Ang Bibliya Nagtubag sa Hinungdanong mga Pangutana sa Atong Adlaw

MAPUSLANON ba ang Bibliya karong adlawa? Aron mahimong oo ang tubag, tino nga kining karaang libro makatanyag sa mga magbabasa niini ug giya bahin sa mga ulohan nga makapaikag ug mapuslanon karon. Nagtagana ba ang Bibliya ug mapuslanong tambag bahin sa mga ulohan nga tinuod nga hinungdanon sa kalibotan karon?

Atong susihon ang duha ka presenteng isyu. Sa pagbuhat niini, atong susihon ang giingon sa Bibliya bahin niining mga butanga.

Nganong Gitugotan sa Diyos ang Pag-antos?

Tungod sa presenteng mga kahimtang sa kalibotan, usa sa labing komon nga gisuknang mga pangutana mao: Nganong gitugotan sa Diyos nga mag-antos ang inosenteng mga tawo? Makataronganon kining pangutanaha, kay nagkadaghan ang mga tawong naapektohan sa pintas nga krimen, korapsiyon, pagpuo sa kaliwat, personal nga trahedya, ug uban pa.

Pananglitan, sa Hunyo 1998 usa ka express nga tren mibangga sa usa ka taytayan sa amihanang Alemanya, nga mipatay sa kapin sa usa ka gatos ka pasahero. Bisan ang sinating mga mediko ug mga bombero nga nag-atiman sa mga nasamdan ug sa mga patay naglagot gumikan sa kadaghan sa nangamatay. Usa ka obispo sa Evangelical Church misukna: “Diyos ko, Nganong kinahanglan man kining mahitabo?” Ang obispo mismo walay ikatubag.

Gipakita sa kasinatian nga sa dihang ang inosenteng mga tawo mahiagom sa kadaot nga dili mapasabot bahin sa hinungdan, usahay sila mangasuko. Dinhi niini nga ang Bibliya makatabang, kay kini nagsaysay kon nganong ang inosenteng mga tawo nahiagom sa pagkadaotan ug pag-antos.

Dihang gilalang ni Jehova nga Diyos ang yuta ug ang tanang butang diha niana, wala niya tuyoa nga ang mga tawo samokon sa pagkadaotan ug pag-antos. Sa unsang paagi kita makaseguro? Kay pagkahuman sa iyang paglalang, “nakita sa Diyos ang tanan nga iyang gibuhat ug, tan-awa! kadto maayo kaayo.” (Genesis 1:31) Pangutan-a ang imong kaugalingon, ‘Kon ako motan-aw ug usa ka butang nga daotan, mopahayag ba ako nga kini “maayo kaayo”?’ Siyempre dili! Sa samang paagi, sa dihang gipahayag sa Diyos ang tanang butang nga “maayo kaayo,” wala gayod niadtoy timailhan sa pagkadaotan sa yuta. Busa kanus-a ug sa unsang paagi nagsugod ang pagkadaotan?

Wala madugay human lalanga ang atong unang mga ginikanan, si Adan ug Eva, usa ka gamhanang espiritung linalang miduol sa babaye ug mihagit sa pagkamatinud-anon ni Jehova ug pagkamatarong sa iyang pagkasoberano. (Genesis 3:1-5) Kadto nga linalang, si Satanas nga Yawa, sa ulahi nangangkon nga ang mga tawo dili makapabiling maunongon sa Diyos ilalom sa kalisdanan. (Job 2:1-5) Sa unsang paagi si Jehova misanong niadtong kahimtanga? Iyang gitugotan nga molabay ang panahon aron madayag nga ang mga tawo dili mahimong motultol sa ilang mga lakang sa malamposong paagi nga independente kaniya. (Jeremias 10:23) Sa dihang ang mga linalang molihok nga sukwahi sa mga balaod ug mga prinsipyo sa Diyos, ang resulta maoy sala, nga magpahinabog makadaot nga mga kahimtang. (Ecclesiastes 8:9; 1 Juan 3:4) Apan, bisan pa niining lisod nga mga kahimtang, si Jehova nasayod nga ang ubang mga tawo maghupot ug integridad ngadto kaniya.

Sukad niadtong makapaguol nga rebelyon sa Eden, mga 6,000 ka tuig na ang miagi. Dugay na ba kaayo kadto? Mahimo na untang patyon ni Jehova si Satanas ug ang iyang mga tigpaluyo mga kasiglohan kanhi. Apan dili ba mas maayo nga maghulat hangtod nga ang matag mahunahunaang pagduhaduha bahin sa pagkamatarong sa pagkasoberano ni Jehova ug sa integridad sa mga tawo ngadto kaniya mahanaw? Dili ba tinuod kana sa presenteng hudisyal nga mga sistema nga mahimong mogugol ug katuigan aron pamatud-an sa kaso sa korte kon kinsay husto ug kon kinsay sayop?

