Mga Magmamantala sa Gingharian Nagtaho

India—Usa ka “Panaghiusa Taliwala sa Panagkalahi”

“PANAGHIUSA Taliwala sa Panagkalahi” maoy usa ka popular nga eslogan nga gigamit sa paghulagway sa nasodnong panaghiusa sa India. Dili gayod sayon ang pagkab-ot sa panaghiusa taliwala niining dakong nasod nga nagkalahi pag-ayo ang kultura, pinulongan, relihiyon, etnikong mga kagikan, pamesti, ug pagkaon. Hinunoa, ang maong panaghiusa makita sa administratibong buhatan sa mga Saksi ni Jehova sa India, bisan tuod nga ang mga boluntaryo nga nagpuyo ug nagtrabaho didto nagagikan sa daghang estado ug nahiusang mga teritoryo ug nagasulti sa daghang lainlaing pinulongan.

• Himamata si Rajrani—usa ka batan-ong babaye nga taga-Punjab, sa tumoy nga dapit sa amihanang-kasadpan sa India. Sa dihang nagtungha pa si Rajrani, usa sa iyang mga klasmet nagtuon sa Bibliya uban sa mga Saksi ni Jehova. Kining batan-on nga babaye nagdasig kang Rajrani sa pagbaton ug interes sa Bibliya. Tungod kay ang iyang klasmet limitado ug kahibalo sa Ingles ug Ang Bantayanang Torre dili pa mabatonan sa Punjabi nianang panahona, iyang gihangyo usab ang tabang ni Rajrani nga hubaron ang mga kaundan sa magasin alang kaniya. Ang nabasa ni Rajrani sa Ang Bantayanang Torre nakatandog pag-ayo kaniya nga bisan pa sa pagsupak sa iyang mga ginikanan, siya miuswag hangtod sa punto sa pagpahinungod sa iyang kinabuhi kang Jehova nga Diyos. Nag-alagad sa Bethel sa India karong adlawa, iyang ginahimo ang samang butang nga maoy nagbukas sa iyang mga mata sa kamatuoran. Siya nagahubad sa Kristohanong mga publikasyon ngadto sa Punjabi!

• Tagda usab si Bijoe, nga nagagikan sa laing bahin sa India—sa habagatan-kasadpang estado sa Kerala. Si Bijoe gipalagpot gikan sa hayskul tungod sa pagpabiling neyutral panahon sa nasyonalistikanhong mga seremonya. Human sa taas nga panahong kaso sa korte nga misangko sa halandomong kadaogan sa putling pagsimba, si Bijoe mibalik pag-eskuyla.a Siya usab nagpadayon pagtungha sa kolehiyo. Hinunoa, ang imoral nga palibot sa tunghaan nakahasol sa iyang tanlag, busa siya miundang sa iyang unang semestre. Karon human sa napulo ka tuig sa Bethel, iyang gibati nga siya nakabenepisyog labaw pa tungod sa pagkahimong membro sa nagkalahi apan nahiusang pamilya sa Bethel kay sa iyang mabatonan pinaagi sa pagpangagpas sa mas taas nga edukasyon.

• Si Norma ug si Lily parehong nag-edad ug kapin sa 70 ka tuig ug mga balo sa daghan nang katuigan. Ang matag usa adunay kapin sa 40 ka tuig sa bug-os-panahong pag-alagad. Sulod na sa mga 20 ka tuig nga si Lily nagtrabaho sa sangang buhatan ingong usa ka maghuhubad sa Tamil nga pinulongan. Si Norma misulod sa Bethel mga 13 na ka tuig ang milabay human mamatay ang iyang bana. Gawas pa sa maayong mga panig-ingnan ingong kugihan ug matanlagong mga magbubuhat, sila nakahatag ug makapahiusang impluwensiya sa tibuok pamilyang Bethel. Sila malipay nga moabiabi ug mga bisita, ug sila mahimuot nga makigsandurot sa mas batan-ong mga membro sa pamilya, nga nagpakig-ambit sa mga kalipay sa taas nga katuigan sa Kristohanong pagkinabuhi. Ug ang mga batan-on mobalos pinaagi sa pagdapit kanila ngadto sa ilang mga lawak alang sa asosasyon ug sa paghatag kanilag tabang kon gikinahanglan. Pagkamaayong mga panig-ingnan!

Tungod kay nakabuntog sa mga panagkalahi nga nagpatunghag panagbangi ug kawalay-panagkauyon sa daghang dapit, kining maong mga boluntaryo malipayong nagtambayayongay sa pag-alagad sa uban ingong mga membro sa nahiusa nga pamilyang Bethel sa India.—Salmo 133:1.

[Footnote]

[Picture Credit Line sa panid 8]

Background: Mountain High Maps® Copyright © 1997 Digital Wisdom, Inc.