Pagsundog sa Diyos sa Kamatuoran
“Mahimong mga tigsundog sa Diyos, ingon nga hinigugmang mga anak.”—EFESO 5:1.
1. Unsay gituohan sa pipila bahin sa kamatuoran, ug nganong sayop ang ilang pangatarongan?
“UNSA bay kamatuoran?” (Juan 18:38) Kanang pangutanaha, nga makantalitahong gisukna ni Poncio Pilato duolan sa 2,000 ka tuig kanhi, nagpasabot nga ang kamatuoran lisod pangitaon. Daghan karon ang mouyon. Ang mismong kinaiyahan sa kamatuoran ginaatake. Tingali nadungog na nimo nga giingon nga ang tagsatagsa maoy mohukom kon unsay kamatuoran, o ang kamatuoran relatibo, o ang kamatuoran kanunayng nag-usab-usab. Sayop ang maong pangatarongan. Ang mismong tumong sa panukiduki ug edukasyon mao ang pagkahibalo kon unsay tinuod nga impormasyon, ang kamatuoran, bahin sa kalibotan nga atong gipuy-an. Ang kamatuoran dili usa ka personal nga opinyon. Pananglitan, ang tawhanong kalag mahimong imortal o dili. Si Satanas mahimong naglungtad o wala. Mahimong dunay katuyoan sa kinabuhi o wala. Sa matag kahimtang, usa lang ang hustong tubag. Ang usa tinuod, ug ang lain bakak; ang duha dili mahimong pulos tinuod.
2. Sa unsang mga paagi nga si Jehova mao ang Diyos sa kamatuoran, ug unsang mga pangutana ang pagahisgotan karon?
2 Sa nag-unang artikulo, atong gihisgotan nga si Jehova mao ang Diyos sa kamatuoran. Siya nahibalo sa kamatuoran sa tanang butang. Kasukwahi kaayo sa iyang malimbongong kaaway nga si Satanas nga Yawa, si Jehova kanunayng matinud-anon. Gawas pa, si Jehova kanunayng nagapadayag sa kamatuoran ngadto sa uban. Si apostol Pablo nag-awhag sa mga isigka-Kristohanon: “Mahimong mga tigsundog sa Diyos, ingon nga hinigugmang mga anak.” (Efeso 5:1) Ingong mga Saksi ni Jehova, sa unsang paagi nato masundog siya diha sa pagsulti ug pagkinabuhi sumala sa kamatuoran? Nganong hinungdanon ang pagbuhat niana? Ug unsang pasalig ang atong nabatonan nga si Jehova nag-uyon niadtong nagsubay sa dalan sa pagkamatinud-anon? Tan-awon nato.
3, 4. Sa unsang paagi ang mga apostoles nga si Pablo ug Pedro naghubit kon unsay mahitabo panahon sa “kataposang mga adlaw”?
3 Kita nagkinabuhi sa panahon diin ang relihiyosong kabakakan nagdagsang. Ingon sa gitagna ni apostol Pablo ilalom sa pag-inspirar sa Diyos, daghang tawo niining “kataposang mga adlaw” ang dunay dagway sa diyosnong pagkamahinalaron apan nagpanghimakak sa gahom niini. Ang uban mosupak sa kamatuoran, kay “dunot gayod ug kaisipan.” Dugang pa, “ang mga tawong daotan ug mga impostor mosamot pa kangil-ad, nga nagapahisalaag ug nahisalaag.” Bisan tuod ang maong mga tawo kanunayng nagtuon, wala gayod sila “makadangat sa tukmang kahibalo sa kamatuoran.”—2 Timoteo 3:1, 5, 7, 8, 13.
