Si Jehova, ang Diyos sa Kamatuoran
“Gitubos mo ako, Oh Jehova nga Diyos sa kamatuoran.”—SALMO 31:5.
1. Unsay mga kahimtang sa langit ug sa yuta sa dihang walay kabakakan?
DIHAY panahon nga walay kabakakan. Ang nagpuyo sa dili-makitang kalangitan maoy hingpit nga espirituhanong mga linalang, nga nag-alagad sa ilang Maglalalang, ang “Diyos sa kamatuoran.” (Salmo 31:5) Walay kabakakan, walay panglimbong. Si Jehova nagsulti kon unsay matuod ngadto sa iyang espiritung mga anak. Gibuhat niya kana tungod kay siya nahigugma kanila ug tungod kay siya interesado kaayo sa ilang kaayohan. Ang kahimtang sa yuta susama niana. Gilalang ni Jehova ang unang lalaki ug babaye, ug pinaagi sa iyang tinudlong galamiton, siya kanunayng nakigsulti kanila sa klaro, prangka, ug matinud-anon nga paagi. Kahibulongan gayod unta kana!
2. Kinsay nagpaila sa kabakakan, ug ngano?
2 Apan, ngadtongadto usa ka espiritung anak sa Diyos maisogong naghimo sa iyang kaugalingon ingong karibal nga diyos, nga misupak kang Jehova. Kining espiritung linalang nga nailhan ingong Satanas nga Yawa, buot nga simbahon siya sa uban. Aron makab-ot ang iyang tumong, iyang gipaila ang kabakakan ingong paagi sa pagpailalom sa uban sa iyang pagkontrolar. Sa pagbuhat niana, siya nahimong ‘bakakon ug amahan sa bakak.’—Juan 8:44.
3. Unsay reaksiyon ni Adan ug Eva sa mga bakak ni Satanas, ug unsay mga epekto niini?
3 Pinaagi sa usa ka bitin, giingnan ni Satanas ang unang babaye, si Eva, nga kon dili siya mosugot sa sugo sa Diyos ug mokaon sa gidiling bunga, dili siya mamatay. Bakak kana. Giingnan pa niya siya nga pinaagi sa pagkaon siya mahisama sa Diyos, nga mahibalo kon unsay maayo ug daotan. Bakak usab kana. Bisan tuod si Eva wala pa bakaki sukad masukad, lagmit naila niya nga ang iyang nadungog gikan sa bitin dili uyon sa giingon sa Diyos sa iyang bana, si Adan. Bisan pa niana, mituo siya kang Satanas, dili kang Jehova. Kay bug-os nga nalimbongan, siya mikuha ug mikaon sa prutas. Sa ulahi, si Adan mikaon usab sa prutas. (Genesis 3:1-6) Sama kang Eva, si Adan wala pa gayod makadungog ug bakak, apan siya wala malimbongi. (1 Timoteo 2:14) Pinaagi sa iyang mga lihok, iyang gipakita nga iyang gisalikway ang iyang Magbubuhat. Malaglagon ang mga epekto niini ngadto sa katawhan. Tungod sa pagkadili-masinugtanon ni Adan, ang sala ug kamatayon—duyog sa kadunotan ug hilabihang kaalaotan—mikaylap ngadto sa tanan niyang kaliwat.—Roma 5:12.
4. (a) Unsa ang mga bakak nga gisulti didto sa Eden? (b) Unsay angay natong buhaton aron dili kita mapahisalaag ni Satanas?
4 Mikaylap usab ang kabakakan. Kinahanglang maila nato nga kadtong maong mga bakak nga gisulti didto sa Eden maoy mga pag-atake sa pagkamatinud-anon ni Jehova mismo. Si Satanas nag-angkon nga ang Diyos malimbongong naghikaw sa unang tawhanong magtiayon sa usa ka butang nga maayo. Siyempre, dili kana tinuod. Si Adan ug Eva wala makabenepisyo gikan sa ilang dili pagsugot. Sila nangamatay, sumala gayod sa giingon ni Jehova nga mahitabo kanila. Bisan pa niana, ang mapasipalahong pag-atake ni Satanas kang Jehova nagpadayon, sa gilapdon nga daghang siglo sa ulahi si apostol Juan giinspirar sa pagsulat nga si Satanas “nagpahisalaag sa tibuok gipuy-ang yuta.” (Pinadayag 12:9) Aron dili mapahisalaag ni Satanas nga Yawa, kita kinahanglang bug-os nga mosalig sa pagkamatinud-anon ni Jehova ug sa iyang Pulong. Sa unsang paagi imong maugmad ug mapalig-on ang imong pagsalig kang Jehova ug mapalig-on ang imong kaugalingon batok sa panglimbong ug kabakakan nga gipasiugda sa iyang Kaaway?
