Nangitag Paraiso

SUMALA SA GIASOY NI PASCAL STISI

Lalom na kaayo ang kagabhion, ug ang kadalanan sa lungsod sa Béziers, sa habagatang Pransiya, walay tawo. Sa pagkakita sa bag-ong napintalang bungbong sa usa ka tindahan sa relihiyosong mga basahon, ang akong higala ug ako nagsulat diha niana ug dagkong itom nga mga letra sa mga pulong sa Alemang pilosopo nga si Nietzsche: ‘Patay ang mga diyos. Hinaot nga molugway ang kinabuhi sa superyor nga tawo!’ Apan, unsa may nag-agak kanako nga maingon niini?

NATAWO ako sa Pransiya niadtong 1951 diha sa usa ka Katolikong pamilya nga may Italyanong kagikan. Niadtong bata pa ako, mobakasyon kami sa habagatan sa Italya. Didto, ang matag balangay may imahen niini sa Birheng Maria. Nga naglakaw uban sa akong apohang lalaki, gisunod ko kining dagkong gibestihang mga estatwa diha sa taas kaayong mga prosesyon latas sa kabukiran​—apan bug-os nga walay pagtuo. Akong natapos ang akong paninugdang edukasyon sa usa ka relihiyosong eskuylahan nga gipalakaw sa mga Heswita. Bisan pa niana, wala ako mahinumdom nga nakadungog ug bisan unsa nga nakapalig-on gayod sa akong pagtuo sa Diyos.

Panahon kadto nga ako nagpalista sa usa ka unibersidad sa Montpellier aron magtuon ug medisina nga ako misugod sa pagpalandong sa katuyoan sa kinabuhi. Ang akong amahan nasamdan panahon sa gubat ug kanunay lang nga may mga doktor sa kiliran sa iyang higdaanan. Dili ba mas maayo nga taposon ang gubat imbes nga maggugol ug daghan kaayong panahon ug paningkamot nga ayohon ang mga tawo gumikan sa mga kadaot niini? Bisan pa niana, ang Gubat sa Vietnam kusog nga nagpadayon. Alang kanako ang bugtong lohikal nga paagi sa pagtambal sa kanser sa baga, pananglitan, mao ang pagwagtang sa pangunang hinungdan niini​—ang tabako. Ug komosta na man ang mga sakit nga miresulta gumikan sa kakulag-pagkaon diha sa nagakaugmad nga kanasoran ug kadtong miresulta gumikan sa sobrang pagkaon diha sa adunahan nga kayutaan? Dili ba mas maayo nga wagtangon ang mga hinungdan imbes nga maningkamot sa pagsulbad sa makapaguol nga mga sangpotanan? Ngano mang adunay hilabihang pag-antos sa yuta? Akong gibati nga may usa ka butang nga sayop kaayo niining mahikogong katilingban, ug akong giisip ang mga kagamhanan nga maoy mabasol.

Ang akong paboritong libro maoy sinulat sa usa ka anarkista, ug akong kopyahon gikan niini ang mga tudling-pulong diha sa mga bungbong. Sa anam-anam, ako usab nahimong anarkista, walay pagtuo o moral nga mga balaod, nga dili gustog Diyos o agalon. Alang kanako, ang Diyos ug relihiyon maoy mga tinumotumo sa mga dato ug gamhanan aron ilang magamhan ug mapahimuslan ang uban kanato. ‘Paghago alang kanamo dinhi sa yuta, ug dako ang inyong ganti sa paraiso sa langit,’ daw mao ang ilang gisulti. Apan natapos na ang awtoridad sa mga diyos. Kinahanglang sultihan ang mga tawo. Ang pagsulatsulat ug mga eslogan mao ang usa ka paagi sa pagsulti kanila.

Ingong resulta, ang akong pagtuon gibutang na lamang sa ikaduhang dapit. Sa kasamtangan nagpalista ako aron magtuon sa geograpiya ug ekolohiya sa laing unibersidad sa Montpellier diin ang usa ka kahimtang sa pag-alsa maoy nangibabaw. Sa akong dugang nga pagtuon sa ekolohiya, labaw akong gingil-aran nga makita ang paghugaw sa atong matahom nga planeta.