4 Si apostol Pedro giinspirar usab sa pagsulat bahin sa kataposang mga adlaw. Sama gayod sa iyang gitagna, ang mga tawo dili lamang magsalikway sa kamatuoran kondili magbugalbugal usab sa Pulong sa Diyos ug niadtong nagamantala sa kamatuoran niini. “Nga magpahiuyon sa ilang kaugalingong mga tinguha,” ang maong mga bugalbugalon wala manumbaling sa kamatuoran nga ang kalibotan sa adlaw ni Noe gilunopan, nga nagsilbing sumbanan sa umaabot nga adlaw sa paghukom. Ang ilang pangandoy magkahulogan sa ilang kalaglagan sa dihang moabot na ang panahon sa Diyos sa paglaglag sa mga tawong dili diyosnon.—2 Pedro 3:3-7.
Ang mga Alagad ni Jehova Nahibalo sa Kamatuoran
5. Sumala sa manalagnang si Daniel, unsay mahitabo sa “panahon sa kataposan,” ug sa unsang paagi natuman kining maong tagna?
5 Sa paghubit sa “panahon sa kataposan,” ang manalagnang si Daniel nagtagna ug lahi kaayong kaugmaran taliwala sa katawhan sa Diyos—usa ka pagpasig-uli sa relihiyosong kamatuoran. Siya misulat: “Daghan ang magngadto-nganhi, ug ang matuod nga kahibalo modagaya.” (Daniel 12:4) Ang katawhan ni Jehova dili malibog o mabutaan sa dakong Manlilimbong. Nagngadto-nganhi sa mga panid sa Bibliya, sila nakabaton ug tinuod nga kahibalo. Sa unang siglo, gilamdagan ni Jesus ang iyang mga tinun-an. Iyang ‘gibuksan sa bug-os ang ilang mga kaisipan aron masabtan ang kahulogan sa mga Kasulatan.’ (Lucas 24:45) Sa atong adlaw, si Jehova milihok nga susama niana. Pinaagi sa iyang Pulong, iyang espiritu, ug sa iyang organisasyon, iyang gipahinabo nga ang milyonmilyon sa tibuok yuta makasabot sa iya nang nahibaloan—ang kamatuoran.
6. Ang katawhan sa Diyos karon nakasabot sa unsang mga kamatuoran sa Bibliya?
6 Ingong katawhan sa Diyos, atong nasabtan ang daghang butang nga dili gayod unta nato mahibaloan. Kita nahibalo sa mga tubag sa mga pangutana nga gipanglimbasogang masabtan sa mga maalamon sa kalibotan sulod sa daghang milenyo. Pananglitan, kita nahibalo kon nganong naglungtad ang pag-antos, kon nganong ang mga tawo mangamatay, ug kon nganong ang mga tawo dili makakab-ot ug tibuok-yutang pakigdait ug panaghiusa. Gipakita usab kanato kon unsay anaa sa umaabot—ang Gingharian sa Diyos, usa ka paraisong yuta, ug walay-kataposang kinabuhi diha sa kahingpitan. Kita nakaila kang Jehova, ang Supremong Usa. Kita nakakat-on bahin sa iyang makapadaning personalidad duyog sa angay natong buhaton aron madawat ang iyang panalangin. Tungod sa pagkahibalo sa kamatuoran, makaila kita kon unsay dili tinuod. Ang pagpadapat sa kamatuoran manalipod kanato batok sa walay-pulos nga mga pangagpas, makapaarang kanato sa pagpahimulos sa labing maayo sa kinabuhi, ug maghatag kanato ug usa ka kahibulongang paglaom sa umaabot.