Si Jehova Nahibalo sa Kamatuoran
5, 6. (a) Unsa nga kahibalo ang nabatonan ni Jehova? (b) Unsay kalainan sa kahibalo nga nabatonan sa tawo ug nianang iya ni Jehova?
5 Ang Bibliya kanunayng nagpaila kang Jehova ingong ang usa nga “naglalang sa tanang butang.” (Efeso 3:9) Siya mao “ang Usa nga naghimo sa langit ug sa yuta ug sa dagat ug sa tanang butang diha niana.” (Buhat 4:24) Tungod kay si Jehova mao ang Maglalalang, siya nahibalo sa kamatuoran bahin sa tanan. Sa pag-ilustrar: Tagda ang usa ka tawo nga nagdisenyo ug dayon nangunay sa pagtukod sa iyang balay. Siya bug-os nga nahibalo sa mga detalye sa maong balay ug mas nakasabot niana kay ni bisan kinsang tumatan-aw. Ang mga tawo bug-os nga nahibalo bahin sa mga butang nga ilang gidisenyo ug gihimo. Sa susama, ang Maglalalang nahibalo sa tanang detalye bahin sa iyang gilalang.
6 Si manalagnang Isaias maanindot nga nagpahayag sa gilapdon sa kahibalo ni Jehova. Atong mabasa: “Kinsay nakasukod sa katubigan diha sa hakop lamang sa iyang kamot, ug nakakuha sa mga sukod sa kalangitan pinaagi lamang sa dangaw ug nagsulod sa abog sa yuta diha sa usa ka taksanan, o nagtimbang sa mga bukid pinaagig igtitimbang, ug sa mga bungtod diha sa timbangan? Kinsay nakakuha sa mga sukod sa espiritu ni Jehova, ug ingon nga iyang magtatambag kinsay makatudlo kaniya sa bisan unsa? Kinsay iyang gikonsulta aron siya makapasabot kaniya, o kinsay nagtudlo kaniya sa alagianan sa hustisya, o nagtudlo kaniyag kahibalo, o nagpaila kaniya sa mismong dalan sa tinuod nga pagsabot?” (Isaias 40:12-14) Sa pagkatinuod, si Jehova mao ang “Diyos sa kahibalo” ug maoy “hingpit sa kahibalo.” (1 Samuel 2:3; Job 36:4; 37:16) Pagkadiyutay sa atong kahibalo kon itandi sa iyang kahibalo! Bisan pa sa makapahinganghang kahibalo nga natigom sa katawhan, ang atong pagsabot sa materyal nga kalalangan dili makaabot bisan sa “kadaplinan lamang sa . . . mga dalan [sa Diyos].” Kini maoy sama ra sa “hunghong” kon itandi sa “gamhanan nga dalugdog.”—Job 26:14.
7. Unsay naamgohan ni David bahin sa kahibalo ni Jehova, ug busa unsay angay natong ilhon?
7 Tungod kay si Jehova maoy naglalang kanato, makataronganong manghinapos nga siya nakaila pag-ayo kanato. Naamgohan kini ni Haring David. Siya misulat: “Oh Jehova, ikaw nakasusi kanako, ug ikaw nakaila kanako. Ikaw nahibalo sa akong paglingkod ug sa akong pagtindog. Gitagad mo ang akong hunahuna gikan sa halayo. Ang akong pagpanaw ug ang akong paghigda imong nasusi, ug ikaw nasinati sa tanan kong mga dalan. Kay walay mausa ka pulong sa akong dila, apan, tan-awa! Oh Jehova, ikaw nahibalo na niining tanan.” (Salmo 139:1-4) Siyempre, si David nakaamgo nga ang mga tawo magpasundayag ug kagawasan sa pagpili—gihatagan kita sa Diyos ug kapasidad nga mosugot o kaha dili mosugot kaniya. (Deuteronomio 30:19, 20; Josue 24:15) Bisan pa niana, si Jehova mas nakaila kanato kay sa atong pagkaila sa atong kaugalingon. Gusto niya ang kinamaayohan alang kanato, ug makahimo siya sa pagtultol sa atong mga dalan. (Jeremias 10:23) Sa pagkatinuod, walay magtutudlo, ni eksperto, ni magtatambag nga mas nasangkapan sa pagtudlo kanato sa kamatuoran ug sa paghimo kanatong maalamon ug malipayon.
