Malipayong Nagadawat sa Pagtultol ni Jehova
SUMALA SA GIASOY NI ULYSSES V. GLASS
Talagsaon kadto nga okasyon. Dihay 127 lamang ka estudyante sa klase nga migraduwar. Apan may madasigon kaayong tumatambong nga 126,387, nga gikan sa nagkalainlaing mga nasod. Graduwasyon kadto sa ika-21ng klase sa Watchtower Bible School of Gilead, nga gihimo sa Yankee Stadium sa New York City sa Hulyo 19, 1953. Nganong hinungdanon kaayo kadtong okasyona sa akong kinabuhi? Tugoti ako sa paghatag ug gamayng impormasyon.
NATAWO ako sa Vincennes, Indiana, T.B.A., sa Pebrero 17, 1912, mga duha ka tuig una pa natawo ang Mesiyanikong Gingharian, ingon sa gihubit sa Pinadayag 12:1-5. Sa nag-una nga tuig nagsugod ang akong mga ginikanan sa pagtuon sa Bibliya uban sa mga tomo sa Studies in the Scriptures. Matag Dominggo sa buntag, basahan ni Papa ang pamilya sa usa niadtong mga libroha, ug dayon among hisgotan kana.
Gigamit ni Mama ang iyang nakat-onan sa pagtabang sa pag-umol sa panghunahuna sa iyang mga anak. Maayo kaayo siyang tawo—maluloton kaayo, andam gayod nga motabang. Upat kaming mga anak, apan ang pagmahal ni Mama miabot pa ngadto sa ubang mga bata sa kasilinganan. Kami iyang gahinan ug panahon. Siya malipay kaayong moasoy kanamo ug mga estorya sa Bibliya ug sa pagkanta uban namo.
Siya usab nanapit diha sa among balay ug lainlaing mga tawo nga nag-alagad sa bug-os panahon sa ministeryo. Sila moestar ug usa o duha lamang ka adlaw, sagad magtigom ug maghatag ug mga pakigpulong diha sa among balay. Kami nakaangay gayod niadtong mogamit ug mga ilustrasyon ug suginlan kami ug mga estorya. Sa usa ka okasyon sa 1919, mga usa ka tuig human matapos ang unang gubat sa kalibotan, gitumong sa nagduaw nga igsoon ang iyang komento kanamo gayod nga mga kabataan. Naghisgot siya bahin sa pagkonsagrar—kanang tukma nato karong gitawag nga pagpahinungod—ug gitabangan kami sa pagsabot kon sa unsang paagi kini nakaapektar sa among mga kinabuhi. Sa ulahing bahin niadtong gabhiona una pa ako natulog, nag-ampo ako sa akong langitnong Amahan ug gisultihan siya nga gusto kong moalagad kaniya kanunay.
Apan, human sa 1922 tungod sa ubang mga alatimanon sa kinabuhi kini nga tinguha napahiklin. Kami nagsigeg balhin sa nagkalainlaing lugar ug walay panag-ubanay sa kongregasyon sa katawhan ni Jehova. Si Papa wala diha tungod sa iyang trabaho diha sa riles sa tren. Ang among pagtuon sa Bibliya dili regular. Nagkuha akog mga kurso sa eskuylahan aron mahimong komersiyal nga tigdibuho ug nagplano sa pagtungha diha sa usa ka maayong unibersidad.
Pagpasibo sa Akong Interes sa Kinabuhi
Sa tungatunga sa mga tuig 1930, ang kalibotan nagsugod pagpaingon sa gubat sa kalibotan. Nagpuyo kami sa Cleveland, Ohio, sa dihang usa sa mga Saksi ni Jehova nanuktok sa among pultahan. Kami nagsugod sa pagpalandong ug maayo bahin sa among nakat-onan sa bata pa. Ang akong magulang nga igsoon, si Russell, maligdong, ug siya ang unang nabawtismohan. Ako lahi, apan sa Pebrero 3, 1936, ako usab nabawtismohan. Ang akong apresasyon bahin sa kon unsay nalangkit sa pagpahinungod kang Jehova nagkadako, ug ako nagsugod sa pagdawat sa pagtultol ni Jehova. Niana gihapong tuiga ang akong duha ka igsoong mga babaye, si Kathryn ug Gertrude, gibawtismohan usab. Kaming tanan misulod sa bug-os-panahong pag-alagad ingong mga payunir.
