Mga Batan-on nga ‘Nagasalig Kang Jehova’
ANG katahom dili lang iya sa mga batan-on, ni ang kaalam iya lamang sa mga tigulang. (Itandi ang Proverbio 11:22; Ecclesiastes 10:1.) Hinunoa, kadtong naghupot ug walay kataposang katahom ug tinuod nga kaalam mao kadtong nagasalig kang Jehova ug bug-os kasingkasing nga nag-ingon bahin kaniya: “Ikaw mao ang akong Diyos.”—Salmo 31:14; Proverbio 9:10; 16:31.
Sa tibuok kalibotan adunay nagatubo nga gidaghanon sa matahom nga mga tawo, bata ug tigulang, kinsa nagpakita sa ilang kaalam pinaagi sa pag-alagad sa Diyos ug sa pagsangyaw sa maayong balita sa Gingharian sa Diyos. Pananglitan, tagda ang otso-anyos nga si Sabrina.
Si Sabrina nagpuyo sa Alemanya ug anaa sa segundo grado. Siya maoy unang Saksi ni Jehova nga mieskuyla sa iyang tunghaan. Ikasubo, siya maoy tumong sa mga insulto sa iyang mga eskolmet hangtod sa adlaw nga ang magtutudlo naghangyo sa mga estudyante sa pagdala sa ilang paboritong libro sa klase. Si Sabrina mihukom sa pagdala sa Akong Basahon sa mga Estorya sa Bibliya. Sa gabii una niana, bisan kon nahadlok, nangandam siya pag-ayo alang sa klase. Sanglit dihay 26 ka estudyante sa iyang klase, siya nasayod nga lagmit kulangon siya sa panahon. Apan determinado siyang dili tugtan si bisan kinsa nga mobalda sa iyang pasundayag ug nakaseguro nga si Jehova motabang kaniya. Sa tinudlong adlaw, ang magtutudlo nangutana kon kinsay nagdala ug libro ug buot nga mouna sa pagpakita niana. Katingad-an, si Sabrina lamang ang nagdala. Mibarog siya atubangan sa klase ug misugod pagsulti, mibasa ug mipakita sa mga hulagway gikan sa libro ug misaysay nga ang tanan gipasikad sa Bibliya. Sa pagtapos siya nangutana: “Kinsay interesadong makabaton niining libroha?” Mihatag siyag usa ka kopya sa magtutudlo, ug sa misunod nga pipila ka adlaw, mihatag siyag dugang napulo ka libro sa pipila niya ka klasmet. Ang komento lamang sa magtutudlo sa iyang pasundayag mao: “Wala pa akoy nakita nga sama niana.” Gihatagan niyag grado nga A si Sabrina tungod sa iyang pasundayag.
Sa pagkatinuod, daghang batan-ong Saksi ang malipayong mga magmamantala sa maayong balita sa tunghaan. Laing panig-ingnan mao si Erika, usa ka 11-anyos nga magmamantala sa Mehiko. Ginatudloan siya sukad pa sa pagkamasuso sa paghigugma kang Jehova. Talagsaon ang iyang mga buluhaton sa tunghaan. Usa sa iyang mga asaynment mao ang pag-andam ug materyal bahin sa AIDS ug pagkagiyan sa tabako ug alkoholikong ilimnon. Nangandam siyag maayo, ginamit ang magasing Pagmata!, ug nakadawat sa kinatas-ang grado. Ang iyang magtutudlo nangutana kon diin niya makuha ang impormasyon ug gihatagan sa mga magasin nga naundan sa mga artikulo mahitungod niadtong mga ulohana. Sa ulahi, ang magtutudlo naggamit niining magasina sa paghisgot sa mga ulohan uban sa tibuok klase. Tungod sa kagawian ni Erika, sa iyang pagtahod sa iyang mga magtutudlo, ug sa iyang tag-as nga mga grado, siya nahimong takos sa mga gasa, mga diploma, ug dili-bug-os nga mga eskolarsyip. Bisan pa niana, gibati niya nga ang iyang kinadak-ang kalamposan mao nga siya nakapaila sa iyang kaugalingon ingong usa sa mga Saksi ni Jehova, nakapahimutang ug mga literatura sa Bibliya, ug nakabayaw sa ngalan sa Diyos.
Unya anaa si Shannon, usa ka diyes-anyos nga batang lalaki nga nagpuyo sa New Zealand. Usa lang ka mata niya ang makakita; ang laing mata nadaot sa kanser sa dihang masuso pa siya. Sa dihang si Shannon nag-edad ug siyete, ang iyang inahan misugod pagtuon sa Bibliya uban sa mga Saksi ni Jehova. Ugaling, wala madugay human siya mosugod sa iyang mga pagtuon sa Bibliya, siya nakigpuyo sa usa ka lalaki ug mihukom sa paghunong sa iyang pagtuon. Si Shannon mihangyo nga magpadayon ang iyang pagtuon sa Bibliya. Gitugot ang iyang hangyo. Ang mga Saksi padayong nagduaw, ug ngadtongadto ang tulo ka membro sa panimalay nagtuon sa Bibliya ug miuswag sa espirituwal. Human malegal ang ilang kaminyoon, ang inahan ug amaama ni Shannon nabawtismohan.
Usa ka adlaw si Shannon ug ang asawa sa magtatan-aw sa sirkito nagkauban sa pagsangyaw. Usa ka tagbalay nangutana kang Shannon: “Unsay nahitabo sa imong mata?” “Gikanser kini ug kinahanglang kuhaon,” siya mitubag. “Sa dili madugay si Jehova magahatag kanako ug bag-ong mata sa Paraiso, ug ania kami aron among isulti ang bahin niana kanimo.”