Pagbaton ug Seguridad Karon nga Molungtad sa Walay Kataposan

NGANONG ang seguridad kasagarang malisod pangitaon ug, kon makaplagan, kini temporaryo lang? Dili kaha nga ang atong pagsabot sa seguridad gipasukad lang sa paghanduraw—kon unsay atong gilaoman nga kab-oton inay kay sa kon unsay tinuod nga makab-ot? Ang maong ilusyon matawag nga pagkinabuhi diha sa kalibotan sa handurawan.

Ang paghanduraw magpahinabo sa hunahuna nga biyaan ang tinuod nga kahimtang sa kinabuhi lakip ang kawalay-seguridad niini ug mosulod sa usa ka matahom, may-seguridad nga kahimtang, nga magsalikway sa bisan unsang butang nga makadaot sa maong kalibotan sa handurawan. Ugaling lang, ang mga problema sa tinuod nga kalibotan kasagarang kalit nga mosugok niining kalibotan sa handurawan ug way-puas nga magpapas sa nindot nga pagbati, nga makapapugwat sa tighanduraw sa tinuod nga kahimtang.

Atong tagdon ang usa ka bahin diin ang mga tawo nangitag seguridad—ang dapit. Pananglitan, ang dakong siyudad daw maghatag ug kalaoman sa kalamposan, nga makapahanduraw kanimo ug mga paglingawlingaw, dagkong mga suweldo, ug nindot nga mga puy-anan. Oo, morag nagtanyag kini sa dugay nang gihandom nga seguridad. Apan realistikanhon ba kining maong paghanduraw?

Dapit—Dakong Siyudad o Dagko Lang nga mga Pangandoy?

Sa nagaugmad nga kanasoran, makapadani ang dakong siyudad tungod kay gipasiugda kini sa panganunsiyo nga makatental sa mga tawong dagkog mga pangandoy. Ang mga organisasyon nga nag-esponsor sa maong mga panganunsiyo dili kanunayng interesado sa imong seguridad kondili, hinunoa, sa ilang mga halin. Dili nila isulti ang mga problemang tinuod nga naglungtad, hinunoa ilang ipakita ang mga esena sa kalamposan nga naglarawan ug seguridad. Sa ingon, ang seguridad nalangkit na sa ilang gianunsiyo nga produkto ug sa dakong siyudad.

Tagda ang mosunod nga pananglitan. Ang mga opisyales sa usa ka siyudad sa Kasadpang Aprika namutang ug mga karatula nga klaro kaayong naghulagway nga ang pagtabako sa pagkatinuod sama ra sa pagsunog ug hinagoang salapi. Kana maoy bahin sa usa ka kampanya sa pagpasidaan sa mga lungsoranon niini batok sa pagtabako. Ang mga tiggama ug ang mga tigbaligya ug sigarilyo mibalos pinaagi sa pagbutang ug mga karatula nga tusong pagkadisenyo nga nagpasundayag sa mga tigtabako diha sa makapadaning mga esena sa kalipay ug kalamposan. Dugang pa, ang usa ka kompaniya sa sigarilyo nagpasul-ob sa pipila ka empleyado niini ug maartehong mga uniporme ug magarbohong mga kalo sa besbol samtang nang-apod-apod ug mga sigarilyo sa mga batan-on sa kadalanan, nga nagdasig sa matag usa sa “pagsulay niini.” Daghan niining mga batan-ona naggikan sa mga baryo ug, tungod kay walay kalibotan sa tusong mga pamaagi sa panganunsiyo, nalimbongan niini nga pag-agni. Sila nahimong mga hinabako. Ang batan-ong mga taga-baryo nangadto sa dakong siyudad sa pagpangitag seguridad aron makasuportar sa ilang mga pamilya o aron magmalamposon sa pinansiyal. Hinunoa, ilang gisunog ang dakong bahin sa salapi nga magamit unta nila sa mas maayong mga katuyoan.