Kada tuig panahon sa bakasyon sa ting-init, ako magsakayg-libre, nga nagkobre ug linibo ka kilometro sa tibuok Uropa. Samtang nagbiyahe ug nakig-estorya sa ginatos ka drayber, nakita sa akong kaugalingong mga mata ang pagkadaotan ug pagkadunot nga naghampak sa tawhanong katilingban. Kas-a, samtang nangita sa paraiso, nakaadto ako sa nindot kaayong mga baybayon diha sa matahom nga isla sa Creta ug nakita kini nga puno sa aseite. Nasubo ako pag-ayo. Aduna pa bay nabilin nga bahin sa paraiso sa bisan haing dapit sa kalibotan?

Balik sa Panguma

Sa Pransiya ang mga ekolohista nagpasiugda sa pagbalik sa panguma ingong solusyon sa mga kalisdanan sa katilingban. Gusto ko nga magtrabaho ginamit ang akong mga kamot. Busa mipalit akog karaang balay nga ginama sa bato diha sa usa ka gamayng balangay sa mga bungtod sa Kabukiran sa Cévennes sa habagatang Pransiya. Diha sa pultahan, akong gisulatan ug “Paraiso Karon,” ang eslogan sa Amerikanong mga hippie. Usa ka batan-on nga Alemang dalaga nga miagi sa among lugar nahimong akong puyopuyo. Dili gayod ako mosugot nga magpakasal sa mayor, usa ka hawas sa kagamhanan. Ug ang pagpakasal sa simbahan? Dili gayod!

Kasagaran, molakaw kaming magtiniil, ug taas ang akong buhok ug kalkag ang bungot. Ang pagpananom ug mga prutas ug mga utanon nakalingaw kanako. Sa ting-init asul ang langit ug nanag-awit ang mga cicada. Ang mga bulak sa kabagnotan humot kaayo, ug ang mga prutas sa Mediteranyo nga among gitikad​—mga ubas ug mga igira—​dugaon kaayo! Maorag among nakaplagan ang among dapit sa paraiso.

Pagtuo sa Diyos Napukaw

Sa unibersidad, akong natun-an ang biolohiya sa selula, embryology, ug anatomiya, ug nakadayeg akog dako sa kakomplikado ug kaharmonya niining tanang mekanismo. Karon nga adlaw-adlaw akong makapalandong ug direktang makapaniid sa kalalangan, ang katahom ug katakos niini nagpuno kanakog kahibulong. Adlaw-adlaw ang basahon sa kalalangan kanunayng nabuksan sa atubangan ko. Usa ka adlaw samtang dugayng naglakaw sa kabungtoran ug human makapamalandong ug lalom bahin sa kinabuhi, ako nakahinapos nga aduna gayoy Maglalalang. Nakadesisyon ako diha sa akong kasingkasing nga motuo sa Diyos. Sa miagi, mibati akog kahaw-ang sa akong kasingkasing, usa ka makapatugaw nga kamingaw. Sa adlaw nga misugod ako sa pagtuo sa Diyos, akong giingnan ang akong kaugalingon, ‘Pascal, dili ka na gayod mag-inusara pag-usab.’ Kadto maoy usa ka talagsaong pagbati.

Wala madugay pagkahuman niana, ang akong puyopuyo ug ako nakabaton ug batang babaye​—si Amandine. Pinangga kaayo nako siya. Karon nga nagtuo na ako sa Diyos, ako misugod sa pagtahod sa pipila ka moral nga mga balaod nga akong nahibaloan. Miundang ako sa pagpangawat ug pagpamakak, ug wala madugay akong naamgohan nga nakatabang kini kanako nga malikayan ang daghang problema uban niadtong anaa sa palibot nako. Oo, may mga suliran kami, ug ang akong paraiso dili bug-os nga sama sa akong gidahom. Ang lokal nga mga magtatanom ug ubas nga himoong bino naggamit ug mga igpapatay sa dangan ug sagbot nga naghugaw usab sa akong mga pananom. Ang akong pangutana mahitungod sa hinungdan sa pagkadaotan wala gihapon matubag. Dugang pa, bisan tuod daghan akog nabasa maylabot sa kinabuhing pamilyahanon, wala kini makapugong sa mainit nga mga panaglalis uban sa akong puyopuyo. Gamay ra ang among mga higala, ug kadtong among nabatonan mga maluibon; ang uban misulay pa gani sa paghimo sa akong puyopuyo nga magbudhi kanako. Aduna gayoy mas maayo pa nga paraiso.