Apan, kana wala magpasabot nga kami wala nay laing gihunahuna. Mitingkag ang akong dalunggan sa dihang naghisgot ang akong bayawng babaye ug maanyag kaayong dalaga nga ginganlag Ann nga “aktibo” kaayo sukad nga nakadungog siya sa kamatuoran ug nga motambong sa miting diha sa among balay. Niadtong higayona si Ann nagtrabaho ingong sekretarya sa bupiti, ug sulod sa usa ka tuig siya gibawtismohan. Wala ako magplano nga magminyo, apan klaro nga si Ann maoy 100 porsiyento alang sa kamatuoran. Siya gustong malangkit sa bug-os sa pag-alagad kang Jehova. Siya dili gayod usa kinsa moingon, “Makahimo kaha ako niana?” Hinunoa, siya mangutana, “Unsa ang labing maayong paagi aron mahimo nako kana?” Ug determinado gayod siya sa pagpangagpas niini. Kanang maong positibong tinamdan nakadani kanako. Gawas pa, siya guwapa kaayo, ug bisan hangtod karon. Siya nahimong akong asawa, ug sa ngadtongadto siya nahimong akong kauban sa payunir nga pag-alagad.
Hinungdanong Pagbansay Ingong mga Payunir
Ingong mga payunir among nakat-onan ang yawi sa pagkahimong kontento kon kulang ang among mga tagana ug kon kami dagaya. (Filipos 4:11-13) Usa ka adlaw sa nagkagabii na, kami wala gayoy makaon. Singko sentimos lamang ang among kuwarta. Miadto kami sa tindahag karne, ug ako nangutana, “Mahimo bang makapalit kamig singko sentimos nga bologna?” Gitan-aw niya kami ug dayon mihiwa ug upat ka hiwa. Segurado ako nga sobra sa singko sentimos ang balor niadto, ug kini nakahatag kanamog igong pagkaon.
Komon nga makasugat ug grabeng pagsupak samtang naghimo sa among ministeryo. Diha sa usa ka lungsod duol sa Syracuse, New York, diha kami sa dalan nga nag-apod-apod sa mga handbill ug nagsul-ob ug mga plakard aron mapahibalo ang usa ka linain nga miting publiko. Gikaptan ako sa duha ka tawong maskulado, ug gidapatan ako. Ang usa maoy usa ka polis, apan wala siya mag-uniporme, ug wala niya pamatia ang akong hangyo sa pagpakita sa iyang tsapa. Unya, si Grant Suiter sa Bethel sa Brooklyn miabot ug miingon nga mangadto kami sa estasyon sa polis aron mahusay ang kasamok. Dayon iyang giteleponohan ang opisina sa Sosyedad sa Brooklyn, ug kaming duha ni Sister Glass gisugo sa pag-adto pag-usab niadto gihapong adlawa nga magdalag mga plakard ug mga handbill aron makataganag basehanan alang sa sumbanan nga kaso. Ingon sa madahom, kami gidakop. Apan, sa dihang gisultihan namo ang mga polis nga sila ikiha tungod sa dili makataronganong pagpangdakop, kami ilang gibuhian.
Sa pagkasunod adlaw gisulong sa pundok sa samokang mga tin-edyer ang among giasembliyahan sa paghulhog sa usa ka pari, ug way polis nga makita. Gilamboslambosan sa mga bugoy ang salog sa mga panghapak sa besbol, gihulog ang pipila sa mga tumatambong gikan sa hinagdanhagdan nga mga lingkoranan ngadto sa ubos, ug misaka sa entablado, diin ilang giisa ang bandera sa Amerika ug misinggit, “Saludohi ninyo kini! Saludohi ninyo kini!” Dayon misugod sila sa pag-awit ug “Beer Barrel Polka.” Nabungkag gayod nila ang miting. Among naagoman mismo kon unsay buot ipasabot ni Jesus sa dihang siya miingon: “Tungod kay kamo dili man bahin sa kalibotan, apan gipili ko kamo gikan sa kalibotan, gumikan niini ang kalibotan nagadumot kaninyo.”—Juan 15:19.