Ang mga panganunsiyo nga naghulagway sa malamposong kinabuhi sa dakong siyudad dili kanunayng maggikan sa mga negosyante. Tingali isulti kini sa mga tawo nga namalhin ngadto sa dakong siyudad ug maulaw nga mopauli sa ilang baryo. Kay dili nila buot nga hunahunaon sa uban nga sila napakyas, magpasiatab sila sa bahandi ug kalamposan nga ilang nakaplagan konohay sa siyudad. Apan, ang pagsusi pag-ayo sa ilang giangkon nga kahimtang nagpadayag nga ang ilang presenteng estilo sa kinabuhi wala moarang-arang kon itandi sa ilang kinabuhi kaniadto sa baryo; sila naglisod gihapon sa pinansiyal sama sa kadaghanan sa ubang mga tawo nga namuyo sa siyudad.

Diha sa dagkong mga siyudad, ang bag-ong nangabot nga nangitag seguridad ilabinang mabiktima sa mga tawong walay prinsipyo. Ngano man? Kasagaran, wala silay panahon sa pag-ugmad ug suod nga panaghigalaay ug layo sila sa mga membro sa ilang pamilya. Busa walay motambag kanila nga makatabang unta kanila sa paglikay sa mga lit-ag sa materyalistikong pagkinabuhi sa siyudad.

Si Josué wala matental nga manabako. Dugang pa, nakita niya nga wala siyay katakos sa pag-atubang nga malamposon sa mga hagit sa kinabuhi sa siyudad. Sa iyang kaso, ubos sa labing maayong mga kahimtang, ang bugtong butang nga ikatanyag ra gayod sa siyudad kaniya mao ang dagko, wala matuman nga mga ambisyon. Iyang naila nga siya walay tinuod nga seguridad diha sa siyudad; siya dili gayod mohaom sa pagkinabuhi sa siyudad. Gidaog siya sa mga pagbati sa kahaw-ang, pagkaubos, ug kapakyasan, ug ngadtongadto iyang gitulon ang iyang garbo ug mipauli sa baryo.

Nabalaka siya nga pagayubiton. Hinunoa, ang iyang pamilya ug tinuod nga mga higala kinasingkasing nga nagdawat kaniya ug balik. Tungod sa pagkamainiton sa iyang pamilya, sa pamilyar nga palibot sa baryo, ug sa gugma sa iyang mga higala sa Kristohanong kongregasyon, wala madugay siya mibati ug mas dakong seguridad kay sa didto sa dakong siyudad, diin ang mga ambisyon sa daghang tawo nahimong makalilisang nga mga kasinatian. Sa iyang katingala, ang nahitabo mao nga ang paghago uban sa iyang amahan diha sa umahan nakahatag kaniya ug sa iyang pamilya ug mas dako nga kita kay sa limpiyong kita nga mabatonan unta niya sa siyudad.

Salapi—Unsa ang Tinuod nga Problema?

Ang salapi ba makahatag kanimo ug pagbati sa seguridad? Si Liz nga taga-Canada nag-ingon: “Sa bata pa, ako nagtuo nga ang salapi makapawala sa kabalaka.” Nahigugma siya sa usa ka lalaki nga adunahan. Wala madugay nagminyo sila. Mibati na ba siya ug seguridad? Si Liz mipadayon: “Sa dihang minyo na ako, kami may nindot nga balay ug duha ka kotse, ug tungod sa among pinansiyal nga kahimtang napahimuslan namo ang halos bisan unsa maylabot sa materyal nga mga butang, pagbiyahe, ug kalingawan. Apan katingad-an nga nabalaka gihapon ako bahin sa salapi.” Iyang gipatin-aw kon ngano: “Dako kaayo ang puwedeng mawala kanamo. Mopatim-aw nga kon mas daghan ang imong mabatonan, mas bation nimo ang kawalay-seguridad. Ang salapi wala makapawala sa kabalaka o kahadlok.”

Kon ikaw nagtuo nga ikaw dili mobati ug seguridad tungod kay ikaw walay igong salapi, pangutan-a ang imong kaugalingon, ‘Unsa ang tinuod nga problema? Kakulang ba gayod sa salapi, o dili maalamong pagdumala sa salapi?’ Sa pagpalandong sa iyang kaagi, si Liz miingon: “Karon ako nakaamgo nga ang hinungdan sa mga problema sa akong pamilya sa bata pa ako mao ang dili maayong pagdumala sa salapi. Mamalit kami pinaagig utang, ug busa kami kanunayng nagbaguod sa utang. Kini nakahatag ug kabalaka.”

