Ayaw Tugoting ang Imong Hiyas Mahimong Imong Kahuyangan
Uban ang 16 ka di-masudlag-tubig nga mga lawak sa kasko niini, ang maluhong barko nga Titanic giisip nga di-malunod. Sa unang paglawig niini niadtong 1912, nagdala lamang kinig mga katunga sa gidaghanong mga bote nga gikinahanglan. Ang barko nabangga sa dakong yelo ug nalunod, nga nakalas ang kapin sa 1,500 ka kinabuhi.
ANG mahinadlokon-sa-Diyos nga si Haring Uzzias sa karaang Jerusalem maoy usa ka utokang komander sa kasundalohan. Sa tabang ni Jehova, sunodsunod niyang giparot ang iyang mga kaaway. “Busa ang kabantog [ni Uzzias] mikaylap sa halayo kaayo, kay sa katingalahang paagi siya gitabangan hangtod nga siya nagmakusganon.” Apan unya “ang iyang kasingkasing nagmapahitas-on . . . sa ingon siya milihok nga dili-matinumanon batok kang Jehova nga iyang Diyos.” Tungod sa pagkamapahitas-on ni Uzzias, siya gisanla.—2 Cronicas 26:15-21; Proverbio 16:18.
Kining duha ka asoy nagtudlo kanato nga ang mga hiyas, kon dili timbangan sa kaalam, kamakasaranganon, ug kamapaubsanon, daling mahimong mga kahuyangan o mga disbentaha. Seryoso kini, kay sa usa o sa laing paagi, ang matag usa kanato dunay pipila ka mga hiyas, o mga gasa, ug buot kitang kini mahimong mapuslanon ug tinubdan sa kalipay sa atong kaugalingon ug sa uban, ilabina sa atong Maglalalang. Sa pagkatinuod, kinahanglang atong gamiton sa bug-os ang bisan unsang gasa sa Diyos nga ania tingali kanato apan sa samang panahon kontrolahon kini aron magpabilin kining usa ka mapuslanong hiyas.
Pananglitan, ang tawong makaangay sa iyang trabaho daling maghimo niining gasaha nga usa ka kahuyangan pinaagi sa pagkahimong lunod-patay nga trabahador. Ang usa ka mabinantayong tawo tingali dili daling mailad, o malimbongan, apan siya tingali mabinantayon ngadto sa punto nga dili gayod mohimog mga desisyon. Ang pagkaepisyente usab maoy usa ka maayong hiyas, apan kon pasobrahan, sa pagkaagi nga ibalewala niini ang kinaiyahan sa tawo, ang resulta mahimong usa ka bugnaw, pig-ot nga palibot nga magpahinabog kasubo. Busa palandonga sa makadiyot ang imong mga hiyas. Imo ba kining gigamit sa maayong paagi? Kini ba maoy panalangin ngadto sa uban? Labaw sa tanan, ginagamit ba nimo kini sa pagpasidungog kang Jehova, ang Tinubdan sa “matag maayong gasa”? (Santiago 1:17) Nianang maong tumong, atong susihon ug dugang ang pipila sa ubang mga pananglitan sa mga hiyas nga mahimong maugmad ngadto sa mga kahuyangan, mga disbentaha pa ngani, kon pasagdan.
Gamita ang mga Katakos sa Panghunahuna sa Maalamong Paagi
Ang pagkautokan maoy usa gayod ka maayong hiyas. Sa gihapon, kini mahimong kahuyangan kon kini motultol ngadto sa sobrang pagsalig o magpahinabo kanatong maugmad ang mapahitas-ong panglantaw sa atong kaugalingon, ilabina kon ang uban sobrang magdayeg kanato o mag-ulog-ulog kanato. O kita mahimong makaugmad ug intelektuwal nga panglantaw sa Pulong sa Diyos ug sa tun-anang mga publikasyon nga pinasukad sa Bibliya.
Ang sobrang pagsalig mahimong madayag sa nagkalainlaing paagi. Pananglitan, sa dihang ang usa nga utokan makadawat ug bahin nga mopakigpulong sa Kristohanong kongregasyon, tingali usa ka pakigpulong publiko o pakigpulong sa Tunghaan sa Teokratikanhong Ministeryo, mahimong ihulat pa niya sa kataposang gutlo ang pagpangandam, tingali dili gani mag-ampo alang sa panalangin ni Jehova. Hinunoa, nagsalig siya sa iyang pondong kahibalo ug sa iyang katakos sa paghunahuna sa ekstemporanyong paagi. Ang kinaiyanhong katakos tingali magtabon sa iyang pagpasagad sa usa ka higayon, apan kay walay bug-os nga panalangin ni Jehova, ang iyang espirituwal nga pag-uswag mohinay, mahimong mohunong pa gani. Pagkausik sa usa ka maayong gasa!—Proverbio 3:5, 6; Santiago 3:1.