Ang pakigpulong publiko maoy kopya sa diskurso ni J. F. Rutherford, nga presidente niadtong higayona sa Watch Tower Society. Si Ann ug ako miestar niadtong lungsora sa pipila ka adlaw ug giduaw ang mga tawo sa pagtanyag kanilag higayon sa pagpamati sa pakigpulong diha sa ilang kaugalingong mga balay. Dihay pipila nga midawat sa tanyag.
Miboluntaryo sa Pag-alagad sa Langyawng Nasod
Sa ngadtongadto, ang bag-ong mga natad sa pag-alagad nabuksan. Ang akong igsoong lalaki, si Russell, ug ang iyang asawa, si Dorothy, gidapit ingong magtiayon sa pagtungha sa unang klase sa Tunghaang Gilead, sa 1943, ug dayon gipadala ingong mga misyonaryo ngadto sa Cuba. Ang akong igsoong babayeng si Kathryn mitungha sa ikaupat nga klase. Siya usab giasayn ngadto sa Cuba. Sa ulahi siya gihatagag bag-ong asaynment sa Dominican Republic ug dayon ngadto sa Puerto Rico. Komosta si Ann ug ako?
Sa dihang nakadungog kami bahin sa Tunghaang Gilead ug sa kamatuoran nga ang Sosyedad nagtinguha sa pagpadalag mga misyonaryo ngadto sa ubang kayutaan, mibati kami nga gusto namong itanyag ang among kaugalingon alang sa langyawng pag-alagad. Sa sinugdan, naghunahuna kami nga magkinaugalingon sa pag-adto, tingali sa Mexico. Apan kami midesidir nga mas maayong maghulat na lang ug pasagdan ang Sosyedad nga maoy mopadala kanamo human kami makatungha sa Tunghaang Gilead. Among naamgohan nga kini maoy usa ka kahikayan nga gigamit ni Jehova.
Kami gidapit ngadto sa ikaupat nga klase sa tunghaang Gilead. Ugaling sa wala pa magsugod ang klase, si N. H. Knorr, nga mao ang presidente sa Watch Tower Society niadtong higayona, nakamatikod sa mga limitasyon ni Ann tungod sa polyo gikan sa pagkabata. Iya akong gipakigsultihan bahin niana ug midesidir nga dili-maalamong ipadala kami sa pag-alagad sa laing nasod.
Mga duha ka tuig sa ulahi, samtang nagtrabaho ako sa buluhaton una pa sa kombensiyon, nakit-an ako pag-usab ni Brader Knorr ug nangutana kon kami interesado pa ba gihapon sa pagtungha sa Gilead. Iya akong gisultihan nga dili kami paadtoon sa langyawng asaynment; siya adunay laing asaynment sa iyang hunahuna. Busa sa dihang ang ikanuybeng klase narehistro sa Pebrero 26, 1947, naapil kami sa pundok sa mga estudyante.
Kadtong mga panahona sa Gilead maoy mga okasyon nga dili gayod makalimtan. Ang mga kurso tugob gayod sa espirituwal. Ang tibuok-kinabuhi nga panaghigala naugmad. Apan ang akong pagkalangkit sa tunghaan misaylo pa niana.
Tali sa Washington ug Gilead
Bag-o pa gayod ang Tunghaang Gilead. Ang gobyerno sa Tinipong Bansa wala pay igong kasayoran bahin sa mga tumong sa tunghaan, busa daghang pangutana ang gipatugbaw. Ang Sosyedad buot nga adunay usa ka hawas sa Washington, D.C. Didto kami gipadala sa pipila ka bulan human migraduwar sa Gilead. Ako mao ang motabang sa pagkuhag mga visa alang niadtong gidapit sa pagtungha sa Gilead gikan sa ubang mga nasod ug sa pagkuhag legal nga mga papeles aron ang mga graduwado mapadala sa gawas sa nasod alang sa misyonaryong buluhaton. Ang pipila ka mga opisyal makataronganon ug matinabangon. Ang uban adunay kusganong mga batok-Saksi nga pagbati. Ang pipila nga lig-on kaayog politikanhong mga hunahuna nag-ingon nga kami adunay mga koneksiyon sa mga kriminal nga ilang giisip nga dili-tilinguhaon.