Apan, karon mas dakong seguridad ang gibati ni Liz ug sa iyang bana, bisan pag diyutay ang ilang salapi. Sa dihang sila nakakat-on sa kamatuoran sa Pulong sa Diyos, sila mihunong sa pagpamati sa makatental nga mga pangangkon bahin sa salapi ug nagsugod sa pagpamati sa kaalam sa Diyos, lakip niining mga pulonga: “Kon bahin sa nagapatalinghog kanako, siya magapuyo sa kasegurohan ug dili matugaw sa kalisang sa katalagman.” (Proverbio 1:33) Buot nila nga makabaton ug dakong kahulogan ang ilang kinabuhi kay sa ikahatag sa dagkong pondo sa bangko. Karon, ingong mga misyonaryo sa usa ka halayo nga nasod, si Liz ug ang iyang bana nagtudlo sa adunahan ug kabos nga mga tawo nga sa dili madugay ipahinabo ni Jehova nga Diyos ang tinuod nga seguridad sa tibuok yuta. Kini nga kalihokan naghatag ug dulot nga katagbawan ug kasegurohan nga nagsumikad sa usa ka superyor nga katuyoan ug taas kaayong mga sukdanan, dili sa pinansiyal nga ganansiya.

Hinumdomi kining paninugdang kamatuoran: Ang pagkadato ngadto sa Diyos mas labi pang bililhon kay sa pagbaton ug materyal nga mga bahandi. Sa tibuok nga Sagradong Kasulatan, wala ipasiugda ang pag-angkon ug materyal nga mga bahandi, kondili ang pagbaton ug maayong baroganan kang Jehova, maayong baroganan nga atong mahuptan pinaagi sa padayong paghimo sa kabubut-on sa Diyos diha sa pagtuo. Si Kristo Jesus nagdasig kanato sa pagkahimong “dato ngadto sa Diyos” ug sa pagtigom ug “bahandi sa mga langit.”—Lucas 12:21, 33.

Kahimtang—Unsay Imong Kab-oton?

Kon ikaw matental sa pagtuo nga ang pagbaton ug mas taas nga kahimtang diha sa katilingban mao ang dalan paingon sa seguridad, pangutan-a ang imong kaugalingon: ‘Kinsa diha sa katilingban ang nakabaton na gayod ug tinuod nga seguridad? Unsang kahimtanga ang kinahanglan nakong kab-oton aron mabatonan kini?’ Ang usa ka malamposong karera mahimong mohatag kanimo ug sayop nga pagbati sa seguridad, nga mosangpot sa kahigawad o, mas daotan pa, sa grabeng pagkapukan.

Ang tinuod nga mga eksperyensiya nagpakita nga ang maayong ngalan uban sa Diyos mohatag ug mas labaw pang seguridad kay sa usa ka ngalan nga ilhon sa tawo. Si Jehova lamang ang makahatag sa mga tawo ug gasa nga kinabuhing dayon. Naglakip kana sa pagsulat sa atong ngalan, dili diha sa listahan sa mga ngalan sa iladong mga tawo sa katilingban, kondili diha sa iya sa Diyos nga basahon sa kinabuhi.—Exodo 32:32; Pinadayag 3:5.

Kon imong ihiklin ang mahandurawong hunahuna, unsay imong pagtimbangtimbang sa imong presenteng kahimtang, ug unsay imong matinud-anong gidahom sa umaabot? Walay tawo nga nagbaton sa tanang butang. Sumala sa pagkasulti niini sa usa ka maalamong Kristohanon, “Akong nakat-onan nga dili puwedeng mabatonan nimo ang tanan sa kinabuhi, ikaw kinahanglang mopili.” Hunong sa makadiyot ug basaha ang kahong “Giasoy Didto sa Benin.”

Karon tubaga kining mga pangutanaha: Unsa ang hinungdanong padulngan, o tumong, sa akong kinabuhi? Unsa ang kinalaktorang dalan aron makaabot didto? Dili kaha taas, walay-seguridad nga agianan kining akong gisubay ug ang akong tinuod nga gusto ug kon unsay posible sa realistikanhong paagi puwede ra diayng makab-ot pinaagi sa pagsubay ug dili kaayo komplikadong dalan?

