Sugilanon sa Kinabuhi

Ang Ginagmayng mga Sakripisyo Nakahatag Kanamog Dagayang Panalangin

SUMALA SA GIASOY NI GEORGE UG ANN ALJIAN

Ang akong asawa ug ako wala gyod maghanduraw nga usa ka adlaw niana dili namo maila ang kalainan tali sa pulong nga “magtutudlo” ug sa pulong nga “ilaga.” Wala gyod mi maghunahuna nga sa among panuigon nga 60 anyos hinuktokan namo ang katingad-an tan-awon nga mga letra sa paningkamot nga makapakigsulti sa mga tawo nga taga-Halayong Silangan. Apan, mao kiniy gihimo nako ug ni Ann sa naghinapos ang mga katuigan sa 1980. Paasoya mi kon sa unsang paagi ang ginagmayng mga sakripisyo nga among gihimo latas sa katuigan naghatag kanamog daghang panalangin.

AKO naggikan sa pamilya nga Armeniano ug kaliwat ug sakop sa Iglesya sa Armenia. Si Ann maoy usa ka Romano Katoliko. Among gikompromiso ang among relihiyosong mga pagtuo sa dihang kami naminyo sa 1950. Ako 27 anyos, ug si Ann 24 anyos. Mipuyo mi sa usa ka apartment ibabaw sa akong dry-cleaning shop sa Jersey City, New Jersey, T.B.A. Nianang tungora mga upat ka tuig na nakong gipanag-iya ang maong negosyo.

Sa 1955 mipalit mi ug usa ka maanindot nga balay nga may tulo ka lawak-katulganan sa Middletown, New Jersey. Ang maong balay maoy mga 60 kilometros gikan sa akong negosyo, diin ako nagtrabaho unom ka adlaw kada semana. Gabii na kaayo kong mopauli. Ang akong bugtong kontak sa mga Saksi ni Jehova maoy sa dihang sila moadto sa akong shop matag karon ug unya ug mopahimutang kanako ug literatura sa Bibliya. Gibasa nako ang literatura uban ang dakong kaikag. Bisan tuod dakong bahin sa akong panahon ug pagtagad ang akong gihatag sa akong negosyo, nakaugmad ako ug halalom nga pagtahod sa Bibliya.

Sa wala madugay akong nadiskobrehan nga ang estasyonan sa radyo sa Watchtower, ang WBBR, nagsibya ug mga pakigpulong sa Bibliya sa panahon nga ako mobiyahe paingon ug gikan sa akong shop. Namati ko pag-ayo niining maong mga pakigpulong, ug midako ang akong interes nga tungod niana akong gihangyo ang mga Saksi nga duawon ako. Sa Nobyembre 1957, si George Blanton miduaw sa akong balay ug gisugdan ang usa ka pagtuon sa Bibliya uban nako.

Ang Among Pamilya Nahiusa sa Putling Pagsimba

Unsay gibati ni Ann niining tanan? Paasoya siya.

“Sa sinugdan, ako misupak pag-ayo. Sigean nako silag balda sa ilang pagtuon sa Bibliya nga si George nakahukom sa pagtuon diha sa laing dapit, nga naghimo niana sulod sa walo ka bulan. Nianang panahona, si George misugod na sa pagtambong sa mga tigom sa ma-Dominggo diha sa Kingdom Hall. Naamgohan nako nga seryoso siya sa iyang pagtuon sa Bibliya tungod kay mao ra kini ang adlaw nga wala siyay trabaho. Bisan pa niana, siya usa gihapon ka maayong bana ug amahan—misamot pa gani—ug ang akong tinamdan nagsugod sa pagkausab. Gani, may mga panahon nga samtang maghinlo ko sa gamayng lamesa diha sa sala sa dihang walay magtan-aw, akong puniton ang magasing Pagmata! nga kanunayng ibilin ni George didto, ug basahon nako kini. Usahay, basahan ko ni George ug mga artikulo sa Pagmata! nga dili direktang naghisgot bahin sa doktrina apan kanunayng nagpasiugda sa Maglalalang.