Ang usa nga may lantip nga panghunahuna tingali nakabaton ug intelektuwal nga panglantaw sa Bibliya ug sa mga tabang sa pagtuon sa Bibliya. Ugaling lang, ang maong kahibalo ‘magpaburot’ lamang, o magpaburot sa garbo sama sa balon; kini dili ‘magpalig-on’ sa mahigugmaong Kristohanong mga relasyon. (1 Corinto 8:1; Galacia 5:26) Sa laing bahin, ang espirituwal nga tawo, way-sapayan sa iyang mga katakos sa panghunahuna, kanunayng mag-ampo ug magsalig sa espiritu sa Diyos. Ang iyang hiyas mahimong labi pang mapuslanon samtang siya motubo diha sa gugma, kamapaubsanon, kahibalo, ug kaalam—ug ang tanan mahimo diha sa maayong pagkatimbang nga paagi.—Colosas 1:9, 10.
Ang katakos mahimong kahuyangan usab kon pinaagi niini atong maugmad ang mapahitas-ong panglantaw sa atong kaugalingon, nga magpakita ug kakulang sa pagkamakasaranganon. Ang usa ka utokang tawo—ug kadtong sobrang nagdayeg kaniya—mahimong nalimot nga si Jehova “dili mag-isip kang bisan kinsa nga maalamon sa ilang kaugalingong kasingkasing,” nga utokan bisag sila ingon tingali niana. (Job 37:24) “Ang kaalam anaa sa mga makasaranganon,” matod sa Pulong sa Diyos. (Proverbio 11:2) Si apostol Pablo, bisag intelihente kaayo ug taas ug kinaadman, miingon ngadto sa mga taga-Corinto: “Dihang ako mianha kaninyo, mga igsoon, wala ako moanha . . . uban ang paghinobra sa sinultihan o sa kaalam . . . ako mianha kaninyo sa kahuyang ug sa kahadlok ug uban ang labihan nga pagkurog; ug ang akong mga pamulong ug ang akong giwali maoy dili pinaagig makapakombensir nga mga pulong sa kaalam apan pinaagig pagpasundayag sa espiritu ug gahom, aron nga ang inyong pagtuo mahimo nga, dili diha sa kaalam sa tawo, apan diha sa gahom sa Diyos.”—1 Corinto 2:1-5.
Ang tinuod nga maalamong tawo dili malimbongan sa panglantaw sa kalibotan sa kinaadman, ni sa sukdanan niini sa kalamposan. Busa inay gamiton ang iyang mga katakos aron maangkon ang pag-uyon sa mga tawo o aron magtigom ug kalibotanong mga bahandi, iyang ihatag ang iyang labing maayo ngadto sa Usa nga maoy naghatag kaniya sa iyang kinabuhi ug mga katakos. (1 Juan 2:15-17) Sa maong tumong iyang unahon ang intereses sa Gingharian sa iyang kinabuhi, nga mahimong sama sa mabungahong “kahoy nga natanom daplin sa kasapaan sa tubig.” Tungod sa mga panalangin ni Jehova, dili sa iyang kinaiyanhong mga katakos, “ang tanan nga iyang ginabuhat magmalamposon.”—Salmo 1:1-3; Mateo 6:33.
Tugoting ang Kristiyanidad Magpauswag sa Imong Hiyas
Sa kinaiyahan mismo niini, ang Kristiyanidad dagaya kaayo sa mga hiyas nga ang kalibotanong mga pilosopiya huyang kaayo kon itandi niini. Ang Kristohanong paagi sa kinabuhi, pananglitan, nagpatunghag labing maayong mga bana ug mga asawa, labing maayong mga silingan, ug labing maayong mga empleyado—mga tawong matinud-anon, matinahuron, makigdaiton, ug makugihon. (Colosas 3:18-23) Dugang pa, ang Kristohanong pagbansay sa pagsulti ug pagtudlo mag-ugmad sa maayong mga katakos sa pagpakigkomunikar. (1 Timoteo 4:13-15) Busa, dili ikatingalang ang mga Kristohanon kasagarang maoy gusto sa ilang mga amo alang sa dugang mga kaakohan ug mga promosyon. Apan ang maong mga hiyas mahimong magamit usab sa sayop nga paagi kon dili bantayan ug maayo. Ang usa ka promosyon o makapadaning tanyag nga trabaho mahimong magpasabot ug pag-unong gayod sa kompaniya, dili pagtambong sa Kristohanong mga tigom nga makanunayon, o pagsakripisyo sa hinungdanong panahon uban sa pamilya sa usa.
