Matuod nga Kasegurohan—Karon ug sa Walay Kataposan

WALAY duhaduha nga si Jehova nga Diyos makahatag ug kasegurohan alang sa iyang katawhan. Siya mao “ang Usa nga Labing Gamhanan.” (Salmo 68:14) Ang iyang talagsaong ngalan nagkahulogang “Siya ang Nagpahinabo.” Kini nagpaila kaniya ingong ang bugtong Usa sa uniberso nga makabuntog sa tanang babag aron matuman ang iyang mga saad ug matuman ang iyang kabubut-on. Ang Diyos mismo nag-ingon: “Sa ingon niini mao man ang akong pulong nga magagula gikan sa akong baba. Kini dili mobalik kanako nga walay kapuslanan, kondili nga kini magatuman gayod sa akong gikahimut-an, ug kini molampos gayod nga tungod niini kini akong gipadala.”​—Isaias 55:11.

Ang Diyos naghatag ug kasegurohan alang niadtong kinsa nagasalig kaniya. Ang iyang Pulong nagagarantiya niini. “Ang ngalan ni Jehova maoy usa ka malig-ong torre,” nag-ingon ang maalamong Haring Solomon ubos sa pagdasig sa Diyos. “Ngadto niana ang matarong modalagan ug hatagag panalipod.” Siya dugang miingon: “Siya nga nagasalig kang Jehova pagapanalipdan.”​—Proverbio 18:10; 29:25.

Kasegurohan Alang sa mga Alagad sa Diyos

Si Jehova kanunayng naghatag ug kasegurohan alang niadtong kinsa nagasalig kaniya. Pananglitan, ang manalagna nga si Jeremias nakatagamtam ug panalipod sa Diyos. Sa dihang gilikosan sa kasundalohan sa Babilonya ang apostatang Jerusalem, ang mga tawo napugos sa “pagkaon ug tinapay nga tinimbang ug sa dakong kabalaka.” (Ezekiel 4:16) Misamot ka lisod ang kahimtang nga gilat-an ug gikaon sa pipila ka babaye ang ilang kaugalingong mga anak. (Lamentaciones 2:20; 4:10) Bisag si Jeremias gidakop niadtong tungora tungod sa iyang maisogong pagsangyaw, gitino ni Jehova nga “adunay mohatag ug usa ka pirasong tinapay kaniya adlaw-adlaw gikan sa mga tiglutog tinapay sa dalan, hangtod mahurot ang tanang tinapay sa siyudad.”​—Jeremias 37:21.

Sa dihang napukan ang Jerusalem sa mga Babilonyanhon, si Jeremias wala patya ni gidala ingong usa ka binilanggo sa Babilonya. Hinunoa, “ang hepe sa mga guwardiya [Babilonyanhon] . . . naghatag kaniyag pagkaon ug gasa ug gipalakaw siya.”​—Jeremias 40:5.

Daghang siglo sa ulahi si Jesu-Kristo nagpasalig sa mga alagad sa Diyos: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay ang tanan niini mao ang mga butang nga maikagong ginapangagpas sa kanasoran. Kay nahibalo ang inyong langitnong Amahan nga gikinahanglan ninyo kining tanang butanga. Nan, padayong pangitaa nga una ang gingharian ug ang iyang pagkamatarong, ug kining tanang ubang mga butang idugang kaninyo.”​—Mateo 6:31-33.

Nagpasabot ba kini nga matagamtam sa mga alagad ni Jehova ang panalipod batok sa tanang presenteng-adlawng mga katalagman? Dili, dili mao kini ang ipasabot. Dili libre ang mga matinumanon sa kadaot. Ang matuod nga mga Kristohanon masakit, makasinatig paglutos, mabiktima sa krimen, mamatay sa mga aksidente, ug mag-antos sa ubang mga paagi.

Bisag wala pa ihatag ni Jehova ang bug-os nga kasegurohan gikan sa kadaot, ang mga taho nagpakita nga siya nagagamit sa iyang gahom sa pagtagana sa iyang mga alagad ug nagapanalipod kanila. Ang mga Kristohanon ginapanalipdan usab batok sa daghang problema tungod kay sila nagapadapat sa mga prinsipyo sa Bibliya sa ilang mga kinabuhi. (Proverbio 22:3) Dugang pa, ginatagamtam nila ang kasegurohan sa tibuok-yutang panag-ubanay sa mahigugmaong espirituwal nga mga igsoong lalaki ug babaye, kinsa nagtinabangay sa usag usa sa mga panahon sa panginahanglan. (Juan 13:34, 35; Roma 8:28) Pananglitan, agig pagsanong sa malisod nga kahimtang sa ilang mga igsoon sa nagusbat-sa-gubat nga Rwanda, ang mga Saksi ni Jehova sa Uropa midonar dayon ug nagpadala kanilag 65 ka toniladang bisti ug $1,600,000 nga kantidad sa medisina, pagkaon, ug ubang mga abiyo.​—Itandi ang Buhat 11:28, 29.

