Mga Pangutana Gikan sa mga Magbabasa

Sa unsang paagi ginalantaw sa mga Saksi ni Jehova ang pagbotar?

Dunay tin-awng mga prinsipyo sa Bibliya nga magpaarang sa mga alagad sa Diyos sa pagbaton ug hustong panglantaw niining butanga. Ugaling lang, morag walay prinsipyo nga batok sa buhat sa pagbotar mismo. Pananglitan, walay katarongan nga ang usa ka hunta direktiba magbotohay aron makahimog mga desisyon maylabot sa ilang korporasyon. Ang mga kongregasyon sa mga Saksi ni Jehova sagad mohimog mga desisyon bahin sa mga oras sa tigom ug paggamit sa mga pondo sa kongregasyon pinaagi sa pagbotar nga iisa ang mga kamot.

Nan, unsa na man ang bahin sa politikal nga mga piliay? Tinuod, sa pipila ka demokratikanhong kayutaan, ingon ka daghan sa mga 50 porsiyento sa populasyon ang dili mobotar sa adlaw sa piliay. Bahin sa mga Saksi ni Jehova, dili sila mobalda sa katungod sa uban sa pagbotar; ni sila sa bisan unsang paagi mokampanya batok sa politikal nga mga piliay. Nagtahod ug nakigtambayayong sila sa mga awtoridad kinsa sa hustong paagi gipili diha sa maong mga piliay. (Roma 13:1-7) Kon sila ba personal nga mobotar ug kandidato nga modagan sa piliay, ang matag usa sa mga Saksi ni Jehova maghimog desisyon pinasikad sa iyang nabansay-sa-Bibliyang tanlag ug sa pagsabot sa iyang responsabilidad ngadto sa Diyos ug sa Estado. (Mateo 22:21; 1 Pedro 3:16) Sa paghimo niining personal nga desisyon, hatagag pagtagad sa mga Saksi ang daghang punto.

Una, si Jesu-Kristo miingon sa iyang mga sumusunod: “Sila dili man bahin sa kalibotan, maingon nga ako dili bahin sa kalibotan.” (Juan 17:14) Giisip nga seryoso sa mga Saksi ni Jehova kining prinsipyoha. Kay “dili bahin sa kalibotan,” sila neyutral sa politikal nga mga kalihokan sa kalibotan.​—Juan 18:36.

Ikaduha, si apostol Pablo naghisgot sa iyang kaugalingon ingong “embahador” nga naghawas kang Kristo ngadto sa mga tawo sa iyang adlaw. (Efeso 6:20; 2 Corinto 5:20) Ang mga Saksi ni Jehova nagtuo nga si Kristo Jesus mao karon ang naentronong Hari sa langitnong Gingharian sa Diyos, ug sila, sama sa mga embahador, kinahanglang magpahibalo niini ngadto sa mga nasod. (Mateo 24:14; Pinadayag 11:15) Ang mga embahador gidahom nga neyutral ug dili manghilabot sa kaugalingong mga kalihokan sa mga nasod nga gipadad-an kanila. Ingong mga hawas sa langitnong Gingharian sa Diyos, ang mga Saksi ni Jehova mobati sa samang obligasyon nga dili manghilabot sa politika sa mga nasod nga ilang gipuy-an.

Ang ikatulong punto nga hatagag pagtagad mao nga kadtong makigbahin sa pagbotar sa usa ka kandidato ngadto sa katungdanan mahimong responsable sa kon unsay buhaton nianang kandidatoha. (Itandi ang 1 Timoteo 5:22, The New English Bible.) Ang mga Kristohanon kinahanglang magtimbangtimbang sa maampingong paagi kon buot ba nilang abagahon kanang responsabilidara.

Ikaupat, ang mga Saksi ni Jehova nagpabili ug dako sa ilang Kristohanong panaghiusa. (Colosas 3:14) Sa dihang ang mga relihiyon malangkit sa politika, ang kasagarang resulta maoy pagkabahinbahin tali sa ilang mga membro. Isip pagsundog kang Jesu-Kristo, ang mga Saksi ni Jehova maglikay nga malangkit sa politika ug sa ingon magmentinar sa ilang Kristohanong panaghiusa.​—Mateo 12:25; Juan 6:15; 18:36, 37.