Si Jehova Matinud-anon
8. Sa unsang paagi nato nahibaloan nga si Jehova matinud-anon?
8 Ang pagkahibalo sa kamatuoran wala magpasabot nga ang usa kanunayng mosulti sa kamatuoran, o magmatinud-anon. Pananglitan, ang Yawa wala “mobarog nga lig-on diha sa kamatuoran.” (Juan 8:44) Sa kasukwahi, si Jehova “dagaya sa . . . kamatuoran.” (Exodo 34:6) Ang Kasulatan kanunayng nagpamatuod sa pagkamatinud-anon ni Jehova. Si apostol Pablo nag-ingon nga “dili gayod mahimo nga mamakak ang Diyos,” ug nga ang Diyos “dili makabakak.” (Hebreohanon 6:18; Tito 1:2) Ang pagkamatinud-anon maoy hinungdanong bahin sa personalidad sa Diyos. Kita mahimong mokompiyansa ug mosalig kang Jehova tungod kay siya matinud-anon; siya dili gayod maglimbong sa mga maunongon kaniya.
9. Sa unsang paagi ang ngalan ni Jehova nalangkit sa kamatuoran?
9 Ang ngalan mismo ni Jehova nagpamatuod sa iyang pagkamatinud-anon. Ang balaang ngalan nagkahulogang “Iyang Gipahinabo nga Mamao.” Kini nagpaila kang Jehova ingong ang usa nga padayong nahimo nga Magtutuman sa tanan nga iyang gisaad. Walay laing makahimo niana. Tungod kay si Jehova mao ang Supremong Usa, walay makababag sa katumanan sa iyang mga katuyoan. Dili lang kay si Jehova matinud-anon kondili siya lamang ang dunay gahom ug kaalam sa paghimo sa tanan nga iyang giingon nga matuman.
10. (a) Sa unsang paagi si Josue nakasaksi sa pagkamatinud-anon ni Jehova? (b) Unsang mga saad ni Jehova ang imong nakita nga natuman?
10 Si Josue maoy usa sa daghang nakasaksi sa kahibulongang mga hitabo nga nagpamatuod sa pagkamatinud-anon ni Jehova. Si Josue didto sa Ehipto sa dihang gipahamtang ni Jehova ang napulo ka hampak nganha sa maong nasod, nga nagtagna daan sa matag usa niana. Lakip sa ubang mga butang, naeksperyensiyahan ni Josue ang katumanan sa mga saad ni Jehova sa pagluwas sa mga Israelinhon gikan sa Ehipto ug pagdala kanila ngadto sa Yutang Saad, nga nagparot sa gamhanang kasundalohan nga Canaanhon nga misupak kanila. Sa ulahing bahin sa iyang kinabuhi, giingnan ni Josue ang mga tigulang nga lalaki sa nasod sa Israel: “Kamo nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo. Walay usa ka pulong kanila nga napakyas.” (Josue 23:14) Bisan tuod wala nimo masaksihi ang mga milagro nga nasaksihan ni Josue, naeksperyensiyahan ba nimo ang pagkamatinud-anon sa mga saad sa Diyos sulod sa tibuok nimong kinabuhi?
Si Jehova Nagpadayag sa Kamatuoran
11. Unsay nagpakita nga buot ni Jehova nga isulti ang kamatuoran ngadto sa katawhan?
11 Handurawa ang usa ka ginikanan nga dunay daghang nahibaloan apan panagsa rang mosulti sa iyang mga anak. Dili ka ba mapasalamaton nga si Jehova dili ingon niana? Si Jehova mahigugmaong nakigsulti sa katawhan, ug kanunay niyang gibuhat kana. Ang Kasulatan nagtawag kaniya nga “Dakong Instruktor.” (Isaias 30:20) Sa iyang mahigugmaong-kalulot, siya nakigsulti bisan niadtong dili gustong mamati kaniya. Pananglitan, si Ezequiel gitudlo sa pagsangyaw niadtong kinsa nahibaloan ni Jehova nga dili mamati. Si Jehova miingon: “Anak sa tawo, lakaw, sulod sa taliwala sa balay sa Israel, ug isulti ang akong mga pulong ngadto kanila.” Dayon nagpasidaan siya: “Dili sila buot mamati kanimo, kay sila dili buot mamati kanako; tungod kay silang tanan sa balay sa Israel mga gahig ulo ug tig-ag kasingkasing.” Malisod kadto nga asaynment, apan matinumanon kadtong gibuhat ni Ezequiel, ug sa pagbuhat niana, iyang gisumbalik-silaw ang pagkamabination ni Jehova. Kon malisod ang teritoryo nga gitudlo kanimo nga sangyawan ug ikaw nagasalig sa Diyos, makaseguro ka nga siya magpalig-on kanimo sama sa gibuhat niya sa iyang manalagnang si Ezequiel.—Ezequiel 3:4, 7-9.