Tungod sa pagkahinungdanon sa mga isyu nga ginaatubang ni Jehova ug sa katawhan​—ang unibersohanong pagkasoberano ug integridad sa mga tawo—​pagkamaalamon gayod sa Diyos sa pagtugot nga molabay ang panahon! Karon tin-aw natong masabtan kon unsay mahitabo sa dihang ang mga tawo mosalikway sa mga balaod sa Diyos ug mokontrolar sa ilang mga kalihokan. Ang resulta maoy kaylap nga pagkadaotan. Ug kanay hinungdan kon nganong daghan kaayong inosenteng mga tawo ang nag-antos karon.

Apan, ikalipay nga gipakita sa Pulong sa Diyos nga ang pagkadaotan dili molungtad hangtod sa kahangtoran. Sa pagkatinuod, si Jehova sa di-madugay magtapos sa daotan ug sa mga nagpahinabo niana. “Kon mahitungod sa mga daotan,” matod sa Proverbio 2:22, “sila pagaputlon gikan sa yuta; ug kon bahin sa mga maluibon, sila pagalukahon gikan niini.” Sa laing bahin, kadtong matinumanon sa Diyos makalantaw sa unahan sa panahon, nga karon duol na, sa dihang “wala na unyay kamatayon, ni pagbangutan ni pagtiyabaw ni may kasakit pa.”​—Pinadayag 21:4.

Busa, ang Bibliya tin-aw nga nagsaysay kon nganong nag-antos ang mga inosente. Nagpasalig usab kini kanato nga ang pagkadaotan ug pag-antos matapos sa di-madugay. Ugaling lang, samtang atong masinati ang mga kalisdanan karon, nagkinahanglan kita ug tubag sa laing hinungdanong pangutana.

Unsa ang Katuyoan sa Kinabuhi?

Tingali karon labaw pa kay sa bisan unsang panahon sa kasaysayan sa tawo, gisulayan sa mga tawo pagpangita kon unsa gayoy kahulogan sa kinabuhi. Daghan ang mosukna sa ilang kaugalingon, ‘Nganong ako nagkinabuhi? Sa unsang paagi akong makaplagan ang kahulogan sa akong kinabuhi?’ Nagkalainlaing kahimtang ang nagtukmod kanila sa pagsukna niining mga pangutanaha.

Ang kinabuhi sa usa mahimong mahugno gumikan sa personal nga trahedya. Pananglitan, sayo sa 1998 usa ka 12-anyos nga batang babaye nga nagpuyo sa Bavaria, Alemanya, gikidnap ug gipatay. Usa ka tuig sa ulahi, ang iyang inahan miadmitir nga iyang gigugol ang matag adlaw sa pagpanukiduki sa kahulogan sa kinabuhi​—sa walay kapuslanan. Ang pipila ka batan-on natukmod sa paghunahuna bahin sa kahulogan sa kinabuhi. Nangita silag kasegurohan, kalamposan, ug usa ka pagbati nga gidawat sa katilingban, apan nahigawad lamang sa kaylap nga kasalingkapaw ug kadunotan. Ang ubang mga tawo magtukod sa ilang mga kinabuhi diha sa usa ka karera, apan ilang madiskobrehan nga ang impluwensiya, dungog, ug mga kabtangan dili makatagbaw sa pangsulod nga pangandoy sa pagkaplag ug hinungdan sa ilang paglungtad.

Bisan unsa pay magtukmod sa usa ka tawo sa pagsusi sa kahulogan sa kinabuhi, kining pangutanaha takos sa seryoso ug makapatagbawng tubag. Sa makausa pa, ang Bibliya mahimong mapuslanon kaayo. Nagpaila kini kang Jehova ingon nga Diyos sa katuyoan, ang usa nga may maayong mga katarongan sa tanan nga iyang gibuhat. Kita mangutana, Magtukod ka ba ug balay sa walay hinungdan? Lagmit dili, sanglit ang pagtukod ug balay nagkinahanglan ug dakong puhonan nga salapi ug mogugol ug mga bulan o katuigan. Magtukod ka ug balay aron ikaw o ang lain makapuyo diha niana. Ang samang lohika mapadapat kang Jehova. Wala siya maghasolhasol sa paglalang sa yuta ug sa tanang butang diha niana nga walay katarongan, o katuyoan. (Itandi ang Hebreohanon 3:4.) Unsay iyang katuyoan alang sa yuta?

Ang tagna ni Isaias nagpaila kang Jehova ingong “matuod nga Diyos, ang Mag-uumol sa yuta ug ang Magbubuhat niini.” Sa pagkatinuod, siya “ang Usa nga lig-ong nagtukod [sa yuta], nga wala maglalang niini sa wala lamay kapuslanan, nga nag-umol niini aron gayod pagapuy-an.” (Isaias 45:18) Oo, sukad nga gilalang ang yuta, maoy katuyoan ni Jehova nga kini puy-an. Matod sa Salmo 115:16: “Kon bahin sa mga langit, iya ni Jehova ang mga langit, apan ang yuta iyang gihatag sa mga anak sa mga tawo.” Busa gipakita sa Bibliya nga gilalang ni Jehova ang yuta aron puy-an sa masinugtanong katawhan, nga magaatiman niini.​—Genesis 1:27, 28.