Ikalima ug kataposan, ang dili nila pag-apil-apil sa politika naghatag sa mga Saksi ni Jehova ug kagawasan sa pagsulti aron makaduol sa mga tawo sa tanang politikal nga partido uban ang hinungdanong mensahe sa Gingharian.​—Hebreohanon 10:35.

Tungod sa Kasulatanhong mga prinsipyo nga gihan-ay sa ibabaw, diha sa daghang nasod ang mga Saksi ni Jehova personal nga nagdesisyon nga dili mobotar diha sa politikal nga mga piliay, ug ang ilang kagawasan sa paghimo sa maong desisyon gipaluyohan sa balaod sa nasod. Apan, unsa na man kon ang balaod nagkinahanglan nga mobotar ang mga lungsoranon? Sa maong kahimtang, ang matag Saksi mao nay responsable sa paghimog matanlagon, gipasukad-sa-Bibliya nga desisyon kon unsaon pag-atubang sa kahimtang. Kon ang usa mohukom nga moadto sa botaranang silid, iya na kanang desisyon. Kon unsa may iyang himoon didto sa botaranang silid iya na kanang tulubagon sa iyang Maglalalang.

Ang Nobyembre 15, 1950, nga gula sa The Watchtower, sa mga panid 445 ug 446, nag-ingon: “Kon ipugos ni Cesar sa mga lungsoranon ang pagbotar . . . [ang mga Saksi] mahimong moadto sa mga presinto ug mosulod sa mga botaranang silid. Dinhi sila sugoon sa pagmarka sa balota o sa pagsulat kon unsay ilang baroganan. Ang mga botante mao nay magbuot sa ilang mga balota. Busa dinhi sa presensiya sa Diyos ang iyang mga saksi kinahanglang molihok uyon sa iyang mga sugo ug sumala sa ilang pagtuo. Dili namo responsabilidad ang pagtudlo kanila kon unsay ilang buhaton sa balota.”

Komosta kon ang di-magtutuong bana sa usa ka Kristohanong asawa moinsistir nga siya moadto aron mobotar? Buweno, nagapasakop siya sa iyang bana, sama nga ang mga Kristohanon nagapasakop sa labawng mga awtoridad. (Efeso 5:22; 1 Pedro 2:13-17) Kon mosunod siya sa iyang bana ug moadto sa botaranang silid, iya na kanang desisyon. Dili siya angayng sawayon ni bisan kinsa.​—Itandi ang Roma 14:4.

Komosta na man sa usa ka nasod nga ang pagbotar wala ibaod apan gikayugtan kadtong dili moadto sa botaranang silid​—tingali sila naladlad sa pisikal nga kapeligrohan? O unsa na man kon ang mga indibiduwal, bisag dili obligado sa pagbotar sumala sa balaod, silotan ug bug-at sa pipila ka paagi kon sila dili moadto sa botaranang silid? Niini ug sa susamang mga kahimtang, ang usa ka Kristohanon mao nay maghimo sa iyang kaugalingong desisyon. “Ang matag usa magapas-an sa iyang kaugalingong luwan.”​—Galacia 6:5.

Mahimong dunay mga tawong mapandol inigkakita nila nga panahon sa piliay sa ilang nasod, ang ubang mga Saksi ni Jehova moadto sa botaranang silid ug ang uban dili. Sila moingon tingali, ‘Ang mga Saksi ni Jehova wala magkasinabot.’ Apan, angayng masabtan sa mga tawo nga kon bahin sa mga butang nga nalangkit ang indibiduwal nga tanlag sama niini, ang matag Kristohanon mao nay maghimo sa iyang desisyon atubangan sa Diyos nga Jehova.​—Roma 14:12.

Bisan unsay personal nga mga desisyon nga himoon sa mga Saksi ni Jehova atubangan sa nagkalainlaing mga kahimtang, sila nagaamping nga huptan ang ilang Kristohanong neyutralidad ug kagawasan sa pagsulti. Sa tanang butang, sila mosalig kang Jehova nga Diyos sa pagpalig-on kanila, sa paghatag kanilag kaalam, ug sa pagtabang kanila sa paglikay nga makompromiso ang ilang pagtuo sa bisan unsang paagi. Busa sila nagpakitag pagsalig sa mga pulong sa salmista: “Ikaw mao ang akong bato ug ang akong kuta; ug tungod sa imong ngalan ikaw magatultol kanako ug magaagak kanako.”​—Salmo 31:3.