Ang Milagroso Bang Pagpanambal Mahitabo Gihapon?
“DAWATA si Jesus ug mamaayo ka!” Ang mga eslogan nga sama niini mitultol kang Alexandre, usa ka membro sa usa ka Ebanghelikal nga iglesya, sa pagtuo nga ang pagtomar ug tambal alang sa iyang balatian nagpakitag kakulang sa pagtuo. Nakombinsir siya nga ang iyang pagtuo lamang magpahinabo sa milagrosong pagkaayo nga iyang gikinahanglan. Si Benedita, usa ka sinserong Katoliko, natandog kaayo sa dihang nakadungog siya bahin sa milagrosong mga pagpang-ayo sa sangtuwaryo sa Aparecida do Norte, sa estado sa São Paulo, Brazil. Naggamit ug mga pangyamyam nga gitudlo sa iyang iyaan kaniya, si Benedita nag-ampo ngadto sa Our Lady of Aparecida, Anthony, ug ubang “mga santos” alang sa gahom sa pag-ayo sa masakiton.
Dayag, bisan sa ulahing bahin sa ika-20ng siglo, daghang tawo ang nagtuo gihapon sa milagrosong pagpanambal—apan ngano? Lagmit, ang pipila nahigawad sa dihang ang mga doktor wala kaayoy mahimo aron sa paghupay sa balatian, kasakit, ug pag-antos sa ilang mga minahal, ilabina sa ilang mga anak. Kadtong natakboyan sa laygay nga mga sakit mahimong mobati nga tungod sa kamahal sa modernong medisina, walay mawala kanila kon magpatambal pinaagi sa pagtuo. Ang pipila nakakita diha sa TV sa nagkalainlaing mga iglesya ug mga indibiduwal nga nagtanyag ug mga tambal alang sa AIDS, depresyon, kanser, pagkabuang, taas nga presyon sa dugo, ug daghang uban pang mga balatian. Kon kaha sila nagtuo o wala sa maong mga pangangkon, sila tingali modangop niana ingong kataposang tuboran sa tabang. Sa gihapon ang uban nga nagtuo nga ang ilang sakit gipahinabo sa daotang mga espiritu mahimong mobati nga ang naandang medisina walay gahom sa pagtabang kanila.
Sa laing bahin, anaa kadtong misupak pag-ayo, nagsaway pa gani, sa ideya sa milagrosong pagpanambal pinaagig patay nga “mga santos” o buhing mga mananambal. Sumala sa Jornal da Tarde, ang imyunologong si Dráusio Varella mibati nga ang pagtuo sa milagrosong pagpang-ayo “nagbugalbugal sa pagtuo sa mga dili-mabinantayon ug sa mga walay-paglaom.” Siya midugang: “Nga naglaom sa mga milagro, daghan ang mohunong tingali sa hinungdanong medikal nga pagtambal tungod niining maong mga manlilimbong.” Ug ang The New Encyclopædia Britannica nag-ingon: “Ang wala-maanding mga pagpang-ayo sa miagi nalangkit sa sagradong mga dapit ug relihiyosong mga rituwal, ug ang medikal nga siyensiya nakiling sa pagpahinungod nianang tanang pagpanambal ngadto sa kinaiyanhong proseso sa paglamat nga naglihok ubos sa maayong mga kahimtang.” Sa gihapon, daghan ang nagtuo nga sila naayo gayod pinaagig milagro. Alang kanila, misaler ang pagtambal!
Kadtong sinati sa Bibliya nakaamgo nga si Jesu-Kristo nag-ayo sa masakiton sa daghang okasyon, nga naghimo niini pinaagi sa “gahom sa Diyos.” (Lucas 9:42, 43) Sa ingon sila mahibulong tingali, ‘Ang gahom ba sa Diyos nagalihok gihapon ug nagpahinabog milagrosong pagpang-ayo karong adlawa?’ Kon mao, nganong ang mga paningkamot sa pagtambal napakyas sa pagpahinabo sa gisaad nga mga resulta? Tungod ba kay ang pasyente kulang ug pagtuo o tungod ba kay ang iyang donasyon gamay ra? Tukma ba alang sa usa ka Kristohanon ang pagtinguhag milagrosong pagtambal sa dihang nag-antos siya sa masakit o kaha walay-kaayohang sakit? Ug ang dili mapakyas nga milagrosong pagtambal nga sama sa gihimo ni Jesus mahitabo ba pag-usab? Makaplagan nimo ang mga tubag niining hinungdanong mga pangutana sa mosunod nga artikulo.