“Usa ka gabii niana samtang si George milakaw aron magtuon sa Bibliya uban kang Brader Blanton, akong gipunit ang usa ka publikasyon nga gibutang sa among dos-anyos nga anak nga si George diha sa lamesa tupad sa akong kama. Mahitungod kadto sa paglaom alang sa mga patay. Bisan tuod gikapoy ko, gisugdan nako kini pagbasa samtang naghigda tungod kay ang akong lola bag-o pang namatay, ug naguol kaayo ko. Dihadiha akong nasabtan ang kamatuoran sa Bibliya nga ang mga patay wala mag-antos sa laing dapit ug nga sila mabuhi pag-usab sa umaabot nga pagkabanhaw. Sa wala madugay mibangon ko, nga mahinamong nagbasa ug nagbadlis sa mga punto nga gusto nakong ipakita kang George inig-uli niya gikan sa iyang pagtuon sa Bibliya.

“Halos dili makatuo ang akong bana nga ako gihapon kadto. Paglakaw niya, ako misupak, ug karon naghinamhinam na ko sa pagsulti bahin sa kahibulongang mga kamatuoran sa Bibliya nga akong nakat-onan! Naabtan mig kadlawon sa paghisgot bahin sa Bibliya. Gipatin-aw ni George ang katuyoan sa Diyos alang sa yuta. Ako siyang gipangutana nianang gabhiona kon mahimo bang sa balay na lang siya magtuon aron makaapil ko.

“Misugyot si Brader Blanton nga motambong ang mga bata sa among pagtuon. Sa among hunahuna sila bata pa kaayo, sanglit sila maoy dos ug kuwatro anyos lamang. Apan, gipakita namo ni Brader Blanton ang Deuteronomio 31:12, nga nag-ingon: ‘Tigoma ang katawhan, ang mga lalaki ug ang mga babaye ug ang mga bata . . . , aron sila mamati ug aron sila makakat-on.’ Among gipabilhan ang maong sugo ug gihikay pa gani nga ang mga bata mokomento panahon sa pagtuon sa Bibliya. Dungan kaming mag-andam sa among mga komento, apan wala gayod namo sila sultii kon unsay ilang ikomento. Nagtuo mi nga kini nakatabang sa among mga anak sa paghimo sa kamatuoran nga ila na. Mapasalamaton gayod kami sa giya nga gihatag ni Brader Blanton kanamo aron ang among pamilya mouswag sa espirituwal.”

Mga Hagit nga Nagkinahanglan ug Sakripisyo

Sa dihang kami nahiusa na sa pagtuon sa Bibliya, diha kamiy bag-ong mga suliran. Tungod kay ang akong shop layo man kaayo, kasagarang alas nuybe sa gabii na ko makauli sa balay. Tungod niini, dili ko makatambong sa mga tigom panahon sa semana, apan makatambong ko sa ma-Dominggo. Nianang panahona, si Ann nagtambongan na sa tanang tigom ug kusog nga nag-uswag. Gusto sab nakong makatambong sa tanang tigom maingon man magdumala ug mabungahong pagtuon sa pamilya. Nahibalo ko nga kinahanglan kong mohimog mga sakripisyo. Busa nakahukom ko nga manira ug sayo sa akong shop, bisan pag mawad-an kog pipila ka mga suki.

Maayo kaayo ang maong kahikayan. Among giisip ang pagtuon sa pamilya nga sama ka ugdang sa ubang lima ka senemanang mga tigom sa Kingdom Hall. Gitawag namo kinig among ikaunom nga tigom. Busa nagtakda mig espesipikong adlaw ug oras—Miyerkoles kada semana sa alas 8:00 s.g. Usahay human sa panihapon, sa dihang mahuman na mig panghugas sa mga plato, ang usa kanamo moingon, “Hapit nang magsugod ang atong ‘tigom’!” Sugdan ni Ann ang pagtuon kon madelatar ko, ug mopuli ko inig-abot nako.

Ang laing butang nga nakapalig-on ug nakapahiusa kanamo ingong pamilya mao ang dungang pagbasa sa inadlawng teksto sa buntag. Apan, dihay problema sa paghikay niini. Lainlain ang among oras sa pagmata. Amo kining gihisgotan ug nakahukom mi nga momata sa samang takna, mamahaw sa alas 6:30 s.b., ug konsiderahon namo ang inadlaw nga teksto. Mapuslanon kaayo kadto alang kanamo. Sa dihang nanagko na ang among mga anak, sila mipili sa pag-alagad sa Bethel. Gibati namo nga kining adlaw-adlaw nga mga panaghisgot nakapauswag sa ilang espirituwalidad.

