Mga Pangutana Gikan sa mga Magbabasa

Sa kahayag sa mga sugo sa Bibliya bahin sa hustong paggamit sa dugo, unsay panglantaw sa mga Saksi ni Jehova sa medikal nga mga pamaagi nga naggamit sa kaugalingong dugo sa usa?

Inay kay mohukom lamang pinasukad sa personal nga kagustohan o sa usa ka medikal nga rekomendasyon, kinahanglang seryosong tagdon sa matag Kristohanon kon unsay gisulti sa Bibliya. Kini maoy butang tali kaniya ug kang Jehova.

Si Jehova, kang kinsa nautang nato ang atong kinabuhi, nagsugo nga ang dugo dili angayng kaonon. (Genesis 9:3, 4) Sa Balaod sa karaang Israel, gilimitehan sa Diyos ang paggamit sa dugo tungod kay kini naghawas sa kinabuhi. Siya nagsugo: “Ang kalag [o kinabuhi] sa unod anaa sa dugo, ug ako nagbutang niini diha sa halaran alang kaninyo aron sa paghimog pagtabon-sa-sala alang sa inyong mga kalag.” Komosta kon gipatay sa usa ka tawo ang hayop aron kaonon? Ang Diyos miingon: “Niana iya gayod nga ibubo ang dugo niini ug tabonan kini sa yuta.”a (Levitico 17:11, 13) Gisublisubli ni Jehova kini nga sugo. (Deuteronomio 12:16, 24; 15:23) Ang Hudiyohanong Soncino Chumash nag-ingon: “Ang dugo dili gayod tipigan kondili isipon nga dili-angayng kaonon pinaagi sa pagbubo niana diha sa yuta.” Walay Israelinhon ang kinahanglang maggahin, magtipig, maggamit sa dugo sa laing linalang, kansang kinabuhi gipanag-iya sa Diyos.

Ang obligasyon sa pagsunod sa Moisesnong Balaod natapos sa dihang ang Mesiyas namatay. Apan, ang panglantaw sa Diyos sa pagkasagrado sa dugo nagpabilin. Nga gipalihok sa balaang espiritu sa Diyos, ang mga apostoles nagsugo sa mga Kristohanon sa ‘paglikay sa dugo.’ Kanang sugoa dili angayng pakamenoson. Kana maoy sama kahinungdanon sa moral nga paagi sa paglikay sa seksuwal nga imoralidad o idolatriya. (Buhat 15:28, 29; 21:25) Sa dihang ang pagdonar ug pag-abonog dugo nahimong komon sa ika-20ng siglo, nasabtan sa mga Saksi ni Jehova nga kining batasana kasukwahi sa Pulong sa Diyos.b

Usahay, ang doktor mag-awhag sa pasyente sa pagdeposito sa iyang kaugalingong dugo mga semana una pa sa operasyon (preoperative autologous blood donation, o PAD) aron nga kon ang panginahanglan motungha, siya makaabono sa pasyente ginamit ang iyang kaugalingong gitipigan nga dugo. Apan, ang maong pagkolekta, pagtipig, ug pag-abono sa dugo laktod nga kasukwahi sa giingon sa Levitico ug Deuteronomio. Ang dugo dili kinahanglang tipigan; kini kinahanglang ibubo—ibalik sa Diyos, pagaingnon pa. Tinuod, ang Moisesnong Balaod wala na ipatuman karon. Bisan pa niana, ang mga Saksi ni Jehova nagtahod sa mga prinsipyo sa Diyos nga nalakip niana, ug sila determinadong ‘maglikay sa dugo.’ Busa, dili kami modonar ug dugo, ni among tipigan aron iabono ang among dugo nga angay untang “ibubo.” Ang maong buhat maoy supak sa balaod sa Diyos.

Ang laing mga pamaagi o mga pagsusi nga naglangkit sa kaugalingong dugo sa usa ka tawo dili kaayo tin-aw nga supak sa gipahayag nga mga prinsipyo sa Diyos. Pananglitan, daghang Kristohanon ang mitugot nga adunay tipik sa ilang dugo nga kuhaon aron susihon o analisahon, ug human niana ang sampol ilabay. Ang lain pang makuting mga pamaagi nga naglangkit sa dugo sa usa mahimong irekomendar usab sa mga mananambal.