Ang pagrebelde ba ni Adan ug Eva nagpahinabo kang Jehova nga usbon ang iyang katuyoan? Wala. Sa unsang paagi kita makaseguro? Buweno, tagda kining puntoha: Ang Bibliya gisulat libolibong katuigan human ang rebelyon sa Eden. Kon gitalikdan pa sa Diyos ang iyang orihinal nga katuyoan, nganong wala kana hisgoti diha sa Bibliya? Ang dayag nga konklusyon mao nga ang iyang katuyoan alang sa yuta ug sa katawhan wala mausab.

Dugang pa, ang katuyoan ni Jehova dili gayod mapakyas. Pinaagi kang Isaias, ang Diyos naghatag niini nga pasalig: “Kay ingon nga ang ulan managpanulo, ug ang niyebe, gikan sa mga langit ug dili mobalik sa maong dapit, hangtod nga kini motuhop sa yuta ug magpabunga ug magpasalingsing niini, ug ang binhi igahatag gayod ngadto sa magpupugas ug ang tinapay ngadto sa kumakaon, maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”​—Isaias 55:10, 11.

Kon Unsay Gidahom sa Diyos Kanato

Nan, dayag nga kita makasalig sa katumanan sa katuyoan sa Diyos nga ang yuta puy-an sa walay kataposan sa masinugtanong katawhan. Kon mahilakip kita niadtong makapribilehiyo sa pagpuyo nga permanente sa yuta, angay natong buhaton ang giingon sa maalamong Haring Solomon: “Kahadloki ang matuod nga Diyos ug tumana ang iyang mga sugo. Kay kini mao ang tibuok nga katungdanan sa tawo.”​—Ecclesiastes 12:13; Juan 17:3.

Ang pagkinabuhi uyon sa katuyoan ni Jehova alang sa tawo nagpasabot sa pagkahibalo bahin sa matuod nga Diyos ug pagpahiuyon sa iyang mga sukdanan sumala sa gipahiluna diha sa Balaang Kasulatan. Kon atong buhaton kini karon, atong mabatonan ang paglaom sa walay-kataposang kinabuhi sa paraisong yuta, nga niana kita dili na gayod mohunong sa pagkat-on ug bag-ong mga butang bahin sa Diyos ug sa iyang kahibulongang kalalangan. (Lucas 23:43) Pagkamakapahinam nga palaaboton!

Daghan kanilang nangita sa katuyoan sa kinabuhi midangop sa Bibliya ug nakakaplag ug dakong kalipay bisan karon. Pananglitan, usa ka batan-ong lalaki nga ginganlag Alfred wala makakaplag sa kahulogan sa kinabuhi. Napikal siya sa kalangkitan sa relihiyon sa gubat, ug naglagot siya sa kasalingkapaw ug korapsiyon diha sa politika. Miduaw si Alfred sa mga Indian sa Amerika del Norte sa paglaom nga makabatog kalamdagan bahin sa katuyoan sa kinabuhi, apan mipauli lamang sa Uropa nga nahigawad. Sa kawalay-paglaom, midangop siya sa mga droga ug mapatuyangong musika. Ugaling lang, ang regular ug maampingong pagsusi sa Bibliya sa ulahi nakatabang kang Alfred sa pagsabot sa tinuod nga katuyoan sa kinabuhi ug sa pagkaplag ug katagbawan.

Usa ka Kasaligang Kahayag sa Atong Alagianan

Nan, unsay atong ikahinapos bahin sa Bibliya? Mapuslanon ba kini karong adlawa? Siyempre, kay kini nagtanyag ug giya bahin sa presenteng mga isyu. Nagsaysay ang Bibliya nga ang pagkadaotan wala ipahinabo sa Diyos ug nagtabang kanato sa pagkaplag ug usa ka makapatagbawng katuyoan sa kinabuhi. Dugang pa, daghag ikasulti ang Bibliya bahin sa ubang butang nga gikaikagan pag-ayo karon. Ang mga ulohan sama sa kaminyoon, pagmatuto sa bata, tawhanong mga relasyon, ug paglaom sa mga patay gipatin-aw diha sa Pulong sa Diyos.

Kon wala pa nimo mahimo kana, palihog susiha ang mga kaundan sa Bibliya. Sa dihang imong makaplagan ang tinuod nga bili sa mga giya niini sa kinabuhi, mahimong ikaw mobati sama sa salmista kinsa nagsalig kang Jehova nga Diyos alang sa giya ug miawit: “Ang imong pulong maoy lamparahan sa akong tiil, ug kahayag sa akong alagianan.”​—Salmo 119:105.

[Hulagway sa panid 6]

Nahibalo ka ba kon nganong ang Diyos nagtugot sa mga inosente nga mag-antos?

[Hulagway sa panid 7]

Imong matagamtam ang usa ka may-katuyoang kinabuhi