Mga Pribilehiyo Human sa Bawtismo Nagkinahanglan ug Mas Dakong Sakripisyo

Nabawtismohan ako sa 1962, ug human dumalaha ang akong negosyo sulod sa 21 ka tuig, ako kining gibaligya ug misulod ug trabaho nga duol sa akong pamilya aron magkauban kami sa pag-alagad kang Jehova. Kini nagbukas sa dalan alang sa daghang panalangin. Among gihimong tumong nga kaming tanan mosulod sa bug-os-panahong ministeryo. Nagsugod kana sa unang bahin sa katuigan sa 1970 sa dihang ang among kamagulangang anak, si Edward, nahimong bug-os-panahong ministro, o regular payunir, human gayod sa hayskul. Wala madugay, ang among anak nga si George misugod pagpayunir, nga gisundan ni Ann. Nadasig kaayo ko nilang tulo, tungod kay ila akong suginlan bahin sa ilang mga eksperyensiya sa pag-alagad sa kanataran. Ingong pamilya among gihisgotan kon sa unsang paagi mapayano namo ang among kinabuhi aron kaming tanan maanaa sa bug-os-panahong pag-alagad. Nakahukom mi sa pagbaligya sa balay. Nagpuyo mi nianang balaya sulod sa 18 ka tuig ug nagmatuto sa among pamilya didto. Gimahal gayod namo ang among balay, apan gipanalanginan ni Jehova ang among desisyon sa pagbaligya niana.

Si Edward gidapit sa pag-alagad sa Bethel sa 1972, ug si George, sa 1974. Bisan tuod gimingaw mi nila, wala kami maghunahuna kon unsa ka nindot nga mopuyo sila duol namo, maminyo, ug makabatog mga anak. Hinunoa, kami nalipay nga ang among mga anak nag-alagad kang Jehova sa Bethel.a Miuyon mi sa Proverbio 23:15, nga nag-ingon: “Anak ko, kon ang imong kasingkasing nahimong maalamon, ang ako gayong kasingkasing magamaya.”

Misulod Kami sa Espesyal Payunir nga Pag-alagad

Tungod kay ang among duha ka anak anaa na man sa Bethel, kami mipadayon sa pagpayunir. Unya usa ka adlaw niana sa 1975, nakadawat mig sulat nga nagdapit kanamo sa pagsulod sa espesyal payunir nga buluhaton diha sa teritoryo nga wala maasayn ug kongregasyon sa Clinton County, Illinois. Pagkadako sa among kahibulong! Nagpasabot kini nga kinahanglan kaming mobiya sa New Jersey, diin duol ra kami sa among mga anak sa New York ug diin kami adunay mga higala ug mga paryente. Apan, giisip namo kini ingong asaynment gikan kang Jehova ug mihimo kamig sakripisyo, nga mitultol sa bag-ong mga panalangin.

Human sa pipila ka bulang pagsangyaw sa maong teritoryo, nagsugod mi pagpahigayon ug mga tigom diha sa usa ka lawak diin ang mga tawo sa komunidad magtigom sa Carlyle, Illinois. Apan gusto namog permanenteng dapit nga katigoman. Ang usa ka lokal nga igsoon ug iyang asawa nakakaplag ug yuta nga adunay gamay kaayong payag nga among giabangan. Amo kining gihinloan—ang payag apil na ang kasilyas nga anaa sa gawas—ug gihimo kanang gamay nga tigomanan. Mahimuot ming mahinumdom sa usa ka kabayo nga maukiton bahin kanamo. Subsob siyang motan-aw sa bentana aron makita kon unsay nagakahitabo diha sa tigom!

Sa ngadtongadto, ang Kongregasyon sa Carlyle natukod, ug nalipay mi nga dunay bahin niini. Gitabangan mi sa usa ka batan-ong magtiayon nga payunir, si Steve ug Karil Thompson, kinsa miadto usab aron sa pagsangyaw diha sa maong teritoryo. Ang magtiayong Thompson miestar didto sulod sa pipila ka tuig ug sa ulahi mitambong sa Watchtower Bible School of Gilead ug naasayn ingong mga misyonaryo sa Sidlakang Aprika, diin sila nag-alagad sa nagapanawng buluhaton.

