Mga Magmamantala sa Gingharian Nagtaho
Ang Diyos Maoy Nagpatubo Niini sa Alaska
ILALOM sa nagatabon nga niyebe ug yelo, ang gamitoyng binhi nagpaabot sa kahigayonan nga motubo ngadto sa pagkagulang. Sulod sa tulo ka hamubong mga bulan nga naglangkob sa ting-init sa Alaska, ang binhi sa repolyo nga tulo ka milimetros ang diametro mahimong motubo ngadto sa duolan sa 40 kilos! Oo, kining yutaa nga kanhi gituohan sa daghan nga dili-mabungahon, hilabihan ka bugnawng umaw nga yuta makapatungha ug dagayang abot.
Kini ilabinang matuod sa espirituwal nga uma sa Alaska. Didto, sa yuta sa tagdugayng mga tingtugnaw, ang mga Saksi ni Jehova nagapadayon sa pagpugas ug binhi sa Gingharian. Sama sa ubang mga dapit sa yuta, ang Diyos nagpatubo sa binhi diha sa tabunok nga mga kasingkasing.—1 Corinto 3:6, 7.
● Samtang nagsakay sa bus sa eskuylahan, usa ka batan-ong Saksi nga ginganlag Vanessa nakamatikod sa usa ka kaubang estudyante, si Ann, nga kanunayng nag-inusara paglingkod. Si Ann morag masulub-on, busa gidapit ni Vanessa si Ann nga motupad niya paglingkod. Mao diayng masulub-on si Ann! Ang iyang inahan namatay gumikan sa atake sa kasingkasing, ug wala madugay sa ulahi, ang iyang amahan namatay gumikan sa kanser. Mao kanay hinungdan kon nganong si Ann nagpuyo uban sa iyang mga paryente sa Alaska.
Si Vanessa mihunong sa balay sa iyang bag-ong kaila samtang nagsangyaw usa ka Sabado niana ug gibinlan siya ug brosyur nga Tinuod Bang May Pagtagad ang Diyos Kanato? Pagkasunod Lunes sa eskuylahan, gipangita ni Ann ang batan-ong Saksi. Si Ann daghag pangutana sa Bibliya, nga natubag ni Vanessa. “Asa ninyo himoa ang inyong mga tigom?” nangutana siya. Nianang gabhiona si Ann mitambong sa iyang unang tigom sa Kingdom Hall.
Wala madugay nakaplagan niining 17-anyos nga ilong tuwapos ang daghang ‘mga amahan’ ug ‘mga inahan,’ ingon sa gisaad ni Jesus. (Mateo 19:29) Ug pagkamakapalipayng okasyon nga makita ang malipayon ug mapahiyomong Ann nga nagpasimbolo sa iyang pahinungod kang Jehova pinaagi sa pagpabawtismo sa tubig panahon sa “Mga Mensahero sa Diyosnong Pakigdait” nga Distritong Kombensiyon!
● Sa hilit nga mga dapit sa dakong rehiyon sa Artiko sa Alaska—diin ang mga balangay gibulag sa gatosan ka kilometrong kamingawan—ang duhay-makina nga ayroplano sa Watch Tower Society gigamit sa pagpugas ug binhi sa Gingharian sa kapin sa 150 ka komunidad. Apan ang espirituwal nga pagtubo pinaagig regular nga pagtuon sa Bibliya nagdepende sa pagsinulatay. Sanglit ang pagsulat maoy hagit alang sa daghan, ang usa ka magtutudlo sa Bibliya kinahanglang magmamugnaon aron huptang buhi ang interes sa estudyante. Sa unsang paagi kaha kini mapalampos?
Si Kathy nagdumala ug progresibong pagtuon sa Bibliya uban kang Edna, bisan tuod nagpuyo sila sa gilay-ong kapin sa 600 kilometros gikan sa usag usa! Inay kopyahon lamang ang mga pangutana diha sa giya sa pagtuon, si Kathy nagsulat sa mga pangutana diha sa laing papel ug nagtaganag luna aron sulatan sa mga tubag. Human masulat ni Edna ang mga tubag, si Kathy mitubag ug nagsukip ug mga komento kon gikinahanglan aron sa pagpatin-aw sa usa ka punto. Si Kathy miingon: “Akong gigahin ang Miyerkoles sa gabii alang sa among ‘pagtuon,’ ug gipaningkamotan kong sundon kana sama sa akong buhaton sa bisan unsang ubang kasabotan sa pagtuon sa Bibliya. Padad-an ko usab si Edna ug gisulatan-nang-daan sa akong adres, may selyo nga sobre. Sanglit dangtag duha ka semana ang pagpadala sa sulat, ang pagtuon pinaagig sinulatay morag may pagkahinay.”
Handurawa ang kahinam sa dihang si Kathy ug Edna nagkita sa usa ka distritong kombensiyon sa Anchorage human sa napulo ka bulan nga pagtuon pinaagi sa sulat! Ang mga Saksi nalipay usab nga mitambong ang mga estudyante sa Bibliya ug ubang mga interesado gikan sa daghang hilit nga mga balangay sa Alaska.
Bisan tuod ang pagtubo usahay morag hinay, ang ubang “mga luyong” kusog nga moturok sa dihang iladlad sa kahayag sa kamatuoran. Sa aberids, kapin sa usa ka gatos ka bag-ong mga magdadayeg ni Jehova ang nabawtismohan matag tuig sa Alaska! Kami moingon, “Salamat, Jehova,” sa pagpatubo niini!