Gipabilhan ba Gayod Nimo ang mga Panalangin ni Jehova?

SI Kenichi, usa ka hamtong nga lalaki, miadto sa botika aron pagpalit ug tambal para sa dili-grabeng sip-on. Sa dihang gitomar niya ang tambal, diha siyay alerdyik nga reaksiyon nga nagpahinabog katol nga nukanuka ug tubigong mga butoybutoy sa tibuok niyang lawas. Dili ikahibulong, si Kenichi nagsugod sa pagduhaduha kon ang parmasiyotiko aduna bay igong pagtagad sa iyang mga panginahanglan.

Ang uban maghunahuna tingali bahin kang Jehova nga Diyos sa samang paagi sa pag-isip ni Kenichi sa parmasiyotiko. Sila nagduhaduha nga ang labing gamhanang Diyos, si Jehova, interesado gayod kanato ingong mga indibiduwal. Bisan tuod ilang giila nga maayo ang Diyos, wala sila makombinsir nga siya nagtagad sa matag usa kanato. Ilabinang matuod kini sa dihang dili maayo ang nahitabo kanila o sa dihang ang ilang pagsunod sa mga prinsipyo sa Bibliya gisundan sa malisod nga mga suliran. Tungod sa kakulang sa panabot, gilantaw nila ang ilang mga suliran samag katol nga nukanuka ug mga butoybutoy nga wala damha ni Kenichi nga motungha, nga morag sala kana sa Diyos.​—Proverbio 19:3.

Si Jehova dili ikatandi sa dili-hingpit nga mga tawo. Ang mga tawo limitado sa kahibalo ug abilidad. Napakyas sila sa pag-ila sa bug-os sa tinuod nga mga panginahanglan sa uban, sama sa parmasiyotiko ni Kenichi. Sa kaatbang, walay masayloan sa mga mata ni Jehova. Si Jehova sagad motabang kanato nga wala nato masabti ug mapabilhi ang maong kamatuoran tungod kay kita may kiling sa pagtumong sa pagtagad sa kon unsay wala nato mabatoni ug sa dili-pagpanumbaling sa daghang panalangin nga atong nabatonan. Inay basolon dayon si Jehova sa bisan unsang suliran nga atong giatubang, kinahanglang maningkamot kita sa pag-ila sa mga panalangin gikan kang Jehova nga atong napahimuslan.

Sumala sa Webster’s Ninth New Collegiate Dictionary, ang “panalangin” mahimong hubiton ingong “usa ka butang nga makaamot sa kalipay o kaayohan.” Nasabtan ba nimo nga ilabinang matuod kini sa mga panalangin gikan kang Jehova?

Dili-Hitupngan Ingong Magtatagana

Sa dihang ang usa ka asawa moingon nga ang iyang bana maoy maayong magtatagana, kasagarang gipasabot niya nga siya nagtagad gayod sa mga panginahanglan sa pamilya, nga nagtaganag igong pagkaon, puloy-anan, ug panapot alang sa kalipay ug kaayohan sa pamilya. Unsa ka maayo si Jehova ingong atong Magtatagana? Susiha pag-ayo ang atong planetang Yuta, ang pinuy-anan sa tawo. Nahimutang kini 150,000,000 kilometros gikan sa adlaw, igo gayod nga gilay-on alang sa kasarangang mga temperatura nga nagpaposible sa kinabuhi dinhi sa yuta. Ang 23.5-grado nga pagkahandag sa atong yuta hingpit nga pagkadisenyo, nga misangpot sa nagkalainlaing mga panahon nga nakaamot sa dagayang mga abot. Ingong sangpotanan, ang yuta nagapakaon sa kapin sa lima ka bilyong tawo. Sa pagkatinuod si Jehova maoy usa ka kahibulongang Magtatagana!

Dugang pa, ang Bibliya nagpasalig kanato nga si Jehova dulot nga interesado kanato ingong mga indibiduwal ug sa atong kaayohan. Tiaw mo kana, si Jehova nakaila sa matag usa sa binilyong bituon pinaagi sa ngalan, ug walay bisan usa ka goryon nga mahulog sa yuta nga wala niya mahibaloi. (Isaias 40:​26; Mateo 10:​29-31) Labi pa gayod niyang gitagad ang mga tawo nga nahigugma kaniya ug gipalit sa bililhong dugo sa iyang pinalanggang Anak, si Jesu-Kristo! (Buhat 20:28) Maayo ang pagkapahayag sa maalamong tawo: “Ang panalangin ni Jehova​—kana mao ang nagapadato, ug dili siya magadugang ug kasakit niana.”​—Proverbio 10:22.