12, 13. Sa unsang mga paagi nga ang Diyos nakigsulti sa mga tawo?
12 Si Jehova nagtinguha nga “ang tanang matang sa mga tawo mangaluwas . . . ug makadangat sa tukmang kahibalo sa kamatuoran.” (1 Timoteo 2:4) Siya nagsulti pinaagi sa mga manalagna, manulonda, ug bisan pinaagi sa iyang pinalanggang Anak, si Jesu-Kristo. (Hebreohanon 1:1, 2; 2:2) Ngadto kang Pilato, si Jesus miingon: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran. Ang matag usa nga dapig sa kamatuoran mamati sa akong tingog.” Si Pilato may bililhong kahigayonan nga direktang makakat-on sa kamatuoran bahin sa tagana ni Jehova alang sa kaluwasan gikan sa Anak sa Diyos. Apan, si Pilato wala modapig sa kamatuoran, ug dili niya gustong mokat-on kang Jesus. Hinunoa, si Pilato makantalitahong mitubag: “Unsa bay kamatuoran?” (Juan 18:37, 38) Makapasubo gayod ang iyang gibuhat! Bisan pa niana, daghan ang namati sa kamatuoran nga gimantala ni Jesus. Ngadto sa iyang mga tinun-an siya miingon: “Malipayon ang inyong mga mata tungod kay makakita man kini, ug ang inyong mga dalunggan tungod kay makabati man kini.”—Mateo 13:16.
13 Gitipigan ni Jehova ang kamatuoran pinaagi sa Bibliya ug gihimo niya kining mabatonan sa mga tawo bisan asa. Ang Bibliya matinud-anong nagpadayag sa mga butang. Kini naghubit sa mga hiyas, katuyoan, ug mga sugo sa Diyos, maingon man sa tinuod nga kahimtang sa mga kahikayan sa katawhan. Si Jesus miingon diha sa pag-ampo ngadto kang Jehova: “Ang imong pulong maoy kamatuoran.” (Juan 17:17) Tungod niini, ang Bibliya maoy usa ka talagsaong libro. Kini lamang ang gisulat ilalom sa pag-inspirar sa Diyos kinsa nahibalo sa tanang butang. (2 Timoteo 3:16) Kini maoy usa ka bililhong gasa ngadto sa katawhan, usa nga gipabilhan sa mga alagad sa Diyos. Maalamon nga basahon nato kini adlaw-adlaw.
Hawiri Pag-ayo ang Kamatuoran
14. Unsa ang pipila ka butang nga giingon ni Jehova nga iyang buhaton, ug nganong angay kitang motuo kaniya?
14 Kinahanglang isipon natong seryoso ang gisulti ni Jehova diha sa iyang Pulong. Siya mao ang giingon niya kon kinsa siya, ug buhaton niya ang iyang gisulti nga iyang buhaton. Duna gayod kitay katarongan nga mosalig sa Diyos. Makatuo kita sa dihang si Jehova nag-ingon nga siya “manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.” (2 Tesalonica 1:8) Makatuo usab kita kang Jehova sa dihang siya nag-ingon nga siya nahigugma niadtong nagsubay sa pagkamatarong, sa dihang siya nag-ingon nga siya magahatag ug walay-kataposang kinabuhi ngadto niadtong nagpasundayag ug pagtuo, ug sa dihang siya nag-ingon nga iyang wagtangon ang kasakit, pagminatay, ug bisan ang kamatayon. Gipasiugda ni Jehova ang pagkakasaligan niining ulahing saad pinaagi sa paghatag niining maong instruksiyon ngadto kang apostol Juan: “Isulat kini, tungod kay kining mga pulonga kasaligan ug matuod.”—Pinadayag 21:4, 5; Proverbio 15:9; Juan 3:36.