Ang Tubag sa Akong mga Pag-ampo

Sa akong kaugalingong paagi, kanunay gayod akong nag-ampo sa Diyos nga giyahan ako sa kinabuhi. Usa ka buntag sa Dominggo usa ka mahigalaong babaye nga ginganlag Irène Lopez ug ang iyang batang lalaki mianha sa among pultahan. Usa siya sa mga Saksi ni Jehova. Naminaw ako sa iyang gisulti ug midawat sa tanyag nga duawon pag-usab. Duha ka lalaki ang miduaw kanako. Sa among pag-estoryahanay, duha ka butang ang nagpabilin sa akong panumdoman​—Paraiso ug Gingharian sa Diyos. Maampingon kong gitipigan ang maong mga panghunahuna diha sa akong kasingkasing, ug sa paglabay sa mga bulan, akong nasabtan nga moabot ang adlaw nga kinahanglang akong ipahiuyon ang akong kinabuhi sa mga sukdanan sa Diyos kon buot kong makabaton ug hinlong tanlag ug makakaplag ug tinuod nga kalipay.

Aron ipahiuyon ang among kinabuhi sa Pulong sa Diyos, ang akong puyopuyo sa sinugdan may kiling pa sa pagpakasal kanako. Dayon nadaldal siya ngadto sa daotang pakig-uban sa mga tawong nagtamay sa Diyos ug sa iyang mga kasugoan. Sa dihang mipauli sa balay usa ka gabii sa tingpamulak, grabe ang akong kakurat. Walay tawo ang among balay. Milayas ang akong puyopuyo, nga dala ang among tres-anyos nga batang babaye. Sulod sa daghang adlaw nagsige kog hulat sa ilang pagbalik​—apan sa walay kapuslanan. Imbes basolon ang Diyos, miampo ako kaniya sa pagtabang kanako.

Wala madugay human niana, akong gikuha ang Bibliya, milingkod ilalom sa akong kahoyng igos, ug misugod sa pagbasa. Sa pagkatinuod, mahinamon kong gibasa ang mga pulong niini. Bisan pag ako nakabasa sa tanang matang sa mga libro sa mga sikoanalista ug mga sikologo, wala pa gayod ako makakaplag ug ingon niana nga kaalam. Kining libroha malagmit gayod nga inspirado sa Diyos. Ang pagpanudlo ni Jesus ug ang iyang pagsabot sa tawhanong kinaiyahan nakapahingangha kanako. Nahupay ako sa Mga Salmo ug nahingangha sa praktikal nga kaalam sa Proverbio. Ako nakaamgo gilayon nga bisan tuod ang pagtuon sa kalalangan maayo kaayo sa pagdani sa usa ka tawo ngadto sa Diyos, kini makapadayag lamang “sa mga tipik sa iyang mga dalan.”​—Job 26:14.

Gibilin usab kanako sa mga Saksi ang mga librong Ang Kamatuoran nga Motultol sa Kinabuhing Dayon ug Paghimo sa Imong Pamilyahanong Kinabuhi nga Malipayon.a Ang pagbasa niini nagbukas sa akong mga mata. Ang Kamatuoran nga libro nagtabang kanako sa pagsabot kon nganong ang tawo nag-atubang ug kaylap nga polusyon, mga gubat, nagauswag nga kapintasan, ug ang hulga sa nukleyar nga pagkalaglag. Ug ingon nga ang mapula nga langit nga akong makita gikan sa akong tanaman nagpailag maayong klima pagkasunod nga adlaw, kining mga hitaboa nagpamatuod nga haduol na kaayo ang Gingharian sa Diyos. Kon mahitungod sa librong Pamilyahanong Kinabuhi, nangandoy ko nga unta akong ikapakita kini sa akong puyopuyo ug sultihan siya nga mahimo kaming magmalipayon pinaagi sa pagpadapat sa tambag sa Bibliya. Apan dili na kini posible.