Usa ka tawo kansang opisina akong giadto kusganong nanaway kanamo tungod kay kami dili mosaludo sa bandera o moadto sa gubat. Human sa iyang dugaydugayng pagyawyaw bahin niana, ako sa kataposan miingon: “Buot kong masayod ka, ug ikaw nasayod, nga ang mga Saksi ni Jehova dili mag-apil-apil sa gubat batok kang bisan kinsa sa kalibotan. Kami dili mag-apil-apil sa mga kalihokan sa kalibotan. Kami dili mag-apil-apil sa ilang mga gubat, sa ilang mga politika. Kami bug-os nga neyutral. Kami nakabuntog na sa mga suliran nga inyong giatubang; kami adunay panaghiusa sa among organisasyon. . . . Karon, unsay gusto nimo nga among buhaton? Gusto ba nimong mobalik kami sa inyong paagi sa paghimo sa mga butang ug hunongon ang amoa?” Siya wala gayoy bisan unsay gisulti human niana.
Bug-os nga duha ka adlaw sa usa ka semana ang igahin alang sa trabaho sa mga opisina sa gobyerno. Dugang pa niana, kami nag-alagad ingong espesyal nga mga payunir. Balik niadto, kinahanglang gahinan kinig 175 ka oras sa pag-alagad sa kanataran matag bulan (sa ulahi kini gibag-o ngadto sa 140 ka oras), busa manangyaw kami hangtod sa lawom na nga kagabhion. Kami nalingaw kaayo niadto. Kami nagdumala ug daghang maayong mga pagtuon uban sa tibuok mga pamilya, ug sila maayog pag-uswag. Si Ann ug ako nakadesidir nga dili manganak, apan sa espirituwal nga pagkasulti, kami nakabaton dili lamang mga anak kondili mga apo ug mga apo sa tuhod. Sila nakahatag gayod kanamog kalipay!
Ulahi sa 1948, nakadawat ako ug dugang asaynment. Si Brader Knorr miingon nga si Brader Schroeder, ang tigrehistro ug usa sa mga instruktor sa Tunghaang Gilead, mahimong okupado sa ubang hinungdanong trabaho, busa ako gihangyo sa pagtudlo sa mga klase sa Gilead kon gikinahanglan. Bisan nagpanuko, ako miabot balik sa Gilead, sa South Lansing, New York, uban kang Ann sa Disyembre 18. Sa sinugdan, pipila lamang ka semana ang among magugol sa Gilead, ug dayon mobalik kami sa Washington. Apan, sa ngadtongadto mas daghang panahon ang akong nagugol sa Gilead kay sa Washington.
Niining yugtoa, ingon sa akong gihisgotan sa sinugdan, nga ang ika-21ng klase sa Gilead migraduwar sa Yankee Stadium sa New York. Mao nga ingong usa sa mga instruktor, ako nakapribilehiyo sa pagpakigbahin sa maong programa sa graduwasyon.
Nag-alagad Diha sa Tibuok-Kalibotang Hedkuwarter
Sa Pebrero 12, 1955, among gisugdan ang laing asaynment sa pag-alagad. Kami nahimong membro sa pamilyang Bethel sa tibuok-kalibotang hedkuwarter sa makitang organisasyon ni Jehova. Apan unsay nalangkit niini? Sa paninugdan, ang pagkaandam sa pagbuhat sa bisan unsang asaynment nga gihatag kanamo, nga makigbahin sa mga proyekto nga nagkinahanglag kooperasyon sa uban. Sa pagkatinuod, nahimo namo kana sa una pa, apan karon kami nahimo nang bahin sa usa ka mas dakong grupo—ang hedkuwarter sa pamilyang Bethel. Among malipayong gidawat kining bag-ong asaynment ingong ebidensiya sa pagtultol ni Jehova.
Ang dakong bahin sa akong trabaho nalangkit sa mga butang may kalabotan sa palaumagian sa balita. Tungod sa pagtinguhag mga estoryang makapaukay ug tungod kay nakakuhag impormasyon gikan sa mapihigong mga tinubdan, ang prensa nakasulat ug pipila ka daotang mga butang bahin sa mga Saksi ni Jehova. Kami naningkamot sa pagpauswag nianang kahimtanga.
