Mga Magmamantala sa Gingharian Nagtaho

Paglingkawas Gikan sa Impluwensiya sa Demonyo

ANG pagbuhat sa espiritismo dugay nang nagdominar sa mga kinabuhi sa minilyong tawo. Apan posible nga makalingkawas niana! Mao kana ang nahitabo sa daghan didto sa karaang siyudad sa Efeso. Sumala sa asoy sa Bibliya, “ubay-ubay niadtong mga nanaggamit ug mga kalaki sa salamangka mitapok sa ilang mga basahon ug misunog niini . . . Busa sa gamhanang paagi ang pulong ni Jehova padayong nagatubo ug nagamadaogon.”​—Buhat 19:​19, 20.

Ang Kristohanong kongregasyon karong adlawa sa susama nakasinati ug pag-uswag. Sama sa kaso sa Efeso, lakip niadtong nahimong mga magtutuo mao kadtong kanhi nagbuhat sa demonismo. Ang mosunod nga kasinatian gikan sa Zimbabwe nag-ilustrar niini.

Si Gogo (Lola) Mthupha ilado tungod sa iyang espiritistikanhong mga gahom. Ang mga tawo naggikan sa ingon kalay-on sa Zambia, Botswana, ug Habagatang Aprika aron tambalan niya sila pinaagi sa iyang mga tambal nga gikan sa tanom. Si Gogo Mthupha nagtudlo usab sa uban kon unsaon pagkahimong n’anga, o tambalan. Ug usahay manglumay siya!

Usa ka Dominggo sa buntag si Gogo Mthupha giduaw sa mga Saksi ni Jehova nga nakig-ambit sa balay-sa-balay nga ministeryo. Nalingaw kaayo siya sa pagpakighisgot uban kanila mahitungod sa saad sa Bibliya sa usa ka bag-ong kalibotan sa pagkamatarong, usa ka kalibotan nga walay daotang mga impluwensiya. Gidawat niya ang librong Ikaw Mabuhing Walay Kataposan sa Paraiso sa Yuta ug miuyon nga magtuon sa Bibliya sa balay.a Human sa tulo lamang ka mga pagtuon, siya misugod sa pagtambong sa mga tigom.

Pinaagi sa iyang pagtuon sa Bibliya, nahibaloan ni Gogo Mthupha nga ang iyang linaing mga gahom naggikan sa daotang espiritung mga linalang nga mirebelde batok sa pagkasoberano ni Jehova. (2 Pedro 2:​4; Judas 6) Nahibaloan usab niya nga kining maong mga demonyo determinado nga pasupakon kang Jehova ug sa putli nga pagsimba ang matag usa kutob sa ilang maarangan. Sanglit ang iyang panginabuhi nagdepende sa pagtawag niining daotang espiritung mga linalang, unsay iyang buhaton?

Si Gogo Mthupha nagpahayag sa iyang tinguha nga wagtangon ang tanan niyang mga anting-anting ug mga galamiton sa espiritismo. Naglakip kini sa iyang linaing purong ug “mosulting mga sungay sa toro,” nga iyang gigamit sa iyang n’anga nga panambal. Buot wagtangon ni Gogo Mthupha kanang tanang butang aron nga siya makaalagad sa bugtong matuod ug buhing Diyos, si Jehova.

Hinunoa, ang pipila sa iyang mga paryente misupak tungod kay iyang gisuportahan sila sa pinansiyal. Gihangyo nila siya nga ibalhin ang mga butang ngadto kanila, uban sa iyang misteryosong mga gahom aron padayon silang mokita. Midumili si Gogo Mthupha.

Sa tabang sa lokal nga kongregasyon sa mga Saksi ni Jehova, natigom niya ang tulo ka dagkong bag sa espiritistikanhong kagamitan ug gisunog kadtong tanan. Samtang gilamoy sa kalayo ang iyang mga kagamitan sa pagsimba sa demonyo, si Gogo Mthupha misinggit: “Tan-awa! Kanang sungay, dili makaluwas sa iyang kaugalingon.”

Ngadtongadto, si Gogo Mthupha malipayong nagsimbolo sa iyang dedikasyon ngadto kang Jehova pinaagi sa bawtismo sa tubig. Sa unsang paagi siya nanginabuhi karon? Pinaagi sa pagpaninda ug mga utanon. Oo, pinaagi sa gahom sa Pulong sa Diyos, ang usa makalingkawas gikan sa pagsimba sa demonyo. Matod ni Gogo Mthupha: “Wala pa gayod ako sukad mobati nga gawasnon kaayo.”

[Mga footnote]