Sa Australia ang usa ka Kristohanong ansiyano ug pamilyado, kinsa usa usab ka malamposon kaayong negosyante, “may kahigayonan nga maangkon ang kalibotan,” matod pa sa panultihon. Apan midumili siya sa tentasyon nga magmalamposon niining sistemaha. “Buot kong mogahin ug dugang panahon uban sa akong pamilya ug sa Kristohanong ministeryo,” siya miingon. “Busa ang akong asawa ug ako nagkauyon nga sa kamaampingon akong kunhoran ang gidaghanon sa panahon nga akong gigahin sa akong sekular nga trabaho. Nganong kinahanglang magtrabaho akog lima ka adlaw kada semana kon wala ko kana kinahanglana?” siya midugang. Pinaagi sa paghimog pipila ka maayong pagkaplanong mga kausaban sa iyang kinabuhi, kining ansiyanoha nakakaplag nga siya makaatiman gihapon sa iyang pamilya pinaagi sa pagtrabahog tulo o upat ka adlaw kada semana. Ngadtongadto, siya gidapit sa pag-ambit sa laing mga pribilehiyo sa pag-alagad, sama sa pag-alagad sa lokal nga Komite sa Assembly Hall ug sa administrasyon sa distritong kombensiyon. Kay maalamong pagkagamit, ang iyang mga hiyas naghatag kaniya ug sa iyang pamilya ug kalipay ug katagbawan.
Usa ka Timbang nga Tinamdan Ngadto sa mga Pribilehiyo
Ang Kristohanong mga lalaki gidasig nga mokab-ot ug mga pribilehiyo sa pag-alagad diha sa kongregasyon. “Kon si bisan kinsang tawhana nagapangab-ot sa katungdanan sa pagkamagtatan-aw [o ministeryal nga alagad], siya matinguhaon sa usa ka maayong buhat.” (1 Timoteo 3:1) Sama sa mga hiyas nga nahisgotan na, ang kaandam sa pagdawat ug mga kaakohan kinahanglang timbangan usab sa maayong panghukom. Kinahanglang walay usang modawat ug daghan kaayong asaynment nga siya mawad-an na sa iyang kalipay diha sa pag-alagad kang Jehova. Oo, dalayegon ang andam nga espiritu, sa pagkatinuod kinahanglanon, kay si Jehova dili mouyon sa tinamdan nga maglikaylikay sa trabaho; apan ang pagkaandam kinahanglang magbanaag usab sa pagkamakasaranganon ug “pagkamabuot sa hunahuna.”—Tito 2:12; Pinadayag 3:15, 16.
Ang kalumo, kahait sa panabot, ug kamabination ni Jesus naghimo bisan sa labing ubos nga mga tawo nga mobatig kahayahay uban kaniya. Susama karon, ang mga tawo mobatig kahayahay uban niadtong kansang hiyas maoy mabination, matinagdanong personalidad. Sa Kristohanong kongregasyon, ang mainiton, sayon duolon nga mga ansiyano sa pagkatinuod maoy gipabilhang “mga gasa nga mga tawo.” Sila maoy “tagoanang dapit gikan sa hangin ug usa ka salipdanang dapit gikan sa bagyo, sama sa mga sapa sa tubig sa usa ka mamala nga yuta, sama sa landong sa usa ka dako kaayong bato sa usa ka umaw nga yuta.”—Efeso 4:8; Isaias 32:2.
Apan ang mga ansiyano kinahanglang magtimbang sa panahong gigugol sa pagtabang sa uban sa ilang panginahanglan sa personal nga pagtuon, pagpamalandong, pag-ampo, ug publikong ministeryo. Siyempre, ang minyong mga ansiyano kinahanglang maggahin usab ug panahon alang sa ilang mga pamilya, kang kinsa sila ilabinang angay nga sayon duolon.
