Mahimong Imong Mabatonan ang mga Panalangin sa Gingharian

ANG Kristohanong si apostol Pablo larino sa pipila ka pangunang pinulongan sa iyang adlaw. Nakadawat siyag katumbas nga edukasyon nga makuha sa unibersidad karong adlawa. Nabatonan niya ang tanang bentaha ug mga katungod sa usa ka lungsoranong Romano. (Buhat 21:37-40; 22:3, 28) Kini nga mga kalig-onan magpaarang unta kaniya nga mahimong dato ug bantogan. Bisan pa niana, siya miingon: “Ang mga butang nga kaniadto maoy ganansiya alang kanako, kini giisip ko nga kapildihan tungod kang Kristo . . . ug giisip kini nga mga basura, aron akong maangkon si Kristo.” (Filipos 3:7, 8) Nganong ingon niana ang gipahayag ni Pablo?

Nga nailhan kaniadto ingong Saulo sa Tarso ug ingong maglulutos niadtong “kinsa iya sa Dalan,” si Pablo nahimong magtutuo human hatagig panan-awon bahin sa nabanhaw ug nahimayang si Jesus. (Buhat 9:1-19) Alang kang Pablo, kining kasinatiana nga nahitabo diha sa dalan paingon sa Damasco nagpamatuod gayod pag-ayo nga si Jesus mao ang gisaad nga Mesiyas, o Kristo, ang umaabot nga magmamando sa gisaad nga Gingharian. Nagpahinabo usab kini ug dramatikanhong kausaban sa dalan sa kinabuhi ni Pablo, ingon sa gipaila sa iyang kusganong pahayag nga gihisgotan sa itaas. Sa laing pagkasulti, kay tim-os ug matinud-anon sa kasingkasing, si Pablo naghinulsol.—Galacia 1:13-16.

Sa Bibliya, ang berbong “paghinulsol” sagad gihubad gikan sa Gregong pulong nga sa literal nagkahulogang “human mahibalo,” nga sukwahi sa “nahibalong daan.” Busa, ang paghinulsol naglangkit sa kausaban sa hunahuna, tinamdan, o katuyoan sa usa ka tawo, pagsalikway sa iyang kanhing mga dalan ingong dili kahimut-anan. (Buhat 3:19; Pinadayag 2:5) Sa kahimtang ni Pablo, wala niya pasagding ang maong talagsaong hitabo diha sa dalan paingon sa Damasco magpabiling usa ka makatandog lamang sa pagbati o yanong usa ka relihiyosong kasinatian. Alang kaniya kadto maoy pagkaamgo sa kamatuoran nga ang iyang kanhing dalan sa kinabuhi, diha sa kawalay-alamag bahin kang Kristo, maoy kawang. Nakaamgo usab siya nga aron makabaton ug kaayohan gikan sa iyang bag-ong nakaplagang kahibalo bahin kang Kristo, kinahanglang duna siyay buhaton sa pagtul-id sa iyang dalan sa kinabuhi.—Roma 2:4; Efeso 4:24.

Kausaban nga Nagdalag mga Panalangin

Sa miagi, ang kahibalo ni Pablo bahin sa Diyos sa dakong bahin naggikan sa sekta sa mga Pariseo, nga niana siya usa ka membro. Ang ilang mga pagtulon-an naglakip sa daghang tawhanong pilosopiya ug tradisyon. Tungod sa mga pagpihig sa relihiyon, ang kasibot ug mga paningkamot ni Pablo gihimo sa sayop nga paagi. Bisan tuod siya nagtuo nga siya nag-alagad sa Diyos, siya sa pagkatinuod nakig-away batok kaniya.—Filipos 3:5, 6.

Human makadawat ug tukmang kahibalo bahin kang Kristo ug sa iyang papel diha sa katuyoan sa Diyos, nasabtan ni Pablo nga siya angayng mohimog pagpili: Angay ba siyang magpabilin nga usa ka Pariseo ug magpadayon sa paghupot sa posisyon ug pagtamod, o angay ba siyang mag-usab sa iyang dalan sa kinabuhi ug magsugod sa pagbuhat sa bisan unsa nga gikinahanglang buhaton aron mabatonan ang pag-uyon sa Diyos? Ikalipay, husto ang napili ni Pablo, kay siya miingon: “Wala ko ikaulaw ang maayong balita; kini, sa pagkatinuod, gahom sa Diyos alang sa kaluwasan sa matag usa nga may pagtuo, una ngadto sa Hudiyo ug usab ngadto sa Grego.” (Roma 1:16) Si Pablo nahimong usa ka masibotong magwawali sa maayong balita bahin kang Kristo ug sa Gingharian.

Daghang tuig sa ulahi, gisultihan ni Pablo ang iyang mga isigka-Kristohanon: “Wala ko pa isipa ang akong kaugalingon nga nakahupot na niini; apan may usa ka butang bahin niini: Ginakalimtan ang mga butang sa luyo ug nagapangab-ot sa mga butang sa unahan, ako nagapangagpas sa tumong alang sa ganti nga pagkatinawag sa Diyos ngadto sa itaas pinaagi ni Kristo Jesus.” (Filipos 3:13, 14) Nakabatog kaayohan si Pablo gikan sa maayong balita tungod kay andam niyang gisalikway ang mga butang nga nagpahilayo kaniya sa Diyos ug kinasingkasing siya nga nangagpas sa mga tumong nga nahiuyon sa katuyoan sa Diyos.