Si Brader Knorr naneguro nga kami adunay daghang buluhatong pagahimoon, busa dihay laing mga asaynment usab. Ang pipila niini nagkinahanglan sa mga kahanas nga akong nakamaohan ingong komersiyal nga tigdibuho. Ang uban nalangkit sa estasyon sa radyo sa Sosyedad, ang WBBR. Dihay buluhaton labot sa mga pelikula nga gihimo sa Sosyedad. Ang teokratikanhong kasaysayan, sa pagkatinuod, maoy bahin sa kurso sa Gilead, apan karon ang lainlaing proyekto gisugdan aron sa pagpasinati pag dugang sa katawhan ni Jehova sa mga detalye niana nga kasaysayan sa modernong-adlawng teokratikanhong organisasyon ug sa pagpaabot niini ngadto sa publiko usab. Laing bahin sa pagbansay sa Gilead nalangkit sa pagpakigpulong publiko, ug buluhaton nga kinahanglang himoon aron ang mga paninugdang kinahanglanon sa pagpakigpulong publiko mabatonan sa mga igsoon sa kongregasyon. Busa dihay daghan gayod nga buluhaton.
Gilead sa Regular nga Paagi
Sa 1961, uban sa pagbansay sa nagapanawng mga magtatan-aw ug mga kawani sa sanga sa umaabot, ang Tunghaang Gilead gibalhin sa Brooklyn, diin ania dinhi ang pangunang mga opisina sa Watch Tower Society. Mibalik na usab ako sa saringan—niining higayona dili ingong kapuli nga instruktor kondili usa ka regular nga membro sa mga instruktor. Pagkadakong pribilehiyo! Ako kombinsido gayod nga ang Tunghaang Gilead maoy usa ka gasa gikan kang Jehova, usa ka gasa nga nakabenepisyo sa iyang tibuok nga makitang organisasyon.
Sa Brooklyn ang mga klase sa Gilead adunay mga kahigayonan nga wala maagii sa mga estudyante sa nangaging mga klase. Dunay mas daghang dinapit nga mga tigpakigpulong ug may suod nga panag-ubanay sa Nagamandong Lawas ug dakong panag-ubanay sa pamilyang Bethel sa hedkuwarter. Posible usab nga makadawat ang mga estudyante ug pagbansay sa mga paagi sa opisina, sa mga palakaw sa panimalayng Bethel, ug sa nagkalainlaing mga bahin sa buluhaton sa pabrika.
Latas sa daghang katuigan lainlain ang gidaghanon sa mga estudyante, ug maingon man ang gidaghanon sa mga instruktor. Ang lokasyon sa tunghaan gibalhin sa makadaghan usab. Karon nahimutang kini sa maanindot nga mga palibot sa Patterson, New York.
Nagtrabaho Uban sa mga Estudyante
Nakahatag gayod ug dakong kalipay ang pagtudlo niining mga klaseha! Aniay mga batan-on nga dili interesadong mobuhat sa mga butang sa daang sistema. Ilang gibiyaan ang ilang pamilya, ilang mga higala, ilang pinuy-anan, ug ang mga tawo nga nagsulti sa ilang sinultihan. Ang klima, ang pagkaon—ang tanang butang mahimong lahi. Sila wala gani mahibalo kon asang nasora sila moadto, apan ang ilang tumong maoy mahimong mga misyonaryo. Dili na kinahanglang agdahon pa nimo ang ingon nianang matanga sa mga tawo.
Inigsulod nako sa saringan, buot nako nga mobatig kaharuhay ang mga estudyante. Wala kaayoy makat-onan ang usa kon siya mobatig kalisod ug kabalaka. Tinuod, ako ang instruktor, apan nahibalo ako kon sama sa unsa ang pagkahimong estudyante. Ako nakalingkod kas-a nianang mga lingkorana. Siyempre, sila nagtuon pag-ayo ug daghag nakat-onan sa Gilead, apan buot ko usab nga sila malingaw sa pagtungha .
Ako nahibalo nga sa dihang sila moadto sa ilang mga asaynment, may mga butang nga ilang gikinahanglan aron molampos. Sila nagkinahanglag malig-ong pagtuo. Sila nagkinahanglag pagkamapainubsanon—daghan niana. Sila nagkinahanglang magtuon sa pagpakig-uban sa ubang tawo, sa pagdawat sa mga kahimtang, nga dagayang mopasaylo. Sila nagkinahanglang magpadayon sa pag-ugmad sa mga bunga sa espiritu. Sila nagkinahanglan usab sa paghigugma sa mga tawo ug paghigugma sa buluhaton diin sila gipadala. Kadtong mga butanga ang kanunay nakong ipasiugda sa mga estudyante samtang nagtungha sila sa Gilead.