7. Kinsa ang mahimong makabaton sa mga kamatuoran sa Bibliya, ug kinsa ang dili?
7 Nasabtan ba nimo ang kamatuoran sa Bibliya? Kon mao, ikaw dagayang gipanalanginan. Sa dihang ang usa ka awtor mosulat ug usa ka basahon, siya kasagarang magdisenyo niana aron kini makapadani sa usa ka espesipikong grupo sa mga tawo. Ang ubang mga basahon gisulat alang sa mga tag-as ug edukasyon, ang uban alang sa mga bata, ug ang uban pa alang sa mga espesyalista. Bisan tuod ang Bibliya dali rang mabatonan sa tanan, kini gisulat aron masabtan ug maapresyar sa usa ka grupo sa mga tawo. Gidisenyo kini ni Jehova alang sa mga mapaubsanon, sa mga maaghop sa yuta. Ang maong mga tawo makasabot sa diwa sa Bibliya, bisan unsa pay ilang edukasyon, kultura, kahimtang sa kinabuhi, o grupo sa minoriya. (1 Timoteo 2:3, 4) Sa laing bahin, ang pagsabot sa kamatuoran sa Bibliya wala ihatag niadtong wala makiling niana sa hustong paagi, bisan unsa pa ka intelihente o edukado sila. Ang mga mapahitas-on, garboso, dili makasabot sa bililhong mga kamatuoran sa Pulong sa Diyos. (Mateo 13:11-15; Lucas 10:21; Buhat 13:48) Ang Diyos lamang ang makapatungha ug ingon nianang basahona.
Ang mga Alagad ni Jehova Matinud-anon
8. Nganong si Jesus mao mismo ang kamatuoran?
8 Sama kang Jehova, ang iyang matinumanong mga Saksi maoy matinud-anon. Si Jesu-Kristo, ang pangunang Saksi ni Jehova, nagpamatuod sa kamatuoran pinaagi sa mga butang nga iyang gitudlo ug pinaagi sa paagi nga siya nagkinabuhi ug namatay. Iyang gituboy ang kamatuoran sa pulong ug mga saad ni Jehova. Busa, si Jesus mao mismo ang kamatuoran, sumala sa giingon niya.—Juan 14:6; Pinadayag 3:14; 19:10.
9. Unsay giingon sa Kasulatan bahin sa pagsulti sa kamatuoran?
9 Si Jesus “puno sa dili-takos nga kalulot ug sa kamatuoran,” ug “walay panglimbong sa iyang baba.” (Juan 1:14; Isaias 53:9) Ang matuod nga mga Kristohanon nagsunod sa sumbanan nga gihatag ni Jesus sa pagkamatinud-anon sa uban. Gitambagan ni Pablo ang mga isigkamagtutuo: “Magsulti sa tinuod ang matag usa kaninyo sa iyang silingan, tungod kay kita mga sangkap nga iya sa usag usa.” (Efeso 4:25) Sayosayo pa, si manalagnang Zacarias misulat: “Sulti nga matinud-anon sa usag usa.” (Zacarias 8:16) Ang mga Kristohanon matinud-anon tungod kay gusto nilang pahimut-an ang Diyos. Si Jehova matinud-anon ug nahibalo sa kadaot nga moresulta gikan sa kabakakan. Busa, angay nga dahomon niya ang iyang mga alagad nga mosulti sa kamatuoran.
10. Nganong mamakak ang mga tawo, ug uban sa unsang makadaot nga mga resulta?
10 Alang sa daghan, ang pagpamakak morag kombenyenteng galamiton aron makadawat ug pipila ka matang sa mga bentaha. Ang mga tawo mamakak aron makalingkawas sa silot, aron makaganansiya sa usa ka paagi, o makaangkon sa pagdayeg sa uban. Apan, ang batasan sa pagpamakak maoy usa ka bisyo. Gawas pa, ang bakakon dili makaangkon sa pag-uyon sa Diyos. (Pinadayag 21:8, 27; 22:15) Sa dihang kita nailhan nga matinud-anon, ang uban motuo sa atong isulti; sila mosalig kanato. Apan, kon masakpan kita nga nagsulti ug bisan usa lang ka bakak, ang uban mahimong magduhaduha kon tinuod ba ang bisan unsa nga atong isulti sa umaabot. Usa ka panultihon sa Aprika nag-ingon: “Ang usa ka bakak makadaot sa libolibo ka kamatuoran.” Ang laing panultihon nag-ingon: “Ang usa ka bakakon dili tuohan, bisan pag nagsulti na siya sa tinuod.”