Human magtambag bahin sa relatibong bili sa materyal nga mga butang kon itandi sa bili sa espirituwal nga mga butang, si Jesus namulong nga huptang “yano” ang mata. (Mateo 6:22) Iyang gitin-aw nga ang pangunang mga butang sa kinabuhi maoy espirituwal nga mga sukdanan ug mga tumong nga nasentro sa ngalan sa Diyos ug sa iyang Gingharian. (Mateo 6:9, 10) Ang ubang mga butang dili kaayo hinungdanon o, ingnon ta, dili mao ang sentro sa pagtagad.

Ang daghang kamera karon awtomatikong mo-focus sa mga butang sa layo ug sa duol. Ikaw ba adunay kiling nga sama niana? Ang halos tanang butang ba nga imong makita na-focus—sa ato pa, hinungdanon, tilinguhaon ug, tungod sa mahandurawong hunahuna, imong gituohang makab-ot? Kon tinuod kini bisan sa gamay lang nga sukod, ang hinungdanong butang alang sa mga Kristohanon, ang Gingharian, daling mawala tungod sa kadaghan sa ubang mga esena, nga ang matag usa buot nga mokuha sa imong pagtagad. Mao kini ang kusganong pahimangno ni Jesus: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.”—Mateo 6:33.

Seguridad Karon ug sa Umaabot

Kitang tanan nangandoy ug maayong mga butang alang sa atong kaugalingon ug sa atong mga hinigugma. Apan, tungod kay kita dili-hingpit, nagpuyo sa dili-hingpit nga kalibotan, ug dunay mubong kinabuhi, kita mapugos sa paglimite sa mga butang nga atong gilaomang kab-oton sa realistikanhong paagi. Usa ka magsusulat sa Bibliya linibo ka tuig kanhi mipatin-aw: “Ako mibalik sa pagtan-aw ilalom sa adlaw nga ang lumba dili alang sa mga matulin, ni ang gubat alang sa mga gamhanan, ni ang pagkaon alang sa mga maalamon, ni ang mga bahandi alang sa mga masinaboton, ni ang pabor alang kanilang adunay kahibalo; tungod kay ang panahon ug ang wala damhang panghitabo modangat kanilang tanan.”—Ecclesiastes 9:11.

Usahay kita malinga pag-ayo sa makalapoy nga rutina sa inadlaw-adlawng kinabuhi nga malimot kita sa pagtan-aw sa mas hinungdanong butang nga mao, kon kinsa kita ug kon unsa gayoy atong gikinahanglan aron mobati ug tinuod nga seguridad. Tagda kining karaang mga pulong sa kaalam: “Kon ikaw nahigugma sa salapi, ikaw dili gayod matagbaw; kon ikaw nangandoy nga maadunahan, ikaw dili gayod makabaton sa tanan nimong gusto. Kini walay pulos. Ang usa ka mamumuo duna o wala tingaliy igong makaon, apan makatulog gihapon siya. Apan, ang adunahan daghan kaayog nabatonan nga dili siya makatulog tungod sa kabalaka.” (Ecclesiastes 5:10, 12, Today’s English Version) Oo, unsay imong gisaligan nga makahatag kanimo ug seguridad?

Kon ang imong kahimtang medyo sama sa dili-realistikanhong ambisyon ni Josué, mausab ba nimo ang imong mga plano? Paluyohan ka niadtong tinuod nga nahigugma kanimo, sama sa gihimo sa pamilya ug mga higala ni Josué diha sa Kristohanong kongregasyon. Ikaw mahimong makakaplag ug mas dakong seguridad diha sa ubos nga palibot uban niadtong nahigugma kanimo kay sa siyudad uban niadtong nagtinguha tingali sa pagpahimulos kanimo.

Kon ikaw adunahan na, sama ni Liz ug sa iyang bana, mapasibo ba nimo ang imong estilo sa kinabuhi sa paghatag ug dugang panahon ug kusog sa pagtabang sa mga tawo, adunahan man o kabos, sa pagkat-on bahin sa Gingharian, ang instrumento sa pag-angkon ug tinuod nga seguridad?