Wala gayod ako mahibalo kon pila na ka estudyante ang akong natudloan. Apan nahibalo ako kon unsay akong pagbati kanila. Human makagugol ug lima ka bulan uban kanila sa saringan, dili nako malikayang masuod pag-ayo kanila. Dayon sa magtan-aw ako kanila nga nagpaso sa entablado ug nagdawat sa ilang mga diploma sa adlaw sa graduwasyon, ako nahibalo nga malamposon nilang natapos ang kurso ug nga sa dili madugay sila manglakaw na. Daw nahisama kini nga may sakop sa akong pamilya nga milakaw. Sa unsang paagi mapugngan nimo ang imong kaugalingon sa paghigugma sa mga tawo nga andam sa paghatag sa ilang kaugalingon ug himoon ang buluhaton nga pagabuhaton unya niining mga batan-ona?
Sa mga katuigan sa ulahi, sa dihang sila mobalik aron sa pagduaw, akong madungog sila nga maghinugilon sa ilang mga kalipay sa pag-alagad, ug ako nahibalo nga sila nagpabilin gihapon sa ilang mga asaynment, nga naghimo sa buluhaton nga sila gibansay. Unsay bation nako niana? Dayag, lalim gayod.
Nagalantaw sa Umaabot
Ang akong mga mata hanap na karon, ug gibati ko ang mga kahigawad nga dala niini. Dili na ako makatudlo sa saringan sa Gilead. Sa sinugdan, malisod ang pagpaangay niining kahimtanga, apan sa akong tibuok kinabuhi ako nakakat-on sa pagdawat sa mga kahimtang ug sa pagsagubang niana. Mahunahunaan nako kanunay ang “tunok sa unod” ni apostol Pablo. Tulo ka higayong miampo si Pablo alang sa kahupayan niana nga balatian, apan ang Ginoo miingon kaniya: “Ang akong dili-takos nga kalulot igo na alang kanimo; kay ang akong gahom ginahimong hingpit diha sa kaluyahon.” (2 Corinto 12:7-10) Giantos kana ni Pablo. Kon iyang naantos kana, angay ko kanang sulayan. Bisan tuod ug wala na ako magtudlo sa mga klase, mapasalamaton ako nga makita ko gihapon adlaw-adlaw ang mga estudyante. Usahay mahinabi ko sila, ug nakahatag ug kalipay sa akong kasingkasing ang pagpalandong sa maayong espiritu nga ilang gipakita.
Maanindot kaayong palandongon kon unsay anaa sa umaabot. Ang pundasyon ginatukod na karon. Ang Gilead adunay dakong bahin niana. Inigkahuman sa dakong kasakitan, sa dihang ang mga linukot nga basahon nga gihisgotan sa Pinadayag 20:12 mabuksan, adunay usa ka libo ka tuig nga dugang matukiong edukasyon diha sa mga dalan ni Jehova. (Isaias 11:9) Apan dili pa kana ang kataposan. Sinugdanan lamang kana. Sa tibuok panahong walay kataposan, daghan pa ang pagatun-an bahin kang Jehova ug daghan pa ang pagabuhaton samtang atong makita ang iyang mga katuyoan nga matuman. Ako bug-os nga masaligon nga tumanon ni Jehova ang dagkong mga saad nga iyang gisaad, ug buot kong makaabot didto aron makaambit sa pagdawat sa mga pagtultol ni Jehova kanato niana unyang panahona.
[Hulagway sa panid 26]
Graduwasyon sa Gilead diha sa Yankee Stadium sa New York sa 1953
[Hulagway sa panid 26]
Si Gertrude, ako, Kathryn, ug Russell
[Hulagway sa panid 26]
Nagtrabaho uban kang N. H. Knorr (halayong wala) ug M. G. Henschel sa organisasyon sa kombensiyon
[Hulagway sa panid 26]
Diha sa WBBR nga estudyo sa pagsibya
[Hulagway sa panid 29]
Diha sa saring sa Gilead
[Hulagway sa panid 31]
Uban kang Ann, dili pa dugay