Takos nga mga Babaye—Usa ka Kahibulongang Panalangin
Sama sa takos nga mga ansiyano, ang mahunahunaon-sa-espirituwal nga mga babaye mapuslanon usab sa organisasyon ni Jehova. Sa katibuk-an, ang mga babaye may kinaiyanhong katakos nga maikag sa ubang mga tawo—usa ka hiyas nga gipabilhan ug gidasig ni Jehova. “Managtan-aw, dili sa personal nga kaayohan nianang mga butang labot sa inyong kaugalingon lamang, apan usab sa personal nga kaayohan nianang ila sa uban,” misulat si apostol Pablo. (Filipos 2:4) Apan, kining “personal nga kaayohan” dunay mga utlanan, kay walay Kristohanon nga buot mahimong “hilabtanon sa mga butang labot sa uban”; ni ang usa mahimong tabian.—1 Pedro 4:15; 1 Timoteo 5:13.
Ang mga babaye adunay daghang ubang mga gasa. Ang usa ka Kristohanong asawa, pananglitan, mahimong mas lantip ug panghunahuna kay sa iyang bana. Bisan pa niana, ingong “usa ka takos nga asawa” nga nahadlok kang Jehova, siya motahod sa iyang bana ug mogamit sa iyang mga gasa sa pagtabang kaniya, dili sa pagpakig-indig kaniya. Ug inay masina o masuko kaniya, ang maalamon, mapaubsanong bana magpabili sa mga hiyas sa iyang asawa ug magkalipay niini. Siya magdasig kaniya sa paggamit sa iyang mga katakos sa bug-os sa pagtukod sa iyang panimalay ug sa pagtabang sa iyang mga anak sa ‘pagkahadlok kang Jehova,’ sama sa iyang ginahimo mismo. (Proverbio 31:10, 28-30; Genesis 2:18) Ang maong makasaranganon, mapaubsanong mga bana ug mga asawa molampos sa mga kaminyoon nga magpasidungog gayod kang Jehova.
Pagkontrolar sa Agresibong Personalidad
Ang agresibong personalidad nga gipasukad sa pagkamatarong ug pagbuhat sa kabubut-on ni Jehova sa bug-os kalag mahimong usa ka bentaha kon ubanan sa pagkamakasaranganon ug pagkamapaubsanon. Bisan pa niana, kini mahimong kahuyangan kon kini magtukmod sa usa sa pagdominar o paghadlok sa uban. Kini tinuod ilabina sulod sa Kristohanong kongregasyon. Ang mga Kristohanon kinahanglang mobating relaks sa usag usa, lakip na sa dihang makig-uban sa mga ansiyano sa kongregasyon.—Mateo 20:25-27.
Sa baylo, ang mga ansiyano kinahanglang mobatig kahayahay sa pagpakig-uban sa usag usa. Ug sa dihang sila magmiting, ang balaang espiritu, dili ang puwersa sa personalidad, maoy kinahanglang mag-impluwensiya sa ilang mga desisyon. Sa pagkatinuod, ang balaang espiritu makaimpluwensiya ni bisan kinsang ansiyano diha sa lawas, lakip sa labing bata o labing hilomong ansiyano. Busa kadtong dunay mas agresibong mga personalidad, bisag gibati nilang sila maoy husto, kinahanglang magkontrolar sa ilang hiyas pinaagi sa pagkat-on sa arte sa pagpahiuyon, sa ingon ‘magpakitag pasidungog’ sa mga isigka-ansiyano. (Roma 12:10) Ang Ecclesiastes 7:16 malulotong nagpasidaan: “Ayaw pagpalabi sa pagkamatarong, ni magpakita nga ikaw hilabihan ka maalamon. Nganong laglagon mo ang imong kaugalingon?”
Si Jehova, ang Tinubdan sa “matag maayong gasa,” naggamit sa iyang makalilisang nga mga hiyas uban ang bug-os nga pagkahingpit. (Santiago 1:17; Deuteronomio 32:4) Ug siya ang atong Magtutudlo! Busa mokat-on kita kaniya ug maningkamot sa pag-ugmad sa atong kinaiyanhong mga gasa, o mga hiyas, ug sa paggamit niini sa maalamon, makasaranganon, ug mahigugmaong paagi. Unya kita mamahimong dakong panalangin ngadto sa uban!
[Mga hulagway sa panid 27]
Ang espirituwal nga pag-uswag nag-agad sa mainampoong pagtuon ug pagsalig kang Jehova
[Hulagway sa panid 29]
Ang personal nga interes inubanan sa pagkamakasaranganon maoy usa ka panalangin
[Picture Credit Line sa panid 26]
Courtesy of The Mariners’ Museum, Newport News, VA