“Ang Kamatuoran Magpagawas Kaninyo”
“Inyong Mahibaloan Ang Kamatuoran, Ug Ang Kamatuoran Magpagawas Kaninyo.” Ingon Niana Ang Gipahayag Ni Jesus Samtang Siya Nanudlo Sa Mga Panon Diha Sa Templo Sa Jerusalem. (Juan 8:32) Nasabtan Dayon Sa Mga Apostol Ni Jesus Ang Mga Pagtulon-an Ni Jesus Ingon Nga Kamatuoran. Nakakita Sila Ug Dagayang Pamatuod Sa Balaang Tinubdan Sa Ilang Magtutudlo.
APAN, karong adlawa ang uban tingali malisdan sa pag-ila sa kamatuoran nga gihisgotan ni Jesus. Ingon sa mga adlaw ni manalagnang Isaias, karong adlawa anaa “kadtong moingon nga maayo ang daotan ug daotan ang maayo, kadtong nag-ilis ug kangitngit sa kahayag ug kahayag sa kangitngit, kadtong naghimong pait sa tam-is ug tam-is sa pait.” (Isaias 5:20) Uban ang daghang opinyon, pilosopiya, ug mga estilo sa kinabuhi nga ginapalambo karong mga adlawa, gibati sa daghang tawo nga ang tanang butang dili absoluto ug nga walay gitawag nga kamatuoran.
Sa dihang giingnan ni Jesus ang iyang mamiminaw nga ang kamatuoran magpagawas kanila, sila mitubag sa pag-ingon: “Mga kaliwat kami ni Abraham ug wala pa kami sukad maulipon kang bisan kinsa. Naunsa bang ikaw nagaingon, ‘Kamo mahimong gawasnon’?” (Juan 8:33) Wala sila mobatig panginahanglan alang ni bisan kinsa o sa bisan unsa nga magpagawas kanila. Apan dayon si Jesus misaysay: “Sa pagkamatuod gayod ako magaingon kaninyo, Ang matag mamumuhat sa sala maoy ulipon sa sala.” (Juan 8:34) Ang kamatuoran nga gihisgotan ni Jesus makabukas sa dalan ngadto sa kagawasan gikan sa sala. Si Jesus miingon: “Kon ang Anak magpagawas kaninyo, kamo sa tinuod mahimong gawasnon.” (Juan 8:36) Busa ang kamatuoran nga magpagawas sa mga tawo mao ang kamatuoran bahin kang Jesu-Kristo, ang Anak sa Diyos. Pinaagi lamang sa pagtuo sa hingpit tawhanong kinabuhi nga halad ni Jesus nga ang usa mapahigawas gikan sa sala ug kamatayon.
Sa laing okasyon si Jesus miingon: “Balaana sila pinaagi sa kamatuoran; ang imong pulong maoy kamatuoran.” (Juan 17:17) Ang pulong sa Diyos nga gipahayag diha sa Bibliya mao ang kamatuoran nga makapahigawas gikan sa patuotuo ug bakak nga pagsimba. Ang Bibliya naundan sa kamatuoran bahin kang Jesus-Kristo, nga nagtultol sa mga tawo sa pagtuo kaniya ug nagbukas sa dalan ngadto sa masanag nga paglaom sa umaabot. Maanindot nga butang ang pagkahibalo sa kamatuoran sa Pulong sa Diyos!
Unsa ka hinungdanon ang pagkahibalo sa kamatuoran? Daghang relihiyon karong adlawa, samtang nangangkon nga nagsunod sa Bibliya, sa dakong bahin naimpluwensiyahan sa tawhanong mga pilosopiya ug mga tradisyon. Kasagaran, ang relihiyosong mga pangulo daw mas mabalak-on kon unsaon nga madawat sa mga tawo inay mabalaka sa katukma sa ilang mensahe. Ang pipila mibati nga ang Diyos natagbaw sa bisan unsang porma sa pagsimba, basta kini sinsero. Apan si Jesu-Kristo misaysay: “Ang takna nagasingabot, ug mao na karon, sa dihang ang matuod nga mga magsisimba mosimba sa Amahan pinaagi sa espiritu ug kamatuoran, kay, sa pagkatinuod, ang Amahan nagapangita sa mga ingon kanila nga mosimba kaniya.”—Juan 4:23.
Kon buot kitang moalagad sa Diyos nga dalawaton, kinahanglang mahibalo kita sa kamatuoran. Kini maoy hinungdanong isyu. Ang atong dumalayong kalipay nag-agad diha niana. Busa, ang matag usa angayng mosukna sa iyang kaugalingon: ‘Ang ako bang paagi sa pagsimba dalawaton sa Diyos? Ako ba tinuod gayong interesado sa pagkakat-on sa kamatuoran sa Pulong sa Diyos? O ako ba nahadlok kon unsay mahimong ibutyag sa mainampingong pagsusi?’