Mga Panalangin nga Magapadato Kanato

Nabatonan nato ang usa ka butang nga bililhon kaayo nga niana kita angayng mapasalamaton kaayo. Unsa kana? Ang Bibliya nagpaila niana sa dihang miingon kini: “Ang balaod sa imong baba maayo alang kanako, labi pa sa linibong bulawan ug salapi.” (Salmo 119:​72; Proverbio 8:10) Bisag bililhon ang taas ug kalidad nga bulawan, ang balaod ni Jehova labi pa gayong tilinguhaon. Ang tukmang kahibalo sa iyang balaod duyog sa kaalam ug panabot nga ihatag ni Jehova ngadto sa sinserong mga nagapangita sa kamatuoran maoy mga butang nga angayng mahalon. Kini magsangkap kanato sa pagpanalipod sa atong kaugalingon, sa pagsagubang sa malisod nga mga kahimtang, sa pagdumala nga malamposon sa mga suliran, ug sa ingon mahimong kontento ug malipayon.

Matuod kini bisan sa mga bata pa kaayo. Konsideraha kon sa unsang paagi ang usa ka gamayng batang babaye nagsulbad sa iyang mga suliran pinaagi sa pagsunod sa balaod ni Jehova. Ang batang babaye, nga si Akemi, nagpuyo duol sa Tokyo. Ang iyang amahan ug inahan nagpadapat sa mga prinsipyo sa Bibliya sa pagbansay kaniya ug pinaagi sa pulong ug panig-ingnan nagtabang sa ilang anak nga babaye sa pag-ugmad ug gugma alang kang Jehova ug sa silingan. Naglantaw nang daan sa mga suliran nga mahiagoman niya sa tunghaan, gipaningkamotan nilang andamon siya sa labing maayo nga maarangan nila. Hinunoa, sa dihang si Akemi mitungha sa elementarya, giisip siya sa pipila niya ka mga klasmet nga “lahi” tungod kay siya nag-ampo una mokaon ug matanlagong naglikay sa pipila ka dili-kasulatanhong mga kalihokan. Wala madugay gipuntirya siya sa usa ka grupo sa mga tigdaogdaog nga moapiki kaniya human sa klase ug mosagpa kaniya, molubag sa iyang mga bukton, ug magbugalbugal kaniya.

Ang batang si Akemi wala mobalos, ni nahadlok siya atubangan sa iyang mga tigsakit. Hinunoa, gisulayan niya pagpadapat ang iyang nakat-onan. Ingong sangpotanan sa iyang maayong panggawi ug kaisog, nabatonan niya ang pagtahod sa kadaghanan sa iyang mga klasmet. Ilang gipahibalo sa magtutudlo ang maong butang, ug sukad niadtong adlawa, si Akemi wala na makasinati ug dugang pag-abuso didto sa tunghaan.

Unsay nakatabang kang Akemi sa pagdumala nga malamposon sa lisod nga kahimtang? Ang tukmang kahibalo, pagsabot, ug kaalam gikan kang Jehova nga gitisok sa iyang mga ginikanan diha kaniya. Siya nasinati pag-ayo sa pagkamainantoson ni Jesus, ug kana nagpalihok kaniya sa pagsundog sa iyang panig-ingnan. Ang Bibliya nakatabang kaniya sa pag-ila nga ang pipila ka tawo mohimog daotang mga butang tungod sa pagkawalay-alamag, ug kana nagdasig kaniya sa pagdumot sa sayop nga gibuhat niadtong mga tigdaogdaog samtang wala magdumot sa mga tawo mismo.​—Lucas 23:​34; Roma 12:​9, 17-21.

Siyempre, walay ginikanan nga gustong magtan-aw sa ilang anak nga mahiagom sa pagbiaybiay ug pag-abuso. Bisan pa niana, mahanduraw nimo kon unsa ka dakong kalipay ang gibati sa mga ginikanan ni Akemi sa dihang nadungog nila ang tanang detalye sa nahitabo. Ang maong mga bata tinuod nga panalangin gikan kang Jehova.​—Salmo 127:​3; 1 Pedro 1:​6, 7.

Mapailobong Paghulat Kang Jehova

Apan, sa dili pa nimo madawat ang mga panalangin ni Jehova, usahay kinahanglang maghulat ka sa iyang panahon. Si Jehova nasayod sa imong kahimtang ug nagtagana sa matag panginahanglan sa dihang kini labing makaayo kanimo. (Salmo 145:​16; Ecclesiastes 3:​1; Santiago 1:17) Tingali mahilig ka sa prutas, apan unsay imong hunahuna sa usa ka tig-abiabi nga modalit kanimo ug prutas nga dili pa mahimong kaonon? Mansanas man, kahel, o uban pa, mas gusto nimong ang imong prutas hinog, dugaon, ug tam-is. Sa susama, si Jehova magtagana kon unsay imong gikinahanglan sa hustong panahon​—dili sayo kaayo ug dili ulahi kaayo.