11. Sa unsang paagi nga ang pagkamatinud-anon labaw pa kay sa pagsulti lamang sa tinuod?
11 Ang pagkamatinud-anon nagpasabot ug labaw pa kay sa pagsulti lamang sa tinuod. Kini maoy paagi sa pagkinabuhi. Kini naghubit kon kinsa kita. Ipahibalo nato ang kamatuoran ngadto sa uban dili lamang pinaagi sa atong isulti kondili usab sa atong buhaton. “Ikaw ba nga nagatudlo sa uban, dili magtudlo sa imong kaugalingon?” nangutana si apostol Pablo. “Ikaw nga nagawali nga ‘Ayaw pangawat,’ nagapangawat ka ba? Ikaw nga nagaingon ‘Ayaw panapaw,’ nagapanapaw ka ba?” (Roma 2:21, 22) Kon buot natong ibutyag ang kamatuoran ngadto sa uban, kinahanglang magmatinud-anon kita sa tanan natong mga dalan. Ang atong reputasyon sa pagkamatinud-anon adunay dakong epekto kon sa unsang paagi ang mga tawo mosanong sa atong gitudlo.
12, 13. Unsay gisulat sa usa ka batan-on bahin sa pagkamatinud-anon, ug unsay hinungdan sa iyang taas nga moral nga sukdanan?
12 Ang mga batan-on taliwala sa mga alagad ni Jehova nakasabot usab sa kahinungdanon sa pagkamatinud-anon. Diha sa usa ka mubong sinulat, si Jenny, kinsa niadtong panahona maoy 13 anyos, misulat: “Gipabilhan ko gayod ang pagkamatinud-anon. Ikasubo, dili daghang tawo ang bug-os nga matinud-anon karon. Akong gisaaran ang akong kaugalingon nga kanunay akong magmatinud-anon sa akong kinabuhi. Magmatinud-anon usab ako bisan pag ang pagsulti sa kamatuoran dili dayon maghatag ug kaayohan kanako o sa akong mga higala. Akong seguroon nga ang akong mga higala mao kadtong nagsulti sa tinuod ug maoy mga matinud-anon.”
13 Sa pagkomento bahin niining mubong sinulat, ang maestra ni Jenny miingon: “Bisan tuod bata ka pa kaayo, naugmad na nimo ang lig-ong lagda sa moralidad ug prinsipyo. Nahibalo ko nga sundon nimo ang imong lagda tungod kay duna kay moral nga kalig-on.” Unsay nakaingon sa moral nga kalig-on niining batan-on nga nagtungha? Sa pasiuna sa iyang mubong sinulat, miingon si Jenny nga ang iyang relihiyon maoy “naghatag sa mga sukdanan alang sa [iyang] kinabuhi.” Pito ka tuig na ang milabay sukad gisulat ni Jenny ang maong mubong sinulat. Sumala sa pangagpas sa iyang maestra, si Jenny nagpadayon sa pagpakita ug taas nga moral nga sukdanan sa iyang kinabuhi ingong usa sa mga Saksi ni Jehova.
Ang mga Alagad ni Jehova Nagpadayag sa Kamatuoran
14. Nganong ang mga alagad sa Diyos ilabinang dunay dakong responsibilidad nga ituboy kon unsay tinuod?
14 Siyempre, ang uban gawas sa mga Saksi ni Jehova mosulti tingali sa kamatuoran ug maningkamot nga magmatinud-anon. Apan, ingong mga alagad sa Diyos, kita ilabinang dunay dakong responsibilidad sa pagtuboy kon unsay tinuod. Gipiyalan kita sa mga kamatuoran sa Bibliya—mga kamatuoran nga mahimong motultol sa usa ngadto sa walay-kataposang kinabuhi. Busa, duna kitay obligasyon sa pagpaambit sa maong kahibalo ngadto sa uban. “Ang usa nga gitugyanan ug daghan,” miingon si Jesus, “daghan usab ang pangayoon kaniya.” (Lucas 12:48) Tino nga ‘pangayoan ug daghan’ kadtong gipanalanginan ug bililhong kahibalo sa Diyos.