15. Unsa ang pipila ka bakak nga gipasiugda ni Satanas?
15 Si Satanas mao ang eksaktong kaatbang ni Jehova. Imbes maglamdag sa mga tawo, siya nagalimbong. Aron makab-ot ang iyang tumong sa pagpatalikod sa mga tawo gikan sa putling pagsimba, si Satanas nagpasiugda ug daghang bakak. Pananglitan, patuohon kita ni Satanas nga wala makita sa Diyos ang panginahanglan nga makigsuod kanato ug nga wala siya magtagad sa mga pag-antos dinhi sa yuta. Apan, gipakita sa Bibliya nga si Jehova nagtagad gayod sa iyang mga linalang ug nasubo sa pagkadaotan ug pag-antos. (Buhat 17:24-30) Gusto usab nga patuohon ni Satanas ang mga tawo nga ang pagtinguha sa espirituwal nga mga butang walay kapuslanan. Sa kaatbang, ang Kasulatan nagpasalig kanato nga “ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” Dugang pa, kini klarong nag-ingon nga “siya maoy tigganti sa mga matinuorong nagapangita kaniya.”—Hebreohanon 6:10; 11:6.
16. Nganong ang mga Kristohanon kinahanglan nga magpabiling magbantay ug mohawid pag-ayo sa kamatuoran?
16 Mahitungod kang Satanas, si apostol Pablo misulat: “Ang diyos niini nga sistema sa mga butang nagbuta sa mga hunahuna sa mga dili-magtutuo, aron nga ang kahayag sa mahimayaong maayong balita bahin kang Kristo, nga mao ang larawan sa Diyos, dili makadan-ag.” (2 Corinto 4:4) Sama kang Eva, ang uban bug-os nga nalimbongan ni Satanas nga Yawa. Ang uban misunod sa dalan ni Adan, kinsa wala malimbongi kondili tinuyo nga mipili sa pagsubay sa dalan sa pagkadili-masinugtanon. (Judas 5, 11) Busa, hinungdanon nga ang mga Kristohanon magpabiling magbantay ug mohawid pag-ayo sa kamatuoran.
Si Jehova Nagkinahanglan ug “Pagtuo nga Walay Pagkasalingkapaw”
17. Unsay angay natong buhaton aron mabatonan ang pag-uyon ni Jehova?
17 Tungod kay siya matinud-anon sa tanan niyang mga dalan, si Jehova nagdahom nga kadtong mosimba kaniya magmatinud-anon usab. Ang salmista misulat: “Oh Jehova, kinsa man ang mahimong dinapit sa imong tolda? Kinsa man ang mopuyo sa imong bukid nga balaan? Siya nga nagalakaw nga walay-ikasaway ug nagabuhat sa pagkamatarong ug nagasulti sa kamatuoran diha sa iyang kasingkasing.” (Salmo 15:1, 2) Ngadto sa mga Hudiyo nga nag-awit nianang mga pulonga, ang paghisgot sa balaang bukid ni Jehova sa walay duhaduha nagpahinumdom kanila sa Bukid sa Zion, diin gidala ni Haring David ang arka sa pakigsaad ngadto sa tolda nga iyang gipatindog didto. (2 Samuel 6:12, 17) Ang bukid ug ang tolda nagpahinumdom kanila sa dapit diin si Jehova nagpuyo sa simbolikong paagi. Didto ang mga tawo makaduol sa Diyos aron mangayo sa iyang pag-uyon.
18. (a) Unsay gikinahanglan sa pagpakighigala sa Diyos? (b) Unsay hisgotan sa sunod nga artikulo?
18 Si bisan kinsa nga gustong makighigala kang Jehova kinahanglang mosulti sa kamatuoran “diha sa iyang kasingkasing,” dili lamang pinaagi sa iyang mga ngabil. Ang matuod nga mga higala sa Diyos kinahanglang matinud-anon ug kasingkasing ug kinahanglang maghatag ug pamatuod sa “pagtuo nga walay pagkasalingkapaw,” tungod kay ang mga buhat sa pagkamatinud-anon naggikan sa kasingkasing. (1 Timoteo 1:5; Mateo 12:34, 35) Ang usa ka higala sa Diyos dili malansison o malimbongon, kay “ang tawo nga . . . limbongan ginadumtan ni Jehova.” (Salmo 5:6) Ang mga Saksi ni Jehova sa tibuok yuta nanglimbasog nga magmatinud-anon agig pagsundog sa ilang Diyos. Ang sunod nga artikulo magsusi niining maong ulohan.
Unsaon Nimo Pagtubag?
• Nganong nahibalo si Jehova sa kamatuoran bahin sa tanang butang?
• Unsay nagpakita nga si Jehova matinud-anon?
• Sa unsang paagi gipadayag ni Jehova ang kamatuoran?
• Mahitungod sa kamatuoran, unsay gikinahanglan kanato?
[Mga hulagway sa panid 10]
Ang Diyos sa kamatuoran nahibalo sa tanang detalye bahin sa iyang gilalang
[Mga hulagway sa panid 12, 13]
Ang mga saad ni Jehova matuman