Bisag gitugotan ni Jehova nga agomon sa matuod nga mga Kristohanon ang mga pagsulay, sila adunay pasalig nga siya mohatag kanilag kalig-on, tabang, ug kaalam sa paglahutay. Nagsulat sa mga isigkamagtutuo, si apostol Pablo miingon: “Walay tentasyon [pagsulay] nga miabot kaninyo kondili kadto rang sagad diha sa mga tawo. Apan ang Diyos matinumanon, ug dili niya itugot nga pagatentalon [sulayon] kamo labaw sa inyong maantos, apan uban sa tentasyon [pagsulay] siya usab magtagana kaninyo ug lutsanan sa paglikay aron kamo makaagwanta niini.”​—1 Corinto 10:13; The Emphatic Diaglott.

Kon Unsay Ginahimo sa Diyos sa Iyang Katawhan

Karon, minilyon sa katawhan malipay sa pagbuhat sa kabubut-on sa Diyos. Sila wala pugsa sa pag-alagad sa Diyos; sila nag-alagad tungod kay sila nakaila ug nahigugma kaniya. Sa baylo, tungod kay gihigugma ni Jehova ang iyang maunongong mga alagad, maoy iyang katuyoan nga himoon kining yutaa nga usa ka paraiso diin tagamtamon sa mga tawong masinugtanon ang kalinaw, maayong panglawas, ug kasegurohan sa walay kataposan.​—Lucas 23:43.

Himoon kini sa Diyos pinaagi sa usa ka langitnong kagamhanan, nga may iyang tinudlong Hari, si Jesu-Kristo, ingong Magmamando niini. (Daniel 7:13, 14) Ang Bibliya naghisgot niini nga kagamhanan ingong ang “gingharian sa Diyos” ug ingong “ang gingharian sa mga langit.” (1 Corinto 15:50; Mateo 13:44) Pulihan sa Gingharian sa Diyos ang tanang tawhanong mga kagamhanan. Imbes kay adunay daghang kagamhanan sa yuta, adunay usa lamang ka kagamhanan. Kini magmando sa pagkamatarong sa ibabaw sa tibuok yuta.​—Salmo 72:7, 8; Daniel 2:44.

Ginapaabot ni Jehova ngadto sa tanan ang imbitasyon sa pagpuyo ubos sa Gingharian. Usa ka paagi nga iyang ginahimo kini maoy pinaagi sa kaylap nga pag-apod-apod sa Bibliya, ang basahon nga nagpatin-aw kon unsay himoon sa Gingharian alang sa katawhan. Ang Bibliya mao ang labing kaylap nga pagkaapod-apod nga basahon sa kalibotan, ug kini mabatonan na karon, sa tibuok o sa bahin, sa kapin sa 2,000 ka pinulongan.

Si Jehova nga Diyos mahigugmaong nagtabang sa mga tawo nga makasabot kon unsay ginatudlo sa Bibliya bahin sa Gingharian. Iyang gihimo kini pinaagi sa pagtudlo ug pagpadalag mga tawo sa pagpatin-aw sa Kasulatan ngadto sa uban. Kapin sa lima ka milyong Saksi ni Jehova karon ang nagamantala sa maayong balita sa Gingharian sa Diyos sa kapin sa 230 ka kayutaan.

Matuod nga Kasegurohan Alang sa Tanan?

Modawat ba ang tanan sa imbitasyon nga mahimong sakop sa Gingharian sa Diyos pinaagi sa pagsunod sa iyang matarong nga mga sukdanan? Dili, tungod kay daghang tawo ang walay interes sa pagtuman sa kabubut-on sa Diyos. Gisalikway nila ang mga paningkamot sa pagtabang kanila sa pag-usab sa ilang mga kinabuhi alang sa ikaayo. Sa pagkatinuod, sila mismo nagpakita sa ilang kaugalingon nga sama niadtong kinsa bahin kanila si Jesus miingon: “Ang kasingkasing niini nga katawhan nahimong dili-madinawaton, ug pinaagi sa ilang mga dalunggan sila nakadungog nga walay pagsanong, ug ilang gipiyong ang ilang mga mata; aron dili gayod sila makakita pinaagi sa ilang mga mata ug makapaminaw pinaagi sa ilang mga dalunggan ug makasabot sa diwa niini pinaagi sa ilang mga kasingkasing ug makapamalik, ug ayohon [sa Diyos] sila.”​—Mateo 13:15.

Sa unsang paagi mabatonan ang matuod nga kasegurohan sa yuta taliwala niadtong kinsa nagadumili sa pagkinabuhi sumala sa matarong nga mga dalan sa Diyos? Dili gayod kana mahimo. Ginahulga sa mga tawong walay Diyos ang kasegurohan niadtong kinsa buot nga moalagad kang Jehova.

