Unsang Matang sa Kasegurohan ang Imong Gipangandoy?
LAINLAING mga tawo adunay lainlaing mga ideya bahin sa kasegurohan. Ang pipila nag-isip niini ingong pagkalig-on tali sa magkaatbang nga mga gahom militar. Pananglitan, ang mga gahom nga labing kusganon sa kalibotan uban sa ilang Uropanhong mga alyado nagkauyon bahin sa daghang mga lakang aron makunhoran ang riyesgo nga ang gagmayng mga panghitabo basin modako nga mahimong tibuok-kalibotang nukleyar nga gubat. Ang Stockholm International Peace Research Institute Yearbook 1990 nagpahayag ug katingala mahitungod sa kakulang ug interes diha sa maong mga lakang sa mga nasod “diha sa ubang mga bahin sa kalibotan.”
Ugaling, alang sa minilyon nga nagpuyo diha sa kabos nga kanasoran, ang “kasegurohan” nagkahulogan sa pagkaon ug pag-atiman sa panglawas. “Kon mahitungod sa pagpalandong sa ‘kalinaw ug kasegurohan,’” patin-aw sa politikal nga siyentipiko si Yash Tandon, “ang linangkob gituohang mga ideya sa dominanteng Kasadpanhong kultura modaog. . . . Ang ‘kasegurohan’ gisabot ingong may kalabotan sa armas ug pagkunhod sa armas, nga nahilain sa mga gikabalak-ang kasegurohan sa walay-pagkaon ug walay-balay sa dos-tersiya sa populasyon sa kalibotan.”
Mahitungod sa Bibliya, kini nagasaad nga ubos sa Gingharian sa Diyos wala na unyay gubat. “Siya nagapahunong sa mga gubat hangtod sa kinatumyan sa yuta. Gibali niya ang pana ug gibunggo ang bangkaw; sa kalayo gisunog niya ang mga karro.” (Salmo 46:9; Isaias 2:4) Ang sakit sa lawas mahimong usa ka butang sa kagahapon. “Walay molupyo ang magaingon: ‘Ako masakiton.’ Ang mga tawo nga nagapuyo sa yuta mao kadtong gipasaylo na sa ilang kasal-anan.”—Isaias 33:24.
Ubos sa maong Gingharian, ang ekonomikanhong kasegurohan dili na mohulga kang bisan kinsa. “Sila magatukod ug mga balay ug magapuyo niana; ug sila magatanom ug kaparrasan ug magakaon sa ilang mga bunga. Sila dili magatukod ug unya lain ang magapuyo; sila dili magatanom ug unya lain ang magakaon.”—Isaias 65:21, 22.
Hinuon, labi pang hinungdanon, wagtangon sa Gingharian ang pangunang hinungdan sa kakulang sa kalinaw ug kasegurohan. Kinsa ba ang nagpaluyo sa hataas nga kasaysayan sa dili-malamposon ug malupigong mga gobyerno sa tawo? Bisan tuod ang Diyos, tungod sa maayong katarongan, nagtugot nila sa paglungtad, ang usa nga kinahanglang manubag mao si Satanas, sanglit ang Bibliya nagaingon nga ‘ang tibuok nga kalibotan nahiluna sa iyang gahom.’—1 Juan 5:19.
Nan, dakong kahupayan, sa dihang ubos sa Gingharian sa Diyos, ang mga pulong ni Pablo ngadto sa mga taga-Roma sa kataposan matuman: “Sa iyang bahin, ang Diyos nga nagahatag kalinaw magadugmok kang Satanas sa ilalom sa imong mga tiil sa dili na madugay”! (Roma 16:20) Ang langitnong Gingharian sa Diyos lamang, ubos sa Haring si Jesu-Kristo, ang makahimo sa maong butang. Busa, ubos lamang sa maong Gingharian nga ang yuta mabalhin nga usa ka paraiso.—Genesis 1:28; Lucas 23:43.
Oo, ang kasegurohan nga gisaad diha sa Bibliya labi pang maayo ug labi pang layog-abot kay sa bisan unsa nga gimugna sa tawo. Aw, atong mabasa nga “ang kamatayon mawala na, ni may pagbalata ni paghilak ni kasakit pa”! (Pinadayag 21:4) Makasalig ba kita sa maong mga saad? Oo, kay kana sila nagagikan sa labing gamhanang Maglalalang, si Jehova nga Diyos, kinsa nagapahayag usab: “Ang akong pulong nga mogula gikan sa akong baba . . . dili mobalik kanako nga walay sangpotanan, apan kini magabuhat gayod sa butang nga akong gikahimut-an, ug kini magbaton ug kalamposan nga alang niana kini akong gipadala.” (Isaias 55:11) Ang tinong kalamposan nagatimaan sa mga tikang nga ginahimo ni Jehova nga Diyos bisan karon aron ipatungha alang sa katawhan ang malungtaron ug makapalipay nga kalinaw, kasegurohan, ug kadagaya diha sa kabayawan sa Iyang walay-kataposang pagkasoberano.