Pagsimba sa Diyos Pinaagi sa Kamatuoran

Aron ang pagsimba dalawaton sa Diyos, kini kinahanglang gipasukad sa kamatuoran. (Juan 4:23) Ang Bibliya nagpaila sa tinuod nga mga magsisimba ingong sakop sa “kongregasyon sa buhing Diyos, usa ka haligi ug tukod sa kamatuoran.” (1 Timoteo 3:15) Silang naglangkob sa kongregasyon sa Diyos dili lamang nagtuo sa kamatuoran sa Pulong sa Diyos kondili nagkinabuhi usab uyon niana ug naglaban niana, nga nagpahibalo niana sa tibuok yuta.​—Mateo 24:​14; Roma 10:​9-​15.

ANG mga Saksi ni Jehova ilado sa ilang edukasyonal nga buluhaton sa Bibliya, nga karon ginahimo sa kapin sa 200 ka kayutaan. Nagtuon sila sa Bibliya ug nagtudlo niana ingong kamatuoran, nga wala sambogi sa makapahuyang nga impluwensiya sa tawhanong mga pilosopiya. Sinati ka ba sa ilang gipasukad sa Bibliyang mga pagtulon-an? Daghan ang nagpanuko sa pagpaminaw sa mga Saksi ni Jehova tungod sa di-maayong impormasyon nga gipakaylap batok kanila. Apan ang matinud-anog-kasingkasing nga mga tawo gidapit nga sila mismo ang maghukom kon kaha ang gisangyaw sa mga Saksi maoy kamatuoran o dili. Ang maong hinungdanong desisyon kinahanglang dili ipasukad sa hulungihong. Daghan nga naghimo mismo ug personal nga panukiduki sa mga pagtulon-an sa mga Saksi ni Jehova nabenepisyohag dako.

Kahibalo sa Kamatuoran Makahanaw sa Kahadlok

Tagda, pananglitan, ang kaso ni Eugenia. Gimatuto siya diha sa estrikto Katolikong panimalay. Usa ang iyang amahan sa mga tig-organisar sa duaw sa papa sa Mexico niadtong 1979. Samtang nagaduaw sa mga higala, nahimamat ni Eugenia ang mga Saksi ni Jehova. Sa ilang tabang siya misugod sa pag-analisar nga maampingon kon unsay ginaingon sa Bibliya. Siya nahinumdom: “Sa sinugdan, misanap ang kahadlok. Nakaplagan ko ang kamatuoran! Apan kini nagpasabot nga sayop ang kadaghanan sa akong mga gituohan kanhi. Ang akong pamilya, ang akong mga higala, ang mga tawo nga akong gihigugma​—silang tanan sayop. Gikulbaan ko. Nagsige kog sukna sa akong kaugalingon kon unsa kahay mahimong reaksiyon sa akong pamilya bahin sa akong bag-ong nakaplagan. Samtang milabay ang panahon ug sa tabang ni Jehova, ako misugod sa pagpasibo niining makuyaw nga kasinatian. Usa ka adlaw ako nakahukom nga mosugilon ngadto sa usa ka higala sa pamilya, usa ka propesor sa teolohiya. Ako siyang giingnan bahin sa akong tinguha sa pagpangita sa kamatuoran. Dayon siya miingon, ‘Kon buot kang mahibalo sa kamatuoran, pangitaa ang mga Saksi ni Jehova.’”

Sumala sa gikahadlokan ni Eugenia, ang iyang pamilya nagpalayas kaniya sa balay. Apan, ang mga Saksi nagpadayon sa paghatag kaniyag espirituwal nga tabang. Siya mikomento: “Nalig-on ako sa pagbarog dapig sa kamatuoran. Akong naamgohan nga takos kining ipakig-away. Ang pag-abiabi nga akong nadawat gikan sa mga Saksi ni Jehova hinungdanon kaayo. Ako mibating gihigugma sulod sa Kristohanong kongregasyon. Ang pagpakigsuod sa organisasyon sa Diyos nakatabang kanako sa pagbuntog sa kahadlok sa pagbarog nga mag-inusara.”

Tagda ang laing pananglitan. Si Sabrina nagdako nga naanad sa paghimog regular nga mga panaghisgot sa pamilya bahin sa Bibliya. Sa pagkatinuod, ilang naugmad ang porma sa ‘relihiyon sa pamilya.’ Gihimo niyang batasan nga makig-uban sa mga membro sa nagkadaiyang mga relihiyon aron iyagyag ang ilang mga sayop. Sa dihang usa sa mga Saksi ni Jehova mitanyag kaniyag pagtuon sa Bibliya, iya dayong gidawat sa tuyo nga ipanghimakak ang ilang mga tinuohan. Siya miingon: “Human sa pagtuon sa kapin sa usa ka tuig, nahadlok ako nga mawad-an sa ‘akong kamatuoran.’ Nakita kong sayon ra ang pagyagyag sa panglimbong sa daghang relihiyon nga ako nalangkit, apan lisod na kana karon.”