Paghimog Espirituwal nga Pag-uswag

Buot ko nga masayod pag dugang, busa akong gihangyo si Robert, usa ka Saksi, sa pagduaw kanako. Sa iyang dakong katingala, ako siyang gisultihan nga buot kong magpabawtismo, busa gisugdan ang usa ka pagtuon sa Bibliya. Ako dihadihang misugod sa pagsulti ngadto sa uban mahitungod sa akong ginatun-an, ug ako misugod sa pagpanagtag sa mga publikasyon nga akong gikuha sa Kingdom Hall.

Aron dunay pangabuhian, nagpalista ako sa kurso sa pamanday sa bato. Kay nasayod sa kaayohan nga mahimo sa Pulong sa Diyos sa usa ka tawo, akong gipahimuslan ang tanang kahigayonan sa pagsangyaw nga di-pormal ngadto sa mga isigkaestudyante ug sa mga magtutudlo. Usa ka gabii, akong nahibalag si Serge diha sa koridor. Naggunit siyag pipila ka magasin. “Akong nakita nga ganahan kang mobasa,” akong giingnan siya. “Oo, apan gilaayan na ako niini.” “Gusto ba nimog balasahong maayo gayod nga basahon?” ako siyang gipangutana. Maayo kaayo ang among paghisgotanay mahitungod sa Gingharian sa Diyos, nga human niana siya midawat ug pipila ka literatura sa Bibliya. Pagkasunod semana, mianha siya sa Kingdom Hall uban kanako, ug nasugdan ang usa ka pagtuon sa Bibliya.

Usa ka adlaw akong gipangutana si Robert kon mahimo ba akong mosangyaw sa balay ug balay. Miadto siya sa iyang kabinet ug nakakaplag ug amerkana alang kanako. Pagkasunod Dominggo, akong gihimo ang akong unang pagsangyaw uban kaniya. Sa kataposan, sa Marso 7, 1981, akong gisimbolohan sa publiko ang akong pagpahinungod kang Jehova nga Diyos pinaagi sa bawtismo.

Tabang Panahon sa Kasakit

Sa kasamtangan akong nahibaloan kon diin nagpuyo sa gawas sa nasod si Amandine ug ang iyang inahan. Ikasubo, ang iyang inahan​—sa tanang legal nga paagi, sumala sa mga balaod sa nasod nga iyang gipuy-an—​nagdili kanako nga makita ang akong anak nga babaye. Naguol ako pag-ayo. Nagminyo ang inahan ni Amandine, ug misamot ang akong kaguol sa dihang akong nadawat ang usa ka opisyal nga pahibalo nga gisagop sa iyang bana ang akong anak nga babaye​—nga sa bug-os walay akong pagtugot. Wala na akoy bisan unsang katungod sa akong anak. Bisan pag mihimog legal nga aksiyon, wala ako makabaton ug mga katungod nga mogugol ug panahon kauban sa bata. Akong gibati nga morag nagpas-an akog 50 kilos sa akong likod, ingon niana ang akong kasakit.

Apan ang Pulong ni Jehova nagpalig-on kanako sa daghang paagi. Usa ka adlaw sa dihang hilabihan ang akong kaguol, akong gibalikbalik ang mga pulong sa Proverbio 24:10: “Ikaw ba nagpakita nga naluya sa adlaw sa kasakitan? Ang imong kusog diyutay ra.” Kining bersikuloha nagtabang kanako nga dili mahugno. Sa lain pang higayon, human ang usa ka kapakyasan sa pagtinguha nga makita ang akong anak nga babaye, migula ako sa pagsangyaw sa kanataran ug hugot kaayong migunit sa kaptanan sa akong bag. Latas sa maong malisod nga mga yugto, ako nakaeksperyensiya sa pagkatinuod sa Salmo 126:6, nga nag-ingon: “Siya nga molakaw, bisag naghilak, nga nagdala sa binhi nga igpupugas, sa walay duhaduha mobalik siya nga may kalipay, nga magdala uban sa iyang mga binangan nga uhay.” Ang usa ka hinungdanong leksiyon nga akong nakat-onan mao nga kon ikaw adunay grabeng mga pagsulay, sa dihang imo nang nahimo ang tanan nimong maarangan sa pagsulbad sa imong mga suliran, kinahanglan nimo kining talikdan ug magpadayon uban ang determinasyon diha sa pag-alagad kang Jehova. Mao lamang kini ang bugtong paagi nga mahuptan ang imong kangaya.

