Importante pa ba ang Kamatuoran?

Gibati ba nimo nga lisod nang mailhan kon unsay tinuod ug kon unsay dili? Ang mga tawo karon mas daling motuo sa usa ka butang tungod sa ilang gibati ug personal nga opinyon, imbes sa kamatuoran ug kasaligang mga impormasyon. Sa tibuok kalibotan, daghan ang miingon nga wala gyoy kamatuoran.

Dili na ni bag-o nga panghunahuna. Mga 2,000 ka tuig sa miagi, ang Romanong Gobernador nga si Poncio Pilato nangutana kang Jesus: “Unsa bay kamatuoran?” (Juan 18:38) Bisag wala na hulata ni Pilato ang tubag ni Jesus, importante ang iyang pangutana. Ang Bibliya naghatag ug tubag nga posibleng makapakombinsir nimo. Ug makatabang ni nimo nga mailhan kon unsay tinuod ug kon unsay bakak nga mga impormasyon nga naa niining kalibotana.

Naa ba gyoy kamatuoran?

Oo. Gigamit sa Bibliya ang pulong “kamatuoran” sa pagtumong kon unsay tinuod ug kon unsay husto. Kini nagtudlo nga si Jehovaa nga Diyos mao “ang Diyos sa kamatuoran” kay siya ang Tinubdan sa kamatuoran. (Salmo 31:5) Naa sa Bibliya ang kamatuoran nga gikan sa Diyos, ug gikompara kini ngadto sa kahayag kay makagiya ni nato gikan sa tanang makalibog nga impormasyon sa kalibotan karon.—Salmo 43:3; Juan 17:17.

Unsaon nimo pagpangita ang kamatuoran?

Dili gusto sa Diyos nga basta na lang natong dawaton ang kamatuoran gikan sa Bibliya. Gidasig ta niya nga susihon kini gamit ang atong gahom sa pagpangatarongan imbes mosalig sa atong emosyon. (Roma 12:1) Gusto niya nga mailhan nato siya ug higugmaon sa ‘tibuok natong hunahuna,’ ug gidasig ta niya nga pamatud-an sa atong kaugalingon nga ang atong nakat-onan sa Bibliya mao ang kamatuoran.—Mateo 22:37, 38; Buhat 17:11.

Kang kinsa nagsugod ang pagpamakak?

Ang Bibliya nag-ingon nga ang pagpamakak nagsugod sa kaaway sa Diyos, si Satanas nga Yawa. Gitawag siya sa Bibliya nga “amahan sa bakak.” (Juan 8:44) Namakak siya sa unang mga tawo bahin sa Diyos. (Genesis 3:1-6, 13, 17-19; 5:5) Sukad niadto, si Satanas padayong nagpakaylap ug mga bakak ug gitago ang kamatuoran bahin sa Diyos.—Pinadayag 12:9.

Nganong komon kaayo karon ang pagpamakak?

Sa atong panahon, nga gitawag sa Bibliya ug “kataposang mga adlaw,” mas migrabe ang impluwensiya ni Satanas sa mga tawo. Daghan karon ang mosultig bakak aron limbongan ang uban ug makabentaha sila. (2 Timoteo 3:1, 13) Komon sab ang pagpamakak sa kadaghanang relihiyon karon. Sama sa gitagna sa Bibliya bahin sa atong panahon, “palibotan [sa mga tawo] ang ilang kaugalingon ug mga magtutudlo aron gitikon ang ilang dalunggan,” kay mas gipili nila nga “dili na maminaw sa kamatuoran.”—2 Timoteo 4:3, 4.

Nganong importante ang kamatuoran?

Gikinahanglan sa mga tawo ang kamatuoran aron makasalig sila sa usag usa. Kon walay pagsalig, mohuyang ang mga panaghigalaay ug dili magkahiusa ang katawhan. Ang Bibliya nag-ingon nga gusto sa Diyos nga ang atong pagsimba gibase sa kamatuoran. Kini nag-ingon: “Ang iyang mga magsisimba kinahanglang magsimba kaniya sa espiritu ug kamatuoran.” (Juan 4:24) Aron mahibalo kon sa unsang paagi ang kamatuoran gikan sa Bibliya makatabang nimo nga mailhan ang bakak nga mga pagtulon-an ug dili na maimpluwensiyahan niana, basaha ang serye sa mga artikulo nga nag-ulohang “Kabakakan nga Nagpahilayo sa mga Tawo Gikan sa Diyos.”

Nganong gusto sa Diyos nga mahibalo ko sa kamatuoran?

Gusto sa Diyos nga maluwas ka, ug aron mahitabo na kinahanglang mahibalo ka sa kamatuoran bahin kaniya. (1 Timoteo 2:4) Kon makakat-on ka sa mga sukdanan sa Diyos sa husto ug sayop ug magkinabuhi uyon niana, mas masuod ka kaniya. (Salmo 15:1, 2) Aron matabangan ang mga tawo nga mahibalo sa kamatuoran, gipadala sa Diyos si Jesus dinhi sa yuta. Gusto sa Diyos nga maminaw ta sa mga gitudlo ni Jesus.—Mateo 17:5; Juan 18:37.

Wad-on ba sa Diyos ang pagpamakak?

Oo. Gidumtan sa Diyos kadtong mamentaha sa uban pinaagi sa pagpamakak. Nagsaad siya nga iyang wad-on sa yuta kadtong padayong mamakak. (Salmo 5:6) Dihang himoon na sa Diyos, matuman pod ang iyang saad nga “ang matinud-anong ngabil magpabilin hangtod sa hangtod.”—Proverbio 12:19.