Mga Magmamantala sa Gingharian Nagtaho

Ayaw Pagpanuko sa Pagmantala sa Maayong Balita

SA DIHANG ang Uropanhong mga manunuhid miduaw sa unang higayon sa Gulpo sa Venezuela ug Lake Maracaibo, ang baybayon napuno sa pinawrang mga payag nga natukod sa mga tukon diha sa mabawng katubigan. Ang talan-awon nagpahinumdom sa Venice, Italya, diin gitukod sa mga tawo ang ilang mga balay ubay sa daplin sa katubigan. Busa ang nagsultig-Kinatsilang mga manunuhid nagngalan sa dapit nga Venezuela, nga nagkahulogang “Gamayng Venice.”

Karong adlawa, kining matahom nga nasod maoy dapit sa laing matang nga programa sa pagpanukod, usa ka espirituwal nga pagpanukod. Didto ang mga Saksi ni Jehova puliki sa pagpamugas ug binhi sa Gingharian sa matag tukmang okasyon. Ang miresultang espirituwal nga ani nagdalag dakong pagdayeg ngadto sa “Agalon sa pag-ani,” si Jehova nga Diyos.​—Mateo 9:​37, 38.

Sa dihang ang nagapanawng magtatan-aw miduaw sa usa ka kongregasyon sa estado sa Zulia sa amihanan-kasadpang Venezuela, ang lokal nga mga Saksi naghikay alang kaniya ug sa iyang asawa nga moduaw sa usa ka gamayng isla sa duol nga gitawag ug Toas. Samtang nanggilinya aron makasakay sa lansa sa sayo sa buntag padulong sa isla, ang asawa sa nagapanawng magtatan-aw, si Mery, misugyot sa iyang kauban, usa ka bug-os panahong payunir nga sister, nga makigsulti sila sa pipila ka trabahante diha sa sakayan. Miuyon ang payunir nga sister.

Miduol sa usa ka teknisyan, gitanyag ni Mery ang librong Kahibalo nga Motultol sa Kinabuhing Walay Kataposan. Iyang gipakita kaniya ang kapitulo nga “Pagtukod ug Usa ka Pamilya nga Nagapasidungog sa Diyos,” nga maorag iyang naangayan. Dayon gisaysay ni Mery nga sa paggamit niining publikasyona, mahimo siyang magtuon sa Bibliya sa iyang balay mismo. Gidawat niya ang libro, ug ang mga kahikayan gihimo nga may usang moduaw kaniya sa iyang balay.

Wala madugay sa ulahi, dihay espesyal nga usa ka adlaw nga asembliya sa maong dapit. Dakong katingala ni Mery sa pagkakita sa teknisyan, si Senor Nava, nga mitambong, uban sa iyang asawa ug duha ka batan-ong mga anak nga babaye! Gisukna ni Mery ang asawa kon unsay iyang hunahuna bahin sa ilang pagtuon sa Bibliya sa pamilya. Ang iyang tubag makapahingangha kaayo.

“Nagpasalamat ako kang Jehova nga among nakat-onan ang kamatuoran,” siya miingon. Dayon siya misaysay. “Niadtong nakigsulti ka sa akong bana, mao pay iyang pagbiya nako kuyog sa laing babaye. Palainom usab siya kaayo. Usahay kon siya mahubog, siya abusado, nga wala kaangayi sa gamayng komunidad sa isla. Naghimo usab siyag espiritismo. Apan, ang kahibalo sa Bibliya nga iyang nabatonan gikan sa pagtuon nagtabang kaniya sa paghimog dagkong kausaban sa iyang kinabuhi. Gibiyaan niya ang tanan niyang di-hinlong mga kalihokan. Ang iyang Katolikong mga ginikanan nakadayeg pag-ayo niini nga mga kausaban. Nalipay sila nga siya karon usa na ka responsableng bana ug amahan.”

Si Senor Nava nabawtismohan sa 1996 ug sa pagkakaron nag-alagad ingong bug-os panahong ministro. Ang iyang asawa, si Jenny, nabawtismohan sa 1997. Ang mayor sa lungsod nakadayeg pag-ayo sa mga kausaban niining mekaniko sa lansa nga siya usab mihangyo sa pagtuon sa Bibliya. Pagkamalipayon sa mga sister nga wala sila magpanuko sa pagmantala sa maayong balita samtang nanggilinya nga naghulat ug lansa sa maong buntag!

[Mga hulagway sa panid 7]

Ang pagpaambit sa maayong balita ngadto sa usa ka teknisyan sa lansa nagdalag malipayong mga resulta