Pagtinguha sa Usa ka Butang nga Mas Maayo

Tungod kay nakita ang mga kausaban nga akong nahimo, ang akong hinigugmang mga ginikanan mitanyag sa pagtabang kanako aron makapadayon sa akong pagtuon sa unibersidad. Ako silang gipasalamatan, apan karon ako adunay laing tumong. Ang kamatuoran nakapahigawas kanako gikan sa tawhanong pilosopiya, mistisismo, ug astrolohiya. Ako karon adunay tinuod nga mga higalang dili gayod magpinatyanay sa gubat. Ug sa kataposan nabatonan ko ang tubag sa akong mga pangutana kon nganong hilabihan ang pag-antos sa yuta. Tungod sa akong pagkamapasalamaton buot kong alagaran ang Diyos sa tibuok kong kusog. Si Jesus bug-os nga naghatag sa iyang kaugalingon sa iyang ministeryo, ug buot kong sundon ang iyang panig-ingnan.

Sa 1983, akong gibiyaan ang akong negosyo sa pamanday sa bato aron mahimong bug-os-panahong ministro. Ingong tubag sa akong mga pag-ampo, nakakita akog inoras nga trabaho diha sa usa ka parke aron sa pagsuportar sa akong kaugalingon. Pagkamakapalipay ang pagtambong sa tunghaan sa payunir kauban kang Serge, ang batan-ong lalaki nga akong gisangyawan sa eskuylahan sa dihang nagtuon ug pamanday sa bato! Human sa tulo ka tuig ingong regular payunir, akong gibati ang tinguha sa paghimog dugang pa sa pag-alagad kang Jehova. Busa, sa 1986 ako gitudlo nga mahimong espesyal payunir sa matahom nga lungsod sa Provins, dili halayo sa Paris. Sagad, sa pagpauli magabii, moluhod ako sa pag-ampo aron pasalamatan si Jehova tungod sa nindot nga adlaw nga akong gigugol sa pagpakigsulti sa uban mahitungod kaniya. Sa pagkamatuod, ang akong duha ka kinalabwang kalipay sa kinabuhi mao ang pagpakigsulti sa Diyos ug pagpakigsulti mahitungod sa Diyos.

Ang akong lain pang dakong kangaya mao ang pagpabawtismo sa akong 68-anyos nga inahan nga nagpuyo sa Cébazan, usa ka gamayng balangay habagatan sa Pransiya. Sa dihang misugod pagbasa sa Bibliya ang akong inahan, ako siyang gipadad-an ug mga suskrisyon sa Ang Bantayanang Torre ug Pagmata! Siya tigpaminsar nga tawo, ug wala magdugay iyang nailhan ang tagingting sa kamatuoran diha sa iyang nabasa.

Bethel​—Usa ka Talagsaong Espirituwal nga Paraiso

Sa dihang ang Watch Tower Society midesisyon sa pagkunhod sa gidaghanon sa mga espesyal payunir, miaplay ako sa Tunghaan sa Ministeryal nga Pagbansay ug sa Bethel, ang sangang buhatan sa mga Saksi ni Jehova sa Pransiya. Buot ko nga itugyan kang Jehova ang pagdesisyon kon unsa ang labing maayong paagi nga ako makaalagad kaniya. Pipila ka bulan sa ulahi, sa Disyembre 1989, ako gidapit sa Bethel sa Louviers, amihanan-kasadpan sa Pransiya. Kini napamatud-an nga usa ka maayo kaayong resulta, sanglit ang dapit nagpaarang kanako sa pagtabang sa akong igsoong lalaki ug bayaw nga babaye sa pag-atiman sa akong mga ginikanan sa dihang sila grabeng nagsakit. Dili unta nako kini mahimo kon ako anaa sa misyonaryong pag-alagad sa gilay-ong linibo ka kilometro.