Sa wala madugay ang among gamayng tigomanan naghuot na, ug nagkinahanglan mig mas dakong tigomanan. Ang mao gihapong lokal nga brader ug iyang asawa maoy nagsulbad sa problema ug mipalit ug propiedad nga mas angayang himoon nga Kingdom Hall. Pagkadako sa among kalipay sa dihang pipila ka tuig sa ulahi, gidapit kami sa pagpahinungod sa bag-ong natukod nga Kingdom Hall sa Carlyle! Nakapribilehiyo ako sa pagpahayag sa pakigpulong sa pagpahinungod. Ang among asaynment didto maoy usa ka maanindot nga eksperyensiya alang kanamo, usa ka panalangin gikan kang Jehova.

Usa ka Bag-ong Asaynment Alang Kanamo

Sa 1979 nakadawat mig bag-ong asaynment, sa Harrison, New Jersey. Nag-alagad mi didto sulod sa 12 ka tuig. Nianang panahona nagsugod mig pagtuon sa Bibliya uban sa usa ka Inseka, ug mitultol kini sa daghang ubang mga pagtuon uban sa mga Insek. Sa kasamtangan, among nahibaloan nga libolibong Insek nga mga estudyante ug mga pamilya ang nagpuyo sa among dapit. Tungod niini, nadasig mi sa pagtuon ug Ininsek. Bisan tuod nagpasabot kinig paggugol ug panahon kada adlaw sa pagtuon sa maong pinulongan, kini miresulta sa daghang makalilipay nga mga pagtuon sa Bibliya uban sa mga Insek sa among dapit.

Niadtong mga tuiga, among naeksperyensiyahan ang daghang kataw-anan nga mga situwasyon, ilabina sa among mga paningkamot sa pagsultig Ininsek. Usa ka adlaw niana gipailaila ni Ann ang iyang kaugalingon ingong usa ka “ilaga” sa Bibliya inay usa ka “magtutudlo” sa Bibliya. Susama gayod ang maong mga pulong. Ang tagbalay mipahiyom ug miingon: “Sige dayon. Wala pa ako makapakigsulti sukad sa usa ka ilaga sa Bibliya.” Naglisod gihapon mi pagsulti niining pinulongana.

Dayon giasayn kami sa laing dapit sa New Jersey diin kami nakapadayon sa pagsangyaw ngadto sa mga Insek. Sa ulahi gidapit mi sa pagbalhin ngadto sa Boston, Massachusetts, diin usa ka Insek nga grupo ang nagdaghan sulod sa mga tulo ka tuig. Among pribilehiyo ang pagsuportar niining maong grupo sa milabayng pito ka tuig ug ang pagkalipay nga makita kini nga nahimong kongregasyon sa Enero 1, 2003.

Mga Panalangin Gumikan sa Kinabuhing Nagsakripisyo sa Kaugalingon

Sa Malaquias 3:10, atong mabasa ang pagdapit ni Jehova nga ang iyang katawhan magdala sa ilang mga halad aron iyang ibubo ang iyang mga panalangin hangtod nga wala nay panginahanglan. Among gisakripisyo ang usa ka negosyo nga gikaikagan kaayo nako. Gibaligya namo ang among balay, nga among gimahal pag-ayo. Ug gisakripisyo usab namo ang ubang mga butang. Bisan pa niana, kon itandi sa mga panalangin, ginagmay ra ang mga sakripisyo.

Pagkadagaya gayod sa panalangin nga gibubo ni Jehova kanamo! Nabatonan namo ang katagbawan nga makita ang among mga anak nga misanong sa kamatuoran, nabatonan namo ang kalipay nga makigbahin sa bug-os panahon sa nagaluwas-kinabuhi nga ministeryo, ug nakita namo nga si Jehova nag-atiman sa among mga panginahanglan. Tinuod, ang among ginagmayng mga sakripisyo nakahatag kanamog dagayang mga panalangin!

[Footnote]

[Hulagway sa panid 25]

Si Louise ug George Blanton uban kang Ann, 1991

[Hulagway sa panid 26]

Ang Kingdom Hall sa Carlyle, gipahinungod niadtong Hunyo 4, 1983

[Hulagway sa panid 27]

Uban sa bag-ong naporma nga Insek nga kongregasyon sa Boston

[Hulagway sa panid 28]

Uban kang Edward, Connie, George, ug Grace