Kon ikaw naningkamot sa pagkab-ot ug mas taas nga kahimtang diha sa katilingban o sa imong trabahoan, basin buot nimong mamalandong sa matinud-anon gayod kon unsay nagtukmod kanimo. Tinuod, ang pipila ka personal nga mga kaharuhay makadugang sa kalipay sa kinabuhi. Apan, imo bang gihuptan nga sentro sa imong pagtagad ang Gingharian—ang tinuod nga instrumento sa pagkab-ot sa dumalayong seguridad? Hinumdomi ang mga pulong ni Jesus: “Adunay labaw nga kalipay sa paghatag kay sa pagdawat.” (Buhat 20:35) Kon makigbahin ka sa lainlaing mga kalihokan diha sa Kristohanong kongregasyon, imong maeksperyensiyahan ang magantihong seguridad.

Kadtong naghatag ug bug-os nga pagsalig kang Jehova ug sa iyang Gingharian mouswag tungod sa makapalipay nga seguridad karon ug makadahom ug hingpit nga seguridad sa umaabot. Ang salmista nag-ingon: “Si Jehova gibutang ko sa kanunay sa akong atubangan. Tungod kay ania siya sa akong tuong kamot, ako dili matarog. Busa nagamaya ang akong kasingkasing, ug ang akong himaya nakiling nga magmalipayon. Labot pa, ang akong unod magapuyo sa kasegurohan.”—Salmo 16:8, 9.

[Kahon/Hulagway sa panid 6]

Giasoy Didto sa Benin

Kining estoryaha giasoy na sa libolibo ka beses sa lainlaing bersiyon. Dili pa dugay, usa ka edarang taga-baryo sa Benin, Kasadpang Aprika, miasoy sa mosunod nga bersiyon ngadto sa pipila ka batan-on.

Usa ka mangingisda mipauli sakay sa iyang baroto ug gitagbo sa usa ka langyawng eksperto nga nag-alagad diha sa maong nagaugmad nga nasod. Ang eksperto nangutana kon nganong sayo kaayo siya nga mipauli. Siya mitubag nga puwede pa unta siyang magdugay apan duna na siyay igong nakuha nga ikatagana alang sa iyang pamilya.

“Unsa man diay imong gihimo sa imong panahon?” nangutana ang eksperto.

Ang mangingisda mitubag: “Aw, mangisda ko ug ginagmay. Makigdula ko sa akong mga anak. Mamahulay mi kon init ang panahon. Magabii, magdungan mi ug panihapon. Pagkahuman, makig-uban ko sa akong mga higala alang sa gamayng musika, ug uban pa.”

Ang eksperto misagbat: “Kabalo ka, graduwado ako sa unibersidad ug akong natun-an kining mga butanga. Gusto ko nga tabangan ka. Kinahanglan mas dugaydugay kang mangisda. Modako ang imong kita ug sa dili madugay makapalit ka ug mas dakong sakayan kay niining maong baroto. Kay mas dako ang sakayan, mas modako pa ang imong kita ug sa dili madugay makapundar ka na ug daghang sakayan nga igpamaling.”

“Unya?” ang mangingisda nangutana.

“Unya, imbes mobaligya ug isda pinaagig ahente, makanegosyo ka direkta sa pabrika o makasugod pa gani sa imong kaugalingong planta sa pagproseso ug isda. Makahawa ka na sa imong baryo ug makabalhin sa Cotonou, o Paris, o New York ug madumalahan ang negosyo samtang ikaw nagpuyo didto. Puwede pa gani nimong ibutang ang imong negosyo sa stock market ug mokitag minilyon.”

“Unsa ka dugay nga mahimo nako kanang tanan?” misukna ang mangingisda.

“Tingali 15 ngadto sa 20 ka tuig,” ang eksperto mitubag.

“Pagkahuman?” ang mangingisda padayong nangutana.

“Mao na kanay panahon nga nindot na ang kinabuhi,” mipatin-aw ang eksperto. “Dayon makaretiro ka na. Mabiyaan na nimo ang puliki nga kinabuhi sa siyudad ug mobalhin sa usa ka hilit nga baryo.”

“Ug unsay resulta?” nangutana ang mangingisda.

“Dayon ikaw duna nay panahong mangisda ug ginagmay, makigdula sa imong mga anak, mopahulay kon init ang panahon, manihapon uban sa imong pamilya, ug makig-uban sa imong mga higala alang sa gamayng musika.”

[Mga hulagway sa panid 7]

Ang promosyon mohatag ba ug seguridad?

[Mga hulagway sa panid 8]

Ang imong mga isigka-Kristohanon interesado gayod sa imong seguridad