Ang akong inahan makadaghan nga miduaw kanako sa Bethel. Bisan pag usa ka sakripisyo alang kaniyang magpuyo nga layo kanako, kanunay niya akong sultihan: “Pabilin sa Bethel, Anak. Nalipay ako nga nag-alagad ka kang Jehova niining paagiha.” Ikasubo, ang akong duha ka ginikanan namatay na. Pagkamalaomon ko nga makita sila dinhi sa yuta nga mahimo nang usa ka literal nga paraiso!

Nagtuo gayod ako nga kon may balay nga takos sa kahubitan nga “Paraiso Karon,” kini mao ang Bethel​—ang “Balay sa Diyos”—​tungod kay ang tinuod nga paraiso, labaw sa tanan, maoy espirituwal, ug ang espirituwalidad naglungtad sa Bethel. Kami adunay kahigayonan sa pagpalambo sa bunga sa espiritu. (Galacia 5:22, 23) Ang dagayang espirituwal nga pagkaon nga among madawat panahon sa paghisgot sa adlaw-adlaw nga teksto sa Bibliya ug ang pagtuon sa pamilya sa Ang Bantayanang Torre nagtabang sa paglig-on kanako alang sa pag-alagad sa Bethel. Dugang pa, ang pagkaposible nga makig-uban sa mahunahunaon-sa-espirituwal nga mga igsoong lalaki ug babaye nga matinumanong nag-alagad kang Jehova sulod na sa mga dekada naghimo sa Bethel nga talagsaong dapit nga diha niana motubo sa espirituwal nga paagi. Bisan pag nahimulag ako sa akong anak nga babaye sulod sa 17 ka tuig na karon, nakakaplag akog daghang masiboton nga mga batan-on sa Bethel, kinsa akong giisip nga akong mga anak, ug kansang espirituwal nga pag-uswag maoy akong kalipay. Sulod sa milabayng walo ka tuig, nakabaton akog pito ka lainlaing asaynment. Bisan tuod kini nga mga kausaban dili kanunayng sayon, ang maong pagbansay mapuslanon sa ngadtongadto.

Nag-atiman ako kanhi ug usa ka matang sa balatong nga mamungag usa ka gatos ka pilo. Sa susama, nakaeksperyensiya ako nga sa dihang ikaw magpugas ug daotan, ikaw moani ug usa ka gatos ka pilo nga mas daotan pa​—ug dili lamang usa ka pag-ani. Ang kasinatian maorag usa ka eskuylahan diin ang mga leksiyon hilabihan ka mahal. Ipalabi ko nga wala gayod unta magpalista sa maong eskuylahan kondili, hinunoa, gipadako unta diha sa mga dalan ni Jehova. Pagkadakong pribilehiyo alang niadtong mga batan-on nga gipadako sa Kristohanon nga mga ginikanan! Walay duhaduha, mas maayo nga magpugas kon unsay maayo diha sa pag-alagad kang Jehova ug sa pag-anig usa ka gatos ka pilo sa kalinaw ug katagbawan.​—Galacia 6:7, 8.

Sa dihang nagpayunir pa ako, usahay akong malabyan ang tindahan sa relihiyosong mga basahon kang kansang bungbong among gisulatan ug anarkistang mga eslogan. Nakasulod pa gani ako ug nakapakigsulti sa tag-iya maylabot sa buhi nga Diyos ug sa iyang katuyoan. Oo, buhi ang Diyos! Dugang pa, si Jehova, ang bugtong matuod nga Diyos, maoy usa ka kasaligang Amahan, nga dili gayod mosalikway sa iyang mga anak. (Pinadayag 15:4) Hinaot nga panonpanon pa gikan sa tanang kanasoran ang makakaplag sa espirituwal nga paraiso karon​—ug sa ipasig-uli nga Paraiso sa umaabot—​pinaagi sa pag-alagad ug pagdayeg sa buhi nga Diyos, si Jehova!

[Footnote]

[Mga hulagway sa panid 26]

Tungod kay natandog sa mga kahibulongan sa kalalangan, nakadesisyon ako diha sa akong kasingkasing nga motuo sa Diyos.

(Tuo) Nag-alagad sa Bethel karon