Unsay Imong Buhaton?

Tingali bag-o lang nimong nadungog ang maayong balita sa Gingharian. Nakadani ba kanimo ang paglaom nga mabuhing walay kataposan sa usa ka hingpit nga paraiso? Kinaiyanhon lamang nga madani bahin niana, kay kitang tanan dunay dala sa pagkatawong tinguha nga mabuhi ug motagamtam sa kinabuhi diha sa pakigdait ug kasegurohan. Nag-ingon ang Bibliya nga ang Diyos nagbutang sa “panahong walay tino” diha sa atong kasingkasing. (Ecclesiastes 3:11) Busa kinaiyanhon alang kanato nga molaom sa panahon sa dihang ang katawhan mabuhing walay kataposan sa pakigdait ug kalipay. Ug mao kana ang ginatanyag sa maayong balita sa Gingharian.

Aron matinuod kana nga paglaom, hinunoa, kinahanglan nimong susihon ug sutaon kon bahin sa unsa ang maayong balita. Si apostol Pablo nagtambag: ‘Pamatud-i sa [inyong kaugalingon] ang maayo ug dalawaton ug hingpit nga kabubut-on sa Diyos.’ (Roma 12:2) Busa, sama kang Pablo, human makabaton ug kahibalo ug pagsabot, ikaw kinahanglang mohimog pagpili.

Sa laing bahin, ikaw tingali duna nay pipila ka gituohan labot sa imong umaabot. Hinumdomi nga si Saulo duna nay mga ideya bahin sa kabubut-on sa Diyos una pa nahimong si apostol Pablo. Apan imbes dahomon ang milagrosong pagpadayag gikan sa Diyos, nganong dili susihon ang maong butang sa makataronganong paagi? Pangutan-a ang imong kaugalingon: ‘Nahibalo ba gayod ako kon unsa ang kabubut-on sa Diyos bahin sa tawo ug sa yuta? Unsang pamatuod ang akong ikapakita aron paluyohan ang akong mga pagtulon-an? Makabarog ba ang akong mga pamatuod kon susihon kini sumala sa kahayag sa Pulong sa Diyos, ang Bibliya?’ Walay mawala kanimo sa pagsusi sa imong relihiyosong mga pagtulon-an niining paagiha. Sa pagkatinuod, angay nimong buhaton kana tungod kay ang Bibliya nag-awhag kanato: “Tinoa ang tanang butang; pangupti pag-ayo ang maayo.” (1 Tesalonica 5:21) Kon hunahunaon, dili ba ang pag-uyon sa Diyos ang labing hinungdanon?—Juan 17:3; 1 Timoteo 2:3, 4.

Ang relihiyosong mga lider lagmit mosaad kanato sa usa ka walay kataposang umaabot. Apan gawas kon kana nga saad ipasukad diha sa mga pagtulon-an sa Bibliya, dili kana motabang kanato sa pagbaton sa mga panalangin sa Gingharian sa Diyos. Sa iyang bantogang Wali sa Bukid, si Jesus kusganong nagpasidaan: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit.”—Mateo 7:21.

Matikdi ang pagpasiugda ni Jesus sa pagbuhat sa kabubut-on sa iyang Amahan ingong kinahanglanon aron madawat ang mga panalangin sa Gingharian sa Diyos. Sa laing pagkasulti, ang pagkahimong diyosnon tan-awon wala magkahulogan nga giuyonan na sa Diyos. Sa pagkatinuod, si Jesus nagpadayon sa pag-ingon: “Daghan ang moingon kanako nianang adlawa, ‘Ginoo, Ginoo, wala ba kami managna sa imong ngalan, ug naghingilin sa mga demonyo sa imong ngalan, ug naghimog daghang gamhanang mga buhat sa imong ngalan?’ Ug unya ako magaingon kanila: Wala gayod ako makaila kaninyo! Pahilayo gikan kanako, kamong mga mamumuhat sa kalapasan.” (Mateo 7:22, 23) Tin-aw, ang hinungdanon mao nga atong tinoon nga tukma natong masabtan kon unsa gayod ang maayong balita sa Gingharian ug unya molihok nga uyon niana.—Mateo 7:24, 25.

Tabang nga Mabatonan

Sa kapin ug 100 ka tuig, ang mga Saksi ni Jehova nagasangyaw sa maayong balita sa Gingharian sa Diyos. Pinaagi sa pinatik nga pahina ug sa binaba, sila nagatabang sa mga tawo sa tibuok kalibotan aron makabaton ug tukmang kahibalo kon unsa ang Gingharian, kon unsang mga panalangin ang itagana niini, ug kon unsay buhaton sa usa ka tawo aron makabaton sa maong mga panalangin.

Gidasig ka namo nga mosanong sa mensahe nga ginasangyaw sa mga Saksi ni Jehova. Pinaagi sa pagdawat ug paglihok nga uyon sa maayong balita, ikaw makadawat sa dagkong mga panalangin dili lamang karon kondili usab sa umaabot sa dihang magmando na ang Gingharian sa Diyos sa tibuok yuta.—1 Timoteo 4:8.

Lihok na karon, kay ang mga panalangin sa Gingharian sa Diyos haduol na!

[Mga hulagway sa panid 7]

Pinaagi sa pinatik nga pahina ug sa binaba, ang mga Saksi ni Jehova nagasangyaw sa maayong balita sa Gingharian sa Diyos