15. Unsang kalipay ang imong makaplagan diha sa pagbutyag sa kamatuoran sa Bibliya ngadto sa uban?
15 Dunay kalipay sa pagbutyag sa kamatuoran sa Bibliya ngadto sa uban. Sama sa unang-siglong mga tinun-an ni Jesus, kita nagapahayag sa maayong balita—usa ka makapadasig nga mensahe sa paglaom—ngadto niadtong “pinanitan ug nagkatibuagsa sama sa mga karnero nga walay magbalantay” ug niadtong nabutaan ug naglibog sa “mga pagtulon-an sa mga demonyo.” (Mateo 9:36; 1 Timoteo 4:1) Si apostol Juan misulat: “Wala nay labaw nga hinungdan sa akong pagkamapasalamaton kay niining mga butanga, nga akong madungog nga ang akong mga anak nagpadayon sa paglakaw diha sa kamatuoran.” (3 Juan 4) Ang pagkamatinumanon sa “mga anak” ni Juan—tingali kadtong iyang gisangyawan sa kamatuoran—nakahatag kaniyag dakong kalipay. Malipay kita sa dihang makita ang mga tawo nga mapasalamatong mosanong sa Pulong sa Diyos.
16, 17. (a) Nganong dili tanan modawat sa kamatuoran? (b) Unsang kalipay ang imong maeksperyensiyahan samtang gimantala nimo ang kamatuoran sa Bibliya?
16 Ibutang ta, dili tanan modawat sa kamatuoran. Si Jesus nagsulti sa tinuod bahin sa Diyos, bisan pag dili popular ang pagbuhat niana. Ngadto sa Hudiyong mga magsusupak siya miingon: “Nganong dili man kamo motuo kanako? Siya nga gikan sa Diyos magapatalinghog sa mga pulong sa Diyos. Mao nga dili kamo magapatalinghog, tungod kay kamo dili gikan sa Diyos.”—Juan 8:46, 47.
17 Kita, sama kang Jesus, dili magpanuko sa pagsulti sa bililhong kamatuoran bahin kang Jehova. Dili nato dahomon nga ang tanan modawat sa atong isulti kanila, kay dili tanan midawat sa gisulti ni Jesus. Bisan pa niana, malipay kita sa pagkahibalo nga husto ang atong ginabuhat. Tungod sa mahigugmaong-kalulot ni Jehova, buot niya nga ibutyag ang kamatuoran ngadto sa katawhan. Ingong mga maghuhupot sa kamatuoran, ang mga Kristohanon nahimong mga tigdala sa kahayag niining mangitngit nga kalibotan. Sa pagpadan-ag sa kahayag sa kamatuoran pinaagi sa atong mga pulong ug buhat, makatabang kita sa uban sa paghimaya sa atong langitnong Amahan. (Mateo 5:14, 16) Gipahibalo nato sa katawhan nga atong gisalikway ang mini nga matang sa kamatuoran ni Satanas ug gibayaw ang putli ug wala-masagoli nga Pulong sa Diyos. Ang kamatuoran nga atong nahibaloan ug gipaambit makahatag ug tinuod nga kagawasan niadtong modawat niana.—Juan 8:32.
Subaya ang Dalan sa Pagkamatinud-anon
18. Ngano ug sa unsang paagi gipaboran ni Jesus si Natanael?
18 Si Jesus nahigugma ug nagsulti sa kamatuoran. Panahon sa iyang ministeryo dinhi sa yuta, iyang gipaboran kadtong mga matinud-anon. Bahin kang Natanael, si Jesus miingon: “Tan-awa, tino nga usa ka Israelinhon, nga kaniya walay limbong.” (Juan 1:47) Human niana, si Natanael, nga lagmit gitawag usab ug Bartolome, gipili nga mahimong usa sa 12 ka apostoles. (Mateo 10:2-4) Pagkadakong kadungganan!
19-21. Sa unsang paagi ang kanhing buta nga lalaki gipanalanginan tungod sa iyang maisogong pagkamatinud-anon?
