni Jehova. Sila ang tinuod “hiniusang kanasoran” nga nakahimo na sa ‘ilang mga espada nga mga punta sa daro.’ Ilang nabugto usab ang mga talikala sa rasismo ug ang mapig-otong nasyonalismo, nga gitawag nga “ang labing gamhanon ug malaglagong puwersa sa internasyonal nga politika.” Kadtong maong mga talikala nagabugkos gihapon ug nakaulang sa HK.—Isaias 2:2-4.

Pinaagi sa personal nga pagtuon sa Bibliya, ang mga Saksi ni Jehova nasayod nga ang Gingharian lamang sa Diyos ang makahatag tinuod ug malungtarong kalinaw niining yutaa ug nga haduol na kaayo ang panahon alang sa Gingharian sa Diyos sa paglihok. (Lucas 21:31-33; Pinadayag 16:14, 16) ‘Unsa nga lihok?’ tingali mangutana ka. Ang kalaglagan niadtong kinabubut-ong magalaglag sa yuta. (Pinadayag 11:18) Lakip niini ang paglaglag sa tanang makapabahing politikal nga mga elemento. (Daniel 2:44) Busa gisalikway sa mga Saksi ni Jehova ang dili-igo mini nga sulbad ni Satanas—ang HK. Nganong dili kana igo?

Ang ika-17ng siglong Olandes nga pilosopo si Spinoza nagbatbat sa kalinaw ingong “dili sa pagkawalay gubat” kondili usa ka butang nga mas malangkobon. Siya miingon: “Kini maoy usa ka hiyas, usa ka panghunahuna, usa ka kinaiya sa pagkamaayo, pagsalig, katarongan.” Makab-ot lamang kana pinaagi sa pagpaedukar sa mga tawo sa gugma ug kahusay imbes pagdumot ug pagbahinbahin. Sumala sa gitala sa usa ka magsusulat sa Bibliya si Santiago: “Ang bunga sa pagkamatarong gipugas diha sa malinawong mga kahimtang alang sa mga nanagpamuhat sa pakigdait.” (Santiago 3:18) Pinaagi sa ilang tibuok yutang edukasyonal nga buluhaton ang mga Saksi ni Jehova nagapanudlo sa mga paagi sa Diyos sa kalinaw, kay ang iyang Pulong nag-ingon: “Ang tanan nimong mga anak pagatudloan ni Jehova, ug dagaya ang kalinaw sa imong mga anak.”—Isaias 54:13.

Kon buot kang masayod ug dugang pa bahin sa kagamhanan sa Gingharian sa Diyos, makahimo ka sa pagkigkita sa mga Saksi ni Jehova sa imong dapit. Malipay sila sa pagtabang kanimo sa pagkasayod sa paagi sa Diyos sa kalinaw.

[Mga footnote]

[Kahon sa panid 11]

Dagkong mga Suliran nga Nakadaot sa HK

Dikompletong listahan sa dagkong mga suliran sa kalibotan karon nga may kalabotan sa daghang nasod nga membro

sa HK

1. Lumba sa nukleyar nga hinagiban ug ang U.S.A.-U.S.S.R. nga komprontasyon

2. Ang pagkaditimbang sa ekonomiya sa Amihanan-Habagatan; suliran sa utang sa gawas sa nagakaugmad nga kanasoran

3. Kagutmanan ug kakabus sa Aprika, anam-anam nga pagkahimong disyerto sa kontinente

4. Droga, internasyonal nga negosyo

5. Internasyonal nga terorismo

6. Mapihigong polisa ug mga relasyon uban sa silingang mga nasod sa Aprika del Sur

7. Ang independensiya sa Namibia gikan sa Aprika del Sur

8. Ang gumonhap sa Israel ug Palestina

9. Kasamok sa Lebanon

10. Panag-away sa Iran-Iraq

11. Habagatan-sidlakang Asia, ang okupasyon sa mga taga Vietnam sa Kampuchea

12. Sentral Amerika, panag-away sa girilya sa El Salvador ug Nicaragua

13. Afghanistan, pagpangilabot sa Unyong Sobyet

14. Suliran sa lagiw sa kalibotan, kapin sa diyes milyones ka tawo ang naapektohan

15. Pag-abuso sa tawhanong mga katungod

Gibase kining listahana sa mga pakigpulong nga gipahayag sa ika-39ng sesyon sa Heneral nga Asembliya sa HK sa 1984 sa 150 ka hawas, lakip sa 16 ka ulo sa estado o kagamhanan. (Tan-awa ang UN Chronicle, Tomo XXI, Numero 8/1984.)

[Kahon sa panid 11]

Pagtubo sa Pagkamembro sa HK

1945 51 ka nasod: Sentral ug Amerika del Sur 19; Uropa 14; Asia 2; Tungang Silangan 7; Aprika 3; Pasipiko 3; Amerika del Norte 3

1950 60 ka nasod: Sentral ug Amerika del Sur 19; Uropa 16; Asia 7; Tungang Silangan 9; Aprika 3; Pasipiko 3; Amerika del Norte 3

1960 100 ka nasod: Sentral ug Amerika del Sur 19; Uropa 27; Asia 13; Tungang Silangan 10; Aprika 25; Pasipiko 3; Amerika del Norte 3

1970 127 ka nasod: Sentral ug Amerika del Sur 23; Uropa 28; Asia 16; Tungang Silangan 12; Aprika 41; Pasipiko 4; Amerika del Norte 3

1980 154 ka nasod: Sentral ug Amerika del Sur 29; Uropa 30; Asia 19; Tungang Silangan 16; Aprika 50; Pasipiko 7; Amerika del Norte 3

1985 159 ka nasod: Sentral ug Amerika del Sur 32; Uropa 30; Asia 20; Tungang Silangan 16; Aprika 50; Pasipiko 8; Norte Amerika 3

[Letrato sa panid 9]

Ang mga bandera sa 159 ka membrong nasod nga giparada sa atubangan sa HK

[Letrato sa panid 10]

Kinsa ang nakahimo na sa ‘ilang mga espada nga mga punta sa daro’?