Ang Diyos dili mamugos sa mga tawo sa pag-usab, apan dili usab siya motugot nga ipalabay ang pagkadaotan sa walay kataposan. Bisag mapailobong nagpadayon si Jehova sa pagpadala sa iyang mga Saksi aron matudloan ang mga tawo bahin sa iyang mga dalan ug mga katuyoan, dili siya mopadayon sa pagbuhat niana hangtod sa hangtod. Si Jesu-Kristo nagtagna: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.”​—Mateo 24:14.

Unsay kahulogan sa “kataposan” alang niadtong mosalikway sa mga sukdanan sa Diyos? Kini nagkahulogan sa ilang grabeng silot ug kalaglagan. Ang Bibliya naghisgot bahin sa pagpahamtang sa “panimalos kanilang wala makaila sa Diyos ug kanilang wala mosunod sa maayong balita bahin sa atong Ginoong Jesus. Kini sila mismo makaagom sa hudisyal nga silot sa kalaglagang walay-kataposan.”​—2 Tesalonica 1:6-9.

Sa Kataposan​—Matuod nga Kasegurohan sa Walay Kataposan!

Human malaglag kadtong mosalikway sa mga dalan ni Jehova sa kalinaw, ang Gingharian sa Diyos mopadangat ug usa ka mahimayaong panahon sa kasegurohan alang sa kaayohan sa mga matarong sa yuta. (Salmo 37:10, 11) Pagkalahi niana nga bag-ong kalibotan sa kalibotan nga atong ginapuy-an karon!​—2 Pedro 3:13.

Ang kanihit sa pagkaon ug kagutmanan mawala na. Ang tanan adunay daghang makaon. Ang Bibliya nag-ingon nga ‘ang tanang katawhan makapahimulos sa usa ka kombira sa lamiang mga pagkaon.’ (Isaias 25:6) Wala na unyay kakulang sa pagkaon, kay “aduna unyay daghang lugas sa yuta; sa ibabaw sa kabukiran adunay pag-awas.”​—Salmo 72:16.

Ang mga tawo dili na magpuyo sa mga balongbalong ug sa mga eskuwater. Ubos sa Gingharian sa Diyos, ang tanan adunay maayong mga balay, ug sila magakaon ug pagkaon nga abot sa ilang kaugalingong yuta. Ang Bibliya nagasaad: “Sila magatukod ug mga balay ug magapuyo niana; ug sila magatanom ug kaparasan ug magakaon sa bunga niini.”​—Isaias 65:21.

Imbes kaylap nga kawalay trabaho, aduna unyay mabungahong trabaho, ug ang mga tawo makakita ug maayong mga resulta gikan niana. Ang Pulong sa Diyos nag-ingon: “Ang akong mga pinili magapahimulos pag-ayo sa buhat sa ilang mga kamot. Sila dili magabuhat nga walay kapuslanan.”​—Isaias 65:22, 23.

Ubos sa pagmando sa Gingharian, ang mga tawo dili mag-antos ug mamatay sa sakit. Ang Pulong sa Diyos nagapasalig kanato: “Walay molupyo ang moingon: ‘Ako masakiton.’”​—Isaias 33:24.

Sa yutan-ong Paraiso nga sa dili madugay mahimong usa ka kamatuoran, ang pag-antos ug kasakit, ang kasubo ug kamatayon, mawagtang na. Oo, bisan ang kamatayon! Ang katawhan mabuhing walay kataposan sa Paraiso! Ang Bibliya nag-ingon kanato nga “pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”​—Pinadayag 21:4.

Ubos sa pagmando ni Jesu-Kristo, ang “Prinsipe sa Pakigdait,” ang kinabuhi sa yuta sa kataposan mahimong tinuod nga may kasegurohan. Sa pagkatinuod, ang tibuok yutang kasegurohan maglungtad ubos sa matarong, mahigugmaong pagmando sa usa ka kagamhanan​—ang Gingharian sa Diyos.​—Isaias 9:6, 7; Pinadayag 7:9, 17.

[Blurb sa panid 4]

“Ang tawhanong kasegurohan nagpakitag pagsalig sa umaabot, . . . [pagtuo sa] kalig-on sa politikanhon ug sa ekonomikanhong kahimtang.”—Usa ka babaye nga nagpuyo sa Asia

[Blurb sa panid 5]

“Ang mopabati kanimo nga walay kasegurohan labaw sa tanan mao ang kapintasan ug delingkuwensiya.”—Usa ka tawo nga nagpuyo sa Amerika del Sur

[Blurb sa panid 6]

“Wala ko mobati nga may kasegurohan panahon sa . . . pag-asdang. Kon ang usa ka nasod nakiggubat, sa unsang paagi bation sa mga tawo ang kasegurohan?”—Usa estudyante sa tunghaang primarya sa Tungang Sidlakan

[Blurb sa panid 7]

“Bation ko ang kasegurohan kon mahibalo ako nga ako makalakaw sa mga dalan sa gabii nga dili malugos.”—Usa ka batang babaye nga nagtungha sa Aprika