Pananglitan, panahon sa pipila ka mga pamaagi sa pag-opera, dunay bahin sa dugo nga tingali ipatipas gikan sa lawas diha sa usa ka proseso nga gitawag ug hemodilution. Ang nahibiling dugo sa pasyente sambogan aron molasaw. Sa ulahi, ang iyang dugo nga gipatipas sa lawas pinaagig instrumento ibalik ngadto kaniya, sa ingon maghimo sa iyang ihap sa dugo nga mas duol sa normal. Sa susama, ang dugo nga moagas sa samad mahimong saluron ug salaon aron ang pulang mga selula mahimong ibalik ngadto sa pasyente; gitawag kini ug pagsalbar sa selula. Diha sa usa ka lahi nga proseso, ang dugo mahimong ipaagi sa usa ka makina nga temporaryong mohimo sa trabaho nga kinaiyanhong gihimo sa mga organo sa lawas (pananglitan, ang kasingkasing, mga baga, o mga rinyon). Dayon ang dugo gikan sa makina ibalik ngadto sa pasyente. Sa laing mga pamaagi, ang dugo ipatipas ngadto sa usa ka separator (centrifuge) aron ang makadaot o depektosong mga bahin niana mahimong mawagtang. O ang tumong tingali mao ang paglain sa pipila ka mga sangkap sa dugo ug idapat kana sa laing bahin sa lawas. Adunay mga pagsusi usab nga niana ang tinong gidaghanon sa dugo kuhaon aron mamarkahan kana o masambogan ug medisina ang nakuhang dugo, nga human niana kini ibalik ngadto sa pasyente.

Ang mga detalye mahimong magkalahi, ug ang bag-ong mga pamaagi, pagtambal, ug mga pagsusi tinong maugmad. Dili among responsabilidad ang pag-analisar sa matag kalainan ug mohimog desisyon. Ang usa ka Kristohanon kinahanglang mohukom alang sa iyang kaugalingon kon sa unsang paagi gamiton ang iyang dugo panahon sa pag-opera, medikal nga pagsusi, o padayong pagtambal. Kinahanglang mangayo siyang daan ug mga impormasyon gikan sa doktor o teknisyan bahin sa kon unsay lagmit nga himoon sa iyang dugo panahon sa maong pamaagi. Dayon siya kinahanglang mohukom sumala sa itugot sa iyang tanlag. (Tan-awa ang kahon.)

Kinahanglang hinumdoman sa mga Kristohanon ang ilang dedikasyon ngadto sa Diyos ug obligasyon ‘sa paghigugma kaniya uban sa tibuok nilang kasingkasing, tibuok kalag, tibuok kusog, ug sa tibuok kaisipan.’ (Lucas 10:27) Dili sama sa kadaghanan sa kalibotan, ang mga Saksi ni Jehova nagpabili pag-ayo sa ilang maayong relasyon uban sa Diyos. Ang Maghahatag-Kinabuhi nag-awhag sa tanan sa pagsalig sa giulang dugo ni Jesus. Atong mabasa: “Pinaagi kaniya [Jesu-Kristo] atong nabatonan ang kapagawasan pinaagig lukat pinaagi sa dugo niana nga usa, oo, ang kapasayloan sa atong kalapasan.”—Efeso 1:7.

[Mga footnote]

[Kahon/Mga hulagway sa panid 31]

MGA PANGUTANA NGA ISUKNA SA IMONG KAUGALINGON

Kon adunay bahin sa akong dugo nga ipatipas sa gawas sa akong lawas ug ang pag-agos mahimo pa ganing hunongon sa makadiyot, ang ako bang tanlag motugot kanako nga lantawon kining maong dugo ingong bahin pa kanako, busa dili na kinahanglan nga kini ‘ibubo sa yuta’?

Ang ako bang nabansay-sa-Bibliya nga tanlag mahasol kon panahon sa usa ka pagdayagnos o pamaagi sa pagtambal adunay bahin sa akong dugo nga kuhaon, prosesohon, ug ibalik pag-usab sa akong lawas?