19 Ang tibuok kapitulo sa basahon sa Bibliya sa Juan nag-asoy bahin sa laing matinud-anong lalaki nga gipanalanginan ni Jesus. Wala kita mahibalo sa iyang ngalan. Ang atong nahibaloan mao nga ang maong tawo maoy usa ka makililimos nga buta sukad sa pagkatawo. Ang mga tawo nahibulong sa dihang gipasig-uli ni Jesus ang iyang panan-aw. Ang balita niining milagrosong pagkaayo nahibaloan sa pipila ka Pariseo, nga mga tigdumot sa kamatuoran, kinsa nagkauyonay nga si bisan kinsa nga magpasundayag ug pagtuo kang Jesus ipalagpot gikan sa sinagoga. Kay nahibalo sa ilang laraw, ang nahadlok nga mga ginikanan sa kanhing buta namakak sa mga Pariseo, nga nag-ingon nga wala sila mahibalo kon sa unsang paagi ang ilang anak nakakita na o kon kinsay nag-ayo kaniya.—Juan 9:1-23.
20 Ang naayo nga lalaki sa makausa pa gipatawag sa mga Pariseo. Wala manumbaling sa bisan unsang mga sangpotanan, siya maisogong misulti sa kamatuoran. Iyang gipatin-aw kon sa unsang paagi siya naayo ug nga si Jesus mao ang nagbuhat niana. Natingala nga kining inila ug edukado nga mga tawo wala motuo nga si Jesus gikan sa Diyos, ang tawo nga naayo maisogong nag-awhag kanila sa pagdawat sa dayag nga kamatuoran: “Kon kining tawhana dili gikan sa Diyos, siya wala gayoy arang mahimo.” Kay walay ikapangatarongan, ang mga Pariseo nag-akusar sa lalaki nga tampalasan ug gipapahawa siya.—Juan 9:24-34.
21 Sa dihang nabalitaan kini ni Jesus, mahigugmaon siyang naggahin ug panahon sa pagpangita niining tawhana. Sa dihang nakaplagan na niya siya, iyang gipalig-on ang pagtuo nga gipakita sa kanhing buta nga lalaki. Si Jesus dayag nga nagpaila sa iyang kaugalingon ingong ang Mesiyas. Gipanalanginan gayod ang maong lalaki tungod sa pagtug-an sa tinuod! Tino nga uyonan sa Diyos kadtong nagsulti sa kamatuoran.—Juan 9:35-37.
22. Nganong angay natong subayon ang dalan sa pagkamatinud-anon?
22 Ang pagtuman sa kamatuoran maoy buluhaton nga angay natong isipon nga seryoso. Hinungdanon kini sa pagpatungha ug pagmentinar ug maayong relasyon uban sa mga tawo ug sa Diyos. Ang pagkahimong matinud-anon nagpasabot nga mahimong madayganon, tinuod, daling duolon, ug kasaligan, ug tungod niini maangkon ang pag-uyon ni Jehova. (Salmo 15:1, 2) Ang pagkahimong dili-matinud-anon nagpasabot nga mahimong malimbongon, dili-kasaligan, ug bakakon, ug tungod niini maangkon ang dili-pag-uyon ni Jehova. (Proverbio 6:16-19) Busa, magmadeterminado sa pagsubay sa dalan sa pagkamatinud-anon. Sa pagkatinuod, aron masundog ang Diyos sa kamatuoran, kita kinahanglang mahibalo sa kamatuoran, mosulti sa kamatuoran, ug magkinabuhi sumala sa kamatuoran.
Unsaon Nimo Pagtubag?
• Nganong mapasalamaton kita sa pagkahibalo sa kamatuoran?
• Sa unsang paagi masundog nato si Jehova sa pagkahimong matinud-anon?
• Unsay mga benepisyo sa pagbutyag sa kamatuoran sa Bibliya ngadto sa uban?
• Nganong hinungdanon ang pagsubay sa dalan sa pagkamatinud-anon?
[Mga hulagway sa panid 17]
Kay gipiyalan sa kamatuoran sa Bibliya, ang mga Kristohanon masibotong nagpaambit niana sa uban
[Mga hulagway sa panid 18]
Ang lalaking buta nga giayo ni Jesus gipanalanginan pag-ayo tungod sa pagsulti sa kamatuoran