Hinumdomi ang kasinatian ni Jose. Bisan tuod dili niya sala, gibalhog siya sa usa ka prisohan sa ilawom sa yuta sa Ehipto. Usa ka kaubang piniriso, ang magtitiing ni Paraon, nagdahom nga buhian ug misaad nga ipahibalo kang Paraon ang kaso ni Jose. Apan human siya buhii nakalimtan niya si Jose. Morag gipasagdan na si Jose. Apan, duha ka bug-os nga tuig sa ulahi, sa kataposan gipagawas siya sa prisohan ug ngadtongadto gihimong ikaduhang magmamando sa Ehipto. Inay maupos ang pailob, si Jose naghulat kang Jehova. Tungod niini, siya gipanalanginan sa paagi nga nagkahulogag pagtipig sa kinabuhi sa mga Israelinhon ug sa mga Ehiptohanon.​—Genesis 39:​1–41:57.

Si Masashi ansiyano sa usa ka kongregasyon sa amihanang Hapon. Wala siya sa prisohan sa ilawom sa yuta, apan kinahanglang maghulat siya kang Jehova. Ngano? Sukad ang Tunghaan sa Ministeryal nga Pagbansay, usa ka tunghaan alang sa pagbansay sa kuwalipikadong Kristohanong mga ministro, gitukod sa Hapon, gihimo niyang iyang kinasingkasing nga tumong nga motambong. Hugot siyang nag-ampo bahin sa pribilehiyo. Ang iyang kaubang payunir gidapit, apan bisan pa sa iyang dulot nga tinguha, si Masashi wala dapita. Siya nahigawad pag-ayo.

Bisan pa niana, mihimo siyag mga lakang sa pagsagubang sa iyang mga pagbati. Nagtuon siya sa Bibliya ug sa mga publikasyon nga gipatik sa Watch Tower Society, nga nasentro sa mga ulohan sama sa pagpaubos ug pagkontrolar sa emosyon sa usa. Iyang gipasibo ang iyang panghunahuna ug sa ingon nakasinati ug labawng katagbawan sa iyang asaynment. Unya, sa dihang wala gayod niya damha, nakadawat siyag imbitasyon nga motambong sa tunghaan.

Sanglit nakaugmad na sa mga hiyas sama sa pagpailob ug pagpaubos, nakabaton siyag dakong kaayohan gikan sa tunghaan. Sa ulahi, si Masashi gihatagag pribilehiyo nga mag-alagad sa iyang mga igsoon ingong nagapanawng magtatan-aw. Oo, si Jehova nasayod kon unsay gikinahanglan ni Masashi ug nagtagana niana sa dihang kini mosangpot sa labing maayo.

Tinguhaa ang Iyang mga Panalangin

Busa, si Jehova dili sama sa parmasiyotiko. Bisan tuod mapakyas tingali kita sa pag-ila sa pagtagad ug kahangawa ni Jehova, ang iyang mga kalulot modangat sa lainlaing matang​—sa mga panahon ug mga paagi nga labing makaayo kanato. Busa padayon sa pagtinguha sa iyang mga panalangin. Hinumdomi nga ikaw aduna nay daghang katarongan sa pagkamapasalamaton. Gipanalanginan ka sa paninugdang mga tagana aron magpadayong buhi dinhi sa yuta. Gihatagan ka ug kahibalo bahin kang Jehova ug sa iyang hingpit nga mga dalan. Gihatagan ka ug kaalam. Ug nakabaton ka ug panabot. Kining tanan nakaamot sa imong kaayohan ug kalipay.

Aron masinati ang panalangin ni Jehova nga mas bug-os pa, padayon sa pagtuon sa Bibliya nga regular. Pangaliyupo kang Jehova nga tabangan ka sa pagsabot ug pagpadapat sa samag mutya nga mga pagtulon-an diha sa iyang dinasig nga Pulong. Kini makapadato gayod kanimo, sa ingon walay makulang kanimo. Oo, kini magkahulogan sa imong kalipay ug pagkakontento karon ug kinabuhi sa kadagaya sa bag-ong kalibotan nga taliabot.​—Juan 10:​10; 1 Timoteo 4:​8, 9.

[Hulagway sa panid 23]

Ang panalangin ni Jehova labi pang bililhon kay sa bulawan