Ang kahadlok ni Sabrina maoy nagpahunong sa iyang pagtuon sa Bibliya uban sa mga Saksi ni Jehova. Apan dayon iyang gibati ang espirituwal nga kahaw-ang. Mihukom siya nga sugdan na usab ang pagtuon ug ngadtongadto midawat niining bag-ong nakaplagang kamatuoran. Miuswag si Sabrina ngadto sa punto nga buot na niyang ipaambit ngadto sa uban ang iyang nakat-onan. Mihangyo pa gani siya sa pagkuyog sa mga Saksi sa ilang balay-balay nga ministeryo. Si Sabrina misaysay: “Una pa maaprobahi sa pagsangyaw uban sa mga Saksi ni Jehova, ako gisukna: ‘Buot ka ba gayod nga mahimong usa sa mga Saksi ni Jehova?’ ‘Dili!’ ako mitubag. Gisanapan na usab ako sa kahadlok.” Sa kataposan, human sa pagpadayon sa pagtambong sa tanang tigom ug pagpaniid sa katawhan sa Diyos ug kon giunsa nila pagpadapat ang mga prinsipyo sa Bibliya, si Sabrina nakahinapos nga mao gayod kadto ang kamatuoran. Nabawtismohan siya ug karon maoy usa ka bug-os panahong tig-ebanghelyo.

Nganong Lahi Kaayo?

Ang uban tingali mangutana, ‘Nganong ang mga pagtulon-an sa mga Saksi ni Jehova lahi kaayo sa ubang mga relihiyon?’ Ang daklit nga pagsusi kon unsay gituohan sa mga Saksi motabang kanimo sa pagsabot nga sila maoy sinserong mga Kristohanon, matinud-anong mga estudyante sa Bibliya. Amo kang dasigon sa pagsusi sa imong Bibliya mismo sa mga teksto diha sa sumarya sa ilang paninugdang mga pagtulon-an nga gipakita sa ibabaw.

Pinaagi sa pagsusi pag-ayo kon unsay gituohan sa mga Saksi ni Jehova ug kon giunsa nila pagsunod ang mga ginatudlo sa Bibliya, ikaw mapanalanginan sa kagawasan nga itagana sa kamatuoran. (Juan 17:17) Walay katarongan nga mahadlok sa kamatuoran. Hinumdomi ang saad ni Jesus: “Inyong mahibaloan ang kamatuoran, ug ang kamatuoran magpagawas kaninyo.”​—Juan 8:32.

[Kahon sa panid 6]

PIPILA SA PANINUGDANG MGA PAGTULON-AN SA MGA SAKSI NI JEHOVA

◯ Si Jehova mao ang labing gamhanang Diyos. Ang iyang personal nga ngalan makita sa kapin sa 7,000 ka higayon diha sa labing karaang mga manuskrito sa Bibliya.​—Salmo 83:18.

◯ Si Jesu-Kristo maoy Anak sa Diyos, nga mianhi sa yuta aron ihatag ang iyang kinabuhi alang sa katawhan. (Juan 3:​16, 17) Gisunod sa mga Saksi ni Jehova ang mga pagtulon-an ni Jesu-Kristo sumala sa makita diha sa Ebanghelyo.

◯ Ang ngalang mga Saksi ni Jehova gipasukad sa Isaias 43:​10, nga nag-ingon: “‘Kamo mao ang akong mga saksi,’ nagaingon si Jehova.” ◯ Ang Gingharian nga giampo sa mga tawo diha sa pag-ampo nga “Amahan Namo” maoy usa ka langitnong kagamhanan nga sa di madugay maghanaw sa tanang pag-antos ug kasakit sa kalibotan aron hatagag luna ang Paraiso nga gisaad sa Bibliya.​—Isaias 9:​6, 7; Daniel 2:​44; Mateo 6:​9, 10; Pinadayag 21:​3, 4.

◯ Ang matag usa nga mobuhat sa kabubut-on sa Diyos adunay kahigayonan sa pagtagamtam sa mga panalangin sa Gingharian sa walay kataposan.​—Juan 17:​3; 1 Juan 2:17.

◯ Kinahanglang umolon sa mga Kristohanon ang ilang panggawi sa kon unsay ginaingon sa Bibliya. Kinahanglang maningkamot silang magmatinud-anon, magkinabuhig hinlo, moral nga kinabuhi, ug magpakitag gugma sa ilang mga silingan.​—Mateo 22:​39; Juan 13:​35; 1 Corinto 6:​9, 10.

[Hulagway sa panid 5]

Gipahibalo sa mga Saksi ni Jehova ang kamatuoran sa Bibliya ngadto sa mga tawo sa kapin sa 200 ka kayutaan